“ວັນທີ 12–18 ເດືອນສິງຫາ: ‘ຍຶດໝັ້ນຢູ່ໃນສັດທາເຖິງພຣະຄຣິດ.’ ແອວມາ 43–52,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 12–18 ເດືອນສິງຫາ. ແອວມາ 43–52,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ໂມໂຣໄນ ແລະ ປ້າຍແຫ່ງເສລີພາບ

For the Blessings of Liberty [ສຳລັບພອນແຫ່ງເສລີພາບ], ໂດຍ ສະກາດ ເອັມ ສະໂນ

ວັນທີ 12–18 ເດືອນສິງຫາ: “ຍຶດໝັ້ນຢູ່ໃນສັດທາເຖິງພຣະຄຣິດ”

ແອວມາ 43–52

ເມື່ອເຮົາອ່ານຖ້ອຍຄຳເຫລົ່ານີ້ ຢູ່ໃນຕອນຕົ້ນຂອງ ແອວມາ ບົດທີ 43—“ແລະ ບັດນີ້ຂ້າພະເຈົ້າຈະກັບມາເວົ້າກ່ຽວກັບສົງຄາມລະຫວ່າງຊາວນີໄຟ ແລະ ຊາວເລມັນ”—ມັນເປັນເລື່ອງທຳມະດາທີ່ຈະສົງໄສວ່າ ເປັນຫຍັງມໍມອນຈຶ່ງລວມເລື່ອງລາວກ່ຽວກັບສົງຄາມເຫລົ່ານີ້ ເມື່ອເພິ່ນມີບ່ອນວ່າງທີ່ຈຳກັດຢູ່ໃນແຜ່ນຈາລຶກ (ເບິ່ງ ຄຳຂອງມໍມອນ 1:5). ມັນເປັນຄວາມຈິງທີ່ເຮົາກໍມີສົງຄາມຄືກັນໃນວັນເວລາຂອງເຮົາ, ແຕ່ມັນມີຄ່າຢູ່ໃນຖ້ອຍຄຳຂອງເພິ່ນ ທີ່ເກີນກວ່າຈະບັນຍາຍໄດ້ ເຖິງຍຸດທະວິທີ ແລະ ເລື່ອງເສົ້າຂອງສົງຄາມ. ຖ້ອຍຄຳຂອງເພິ່ນກໍຍັງກະກຽມເຮົາສຳລັບສົງຄາມ ຊຶ່ງໃນນັ້ນ “we are all enlisted [ເຮົາທຸກຄົນຖືກເກນ]” (Hymns, ເລກທີ 250), ສົງຄາມທີ່ເຮົາຕໍ່ສູ້ໃນແຕ່ລະວັນແມ່ນຕໍ່ຕ້ານກັບອິດທິພົນທີ່ຊົ່ວຮ້າຍ. ສົງຄາມນີ້ແມ່ນເປັນເລື່ອງຈິງ, ແລະ ຜົນສະທ້ອນຈະກະທົບກະເທືອນຕໍ່ຊີວິດນິລັນດອນຂອງເຮົາ. ເໝືອນດັ່ງຊາວນີໄຟ, ເຮົາກໍໄດ້ຖືກດົນໃຈດ້ວຍອຸດົມການສັກສິດ—“ພຣະເຈົ້າຂອງພວກເຮົາ, ສາດສະໜາຂອງພວກເຮົາ, ອິດສະລະພາບຂອງພວກເຮົາ, ແລະ ສັນຕິສຸກຂອງພວກເຮົາ, ເມຍຂອງພວກເຮົາ, ແລະ ລູກຂອງພວກເຮົາ”—ສິ່ງທີ່ໂມໂຣໄນໄດ້ເອີ້ນວ່າ “ອຸດົມການຂອງຄຣິດສະຕຽນ” (ແອວມາ 46:12, 16).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ແອວມາ 43–52

ພຣະເຢຊູຄຣິດສາມາດຊ່ວຍເຮົາໃນການຕໍ່ສູ້ທາງວິນຍານຂອງເຮົາ.

