Jisas Kraes i jes spendem dei blong givhan long graon ia, Plante, i stap tijim gospel blong Hem, i givim ol pipol wan janis blong luk mo filim ol mak long bodi blong Hem we i laef bakegen long ded, mo i stap testifae se, Hem nao, Hem i Sevya ia blong promes. Naoia i taem blong Hem i go. Hem i talem, “Taem blog mi i kam kolosap” (3 Nifae 17:1). Hem i nid blong gobak long Papa blong Hem, mo Hem i bin save se ol pipol oli nidim taem blong tingting hevi long wanem Hem i bin tijim olgeta. Mekem se, Hem i promes se bae Hem i kambak long nekis dei, nao, Hem i sendem ol grup blong ol pipol oli gobak long haos blong olgeta. Be, i no gat wan i go. Oli no talem wanem we oli stap filim, be Jisas i save filim: oli bin hop se bae Hem i “stap wetem olgeta smol taem moa” (3 Nifae 17:5). Hem i gat ol narafala impoten samting blong mekem, be blong soem sore blong God long ol pikinini blong Hem i oltaem kam faswan long Hem. Mekem se Jisas i stap long taem smol. Wanem i bin kam afta, maet i wan eksampol blong givhan we i mekem hat blong man i sopsop, we oli bin raetemdaon long ol skripja. Olgeta we oli bin stap long tetaem ia, oli save talem nomo se i no gat toktok blong tokbaot wanem i hapen (luk long 3 Nifae 17:16–17). Jisas Hemwan, i talemsot bigfala taem we Spirit i bin plante, wetem ol simpol toktok ia: “Mo nao luk, glad blong mi i fulap” (3 Nifae 17:20).
Sevya i stret eksampol blong mi, blong fasin blong givhan.
Kolosap, 2,500 pipol i stap long taem ia we, Sevya i bin faenem wan wei blong givhan long olgeta, wan afta wan. ?Wanem nao yu bin luksave abaot wei we Hem i bin givhan 3 Nifae 17; 18:24–25, 28–32? ?Wanem nid nao Hem i bin givhan long hem? ?Ol wanem fasin nao i mekem se givhan blong Hem i wok gud? Maet yu nid tu blong tingting long olsem Hem i bin givhan long yu. ?Olsem wanem nao yumi save folem eksampol blong hem? (Luk tu long 3 Nifae 18:24–25 mo 28–32.)
Luk tu long “Jesus Christ Has Compassion and Heals the People” (vidio), Gospel Laebri.
Traem blong tingting se bae i olsem wanem blong harem Sevya i stap prea from yu. ?Olsem wanem nao eksperiens ia i afektem hao yu prea? Tingting hevi long hemia taem yu stap stadi long 3 Nifae 17:13–22; 18:15–25; mo 19:6–9, 15–36. ?Wanem nao yu lanem aot long eksampol blong Jisas Kraes mo ol tijing blong Hem abaot prea? Tingting blong lukaotem ol niu tingting long olsem wanem, wetaem, wea ples, blong hu mo from wanem blong prea. ?Wanem moa niu tingting yu kasem aot long ol ves ia?
Mi save tingting abaot Jisas taem mi stap tekem mo kakae sakramen.
Taem yumi mekem samting oltaem, i save kam pat blong wan samting we yumi mekem evri dei. Samtaem yumi mekem be yumi no tingting blong mekem. ?Olsem wanem yu save stopem hemia blong i hapen wetem evri wik blong odinens blong sakramen miting? Taem yu stap ridim 3 Nifae 18:1–12, tingting hevi long, hao nao yu save “fulap” wetem spirit evri taem yu kakae sakramen (luk long 3 Nifae 20:1–9). Long ol ves 5–7, 11, ?wanem nao ol samting yu mas “oltaem” mekem? Maet yu wantem blong tingting hevi long from wanem Jisas i givim long yumi odinens blong sakramen—mo sapos sakramen i winim stamba tingting blong Hem long laef blong yu. ?From wanem sakramen i tabu long yu?
Long mesej blong hem “Always Remember Him” (Liahona, Feb. 2018, 4–6), Presiden Henry B. Eyring i givim “tri tingting long olsem wanem yu savr tingbaot hem evri wik taem yu tekpat long tabu sakramen.” ?Wanem nao i pulum tingting blong yu abaot tingting ia? ?Wanem nao yu save mekem blong mekem wosip blong yu long sakramen long wik ia i kam moa gud mo truaot long wik?
?Wanem nao yu save mekem blong wosip we i gat tru mining? Yu save askem yuwan ol kwestin olsem: ?Olsem wanem nao sakrifaes blong Sevya i gat mining long laef blong mi? “?Wanem nao mi stap mekem gud olsem wan disaepol blong Hem, mo wanem nao mi save mekem blong kam moa gud?”
