Buk blong Hileman i rekodem tugeta ol win mo ol nogud taem long medel blong Ol Man blong Nifae mo Ol Man blong Leman. Hem i stat wetem “wan bigfala trabol we i nogud tumas long medel blong ol pipol blong Ol Man blong Nifae” (Hileman 1:1), mo ol bigfala trabol ia oli gohed blong hapen truaot long histri ia. Long ples ia, yumi stap rid abaot ol tingting blong politik, ol grup blong ol stilman, fasin blong sakemaot ol profet, mo hae tingting mo fasin blong no bilif we i stap truaot long graon. Be yumi faenem ol eksampol tu olsem Nifae mo Lihae, mo “ol pipol we tingting blong olgeta i stap daon moa,” we oli bin gotru mo laef, be tu, oli bin traehad long saed blong spirit (Hileman 3:34). ?Olsem wanem oli mekem samting ia? ?Olsem wanem nao oli bin stap strong taem we fasin blong laef i stat blong kamdaon mo i foldaon i go brokbrok? Long sem wei we eniwan long yumi i stap strong long “strong win” we devel i sendem blong “i foldaon long [yumi]”— taem yumi bildim laef blong yumi antap long “strong ston blong Ridima blong yumi, we i Kraes, Pikinini blong God, … we i wan fandesen we sapos ol man oli bildimap olgeta antap long hem, oli no save foldaon” (Hileman 5:12).
Hae tingting i seperetem mi long Spirit mo paoa blong God.
Taem yu ridim Hileman 1–6, bae yu luksave wan paten long fasin blong Ol Man blong Nifae. Taem oli stap stret mo gud, God i blesem olgeta, mo oli kam antap gud. Afta smol taem, oli kam blong gat hae tingting mo gat ol fasin nogud, oli mekem ol joes we i stap lidim olgeta blong oli go lus evriwan mo oli stap safa. Taem oli gat tingting i stap daon, mo oli gat insperesen ia blong sakem sin, God i stap blesem olgeta bakegen. Paten ia i stap ripripitim hemwan oltaem mekem se sam oli singaotem “raon rod blong hae tingting.”
Lukaotem ol eksampol blong raon rod ia taem yu stap ridim Hileman 1–6. Hemia samfala kwestin blong helpem yu andastanem paten ia:
?Wanem pruf blong hae tingting nao yu luk long medel blong Ol Man blong Nifae? (luk long, eksampol, Hileman 3:33–34; 4:11–13). ?Yu, yu stap luk semmak pruf blong hae tingting long yuwan?
?Wanem nao ol risal blong gat hae tingting mo fasin nogud? (luk long Hileman 4:23–26). ?Wanem nao ol risal blong gat tingting i stap daon mo gat fasin blong sakem sin? (luk long Hileman 3:27–30, 35; 4:14–16).
?Wanem ol samting we Hileman i wantem ol boe blong hem oli tingbaot? (luk long Hileman 5:4–12). ?Long wanem wei nao, we, taem yumi stap tingbaot ol trutok ia, i helpem yumi blong stap longwe long fasin blong gat hae tingting?
Luk tu long “Japta 18: Beware of Pride,” Teachings of Presidents of the Church: Ezra Taft Benson (2014), 229–40; “I Need Thee Every Hour,” Hym, namba 98.
Long Hileman 3, Momon i tokbaot wan taem blong bigfala glad from blesing we Jos i kasem we iven ol lida oli bin sapraes. Folem wanem we yu bin ridim long ol ves 24–32, ?wanem nao yu ting se i mekem oli kasem pat ia? I no evri memba we oli gohed blong gat glad ia. Luksave ol samting we i defdefren bitwin ol pipol we oli tokbaot long ol ves 33–35. ?Wanem nao yu lanem long ol eksampol blong olgeta?
Lukaotem ol samting we yu save yusum blong yuwan. Profet Momon i yusum ol toktok ia, “olsem ia yumi save luk se,” blong tokbaot bigwan hamas ol trutok oli impoten, taem hem i raetemsot Buk blong Momon. Eksampol. ?Wanem nao hem i wantem yumi blong luk long Hileman 3:27–30? Taem yu stadi long ol skripja, yu save stop wanwan taem blong komplitim ol toktok ia “olsem ia yumi save luk se,” folem wanem we yu bin ridim.
Blong stap ridim Hileman 5:6–7 i save givim insperesen long yu blong tingting long ol nem we oli bin givim long yu, we i tekem tu ol nem blong famli. ?Wanem nao ol nem ia oli minim long yu? ?Olsem wanem nao yu save respektem olgeta? Wanem we i moa impoten, tingting long wanem i minim blong tekem nem blong Sevya (luk long Moronae 4:3). ?Olsem wanem nao yu stap respektem tabu nem ia?
Sapos mi mekem Jisas Kraes i kam fandesen blong mi, mi no save foldaon.
