Moronaai 1–6

Ngkana ko wareka Moronaai 1tera ae kaungako n ana kakaonimaki Moronaai nakon te Uea ao nakon ana wewete? Tera kawai tabeua are e na kona iai te aomata n “kakewea Kristo”? (Moronaai 1:2–3). Iangoia raoi bwa ko na kanga ni kakaonimaki nakon Iesu Kristo n aekakin anne, e ngae ngkana ko kaitra ma tain kangaanga ao kakaitara.

Moronaai e birinako ni kamanoa maiuna ngke e korei mwakoro aikai. Bukin tera bwa e na tabeaianga ni koroboki ni kabwarabwarai aron karaoan bwaai n te katooto n aron karaoan otenanti? Iangoa aei ngkai ko wareka Moronaai 2–6. Bukin tera n am iango kabwarabwara aikai a kakaawaki iroun te Uea? Aikai tabeua titiraki ake a na kona ni kaira am kamatebwai:

Te Kamatoa (Moronaai 2; 6:4).Tera ana kaetieti te Uea n Moronaai 2:2 ae reireiniko taekan te otenanti n te kamatoa? Kona kanga ni kabwarabwara te bwai ae nanonaki “n rotaki ma ni kaitiakaki ni mwaakan te Tamnei ae Raoiroi”? (Moronaai 6:4).

Te katabu n te Nakoanibonga (Moronaai 3).Tera ae ko kunea n te mwakoro aei are e na kona ni buoka temanna bwa e na katabuaki nakon te nakoanibonga? Tera ae ko kunea ae e na kona ni buoka temanna ni karaoa te katabu?

Te toa (Moronaai 4–5; 6:6).Tera ae ko kona ni karaoia ni karika te toa bwa te kanikina ae kaira maium n tamnei n am wiiki anne?

Bwabetito (Moronaai 6:1–3).Tera ae kona karaoia n reitanako kakoroan nanon kainibaire ibukin te bwabetito?

Tamnei

e karekea te kakabwaia te ataeinnaine

Ni boboto iaon te bwai are ko a tia n reiakinna, ko na kanga ni bitii arom ake ko iangoi, ni ibuobuoki iai, ke ni katauraoia tabeman ibukin otenanti aikai?

Taraa naba Reirei ao Berita aika Tabu 84:20.

Ko bae n tia n ongoongo taekan te tataro n toa n taai aika a mwaiti, ma kona kanga n tainako n iangoa raoi nanona? Tao ko kona ni kataia ni korei taekan tataron toa ni kauoua man am ururing. Ngkanne katitabooa are ko a tia ni koreia ma Moronaai 4:3 ao 5:2. Iai te bwai ae ko noria iaon tataro aikai ae aki nonoraki mai imwaina?

Iangoia ni karina anenen te toa n am kamatebwai, n aron “In Memory of the Crucified” (Kuna n Taromauri, nambwa. 190).

Ana rinerine temanna n iriira Kristo e bon nakon temanna ma temanna, ma raora ni kakoaua a kona ni buokiira ni kateimatoaira “n te kawai ae eti,” (Moronaai 6:4–5). Tera ae a karaoia kain te Ekaretia n ana tai Moronaai ni kakorakoraia imarenaia? Ngkana ko wareka Moronaai 6:4–9iangoi inanom kakabwaia ake a roko ake a “warekaki ibuakoia aomatan ana ekaretia Kristo” (Moronaai 6:4).

Kona bae n iangoia naba aomata ake a iriiri n am uoote ke am mwaanga. Iai ae ko ataia ae e na kainnanoa te tangira ae onoti—tao temanna ae boou ke ae tibwa oki? Kona kanga ni kona ni buoka aia taneiai n te taromauri bwa e na riki n ai aron are e kabwarabwara Moronaai? (ibukin iango, taraa My Covenant Path ke “Strengthening New Members” videos in the Gospel Library). Kona bae ni kunei rongorongo ni kaunganano n teuana mwakoron ana marooro Beretitenti Dallin H. Oaks “Kainnanoan te Ekaretia” (Riaona, Nov. 2021, 24–25).