ຂະນະທີ່ທ່ານອ່ານ ແອວມາ 43–52, ໃຫ້ສັງເກດເບິ່ງສິ່ງທີ່ຊາວນີໄຟໄດ້ເຮັດ ທີ່ເຮັດໃຫ້ພວກເຂົາປະສົບຄວາມສຳເລັດ (ຫລື ບໍ່ສຳເລັດ). ແລ້ວໃຫ້ໄຕ່ຕອງວິທີທີ່ທ່ານສາມາດໃຊ້ສິ່ງທີ່ທ່ານໄດ້ຮຽນຮູ້ເພື່ອຊ່ວຍທ່ານເອົາຊະນະການຕໍ່ສູ້ທາງວິນຍານຂອງທ່ານ. ບັນທຶກຄວາມປະທັບໃຈຂອງທ່ານຢູ່ຂ້າງລຸ່ມ:

ແອວມາ 43:19: ຊາວນີໄຟໄດ້ຕຽມພ້ອມດ້ວຍເຄື່ອງປ້ອງກັນ. (ເຮົາສາມາດພະຍາຍາມກະກຽມຕົວເຮົາເອງ ດ້ວຍເຄື່ອງປ້ອງກັນທາງວິນຍານ.)
ແອວມາ 43:23–24: ພວກເຂົາໄດ້ສະແຫວງຫາການຊີ້ນຳຂອງສາດສະດາ.
ແອວມາ 44:1–4:
ແອວມາ 45:1:
ແອວມາ 46:11–20:
ແອວມາ 48:7–9:
ແອວມາ 49:3, 12–14:

ພ້ອມນີ້, ໃຫ້ເບິ່ງສິ່ງທີ່ທ່ານສາມາດຮຽນຮູ້ ຈາກຄວາມພະຍາຍາມຂອງສັດຕູຂອງຊາວນີໄຟ. ໃຫ້ໄຕ່ຕອງວິທີທີ່ຊາຕານອາດໂຈມຕີທ່ານ ໃນວິທີທາງທີ່ຄ້າຍຄືກັນເຫລົ່ານີ້:

ແອວມາ 43:8: ເຊຣາເຮັມນາໄດ້ພະຍາຍາມເຮັດໃຫ້ຜູ້ຄົນຂອງລາວຄຽດແຄ້ນ ເພື່ອວ່າລາວຈະມີອຳນາດເໜືອພວກເຂົາ. (ຊາຕານອາດລໍ້ລວງເຮົາໃຫ້ກະທຳດ້ວຍຄວາມໃຈຮ້າຍ.)
ແອວມາ 43:29:
ແອວມາ 46:10:
ແອວມາ 47:10–19:

ເບິ່ງ Russell M. Nelson, “Embrace the Future with Faith,” Liahona, Nov. 2020, 73–76; “ສູງຂຶ້ນໄປເທິງພູເຂົາ,” ເພງສວດ ແລະ ເພງຂອງເດັກນ້ອຍ, 32 ນຳອີກ.

ມິເນີວາ ໄທເກີດ (1888–1976), Defense of a Nephite City [ການປົກປ້ອງເມືອງນີໄຟ], 1949–1951, ສີນ້ຳມັນ ເທິງແຜ່ນໄມ້ອັດ, 36 × 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.

ແອວມາ 46:11–28; 48:7–17

ຮູບພາບ
ໄອຄອນຫ້ອງຮຽນສາດສະໜາ
“ຍຶດໝັ້ນຢູ່ໃນສັດທາເຖິງພຣະຄຣິດ.”

