“Luk, mi mi Jisas Kraes, we ol profet oli bin testifae se bambae mi kam long wol” (3 Nifae 11:10). Wetem ol toktok ia, Sevya we i bin laef bakegen long ded i bin presentem Hemwan, mo long wei ia, i bin mekem ol profesi we oli bin tokbaot insaed long Buk blong Momon ova long 600 yia i pas, oli kam blong hapen. “Taem ia we Hem i bin kamkamaot mo toktok ia we Hem i bin talem, Elda Jeffrey R. Holland i raetem se, oli “stap olsem stret poen ia, bigfala taem ia, long ful histri blong Buk blong Momon. Hem i taem we i soemaot Hem, mo i toktok we i bin talem mo i bin givim insperesen long evri profet blong Ol Man Nifae. … Evriwan i bin toktok abaot Hem, oli bin singsing abaot Hem, oli bin drim abaot Hem, mo oli bin prea blong Hem i kamkamaot—be Hem i bin stap ia oltaem nomo. !Hemia i bin dei ia blong evri dei! God we i stap tanem evri naet we i tudak i kam laet blong moning, i bin kam” (Christ and the New Covenant [1997], 250–51).
Luk tu long“Jesus Christ Appears in the Ancient Americas” (vidio), Gospel Laebri.
Maet bae yu luk se ol stamba toktok we oli go wetem tudak mo laet oli ripripitim truaot long 3 Nifae 8–11 ?Wanem nao yu lanem long ol japta ia abaot tudak long saed blong spirit mo laet long saed blong spirit? (luk long, eksampol, 3 Nifae 8:19–23; 9:18; 10:9–13). ?Wanem i tekem tudak i kam insaed long laef blong yu? ?Wanem i tekem laet i kam? ?From wanem nao yu ting se Sevya i tokbaot Hemwan olsem “laet mo laef blong wol ia”? (3 Nifae 9:18; 11:11).
Ol samting we oli hapen, we oli tokbaot long 3 Nifae 9–11 oli ol samting we oli moa tabu we oli stap long Buk blong Momon. Ridim olgeta slo, mo tingting gud long olgeta. Hemia samfala kwestin blong i helpem yu. Tingting blong raetemdaon ol filing mo tingting we oli kam long yu.
?Olsem wanem nao bae mi filim sapos mi stap long medel blong ol pipol ia?
?Wanem nao i tajem yu abaot Sevya long ol japta ia?
?Olsem wanem nao mi save se Jisas Kraes i Sevya blong mi?
?Olsem wanem nao Jisas Kraes i wan laet insaed long laef blong mi?
Elda Neil L. Andersen i talem: “Mi testifae se Sevya i save mo i wantem tumas blong fogivim ol sin blong yumi” (“Repent … That I May Heal You,” Liahona, Novemba 2009, 40). Lukaotem long 3 Nifae 9–10 blong luk ol pruf blong sore blong Kraes. ?Wanem nao yu faenem insaed long 3 Nifae 9:13–22; mo 10:1–6 we i save helpem yu blong filim lav mo sore blong Sevya? ?Wetaem we yu bin filim Hem i “karem” mo “givim gudfala kaekae” long yu? (luk long 3 Nifae 10:4
Lod i askem wan “hat we i fulap wetem sore mo wan spirit we i wantem blong sakem sin.”
Bifo taem we Sevya i kam long wol, ol sakrifaes blong ol animol oli ol saen blong sakrifaes blong Jisas Kraes (luk long Moses 5:5–8). ?Wanem niufala komanmen we Sevya i givim long 3 Nifae: 09:20–22? ?Olsem wanem hemia i poenem yumi i go long Hem mo sakrifaes blong Hem?
?I minim wanem long yu blong givim wan sakrifaes wetem wan hat we i fulap wetem sore mo wan spirit we i wantem blong sakem sin? ?From wanem nao yu filim se Sevya i wantem sakrifaes ia long yu?
Mi save lanem blong harem mo andastanem voes blong God.
?Olsem wanem nao yu save taem we God i stap toktok long yu? Maet eksperiens blong ol pipol we oli tokbaot insaed long 3 Nifae 11:1–8, oli save helpem yu blong andastanem voes blong God. I gud blong yu luk wanem kaen voes blong God nao ol pipol oli bin harem mo wanem oli bin mekem blong oli andastanem gud moa voes ia.
Yu save gat janis ia tu blong save lisin long ol profet, ol aposol mo ol narafala Jos lida we oli gat ol eksperiens blong lisin mo stap folem voes blong God. Sam long olgeta i serem eksperiens blong olgeta long “Hear Him!” vidio koleksen long Gospel Laebri. Tingting blong wajem wan o moa vidio
?Olsem wanem nao bae yu praktisim wanem we yu bin lanem abaot olsem wanem blong lisin mo harem save voes blong God i moa klia?
