Blong Oli Save Luk

Ol brata mo sista, ol hat blong yumi i kasem blesing mo kam niu bakegen tru long Spirit we yumi bin filim

Tu handred yia pas, wan laet i saen antap i kamdaon long hed blong wan yang man insaed long wan bus blong ol tri. Long laet ia, Josef Smit i bin luk God Papa mo Pikinini blong Hem, Jisas Kraes. Laet blong Tufala i karemaot tudak long saed blong spirit we i kavremap wol mo poenem rod i go fored blong Josef Smit—mo yumi evri wan. From laet ia we i kamaot long dei ia, yumi save kasem ol blesing we i fulwan we i kam tru long Atonmen blong Sevya blong yumi Jisas Kraes.

Tru long klin fasin blong Restoresen blong gospel blong Hem, yumi save fulap long laet blong Sevya blong yumi. Be, laet ia i no blong yuwan mo mi nomo. Jisas Kraes i bin singaotem yumi blong, “ letem laet blong yufala i saen olsem ia long fored blong ol pipol ia, blong oli save luk ol gudfala wok blong yufala mo leftemap nem blong Papa blong yufala we i stap long heven.”¹ Mi kam blong lavem sot sentens ia “blong oli save luk.” Hem i wan invitesen we i kam long hat blong Lod blong gat strong tingting blong wantem stap helpem ol narawan blong luk rod ia mo afta kam long Kraes.

Taem mi 10 yia, famli blong mifala i gat ona blong invaetem Elda L. Tom Perry blong Kworom blong Olgeta Twelef Aposol taem hem i stap wok long homtaon blong mi.

Long en blong dei, famli blong mifala mo blong Perry i sidaon long salong blong mifala mo kakae apolpae blong mama blong mi we i naes tumas wetem glad, taem Elda Perry i stap tokbaot ol stori abaot ol Sent raon long wol. Mi intres tumas.

I stap let nao taem mama blong mi i singaotem mi i go long kijin mo askem wan simpol kwestin: “Boni, ?yu bin fidim ol faol?”

Hat blong mi i foldaon; Mi no bin mekem. Mi no wantem lego saed blong wan Aposol blong Lod, mi se, ol faol ia oli save livim kakae kasem moning.

Mama i ansa stret se “no.” Stret taem, Elda Peri i kam insaed long kijin, mo wetem hevi mo laod voes blong hem, i askem, “?Mi harem se wan man i nid blong fidim ol faol? ?Boe blong mi mo mi i save folem yu?

!O, i kam wan bigfala glad naoia blong fidim ol faol! Mi ron i go blong karem bigfala yelo toj blong mifala. Wetem bigfala glad, mi lidim rod, jiam ova ol nogud rod i go long haos blong ol faol. Wetem toj i stap swing swing long han blong mi, mifala i pas tru long fil blong kon mo flaoa.

Taem mifala i kasem smol rod blong ples we wota i kros long hem long graon, mi jiam ova long hem mo no tingting gud from mi bin mekem olsem plante naet bifo. Mi fogetem gud se Elda Peri i stap hadwok blong kajap long rod ia we hem i no save gud. Laet blong mi we i stap muvmuv i no helpem hem blong luk rod blong wota ia. From se i nogat laet we i saen stret blong lukluk, hem i stanap stret insaed long wota mo singaot nogud. Wetem fraet, mi tanem raon blong luk niufala fren blong mi i karemaot wetwet leg blong hem long wota mo sak sakemaot wota long hevi sus blong hem.

Wetem wan sus we i gat wota yet insaed, Elda Peri i helpem mi blong fidim faol. Taem mitufala i finis, hem i talem wetem lav, “Boni, mi nidim blong luk rod. Mi nidim laet blong saenem ples we mi stap wokbaot long hem.”

Mi stap saenem laet blong mi be i no long wan wei we mi save helpem Elda Peri. Naoia, blong save se hem i nidim laet blong mi blong faenem rod we i sef, mi mekem laet i saen stret long fored blong ol step blong hem mo mifala i kasem gud haos.

Ol dia brata mo sista blong mi, blong plante yia mi stap tingting hevi long prinsipol we mi lanem aot long Elda Peri. Invitesen blong Lod blong saenem laet blong yumi i no blong saenem olbaot nomo laet ia mo mekem wol i luk delaet moa. I blong stap saenem stret laet, mekem se ol narawan oli save luk rod i go long Kraes. Hem i kam tugeta blong Isrel long saed ia blong vel—we i stap helpem ol narawan blong luk nekis step long fored blong stap mekem mo kipim ol tabu kavenan wetem God.²

Sevya i testifae, “Luk Mi Mi laet; Mi bin mekem wan eksampol blong yufala.”³ Bae yumi lukluk long wan long ol eksampol blong Hem.