ທ່ານຢາກເຮັດໃຫ້ອຳນາດຂອງຜູ້ປໍລະປັກມີໜ້ອຍລົງຢູ່ໃນຊີວິດຂອງທ່ານບໍ? ວິທີໜຶ່ງແມ່ນການເຮັດຕາມຄຳແນະນຳ ຢູ່ໃນ ແອວມາ 48:17 ທີ່ຈະກາຍເປັນ “ເໝືອນດັ່ງໂມໂຣໄນ.” ໃຫ້ຂຽນຖ້ອຍຄຳທີ່ບັນຍາຍເຖິງໂມໂຣໄນ ຂະນະທີ່ທ່ານອ່ານ ແອວມາ 46:11–28; 48:7–17. ທ່ານຮຽນຮູ້ຫຍັງແດ່ຈາກໂມໂຣໄນ ກ່ຽວກັບ “[ການ] ຍຶດໝັ້ນຢູ່ໃນສັດທາເຖິງພຣະຄຣິດ”? (ແອວມາ 46:27).

ທ່ານອາດສຶກສາວິທີທີ່ໂມໂຣໄນໄດ້ດົນໃຈຄົນອື່ນໃນ “ອຸດົມການຂອງຄຣິດສະຕຽນ” ແນວໃດນຳອີກ (ເບິ່ງ ແອວມາ 46:11–22). ທ່ານຈະບັນຍາຍອຸດົມການນັ້ນວ່າແນວໃດ? ທ່ານສາມາດເຮັດສິ່ງໃດເພື່ອຈະໄດ້ເຂົ້າຮ່ວມໃນອຸດົມການນັ້ນ? ທ່ານຈະສາມາດດົນໃຈຄົນອື່ນໃຫ້ເຂົ້າຮ່ວມຄືກັນໄດ້ແນວໃດ?

ສິ່ງໜຶ່ງທີ່ໂມໂຣໄນໄດ້ເຮັດເພື່ອດົນໃຈຄົນອື່ນແມ່ນເຮັດປ້າຍແຫ່ງເສລີພາບ, ຊຶ່ງໄດ້ເນັ້ນຫລັກທຳເພື່ອດົນໃຈຊາວນີໄຟ (ເບິ່ງ ຂໍ້ທີ 12). ມີຫລັກທຳໃດແດ່ທີ່ຜູ້ນຳຂອງສາດສະໜາຈັກຂອງເຮົາກຳລັງເນັ້ນໜັກຢູ່ໃນວັນເວລາຂອງເຮົາ? ທ່ານອາດຊອກຫາຫລັກທຳຢູ່ໃນ ຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (ປຶ້ມນ້ອຍ, 2022), “ຄອບຄົວ: ການປະກາດຕໍ່ໂລກ,” ຄຳຂວັນຂອງ ຍິງໜຸ່ມ ແລະ ຄຳຂວັນຂອງ ກຸ່ມຖານະປະໂລຫິດແຫ່ງອາໂຣນ, ຫລື ຂ່າວສານຈາກກອງປະຊຸມໃຫຍ່ສາມັນຄັ້ງລ່າສຸດ. ທ່ານສາມາດສະຫລຸບສິ່ງທີ່ພວກເພິ່ນກຳລັງສິດສອນ ເປັນການຖະແຫລງທີ່ລຽບງ່າຍເພື່ອສ້າງປ້າຍແຫ່ງເສລີພາບຂອງທ່ານເອງ—ເປັນບາງສິ່ງທີ່ເຕືອນໃຈທ່ານໃຫ້ຈິງໃຈຕໍ່ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ.

ເບິ່ງ Gospel Topic, “Faith in Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ແອວມາ 47

ຊາຕານລໍ້ລວງ ແລະ ຫລອກລວງ ເທື່ອລະເລັກເທື່ອລະໜ້ອຍ.

