N aro aika a bati, e rang tamaroa maiuia Amureki ao Teeterom i Amonia. Amureki bon “te aomata ae rang kinaaki,” ao “a mwaiti ana koraki ao raoraona” ao “e kaubwai” (Aramwa 10:4). Teeterom bon te rooia ae bane arona ae rang ni kukurei n ana “mwakuri ae mwaiti” (Aramwa 10:31). Ngkanne e roko Aramwa i Amonia n te kakao mai karawa bwa e na raira nanona ao “n rin n ana rau te Uea” (Aramwa 13:16). Iroun Amureki, Teeterom, ao tabeman riki, butimwaean te kakao aei e kainnanoa te anganano ao riki te kaitara ae a kuri n aki kona.
Ma eng e aki moti ikanne te karaki. N Aramwa 13–16, ti reiakin bwaai ake a riki n tokin te tai nakoia ake a kakoauaa “mwaakan Kristo nakon te kamaiuaki” (Aramwa 15:6). N tabetai iai te kamaiuaki, n tabetai te kamarurungaki—ao n tabetai e aki rikirake ni bebete bwaai n te maiu. Ma n tainako, “te Uea e butimwaia [Ana botanaomata] nakoina, ma te mimitong” (Aramwa 14:11). N tainako, te Uea e anga “te mwaaka, n aron [ara] onimaki … are iroun Kristo” (Aramwa 14:28). Ao n taainako, te onimaki anne e anganiira “te kantaninga bwa [ti] na karekea te maiu ae akea tokina” (Aramwa 13:29). Ngkai ko wareki mwakoro aikai, ko kona n nanoraoi ni berita aikai, ao ko kona ni matata riki n te bwai are e nanonna Aramwa ngke e taekina n rin n “ana rau te Uea.”(Aramwa 13:16).
Iango ibukin Reiakinana n te Mweenga ao n te Taromauri
Otenanti n te Nakoanibonga a buokai n taraa Iesu Kristo ibukin kabooan maiu.
Ana taeka Aramwa n Aramwa 13 e kaoti koaua aika mwaaka ibukin mwaakan ana nakoanibonga te Atua ao bukina—bwa e na katauraoira bwa ti na rin n “ana rau te Uea,” ke te maiu ae akea tokina (Aramwa 13:16). Tao ko kona ni korea teuana naba te koaua ibukin te kibu n tatabeua nako n Aramwa 13:1–19. Aikai tabeua iango bwa ko aonga ni waaki:
Kibu 2.Te Atua e katabuia ibonga bwa a na buokiia aomata n taraa Natina ibukin kamaiuakiia.
Tera riki ae ko kunea? Tera ae ko namakinna ibukin te nakoanibonga ngkai ko iangoi koaua aikai?
Ko a tia n iangoi otenanti n te nakoanibonga bwa kanga bwaintituaraoi mairoun te Atua ae na buokiko ni “kariaria Natina ibukin te kaboaki”? (kibu 2; taraa naba kibu 16). Tao ko kona ni koroi ni karinani otenanti aika ko a tia ni karekei, n aron te bwabetito, te kamatoa, te toa, te kamatoa ibukin te nakoa, te kakabwaia ibukin karekean te rau ke te kamaiu, ana kakabwaia te tamanuea, ao otenanti n te tembora. Iangoi am atatai ma otenanti n aron aikai. Iangoa te kanikina ae irekereke ao te Tamnei ae ko namakinna. A kanga otenanti aikai n tatabeua nako ni uotiko nakon Iesu Kristo ibukin kaboan maium?
Tabeman aomata a kairua n aia koaua ae otenanti—ao te kariaia n te nakoanibonga ni karaoi—aki kainnanoaki. Ko na kanga ni kaeka nakon te iango anne? Aikai uoua rongorongo man te maungatabu ni kabuta ake a kona ni buoka am iango; n rinea teuana, ao koroi kaeka ake a roko n am iango: Russell M. Nelson, “Spiritual Treasures,” Riaona, Nobembwa 2019, 76–79; Dale G. Renlund, “The Priesthood and the Savior’s Atoning Power,” Riaona, Nobembwa 2017, 64–67.
Te kakao n “rin inanon ana rau te Uea” (Aramwa 13:16) e kaokiokaki n tainako inanon Aramwa 13. Tao ko kona n tarai kiibu ni kabane are e oti iai te taeka “te rau” ao iangoia bwa tera ae a reireiniko kiibu aikai n nanon “ana rau te Uea”. E kanga ni kaokoro ma te rau n rabwata? Ti na kanga ni karekea?