Luk long Russell M. Nelson, “Hear Him,” Liahona, May 2020, 88–92; “This Is My Beloved Son,” Children’s Songbook, 76; Gospel Topik, “Personal Revelation,” Gospel Laebri.
Pikja
Jisas i soem long Ol Man blong Nifae, ol mak ia long ol han blong Hem.
Jisas Kraes i stap invaetem mi blong mi kasem wan testemoni blong miwan abaot Hem.
I bin gat samples 2,500 pipol we oli bin kam tugeta long tempol long Plante, ples we Jisas i bin kamkamaot long olgeta (luk long 3 Nifae 17:25). Nomata long bigfala namba ia, Sevya i bin invaetem olgeta, “wan afta wan” blong oli filim mak blong nil long han mo leg blong Hem (3 Nifae 11:14–15). Taem yu stap rid, pikjarem long maen blong yu se ples ia i luk olsem wanem. ?Long wanem wei nao Sevya i stap invaetem yu blong “girap mo kam fored” long Hem? (3 Nifae 11:14).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Taem mi stap long tudak, Jisas Kraes i save stap olsem laet blong mi.
Blong helpem ol pikinini blong yu blong oli save yusum ol eksperiens we oli stap long 3 Nifae 8–9, i kam long olgetawan, yu save talem bakegen, o lisin long wan rekoding blong samfala pat blong ol japta ia long wan rum we i tudak. ?Bae i olsem wanem blong stap long tudak blong tri dei? Toktok raon long poen ia. Afta yu save tokbaot from wanem Jisas Kraes i singaotem Hemwan Laet blong Wol ia (luk long 3 Nifae 9:18). ?Wanem nao Jisas i bin invaetem ol pipol, mo yumi tu, blong mekem, blong mekem se Hem i save stao olsem laet blong yumi? (luk long 3 Nifae 9:20–22).
Jisas i stap protektem ol pipol blong Hem semmak olsem wan mama faol i stap protektem ol smol pikinini faol blong hem.
Pikja ia, blong wan mama faol i pulum tugeta ol smol pikinini blong hem, hem i wan tijing we i gat paoa blong helpem ol pikinini oli andastanem fasin mo misin blong Sevya. Yu save rid long 3 Nifae 10:4–6 taem famli blong yu i stap lukluk pikja blong mama faol mo ol pikinini blong hem. ?From wanem nao wan mama faol bae i wantem pulum tugeta ol pikinini blong hem? ?From wanem Sevya i wantem blong pulum yumi i go kolosap long Hem? ?Olsem wanem nao yumi save go long Hem blong save faenem wan sef ples?
?Hao nao bae yu helpem pikinini blong yu i filim Spirit taem yufala i ridim tugeta 3 Nifae 11:1–15 ? Maet yu askem ol pikinini blong talem long yu, taem we oli faenem wan samting insaed long ol ves ia we i helpem olgeta blong filim lav blong God. Yu save mekem sem samting wetem ol pikja long lesen ia o vidio“ Jesus Christ Appears at the Temple” (Gospel Laebri). Talem long ol pikinini olsem wanem nao yu filim taem yu stap ridim mo tingting hevi long ol taem ia. Askem olgeta blong serem ol filing blong olgeta.
God i toktok long mi long wan voes we i kwaet, mo i no strong.
Maet yufala i save ridim sam long ol ves ia long wan voes we i sofsof mo i “i no strong” (3 Nifae 11:3). O yu save plei wan miusik blong wan singsing olsem “This Is My Beloved Son” (Children’s Songbook, 76) i no laod we i had blong lisin long hem. ?Wanem nao ol pipol oli mas mekem blong andastanem voes we i kam long heven? (Luk long ol ves 5–7). ?Wanem nao yumi save lanem long eksperiens blong olgeta?
Ridim 3 Nifae 11:21–26, mo invaetem ol pikinini blong stanap evri taem oli stap harem toktok ia, baptaes. ?Wanem nao Jisas i tijim abaot baptaes? Sapos ol pikinini oli bin luk wan baptaes bifo, askem olgeta blong tokbaot wanem we oli bin luk. ?From wanem nao Jisas i wantem yumi blong kasem baptaes?
Blong kasem moa aedia, luk long magasin blong Fren long manis ia.
Pikja
Jisas i kamkamaot long Ol Man blong Nifae
Wan Man blong Lukaot long Sipsip, i kam long Howard Lyon