?Wanem i minim long yu blong “bildimap fandesen blong yu” antap long “strong ston blong Ridima blong yumi”? (Hileman 5:12). ?Olsem wanem nao yu bin faenem sefples long Jisas Kraes long taem blong ol strong win blong laef? Taem yu ridim Hileman 5:12–52, poenemaot olsem wanem Nifae mo Lihae oli bin kasem blesing blong stap bildimap fet blong olgeta long strong ston blong Ridima blong olgeta.
Sam pipol oli luk se blong stadi mo lukluk pikja blong wanem oli stap stadi long hem i save helpem olgeta. Blong soem Hileman 5:12, yu save bildimap wan smol plan blong ol defren kaen fandesen. Afta, yu save krietem wan “strong win” taem yu stap spre wota long hem. ?Wanem ol niu lukluk we hemia i givim long yu abaot bildimap fandesen blong yu long Jisas Kraes? ?Wanem bakegen yu lanem long vidio “A Secure Anchor”? (Gospel Laebri).
Ves 50 i tokbaot “ol bigfala pruf we oli bin kasem” we Ol Man blong Leman oli bin kasem. Blong stap ridim Hileman 5:12–52 i save mekem yu tingting long ol pruf we God i bin givim long yu. Eksampol, maet “wan filing” we i kam long Spirit i bin givim paoa long fet blong yu long Sevya (Hileman 5:30; luk tu long Doktrin mo Ol Kavenan 88:66). O ating yu bin stap long tudak mo singaot i go long God blong kasem bigfala fet (luk long Hileman 5:40–47). ?Wanem ol narafala eksperiens we oli bin helpem yu blong bildimap fandesen blong yu long Jisas Kraes?
Papa long Heven i wantem mi blong putum tingting i stap daon.
Tingting blong invaetem ol pikinini blong droem “raon rod blong hae tingting,” folem droing antap ia. Afta, taem yufala i stap rid tugeta long Hileman 3:24, 33–34 mo 4:11–15, oli save poenem ol pat blong raon rod ia we ol ves ia oli tokbaot. ?Olsem wanem nao yumi save jusum blong stap gat tingting i stap daon—mo stap nomo olsem?
Bae mi bildimap fandesen blong mi long Jisas Kraes.
Tingting blong stap yusum wan pikja blong wan tempol blong statem wan storian abaot from wanem ol bilding oli nidim ol strong fandesen. O yufala i save lukluk long fandesen blong hom blong yu o Jos bilding. Blong tokbaot bigwan paoa blong strong ston blong fandesen, ol pikinini blong yu bae oli save traem blong muvum taem oli blo long hem. Taem yu ridim tugeta Hileman 5:12, askem pikinini blong yu from wanem Jisas Kraes hem i “sua fandesen” blong laef blong yumi. ?Olsem wanem nao yumi save bildimap laef blong yumi long Hem? (luk long Hileman 3:27–29, 35 mo Articles of Faith 1:4).
Invaetem ol pikinini blong yu blong bildimap wan taoa, yusum ol pleiplei brikis o ol narafala materiol long ol defren kaen fandesen (olsem koten balong o flat ston). ?Long wanem wei nao strong ston fandesen i olsem Jisas Kraes? Oli save ademap wan brikis i go long bilding ia blong wanwan aedia we oli serem abaot wanem oli save mekem blong folem Hem.
Tabu Spirit i toktok long wan voes we i kwaet, i smol.
Voes ia we oli tokbaot long Hileman 5:29–30, 45–47 oli tijim yumi wan wei se Tabu Spirit i stap toktok long yumi. Blong helpem ol pikinini blong yu andastanem trutok ia, tingting blong stap ridim “Japta 37: Nifae mo Lihae long kalabus” (Ol Stori long Buk blong Momon, 99–102). Taem yu tokbaot voes ia we ol pipol oli harem, toktok long wan kwaet voes. Ripitim stori ia plante taem, mo invaetem ol pikinini blong wispa wetem yu. Helpem olgeta blong tingting long ol narafala wei we Tabu Spirit i save toktok long yumi. Blong sapotem prinsipol ia, yufala save singsing tugeta singsing ia “The Still Small Voice” (Children’s Songbook, 106–7).
Fasin blong sakem sin i riplesem tudak long saed blong spirit wetem laet.
Blong tokbaot bigwan wanem we Hileman 5:20–41 i stap tijim abaot bigfala tudak mo laet, traem stap ridim o talem i sot stori we ol ves ia i tokbaot abaot tudak, yusum wan tok nomo. Ol pikinini blong yu oli save lisin long wanem we ol pipol oli nidim blong mekem, blong mekem se bigfala tudak i save kamaot. Afta, onem ol laet, mo ridim ol ves 42–48 tugeta. ?Wanem nao ol ves ia oli stap tijim yumi abaot fasin blong sakem sin?
Blong moa tingting, luk long namba blong manis ia Fren magasin.
Pikja
Nifae mo Lihae long kalabus
Iven long kalabus, paoa blong God i protektem Nifae mo Lihae.