Woman long wel i wan Woman Sameria we i no save Jisas Kraes mo plante man oli lukluk hem olsem wan we oli sakemaot hem long sosaeti blong hem. Jisas i mitim hem mo statem wan storian. Hem i toktok long woman ia abaot wota. Afta, Hem i lidim woman ia i go long wan laet we i moa bigwan mo Hem i talemaot Hemwan olsem “wota we i stap laef.”⁴

Kraes i gat bigfala sore mo lav long hem mo save finis ol nid blong hem. Hem i mitim woman ia long long ples we hem i bin stap long hem mo stat blong tokbaot wan samting we evri wan i save gud mo stap yusum oltaem. Sapos Hem i stop long ples ia, bae i wan gudfala eksperiens. Be risal blong hem bae i no mekem woman ia i go long siti blong talemaot, “Yufala i kam luk … : ating hem i Mesaea ya?”⁵ Sloslo, tru long storian, hem i faenemaot Jisas Kraes, mo nomata long pas blong hem, hem i kam wan tul blong laet blong saenem rod blong ol narawan blong luk.⁶

Naoia bae yumi luk long tu defren pipol we oli bin folem eksampol blong Sevya blong saenem laet. I no longtaem i pas, fren blong mi Kevin i bin sidaon narasaed long wan bisnis eksekutiv long dina [tebol]. Hem i wari long wanem blong tokbaot blong tu aoa. Folem smol voes, Kevin i askem, “Talem long mi abaot famli blong yu. ?Oli kam wea?

Gudfala man ia i save smol nomo abaot famli histri blong hem, so, Kevin i pulumaot fon blong hem mo talem, “Mi gat wan ap we i konektem ol pipol i go long ol famli blong olgeta. Bae yumitu luk wanem yumitu save faenem.”

Afta long wan longfala storian, niufala fren blong Kevin i askem, “?From wanem famli i impoten tumas long jos blong yu?”

Kevin i ansa simpol nomo: “Mifala i biliv se yumi gohed blong laef afta we yumi ded. Sapos mifala i faenemaot ol apu blong mifala mo tekem nem blong olgeta i go long wan tabu ples we oli singaotem tempol, mifala i save mekem ol mared odinens we bae i kipim famli blong mifala tugeta iven afta long ded.”⁷

Kevin i stat wetem wan samting we hem mo niu fren blong hem i gat we i semmak. Afta, hem i faenem wan wei blong witnes abaot laet mo lav blong Sevya.

Seken stori i abaot Ela, wan kolej basketbol pleya. Eksampol blong hem i stat taem hem i kasem misin kol blong hem taem hem i stap long skul. Hem i bin jusum blong openem kol blong hem long fored blong tim blong hem. Olgeta oli no save eni samting abaot Jos Ia blong Jisas Kraes mo no andastanem tingting blong hat blong Ela blong go givim seves. Hem i ripripitim prea blong save olsem wanem blong eksplenem misin kol blong hem long wan wei we bae tim blong hem i save filim Spirit. ?Ansa blong hem?

“Mi mekem wan PaoaPoen sot klip,” Ela i talem, “blong pulum tingting.” Hem i talem long olgeta abaot olsem wanem i posibol blong givim seves long wan long ol 400 plas misin mo lanem wan lanwis. Hem i tokbaot gud ol taosen misinari ia we oli stap givim seves naoia. Ela i endem wetem wan pikja blong Sevya mo sot testemoni ia: “Basketbol i wan long ol impoten samting long laef blong mi. Mi muv krosem kantri mo lego famli blong mi blong plei blong koj ia mo wetem tim ia. Tu samting nomo we i moa impoten long mi bitim basketbol hem i fet mo famli blong mi.”⁸

Naoia, sapos yu stap tingting, “Hemia ol bigfala eksampol blong 1,000-Watt, be mi wan 20-Watt balb,” tingabaot se Sevya i testifae, “Mi mi laet we yufala i mas leftemap.”⁹ Hem i rimaenem yumi se bae Hem i tekem laet i kam sapos yumi jes poenem ol narawan i go long Hem.

Yu mo mi i gat inaf laet blong serem naoia. Yumi save saenem nekis step blong helpem wan narawan blong kam kolosap moa long Jisas Kraes, mo afta nekis step, mo nekis wan.

Askem yuwan, “?Huia i nidim laet we yu gat, blong oli faenem rod we oli nidim, be oli no save luk?”

Ol dia fren blong mi, ?from wanem blong stap saenem laet blong yumi i impoten tumas? Lod i bin talem long yumi se “i gat plante yet long wol ia … mo oli no save faenem trutok from nomo oli no save weaples blong faenem trutok.”¹⁰ Yumi save help. Yumi save gat strong tingting long hat blong saenem laet blong yumi mekem se ol narawan oli save luk. Yumi save mekem invitesen ia i go moa bigwan.¹¹ Yumi save wokbaot long rod ia wetem olgeta we oli stap tekem wan step i go fored long Sevya, nomata we i had. Yumi save karem Isrel i kam tugeta.

Mi testifae se Lod bae i givim paoa long evri smol hadwok blong yumi. Tabu Spirit bae i mekem yumi save wanem blong talem mo mekem. Blong traem ol samting ia i nidim yumi blong kamaot long ples blong kamfot blong yumi, be yumi save tu, se bae Lod i helpem yumi blong saenem laet blong yumi.

Miwan mi glad tumas long laet blong Sevya we i gohed blong lidim Jos ia tru long revelesen.

Mi invaetem yumi evriwan blong folem eksampol blong Jisas Kraes mo blong save luksave olgeta we oli stap raon long yumi wetem wan hat we i fulap long sore. Lukaotem mo prea from ol janis blong yu save mekem laet blong yu i saen mekem se ol narawan oli save luk rod i go long Jisas Kraes. Promes blong Hem i bigwan: “Man we i biaen long mi, bambae hem i no save wokbaot long tudak. Hem bambae i gat laet blong laef.”¹² Mi testifae se Sevya blong yumi, Jisas Kraes, i rod ia, i trutok, i laef, laet, mo lav blong wol. Long nem blong Jisas Kraes, amen.