Ang Himpit nga Dulot sang Anak

Samtang nagabasa ako sang Libro ni Mormon para sa leksyon sang Dali, Magsunod sa Akon sang nagligad nga tig-ilinit, nakibot gid ako sang ginsugid ni Alma nga sang lubos niya nga namarasmasan ang iya mga kasal-anan, “wala na sing tuman pa kahimpit kag tuman pa kapait sangsa [iya] mga kasakit.” ¹ Ginaako ko, ang pamulongpulong sang himpit nga kasakit nagpangibabaw sa akon tungod sang akon pagpakig-away sina nga semana sa pito-ka-milimetro nga bato sa kidney. Wala pa gid sang tawo nga nakaeksperiyensya sang pareho [ka] “dalagko nga mga butang” kon ang “diutay kag yano” nga bagay “ginpahanabo” ²

Ang lenggwahe ni Alma nagkuha man sang akon interes tungod ang tinaga nga himpit, sa Ingles nga paglubad sang Libro ni Mormon, kinaandan nga nagalaragway sang mga butang nga wala sing tupong ang katahum ukon indi maparisan nga kahalangdon. Halimbawa, natandaan ni Joseph Smith nga si anghel Moroni nagsuksok sang panapton nga “sobra ang kaputi,” “ang kaputi nga labaw pa sangsa bisan ano nga dutan-on kaputi nga [iya] nakita.” ³ Apang ang himpit mahimo man magpahangop sang tuman nga kabaskog bisan pa sa malaw-ay nga mga butang. Gani si Alma kag ang nagapanguna nga mga diksyunaryo nagaangot sang himpit nga kasakit sa “ginpaantos,” “ginsakit,” kag “gintublag” sa “tuman nga kadakuon.” ⁴

Ang paglaragway ni Alma nagapakita sang masubo nga realidad nga sa isa ka punto ang lubos, tuman kasakit nga pagkakonsiyensya sa tagsa ka sala nga aton nahimo kinahanglan mabatyagan. Ginapangayo ini sang hustisya, kag ang Dios mismo indi makaguba sini. ⁵ Sang madumduman ni Alma ang “tanan” niya nga sala—ilabi na yadtong mga nagguba sang pagtuo sang iban—ang iya kasakit daw halos indi masarangan, kag ang ideya nga magtindog sa atubang sang Dios nagpuno sa iya sang “indi mapaathag nga kakugmat.” Naghandum sia kuntani nga “maalimunaw alangay sa kalag kag lawas.” ⁶

Apang, si Alma nagsiling nga ang tanan nagsugod sa pagbag-o sa tion nga “matutukan sang [iya] kaisipan” ang ginpropesiya nga “pagkari sang isa ka Jesucristo … sa pagbayad sang mga sala sang kalibutan” kag sia “nagtuaw sa sulod sang [iya] tagipusuon: O Jesus, ikaw nga anak sang Dios, kaluoyi ako.” Sa sina nga panghunahuna kag solo nga pagpakitluoy, si Alma napuno sang “himpit” nga kalipay nga subong “kadako sang [iya] kasakit.” ⁷

Indi gid naton pagkalimtan nga ang pinakatinutuyo sang paghinulsol amo ang pagbatyag sang kasubo kag baylohan ini sang tunay nga kalipay. Salamat sa Iya “gilayon nga kaayo,” ⁸ sa tion nga kita magpalapit kay Cristo—nga nagapakita sang pagtuo sa Iya kag sang matuodtuod nga pagbag-o sang tagipusuon—ang makapausmod nga kabug-at sang aton mga sala nagasugod sa pagsaylo halin sa aton mga abaga pakadto sa Iya. Nangin posible lang ini tungod Sia nga wala sing sala nag-antos sang “wala katapusan kag indi-malaragway nga kasakit” ⁹ sang tagsa ka sala sa uniberso sang Iya mga tinuga, para sa tanan Niya nga tinuga—sa tuman nga kasakit, ang dugo naggwa sa tagsa ka buho sang Iya panit. Gikan sa direkta, nga personal nga inagihan ang Manluluwas nagapaandam sa aton, sa moderno nga balaan nga kasulatan, nga wala kita sing ideya kon daw ano ka “himpit” ang aton mangin “mga pag-antos” kon indi kita maghinulsol. Apang sa indi matungkad nga pagkamaluluy-on nagpaathag man Sia nga “Ako nga Dios, nag-antos sining mga butang para sa tanan, agud nga indi sila mag-antos kon maghinulsol sila” ¹⁰ —paghinulsol nga nagatugot sa aton sa “pagtam-id” sang “tuman nga kalipay” nga natilawan ni Alma. ¹¹ Sa sining doktrina lamang, “Ako nahalawhaw gid.” ¹² Apang, makatilingala gid, nagatanyag si Cristo sang masobra pa.

