Long sam wei, mi filim se hem i wan gudfala taem blong stap biliv long Jisas Kraes. Ol profesi oli stap kamtru—ol bigfala saen mo merikel long medel blong ol pipol oli bin stap soem se Sevya bae i bon i no longtaem. Long nara han, i bin wan taem blong wari blong olgeta we oli bin biliv, from se, nomata ol merikel ia, olgeta we oli no bin stap biliv, oli stap strong se “taem ia i pas finis” blong Sevya i bon i kam long wol ia (3 Nifae 1:5). Olgeta pipol ia, oli “mekem wan bigfala trabol truaot long graon,” (3 Nifae 1:7) mo oli iven putum wan deit blong kilimded evriwan we oli bin biliv sapos saen ia we Samuel, Man blong Leman i bin profesae from—wan naet we i no gat tudak—i no bin kamaot.
Long ol had situesen ia, profet Nifae “i prea strong long God blong hem from ol pipol blong hem” (3 Nifae 1:11). Ansa blong Lod i save givim insperesen long eniwan we i stap fesem hadtaem, o i gat tu tingting, mo i nidim blong save se laet bae i winim tudak: “Leftemap hed blong yu mo stap glad; … bae mi mekem evri samting i hapen we mi bin mekem se oli talemaot tru long maot blong ol tabu profet blong mi” (3 Nifae 1:13
Blong konvet i kam long gospel blong Jisas Kraes i nidim fasin blong save wet longtaem mo efot.
3 Nifae 1–7 i tokbaot ol pipol we oli bin jenisim laef blong olgeta i go long Lod mo olgeta pipol we oli no bin jenis. ?Wanem nao i mekem samting i defren long ol grup ia? Wan jat olsem hemia we i stap daon ia bae i save helpem yu blong oganaesem ol tingting blong yu:
Ol samting we i mekem se tingting blong jenisim laef i no save kam strong
Ol samting we i save givim paoa long fasin blong jenisim laef.
Askem ol kwestin long yuwan taem yu stap stadi. Eksampol, taem yu stap finisim jat ia, yu save askem ol kwestin olsem, “?Wanem lesen nao i blong mi long ples ia?” Hemia bae i givim insperesen tru long Tabu Spirit.
Papa blong yu long Heven i save se laef blong yu bae i gat ol taem we bae i had, iven ol taem we bae i gat fraet. Be Hem i wantem tu blong yu blong eksperiensem glad. Ridim 3 Nifae 1:1–23 blong lanem from wanem ol Man blong Nifae we oli fetful, oli stap gat fraet. ?Wanem risen nao Lod i givim long olgeta blong “oli stap glad”?
Sevya i yusum toktok ia “stap glad” plante taem—eksampol, long Matiu 14:24–27; Jon 16:33; Doktrin mo Ol Kavenan 61:36; 78:17–19. ?Wanem nao i tajem tingting mo filing blong yu abaot ol invitesen ia? Maet yu wantem ridim ol narafala ves ia blong andastanem ol situesen we Sevya i stap long hem taem Hem i talem ol toktok ia. Long situesen ia, ?wanem ol risen nao Hem i givim blong helpem ol pipol oli fesem ol fraet blong olgeta? ?Long wanem wei nao Hem i bin mekem hemia long yu?
Tingting blong stadi long toktok blong Presiden Russell M. Nelson “Glad mo Traehad blong Laef long Saed blong Spirit” (Liahona, Novemba 2016, 81–84). ?Wanem nao Presiden Nelson i tijim long yu abaot fasin blong faenem glad long eni situesen? Luksave hamas taem Presiden Nelson i yusum toktok ia, lukluk nomo. Maet yu save komperem blong lukluk long wan kamera we i stap lukluk nomo long o ol narafala lens we i lukluk nomo long Jisas Kraes. ?Olsem wanem nao bae yu lukluk nomo long Hem moa?
Luk long “Grief,” “Hope,” “Mental Health,” o ol narafala topik long “Life Help” seksen blong Gospel Laebri.
Lod bae i mekem evri toktok blong Hem oli hapen long taem blong Hem.
Ridim 3 Nifae 1:4–7 mo tingbaot wanem bae yu filim sapos yu wan long ol man blong biliv. ?Wanem nao oli mekem blong holemtaet fet blong olgeta i stap strong? (luk long 3 Nifae 1:4–21 mo 5:1–3). ?Olsem wanem nao toktok blong Samuel i bin kamtru? (luk long 3 Nifae 1:19–21). ?Olsem wanem nao Lod i mekem ol toktok blong hem i kamtru long laef blong yu?