Ngkai ko iangoia bwa tera ae e nanonaki n “kamwarakeaki n ana taeka te Atua aika a raoiroi” (Moronaai 6:4), e kona n ibuobuoki ibukin kamwarakean te aroka anne ke kainnanon te merimeri—ao tera ae e na kona n riki ngkana e katinanikuaki. Kakaai n Moronaai 6:4–9 iango ibukin arom ni kona ni buoka “kamwarakeaia” tabeman n te maiu n tamnei. A kanga raom aika ana reirei ni buokiko ni kamwarakeko?

E aki matata nakoia aomata nako bwa bukin tera e kakaawaki bwa kona “warekaki ibuakoia aomata aika kain ana ekaretia Kristo” ao ni “ikotaki ni kaitiboaki n tainako” ni bootakin te Ekaretia. Kona kanga ni kabwarabwara bwa bukin tera ko kakaitau n riki bwa kain ana Ekaretia Iesu Kristo? (taraa mwakoron teuana ana marooro Beretitenti Oaks “Kainnanoan te Ekaretia”).

• Te Tamnei ae Raoiroi ke te Tamnei e taekinaki tabeua te tai n Moronaai 2–6. Tao ko kona n tuangiia am ataei bwa a na kakaai ni katoai kiibu nako ake a taekina taekana, wareki kibu akanne, ao karinani bwaai ake ko reiakin n taekan te Tamnei ae Raoiroi. Ko kona naba n tibwaia imarenami ami taneiai ngke kam namakina ana wirikiriki te Tamnei.

• Ni warekan te tataro n toa ma natim e kona ni kaira maroroakinan aron karekean te namakin ae nano riki n te toa. E kona ni buokiia bwa a na iangoia bwa raoraoia e roko n tain te bootaki n toa n te moan tai. Ti nakanga ni kabwarabwara nakoia raoraora bwa tera te toa ao bukin tera ngkai e tabu? Kaungaia ami ataei bwa a na kabonganai man Moronaai 4 ke 5 n aia kabwarabwara. Ataei ake a uarereke riki a kona ni kabongana te iteraniba ibukin waaki ni kakukurei n te wiiki aei ke Gospel Art Book, no. 108.

• Iangoia n ikotaki n anenea te kuna are e na buokiia natim n iangoa taekan te Tia Kamaiu (n aron “Reverently, Quietly,” Children’s Songbook, 26). Ko kona naba ni kataneiai n tekateka ma te karinerine inanon tain te toa.

• Antai aika a kona ni bwabetitoaki? Buokiia natim ni karekea kaekaan te titiraki aei ni Moronaai 6:1–3. Tera ae nanonaki ni karekean “te nano ae uruaki ao te tamnei ae raraoma”? (Moronaai 6:2). E kanga ni buokiira aei ni katauraoira ibukin te bwabetito? Iangoia n tuangiia natim bwa a na kanga ni katauraoi ibukin te bwabetito.

• A ataia natim bukin tera ko tatangiria n nako n taromauri? N warekan Moronaai 6:4–6, 9 e kona ni karekea aia tai n ikotaki ni maroroakin tabeua bwaai ake ti karaoi n te ekaretia. Tao a kona ni korei tamneia ni karaoan bwaai aikai (n aron te tataro, reirei, anene, ao anaakin te toa).

• Imwiin warekan Moronaai 6:4 ikotaki, ngkoe ma natim kam kona n taraa te tamnei ke katotongan amwarake aika kanuai ao ni kabotaua ma kamwarakean rabwatara nakon te “kamwarakeaki n ana taeka te Atua aika a raoiroi.” Ko kona naba ni mataku n te witeo “Children Sharing the Gospel” (Gospel Library).