Kon kaisa ang himpit nga mga kasakit wala nagahalin sa sala apang sa mga bunayag nga mga kasaypanan, sa mga akto sang iban ukon mga puwersa nga indi naton mapunggan. Sa sining mga tinion, mahimo nga maghibi kamo kasubong sang matarong nga Salmista:

“Ang akon tagipusuon masakit sing tama sa sulod nakon: ang mga kakugmat sang kamatayon nagaabot sa akon.

“… Kag ang kakugmat nagdaug sa akon.

“… O kabay kuntani may mga pakpak ako subong sang salampati! Niyan magalupad ako, kag magpahuway.” ¹³

Ang medikal nga siyensya, propesyunal nga pagpanglaygay, ukon legal nga pagtadlong makabulig pamag-an sang amo nga mga pag-antos. Apang tandai, ang tanan nga maayo nga mga dulot—lakip ang mga ini—naghalin sa Manluluwas. ¹⁴ Wala sapayan sang mga gintunaan sang aton pinakagrabe nga kasaklaw kag kasakit sang buot, ang pinakaginhalinan sang kaumpawan amo sa gihapon: si Jesucristo. Sia gid lamang ang may bug-os nga gahum kag nagapang-ayo nga balanyos agud matadlong sang tagsa ka sayop, mangin husto ang tagsa ka sala, maliwat ang tagsa ka pagka-di-perpekto, mag-ayo ang tagsa ka pilas, kag mahatag ang tagsa ka naatrasar nga bugay. Pareho sang mga saksi sang una, nagasaksi ako nga “wala kita sang mataas nga pari nga indi matandog sang aton mga kaluyahon” ¹⁵ kundi ang mapinalanggaon nga Manunubos nga nagpanaog gikan sa Iya trono sa ibabaw kag naglakat nga “nagaantos sang mga kasakit kag mga kapipit-an kag mga pagsulay sa tagsa ka sahi …, agud mahimo niya nga mahibal-an … kon paano magtabang sa iya katawhan.” ¹⁶

Sa bisan sin-o sa karon nga may kasakit nga tuman kapait ukon kapinasahi nga pamatyag ninyo daw wala gid sing lubos nga makaintiendi, mahimo nga may punto kamo. Mahimo nga wala sing miyembro sang pamilya, abyan, ukon lider sa priesthood—bisan ano pa ka sensitibo ukon maulikdon sang kada isa—nga lubos nga makahibalo kon ano ang inyo nabatyagan ukon may sibo nga mga tinaga agud mabuligan kamo nga mag-ayo. Apang hibaloa ini: may Isa nga nakaintiendi sing lubos sang inyo ginaeksperiyensyahan, nga “labaw pa nga gamhanan sangsa bug-os nga duta,” ¹⁷ kag “sarang makahimo suno sa gahum nga nagapanghikot sa aton sing lakas kabugana labaw sa tanan nga [inyo] ginapangayo ukon ginahunahuna.” ¹⁸ Ang proseso mahanabo sa Iya pamaagi kag sa Iya gintalana nga tion, apang si Cristo nagatindog nga handa pirme sa pag-ayo sang tagsa ka tipik kag aspeto sang inyo pag-antos.