Momon i bin talem: “Luk, mi mi wan disaepol blong Jisas Kraes” (3 Nifae 5:13 ?Toktok ia i minim wanem long yu? Tingting blong lukaotem long 3 Nifae 1:4–15; 5:12–26; 6:10–15; mo 7:15–26, blong faenem ol kwaliti, ol bilif, mo ol aksen blong Jisas Kraes.
Luk tu long “I’m Trying to Be like Jesus,” Children’s Songbook, 78.
Taem mi praktisim fet blong mi long Jisas Kraes, mi no nid blong fraet.
Ol Man blong Nifae wetem ol ami blong man blong stil oli kasem eksperiens, maet i save gat wan lesen we i save helpem yu wetem ol denja long saed blong spirit we yu stap fesem. Lukaotem ol lesen ia long 3 Nifae 2:11–12 mo 3:1–26. Eksampol, yu save lukaotem ol toktok blong Gidianhae long 3 Nifae 3:2–10 mo komperem olgeta long ol wei we Setan i save traem blong giaman long yu. ?Wanem lesen nao yu lanem long eksampol blong Lakonius?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Wan niu sta i kamkamaot taem we Jisas Kraes i bon i kam long wol ia.
Aktiviti pej blong wik ia i save helpem ol pikinini blong yu lanem abaot ol merikel we Ol Man blong Nifae oli witnesem taem we Jisas Kraes i bon i kam long wol. Mo tu, yu save yusum “Japta 41: Ol Saen blong Taem we Kraes bae i Bon” (Ol Stori long Buk blong Momon, 114–16) blong tijim stori ia long olgeta—o blong helpem olgeta blong talem stori ia long yu.
Oltaem, ol toktok blong ol profet oli stap kamtru.
Ridim 3 Nifae 1:4–10, invaetem olgeta blong tokbaot olsem wanem bae oli filim sapos oli stap olsem wan man blong biliv we oli stap long taem ia. Afta, oli save ridim flatem stori ia long ol ves 11–15, mo givim sam tingting abaot sam wei blong finisim sentens ia: “Long mi, lesen blong stori ia hem i …”
Maet ol pikinini blong yu oli save helpem yu blong tingting long ol taem we God i mekem i kamtru ol promes blong Hem tru we Hem i givim long ol profet blong Hem. Bae oli save faenem ol pikja blong ol stori ia long Gospel Art Buk (luk long, eksampol, ol namba 7–8 mo 81). Letem olgeta oli serem wanem oli save abaot ol stori ia, wetem hemia we God i mekem ol promes blong Hem i kamtru. Tugeta, ridim 3 Nifae 1:20, mo serem witnes blong yuwan abaot ol trutok ia.
Yumi kam strong moa taem yumi kam tugeta long wan ples.
Helpem pikinini blong yu blong faenemaot from wanem Ol Man blong Nifae oli kam tugeta mo ol blesing we oli kam long olgeta: 3 Nifae 2:11–12 mo 3:13–14, 24–26. ?From wanem i impoten blong yumi “kam tugeta” tedei long ol famli blong yumi, mo tu, long jos?
?Yu yu save eni lesen we i yusum samting blong tij abaot paoa blong wok wan? Maet ol pikinini blong yu oli save traem blong brekem wan stik, mo afta, traem brekem wan bandel stik, o blong terem wan pis pepa, mo afta terem wan hip blong pepa. ?Long wanem wei nao, yumi, yumi olsem ol stik, o ol pepa ia?
Afta we yufala i ridim tugeta 3 Nifae 5:13, invaetem ol pikinini blong ripitim sentens ia: “Mi mi wan disaepol blong Jisas Kraes.” Blong lanem wanem i minim blong stap olsem wan disaepol blong Jisas Kraes, tugeta ridim sam long ol eksampol ia long: Ol Man blong Leman we oli Konvet (luk long 3 Nifae 6:14), Momon (luk long 3 Nifae 5:12–26), mo Nifae (luk long 3 Nifae 7:15–26). Yu save faenem sam aedia long wan singsing olsem “I’m Trying to Be like Jesus” (Children’s Songbook, 78–79).
Long wan pis pepa, helpem ol pikinini blong oli droem han blong olgeta mo oli katem. Raetem: “Mi mi wan disaepol blong Jisas Kraes” long wan saed, mo invaetem olgeta blong droem wan samting we oli save mekem blong stap wan disaepol long nara saed.
Blong kasem sam moa aedia, luk long magasin blong Fren blong manis ia.
Pikja
Ol Man blong Nifae oli witnesem dei ia we i no bin gat naet long hem
Wan Dei, Wan Naet, mo wan Dei,, i kam long Walter Rane.