Luk tu long Matthew 26:26–28; Jeffrey R. Holland, “Behold the Lamb of God,” Liahona, May 2019, 44–46; “As Now We Take the Sacrament,” Hym, magasin 169; “Jesus Christ Introduces the Sacrament” (vidio), Gospel Laebri; Gospel Topik, “Sacrament,” Gospel Laebri.
Givim taem blong stap tingting hevi. Samtaem, blong stadi olgeta skripja i joen wetem blong rid, prea mo tingting hevi. Taem yu letem wan kwaet taem blong tingting mo toktok wetem God abaot wanem yu stap lanem, yu save leftemap paoa blong toktok blong Hem long laef blong yu.
Sapos yu gat wan fren we i no save wan samting abaot Jisas Kraes be i save nomo se yu stap folem Hem. ?Wanem nao yu fren blong yu save talem abaot Hem, tru long ol aksen blong yu? ?Hem i minim wanem long yu blong “leftemap laet blong yufala i save saen long wol.” (3 Nifae 18:24) ?Wanem narafala invitesen we Sevya i givim long 3 Nifae: 18:22–25 we i save helpem yu holem laet ia?
Luk tu long Bonnie H. Cordon, “That They May See,” Liahona, May 2020, 78–80.
Ol disaepol blong Jisas Kraes oli lukaotem blong kasem presen we i Tabu Spirit.
Tingbaot ol prea we yu jes mekem. ?Wanem nao ol prea oli tijim yu abaot ol dip filing blong hat blong yu? Afta we oli spenem wan dei wetem Sevya, bigfala grup blong ol pipol oli “bin prea from samting we oli wantem tumas”—presen we i Tabu Spirit (3 Nifae 19:9). ?From wanem presen ia we i Tabu Spirit i impoten tumas? Taem yu stap ridim olgeta skripja ia, tingting hevi long hamas nao, yuwan, yu wantem kampani blong Tabu Spirit. ?Olsem wanem nao yu save askem strong kompanionsip ia?
Blong kasem moa aedia,luk long namba blong manis ia Liahona mo Blong Ol Yut Oli Kam Strong magasin.
Sevya i lavem wanwan long ol pikinini blong Papa long Heven.
Yu save yusum wan pikja olsem ia o vidio ia “Jesus Christ Prays and Angels Minister to the Children” (Gospel Laebri)blong helpem pikinini blong yu pikjarem stori insaed long 3 Nifae 17. Ridim ol sentens o ol ves long 3 Nifae 17 we i tokbaot bigwan lav we Sevya i gat long ol pipol (olsem ol ves7 mo 20–25). Invaetem ol pikinini blong dro wan pikja blong olgetawan wetem Jisas. Taem oli mekem olsem, helpem olgeta blong tingting long sam wei we Jisas i bin soem lav we Hem i gat long olgeta.
Pikja
Jisas i stap blesem ol pikinini
Luk Ol Smolwan blong Yufala,, i kam long Gary L. Kapp
Mi save tingting abaot Jisas taem mi stap tekem mo kakae sakramen.
Maet yu wantem blong invaetem ol pikinini blong oli talem long yu wanem nao i stap hapen long taem blong sakramen. Afta yu save ridim 3 Nifae 18:1–12 mo askem ol pikinini blong yu blong leftemap han taem oli harem wan samting we yumi mekem tedei. ?Wanem nao Jisas Kraes i wantem yumi blong “tingbaot” o tingting long hem long taem blong sakramen (luk long 3 Nifae 18:7, 11
Singsing tugeta wan singsing, olsem “A Child’s Prayer” (Children’s Songbook, 12–13), i wan gud wei blong helpem ol pikinini blong yu tingbaot from wanem yumi prea. Yu mo ol pikinini blong yu save rid long 3 Nifae18:18–21 mo tokbaot wanem Jisas i tijim abaot prea. Invaetem ol pikinini blong yu blong takem long yu olsem wanem oli filim abaot prea we i save helpem olgeta blong serem testemoni blong olgeta abaot prea.
Maet bae oli gat wan gud taem blong lukaotem ol tresa blong ol blesing blong prea. Yu save raetem ol skripja ves ia long wan pis blong pepa mo haedem olgeta.: 3 Nifae 18:15; 3 Nifae 18:20; 3 Nifae 18:21; 3 Nifae 19:9; mo 3 Nifae 19:23. Invaetem ol pikinini blong faenem ol pis pepa ia mo ridim ol ves ia we, oli lukaotem ol samting we Jisas Kraes o ol disaepol blong Hem oli stap tijim abaot prea.
Blong kasem moa aedia, luk long namba blong Fren long manis ia.
Pikja
ol enjel oli raonem Jisas mo ol pikinini blong Ol Man blong Nifae
Ol Enjel oli Bin Givhan long Olgeta, i kam long Walter Rane.