ຊາຕານຮູ້ວ່າ ທ່ານຈະບໍ່ເຮັດບາບທີ່ໃຫຍ່ໂຕ ຫລື ເຊື່ອຄວາມຕົວະທີ່ຊັດເຈນ. ສະນັ້ນ, ມັນຈຶ່ງໃຊ້ຄວາມຕົວະທີ່ນຽບນຽນ ແລະ ການລໍ້ລວງແບບນ້ອຍໆ—ຫລາຍເທົ່າທີ່ມັນຄິດວ່າທ່ານຈະຮັບໄດ້—ເພື່ອນຳພາທ່ານໄປຈາກຄວາມປອດໄພຂອງການດຳລົງຊີວິດທີ່ຊອບທຳ.

ໃຫ້ຊອກຫາແບບແຜນນີ້ຢູ່ໃນ ແອວມາ 47, ແລະ ໄຕ່ຕອງວິທີທີ່ຊາຕານອາດພະຍາຍາມຫລອກລວງທ່ານ. ໃຫ້ພິຈາລະນາຄວາມຮູ້ເຫລົ່ານີ້ຈາກແອວເດີ ຣໍເບີດ ດີ ແຮວສ໌:

“ອະມາລີໄຄຢາຜູ້ທໍລະຍົດຍົວະຍົງໃຫ້ລີຮອນໄທ ‘ລົງມາ’ ແລະ ພົບກັບລາວໃນຮ່ອມພູ. ແຕ່ເມື່ອລີຮອນໄທໄປຈາກທີ່ໝັ້ນຄົງຂອງພູສູງນັ້ນ, ເພິ່ນກໍຖືກວາງຢາພິດ ‘ເທື່ອລະເລັກເທື່ອລະໜ້ອຍ’ ຈົນວ່າເພິ່ນຕາຍ, ແລະ ກອງທັບຂອງເພິ່ນຕົກຢູ່ໃນກຳມືຂອງອະມາລີໄຄຢາ (ເບິ່ງ ແອວມາ 47). ໂດຍການໂຕ້ຖຽງ ແລະ ການກ່າວຫາ, ຄົນບາງຄົນຈະລໍ້ລວງໃຫ້ເຮົາອອກໄປຈາກທີ່ໝັ້ນຄົງຂອງພູສູງ. ທີ່ໝັ້ນຄົງຂອງພູສູງເປັນບ່ອນທີ່ມີແສງສະຫວ່າງ. … ມັນເປັນບ່ອນທີ່ປອດໄພ” (“Christian Courage: The Price of Discipleship,” Liahona, Nov. 2008, 74).

ທ່ານຮຽນຮູ້ຫຍັງແດ່ຈາກວິດີໂອ “Temptation Fades as We Seek Christ in Every Thought” (ຫ້ອງສະໝຸດພຣະກິດຕິຄຸນ) ທີ່ສາມາດຊ່ວຍທ່ານໃຫ້ຕ້ານທານກັບການລໍ້ລວງ?

ເບິ່ງ ເນເຫມີຢາ 6:3; 2 ນີໄຟ 26:22; 28:21–22 ນຳອີກ.

ແອວມາ 50–51

ຄວາມເປັນອັນໜຶ່ງອັນດຽວກັນນຳຄວາມປອດໄພມາໃຫ້.

ເຖິງແມ່ນວ່າຊາວນີໄຟມີເຄື່ອງປ້ອງກັນ ແລະ ມີການເສີມກຳລັງກໍຕາມ, ແຕ່ບໍ່ດົນຊາວເລມັນກໍໄດ້ຍຶດເອົາຫລາຍຫົວເມືອງຂອງພວກເຂົາ (ເບິ່ງ ແອວມາ 51:26–27). ສິ່ງນັ້ນເກີດຂຶ້ນໄດ້ແນວໃດ? ໃຫ້ຊອກຫາຄຳຕອບ ຂະນະທີ່ທ່ານອ່ານບົດເຫລົ່ານີ້ (ເບິ່ງ ໂດຍສະເພາະ ແອວມາ 51:1–12). ໄຕ່ຕອງເຖິງຄຳເຕືອນຢູ່ໃນເລື່ອງນີ້ສຳລັບທ່ານ ແລະ ຄອບຄົວຂອງທ່ານ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 43:17–21; 48:7–8; 49:1–5; 50:1–6.