Kona bae ni kan ataia, n aroia aika a mwaiti, bukin tera a riki bwaai aika kakamaku nakoia aomata aika a kataia ni maiuakina te raoiroi. Ko kona n aki kona ni kunei kaeka ni kabane nakon te titiraki ae kangaanga aei n Aramwa 14, ma a mwaiti bwaai aika ko kona n reiakin man aroia Aramwa ao Amureki aika a na ibuobuoki nakon te kabuanibwai. Tera bukina ae ko reiakinna man aia taeka ao aia mwakuri ngkai te Uea n tabetai e kariaia aomata aika a raraoi bwa a na rinanon te korakai? Tera ibuobuoki aika a kona Aramwa ao Amureki n anganiira ngkana ti kaitara ma kataaki aika kangaanga?
Tatauraoi n tainako. Taai n reireiaki a tauraoi n te tai ae uarereke, ngaia are kabonganai raoi ngkana a roko. Te kabuanibwai n te aonaaba, te katooto, e kona iai n reke tain tibwauakin te reirei man, Aramwa 14 iaon tera bukina bwa te Uea e kariaia naake akea aia bure bwa a na rootaki n tabetai.
E bae ni kakaongora karaoan rinanin bwaai ake e katikui Amureki ibukin kamoamoaan te euangkerio (taraa Aramwa 10:4–5; 15:16) ao kabotaua ma rinanin bwaai ake e karekei (taraa Aramwa 15:18; 16:13–15; 34:8). Tera ae ko tauraoi n anganano iai n riki bwa ana reirei Iesu Kristo ae kakaonimaki riki?
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
E buokai mwaakan te Nakoanibonga ni kaaniai riki ma Kristo.
Teuana te kawai ae na buokiia natim n nooria bwa e kanga mwaakan te nakoanibonga ni uotiira nakon Kristo bon man kaotakin tamnei nakoia n aron kabonganakin mwaakan te nakoanibonga (taraa Gospel Art Book, nambwa. 103–110). A kona natim ni buokiko n iangoi kawai ae kabonganaa iai mwaakana Iesu (taraa, ibukin te katooto, Mataio 26:26–28; Mareko 5:22–24, 35–43; Gospel Art Book, nambwa. 38–41). Ngkanne kam kona ni bootaki ni wareka Aramwa 13:2 ao ni maroroakinna bwa e kanga mwaakan te nakoanibonga ni buokiira “ni kaingaingaira nakon Natin te [Atua]” ao n riki n Arona.
Bukin tera te Atua e anganiira otenanti n te nakoanibonga? Buokiia am ataei ni kakaea te reke inanon Aramwa 13:16. Ngkana ko kainnanoa buokam n ataia bwa tera te otenanti, iai aika koreaki inanon te Aeniboki ni Kabuta, 18.1 ao 18.2. Tao ko kona ngkoe ao natim ni maroroakina am taneiai ni karekean otenanti aikai. E kanga ni buokiira “ni kariaria [Iesu Kristo] ibukin kamaunaan [ara] bure”? Te anene n aron “When I Am Baptized” (Aia Boki n Anene Ataei, 103) e kona ni buokiia am ataei n iangoi bukina riki tabeua ni kakaitau ibukin otenanti n te nakoanibonga.
Imwiin warekan kiibu aikai ni bootaki, iangoi kawai aika a na kona am ataei ni kamatenanoi bwaai ake a anga reirei iaona. Tao kam kona ni bootaki ni kaitiaka te bwai teuana. Tera aron ara namakin ngkana ti barekareka? Tera aron ara namakin ngkana ti a manga itiaki? Aekakira aron namakin aikai ni kabotauaki ma are ti namakinna ngkana ti bure ao imwiina ti rairinanora ao ni manga itiaki rinanon Ana Mwakuri ni Kamaiu te Tia Kamaiu?
Tamau are i Karawa e kakorakoraai ngkai iai au onimaki iroun Iesu Kristo.
Te iteraniba n te waaki ni kakukurei n te wiiki aei e kona n buokiko—ke am ataei—ni karakina te karaki inanon Aramwa 14:18–29 (tara naba “Mwakoro 22: Alma’s Mission to Ammonihah,” Karaki man Ana Boki Moomon, 58–63). Kabwarabwaraa bwa a anganaki te korakora Aramwa ma Amureki ibukin aia “onimaki are e [mena] iroun Kristo” (Aramwa 14:26). Ko kona naba n taekina te tai are e anganiko iai te korakora te Atua “ni kaineti ma [am] onimaki.” Ti na kanga n rangi n onimaki n aron Aramwa ao Amureki?
Bitakin nanon Teeterom rinanon Iesu Kristo e bon nako mairoun te tamnei. Iangoia ni manga rinanona ma am ataei te bwai are a reiakinna n te wiiki ae nako iaon Teeterom. A kona n ikotaki ni wareka Aramwa 15:3–12 ni kakaea bwa e kanga ni bitaki. Tera ae ti reiakinna man ana taneiai Teeterom iaon taekan mwaakan te Uea? (taraa “Zeezrom Is Healed and Baptized” [witeo], Gospel Library).
Ibukin iango riki tabeua, taraa te beeba ni kaongora n te namwakaina aio n te Rao maekatiin.