Kon inyo Sia tugotan nga himuon ini, matalupangdan ninyo nga ang inyo mga pag-antos wala nangin walay kapuslanan. Nga nagahambal parte sa madamo nga halangdon nga mga baganihan sa Biblia kag ang ila mga kasubo, ang Apostoles nga si Pablo nagsiling nga “Ang Dios… may natigana nga maayo pa tungod sa [ila] mga pag-antos, nga sa wala kita indi sila maghimpit.” ¹⁹ Nakita ninyo, ang mismong kinaugali sang Dios kag tinutuyo sang aton mortal nga pagkabuhi amo ang kalipay, ²⁰ apang indi kita mangin perpekto nga mga tinuga nga may diosnon nga kalipay nga wala sing mga eksperiyensya nga magatilaw sa aton, kon kis-a sa aton pinakasulod nga ikasarang. Si Pablo nagsiling bisan pa ang Manluluwas Mismo sa katubtuban nangin “himpit [ukon kompleto] paagi sa pag-antos.” ²¹ Gani, kinahanglan nga bantayan ninyo ang mga pagpanghutik ni satanas nga kon mas maayo kamo nga tawo, malikawan ninyo ining mga pagtilaw.

Kinahanglan man ninyo batoan ang kabutigan nga ang inyo mga pag-antos dawsa nagapakita nga wala kamo nalakip sa grupo sang mga pinili, nga daw nagasaylo-saylo gikan sa isa ka mahimayaon nga kahimtangan pakadto sa isa. Sa baylo, tan-awa ang inyo kaugalingon pareho sang nakita kamo ni Juan nga Manugbugna sa iya matahum nga bugna sa ulihing mga adlaw. Kay nakita ni Juan “ang dakong kadam-an, nga walay tawo nga makaisip, gikan sa tagsa ka pungsod, gikan sa tanan nga kabikahan, kag katawhan, kag hambal, [nga] nagatindog sa atubangan sang trono, kag sang Cordero, nga napanaptan sing malaba nga mga panapton nga maputi, … [nga] nagasinggit sila sa mabaskog nga tingug, [nga nagasiling], ang Kaluwasan iya sang aton Dios.” ²²

Sang pamangkuton: “Sin-o bala ini sila nga nagapanapot sing malaba nga mga panapton nga maputi? kag diin sila maghalin?” Nabaton ni Juan ang sabat: “Ini amo sila ang nagguwa sa dakong kangitngitan, kag ginbunakan nila ang ila mga panapton nga malaba, kag ginpaputi sila sa dugo sang Cordero.” ²³

Mga kauturan, ang pag-antos sa pagkamatarong nagabulig sa inyo nga mangin kalipikado, sangsa magapapain sa inyo, sa mga pinili sang Dios. Kag ginahimo sini ang ila mga panaad nga imo mga panaad. Suno kay Juan, “Indi na [kamo] paggutumon, ukon pag-uhawon pa; ang adlaw indi na magsilak sa [inyo], ukon ang bisan ano pa nga kasingkal sang init. Kay ang Cordero nga yara sa tunga sang trono mangin [inyo] manugpahalab, kag magatuytoy sa [inyo] sa mga tuburan sang tubig nga nagahatag sing kabuhi: kag ang Dios magapahid sang tagsa ka luha sa [inyo] mga mata.” ²⁴

“Kag wala na sing kamatayon, ukon kalisud, ukon paghibi, ukon kasakit pa.” ²⁵

Nagasaksi ako sa inyo nga paagi sa makahalawhaw nga kaayo ni Jesucristo kag sa Iya wala katapusan nga Pagbayad-sala, sarang naton malikawan ang nagakabagay nga mga kasakit sang aton mga kapaslawan kag malampuwasan ang indi nagakabagay nga mga kasakit sang aton mortal nga mga kademalasan. Sa idalom sang Iya direksyon, ang inyo diosnon nga madangatan isa sa indi maparisan sa kahalangdon kag di-malaragway nga kalipay—kalipay nga tuman kabaskog kag tuman kapinasahi sa imo, ang inyo “mga abo” mangin purungpurung “labaw pa sangsa bisan ano nga dutan-on.” ²⁶ Agud nga inyo maagom ang kalipay sa karon kag mapuno sini sa katubtoban, ginaagda ko kamo nga himuon ang ginhimo ni Alma: tutoki sang inyo mga kaisipan ang himpit nga dulot sang Anak sang Dios suno sa ginpahayag paagi sa Iya ebanghelyo sa sining, Iya matuodtuod kag buhi nga Simbahan. Sa ngalan ni Jesucristo, amen.