Aramwa 8–12

Tamnei

te kanikina ibukin te tieminari

Aramwa 8

Au kekeiaki n tibwaa ana euangkerio Iesu Kristo e kainnanoa te taotaona n nano.

Ko a tia ni kataia n tibwa ana euangkerio Iesu Kristo.ma tabeman, ma am kakao e aki butimwaeaki? Aramwa e rinanon naba anne. Tera ae ko reiakinna n Aramwa 8:13–16 n aron tibwauaan te euangkerio n aki ongei taian kakawenako ao kakaaitara? Reitanako te wareware ni kiibu 17–32, ao tarai mwakoro n taeka ake a kaunga nanom n teimatoa n tibwa te euangkerio, e ngae ngke e taraa n akea te rikirake.

Burabeti ao abotoro bon taan kakoaua iroun Kristo, ngaia are e korakora aia taeka n reirei aika a kairaki iroun te tamnei n tibwaaki iaon kakoauaan Kristo. Nora te bwai are e taekinna Unimwaane Dieter F. Uchtdorf “Ma Ngkana Arona bwa e Rangi ni Kangaanga?” (te mwakoro inanon “Mwakuri ni Mitinare: Tibwa te Bwai are i Nanom,” Riaona, Meei 2019, 18) ke are e tibwaia Unimwaane Gary E. Stevenson inanon “Tangira, Tibwatibwa, Kakao,” (Riaona, Meei 2022, 84–87). Tera ae ko kunea ikanne are e kona ni buoka temanna ae e a moanna n namakina te bwaranano iaon tibwaan te euangkerio?

Ko na kanga ni kakimototoi baike ko kamatebwaii ikai n ti teuana ke uoua taeka ni kaunganano iaon tibwaan te euangkerio? Iangoia ni karaoa te boutita ke te tamnei ke te koroboki are e kona ni kaungako (ao tabeman) n teimatoa ni kataia.

Taraa naba “Help Me Teach with Inspiration,” Anene n Taromauri, nambwa 281; “Alma Is Commanded by an Angel to Return to Ammonihah” (witeo), Gospel Library; Gospel Topics, “Inviting All to Receive the Gospel of Jesus Christ,” Gospel Library.

Ngkana ko wareka rongorongoia Nibwaite i Amonia ngke aki butimwaeia ana toro te Uea, e bon bebete aki atakina ae bon ngaiia ngkoa aomata ake a maiuakina te euangkerio ao e “korakora tangirakiia iroun te Uea” (Aramwa 9:20). Ngkai ko wareki taekan kakabwaia aika korakora are e anga te Atua nakoia ana botannaomata Nibwaai (taraa riki Aramwa 9:14–23) iangoai raoi kakabwaia are E a tia n anganiko. Tera taian mwioko aika a roko man kakabwaia aikai? Tera ae kona karaoia n tiku n teimatoa nakon mwioko aikai?

Taraa naba Reirei ao Berita aika Tabu 50:24; 82:3; 93:39.

N Aramwa 11–12, Aramwa ao Amureki taekina ana babaire te Atua bwa te babaire ibukin kaboan maiura. Ngkai ko wareki mwakoro aikai, iangoia raoi bwa bukin tera te taeka kaboan maiura e kabonganaaki ni kabwarabwaraa ana babaire te Atua. Iangoia ni korea kakimototoan te bwai are Aramwa ao Amureki a reirei iaona n aron nako te babaire:

• Te Bwaka

• Te Tia Kabooa Maiura

• Rairannano

• Te Mate

• Te Mangauti

• Motikitaeka

Nora mwiin ana taeka Amureki iaoia aomata (taraa Aramwa 11:46). E kanga atakin Ana babaire te Atua ni iai mwiina iaom?

Taraa naba Dallin H. Oaks, “Te Baire ae Korakora,” Riaona, Meei 2020, 93–96; “Amulek Testifies of Jesus Christ” (witeo), Gospel Library.

Tabeman aomata a na miimi bwa bukin tera Tamara are i Karawa e aki kaotii bwaai ni kabane nakoira bwa ti na ataia. N Aramwa 12:9–14, Aramwa e kabwarabwara teuana bukina ae riai. Titiraki aikai a kona ni buokiko n iangoia raoi bwa tera ae e reireia:

• Tera ae nanonaki ni kamatoa nanom? Tera mwiina ae e na reke n te nao ae matoa? (taraa naba Aramwa 8:9–11; 9:5, 30–31; a0 10:6, 25).