ເຮົາສາມາດພົບການປົກປ້ອງທາງວິນຍານໄດ້ ໃນພຣະກິດຕິຄຸນຂອງພຣະເຢຊູຄຣິດ.

ໃຫ້ຄິດທີ່ຈະໃຊ້ “ບົດທີ 31: ແມ່ທັບໂມໂຣໄນເອົາຊະນະເຊຣາເຮັມນາ” (ເລື່ອງພຣະຄຳພີມໍມອນ, 85–88) ເພື່ອບອກລູກໆຂອງທ່ານກ່ຽວກັບສົງຄາມລະຫວ່າງຊາວນີໄຟ ແລະ ຊາວເລມັນ. ຂະນະທີ່ທ່ານອ່ານກ່ຽວກັບເຄື່ອງປ້ອງກັນຂອງຊາວນີໄຟໃນ ແອວມາ 43:19, ທ່ານສາມາດປຽບທຽບເຄື່ອງປ້ອງກັນທີ່ປົກປ້ອງຮ່າງກາຍຂອງເຮົາກັບສິ່ງທີ່ພຣະເຈົ້າໄດ້ປະທານໃຫ້ເຮົາ ເພື່ອປົກປ້ອງວິນຍານຂອງເຮົາ. ບາງທີທ່ານ ແລະ ລູກໆຂອງທ່ານສາມາດແຕ້ມຮູບເດັກນ້ອຍຄົນໜຶ່ງ ແລະ ຕື່ມເຄື່ອງປ້ອງກັນໃສ່ໃນຮູບ ສຳລັບທຸກສິ່ງທີ່ລູກໆຂອງທ່ານສາມາດບອກຊື່ໄດ້ ທີ່ປົກປ້ອງເຮົາທາງວິນຍານ.
ຂໍ້ເຫລົ່ານີ້ບັນຍາຍເຖິງການເສີມກຳລັງທີ່ຊາວນີໄຟໄດ້ສ້າງຂຶ້ນມາ: ແອວມາ 48:7–9; 49:1–9; 50:1–6. ຫລັງຈາກການອ່ານຂໍ້ເຫລົ່ານີ້ນຳກັນແລ້ວ, ລູກໆຂອງທ່ານອາດມັກການສ້າງປ້ອມຈາກສິ່ງຂອງດັ່ງເຊັ່ນ ຕັ່ງ ແລະ ຜ້າຫົ່ມ. ວິດີໂອ “Elder Stevenson on Fortifying Families” (ຫ້ອງສະໝຸດພຣະກິດຕິຄຸນ) ສາມາດຊ່ວຍທ່ານສົນທະນາວິທີທີ່ຈະເສີມສ້າງບ້ານເຮືອນຂອງທ່ານທາງວິນຍານໄດ້.

ແອວມາ 46:11–16; 48:11–13, 16–17

ເຮົາສາມາດເປັນຄົນ “ໝັ້ນຄົງຢູ່ໃນສັດທາເຖິງພຣະຄຣິດ” ຄືກັນກັບແມ່ທັບໂມໂຣໄນ.