• Tera ae ko kona ni karaoai ni bita nanom nakon te Atua? (taraa Ieremia 24:7; Aramwa 16:16; Ereman 3:35).

• Tera ae ko kona ni karaoia n ataia raoi bwa ana taeka te Atua e bon “kuneaki i[roum]”? (Aramwa 12:13). Ngkana iai ana taeka te Atua iroum, tera mwiina ae reke nakon am “taeka,” “mwakuri,” ao “iango”? (Aramwa 12:14).

Tera ae e reiakiniko ana taneiai Amureki iaon te kakabwaia ni karekean te nano ae tauraoi? (taraa Aramwa 10:1–11).

Taraa naba “Alma Warns Zeezrom” (witeo), Gospel Library.

• N te iteraniba n te waaki ni kakukurei n te wiiki aei e kona ni buokiko ni kakimototoa taekan te bwai ae riki n Aramwa 8–10 ibukiia natim. Ko na bae n tangiria ni buokiia ni kakaai tuua ake e karikiia Aramwa ao Amureki bwa mitinare aika tamaroa. Te katooto, a aki bwara nanoia (taraa Alma 8:8–13), a taekina kakoauaan Kristo (taraa Alma 9:26–27), ao a reitaki ni mwakuri (taraa Aramwa 10:12).

• Te kuna iaon te mwakuri ni mitinare, n aron “I Want to Be a Missionary Now” (Aia Boki n Anene Ataei, 168), e kona n anganiia natim iango n taian kawai n tibwaan te euangkerio ma raraoia. Kaoiia bwa a na koroi bwaai aika a kunei ao aomata ake a kona n tibwa te euangkerio ma ngaiia. Ko kona naba ni kariaia bwa a na karaoa te kaotioti bwa tera ae a na taekinna ke ni karaoia.

• Tao a kona natim ni korea te tmnei are e tei ibukin taian reirei iaon te babaire ni kabomwi, n aron Bwakan Atam ao Ewa, Ana Mwakuri ni Kamaiu Iesu Kristo, te rairannano, te mate, te mangauti, ao te motiki taeka. Imwiina ko kona ni buokiia ni kakatiteboa te tamnei ma te kibu n Aramwa 11–12 ake a reiakinaki n taian tua aikai.

• Ko kona ni kaoa temanna te ataei bwa aongkoa ngaia Amureki ao temanna e na riki bwa Aramwa ngkai ko karakina te karaki n Aramwa 8:18–22. E kanga n riki Amureki bwa raoraon Aramwa? Imwiina natim a kona n tibwaia bwa e kanga temanna n reke bwa raraoia ao e kanga te taneiai anne n anganiia te namakin.

• Tao ko kona ni karaoa te kamwaninga ni iraorao: kakaea ke korea te tamnei ae e tei ibukin te iraorao ao koreia ni karika te kamwaninga ae tomatomaaki. Itinanikun te tamnei are ko korokoreia, korei tabeua bwaai ake ti kona ni karaoi n riki bwa rao aika tamaroa, ni ikotaki ma bwaai ake a karaoi Aramwa ao Amureki. A kona natim ni ikaruoruo n anai mwakorokoro n tamnei ni katomai nakon te tamnei ngkai ko wareka are e koreaki mai aana. Antai ae e kainnanoa ara ibuobuoki?

Tamnei

a ngarengare uoman ataeinnaine

• Iangoa te reirei ni kabongana te bwai ae nooraki n aron aei n reirei iaon te Mangauti: baim e kona n onea mwiin tamneim, ao nangoan te bai e tei n onea mwiin rabwatam. Buuta baim mai inanon nangoan te bai ni kaotia nakoia natim bwa tamneira ao rabwatara a na maenako n tain te mate. Ngkanne manga karina baim inanon nangoan te bai ni kaotia bwa tamneira ao rabwatara a na manga bootaki n tain te Mangauti. Kariaia natim bwa a na reke aia tai temanna imwin temanna ni karina baia inanon nangoan te bai ao ni manga butia ngkai ko wareka Aramwa 11:43 nakoia. Kaota tamnein te Tia Kamaiu ae Mangauti (taraa Te Boki n Tamnei n te Euangkerio, nambwa 59), ao taekina koauana bwa Iesu Kristo e karikia bwa a na kona ni manga bane ni mangauti aomata nako.