ລູກໆຂອງທ່ານສາມາດເບິ່ງຮູບທີ່ຢູ່ໃນໂຄງຮ່າງນີ້ ທີ່ເລົ່າເລື່ອງລາວຂອງປ້າຍແຫ່ງເສລີພາບ (ເບິ່ງ ແອວມາ 46:11–16; “ບົດທີ 32: ແມ່ທັບໂມໂຣໄນ ແລະ ປ້າຍແຫ່ງເສລີພາບ,” ເລື່ອງພຣະຄຳພີມໍມອນ, 89–90). ໂມໂຣໄນຢາກໃຫ້ຜູ້ຄົນຈື່ຈຳຫຍັງແດ່ (ເບິ່ງ ຂໍ້ທີ 12)? ພຣະບິດາເທິງສະຫວັນປະສົງໃຫ້ເຮົາຈື່ຈຳຫຍັງແດ່? ບາງທີລູກໆຂອງທ່ານສາມາດອອກແບບ “ປ້າຍແຫ່ງເສລີພາບ” ຂອງພວກເຂົາເອງ ດ້ວຍວະລີ ຫລື ຮູບພາບທີ່ຈະຊ່ວຍພວກເຂົາໃຫ້ຈື່ຈຳສິ່ງເຫລົ່ານີ້.
ເພື່ອສິດສອນລູກໆຂອງທ່ານກ່ຽວກັບການເປັນຄົນ “ໝັ້ນຄົງຢູ່ໃນສັດທາເຖິງພຣະຄຣິດ” ຄືກັນກັບໂມໂຣໄນ (ເບິ່ງ ແອວມາ 48:13), ທ່ານສາມາດຊ່ວຍພວກເຂົາໃຫ້ຊອກຫາ ແລະ ຈັບບາຍບາງສິ່ງທີ່ແຂງແກ່ນ. ມັນໝາຍຄວາມວ່າແນວໃດສຳລັບສັດທາທີ່ຈະ “ໝັ້ນຄົງ”? ອ່ານ ແອວມາ 48:11–12 ນຳກັນ ເພື່ອຊອກຫາສິ່ງທີ່ເຮັດໃຫ້ໂມໂຣໄນໝັ້ນຄົງໃນສັດທາຂອງເພິ່ນຢູ່ໃນພຣະຄຣິດ. ພວກທ່ານກໍສາມາດຮ້ອງເພງ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70)ນຳກັນ ນຳອີກ. ເຮົາຈະເຮັດຫຍັງໄດ້ແດ່ເພື່ອຈະ “ໝັ້ນຄົງຢູ່ໃນສັດທາເຖິງພຣະຄຣິດ”?

ແອວມາ 47:4–19

ຊາຕານລໍ້ລວງ ແລະ ຫລອກລວງເຮົາ ເທື່ອລະເລັກເທື່ອລະໜ້ອຍ.

ອ່ານຂໍ້ທີ່ເລືອກມາຈາກ ແອວມາ 47:4–19 ນຳກັນ. ແມ່ນຫຍັງຈະເກີດຂຶ້ນຖ້າຫາກອະມາລີໄຄ ໄດ້ບອກລີຮອນໄທ ສິ່ງທີ່ລາວໄດ້ວາງແຜນຈະເຮັດຕັ້ງແຕ່ຕົ້ນ? ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບວິທີທີ່ຊາຕານພະຍາຍາມຈະຫລອກລວງເຮົາ?

ຊ່ວຍລູກໆຂອງທ່ານສ້າງຄວາມໝັ້ນໃຈ. ເດັກນ້ອຍບາງຄົນອາດຮູ້ສຶກວ່າບໍ່ມີຄວາມສາມາດທີ່ຈະຮຽນຮູ້ພຣະກິດຕິຄຸນດ້ວຍຕົວເອງ. ວິທີໜຶ່ງໃນການສ້າງຄວາມໝັ້ນໃຈຂອງພວກເຂົາແມ່ນຈະຍ້ອງຍໍພວກເຂົາ ເມື່ອພວກເຂົາເຂົ້າຮ່ວມໃນການຮຽນຮູ້. ທ່ານສາມາດນຳໃຊ້ຄຳແນະນຳນີ້ກັບກິດຈະກຳໃນໂຄງຮ່າງນີ້ໃນບ່ອນໃດແດ່?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Title of Liberty [ປ້າຍແຫ່ງເສລີພາບ], ໂດຍ ແລຣີ ຄອນແຣດ ວິນບອກ

ຮູບພາບ

ໜ້າກິດຈະກຳ: ພຣະກິດຕິຄຸນປົກປ້ອງເຮົາທາງວີນຍານ