Bifo Moronae i endem histri rekod ia, we tedei yumi save long hem olsem Buk blong Momon, wetem ol las toktok blong hem, hem i bin serem trifala mesej we i kam long papa blong hem, Momon: wan toktok i go long olgeta we “[oli] folem Kraes wetem pis,” (Moronae 7:3) mo tu leta we Momon i bin raetem i go long Moronae. Maet Moronae i bin putum ol trifala mesej ia insaed long Buk blong Momon from se hem i bin luk finis ol semmak samting bitwin ol denja blong taem blong hem mo taem blong yumi. Taem hem i bin raetem ol toktok ia, ol pipol blong Ol Man blong Nifae, oli tanem baksaed long Sevya. Plante long olgeta “oli bin lusum lav blong olgeta, wan i go long narawan” mo oli glad long “evri samting be i no long samting we i gud” (Moronae 9:5, 19). Be yet, Momon i luk se i gat ples blong gat hop yet, i stap tijim yumi se, hop, i no minim blong sarem ae long samting, o blong no tingting hevi long ol problem blong wol. Hop i minim blong stap gat fet long Papa long Heven mo Jisas Kraes, we paoa blong Tufala i bigwan mo i no gat en bitim ol problem ia. Hem i minim blong “holemtaet evri gud samting” (Moronae 7:19). Hem i minim blong letem Atonmen blong Jisas Kraes mo “hop blong glori blong hem, mo blong laef we i no save finis, i stap long maen blong yu blong oltaem” (Moronae 9:25).
Laet blong Kraes i helpem mi blong save trutok long giaman toktok.
Plante pipol oli wantem save, “Olsem wanem nao olgeta mi save talem save se toktok ia i kam long God o tingting blong mi wan nomo?” o “Wetem plante giaman tedei, olsem wanem nao mi save wanem we i raet o rong?” Ol toktok blong Momon long Moronae 7 i gat samfala prinsipol we yumi save yusum blong ansa long ol kwestin ia. Lukaotem olgeta speseli long ves 12–20. Yu save yusum ol tru tok ia blong helpem yu blong lukluk bak long ol mesej mo ol eksperiens we yu bin kasem long wik ia.
From Jisas Kraes, Mi save “holemtaet evri gud samting.”
Momon i askem wan kwestin we i impoten long taem blong yumi tedei: ?“Olsem wanem nao i posibol [blong] holemtaet evri gud samting?” (Moronae 7:20). Hem i bin tij abaot fet long Jisas Kraes, hop, mo bigfala lav. Taem yu ridim ves 20–48, luk long olsem wanem wanwan fasin ia oli helpem yu blong faenem mo “holemtaet” evri gud samting we oli kam long Jisas Kraes. ?From wanem ol fasin ia oli wan nid blong wan disaepol blong Jisas Kraes?
Luk tu long “Mormon’s Teachings about Faith, Hope, and Charity” (video), Gospel Library.
Momon i luksave se fet mo hop blong yumi long Jisas Kraes i lidim yumi blong gat bigfala lav. ?Be wanem ia bigfala lav? Yu save raetem Bigfala lav hem i … mo afta ridim Moronae 7:44–48, mo stap lukaotem ol toktok o sentens we i save finisim sentens ia. Taem yu finis, lukluk blong jenisim toktok ia Bigfala lav mo putum nem ia Jisas Kraes. ?Wanem nao hemia i tijim yumi abaot Sevya? ?Olsem wanem nao Jisas Kraes i bin soem bigfala lav blong Hem? Tingting long ol eksampol long skripja mo laef blong yuwan.
Presiden Dallin H. Oaks i luk hemia: “Risen from wanem bigfala lav i neva mestem rod, mo risen from wanem bigfala lav i moa bigwan bitim evri gudfala aksen, … i from we bigfala lav, ‘klin lav blong Kraes’ [Moronae 7:47], i no wan aksen be i wan wei blong stap, o i wan fasin insaed long yu. … Jareti o bigfala lav, i wan samting we wan i kam olsem” (“The Challenge to Become,” Ensign, Nov. 2000, 34). Blong sapotem toktok storian ia, kworom o klas i save ridim samfala pat blong mesej blong Elda Massimo De Feo “Stret Lav: Tru Saen blong Evri Tru Disaepol blong Jisas Kraes” (Liahona, May 2018, 81–83). ?Olsem wanem nao bigfala lav i afektem fasin blong stap olsem wan disaepol? Olsem wanem nao yu “hang long bigfala lav”? (ves 46).
Luk tu long 1 Korin 13:1–13; Ita 12:33–34; “Love One Another,” Hym, no. 308; “Charity: An Example of the Believers” (video), Gospel Library; Gospel Topics, “Charity,” Gospel Library.
Yusum samting long lesen blong yu. Tingting long wan stul we i gat tri leg bae i save helpem yu blong andastanem moa abaot rilesensip bitwin fet, hop, mo bigfala lav (luk long Dieter F. Uchtdorf, “The Infinite Power of Hope,” Liahona, Nov. 2008, 21–24).
Oposit blong Mesej blong Moronae abaot lav long Moronae 7:44–48, Seken leta blong Momon i go long Moronae i ingkludum ol woning agensem samting we plante i traehad wetem tedei—kros. Olsem we i stap long Moronae 9:3–5, wanem nao samfala risal blong kros blong Ol Man blong Nifae? Wanem ol woning we yumi save tekem aot long ves 3–5, 18–20, 23?
Luk tu long Gordon B. Hinckley, “Slow to Anger,” Liahona, Nov. 2007, 62–66.
Mi save gat hop long Kraes, i nomata long ol situesen blong mi.
Afta we hem i tokbaot fasin nogud we hem i bin luk, Moronae i talem long boe blong hem se bae hem i no mas harem nogud. ?Wanem nao i tajem yu abaot mesej blong hop we i kam long Momon? ?Hem i minim wanem long yu blong Kraes i “leftemap yu”? Wanem fasin blong Kraes mo wanem prinsipol blong gospel blong Hem nao ‘i stap long maen blong yu’ mo i givim hop long yu? (Moronae 9:25).
Sapos mi gat fet long Jisas Kraes, mi save mekem evri samting we Hem i nidim mi blong mekem.
Lukluk long sam pikja tugeta we i soem wan man long ol skripja we i stap mekem wan impoten samting (lukaotem eksampol long, Gospel Art Book, nos. 19, 70, 78, 81). Olsem wanem nao fet long Kraes i mekem wan jenis insaed long ol eksampol ia? Yu mo ol pikinini blong yu i save ridim Moronae 7:33, lukluk long wanem yumi save mekem taem yumi gat fet long Jisas Kraes. Yu save serem eksperiens wetem evriwan taem God i bin blesem yu wetem paoa blong mekem wanem Hem i wantem.
Blong stap biliv long Jisas Kraes i save givim hop long mi.
Taem yu ridim Moronae 7:41 long ol pikinini, askem olgeta blong leftemap han blong olgeta taem olgeta oli harem wan samting we Momon i bin talem we yumi mas gat hop from. Talem long ol pikinini abaot hop we yu stap filim from Jisas Kraes. .
Yu mo ol pikinini blong yu i save tingting long wan man we ating i stap gotru long wan hadtaem wetem wan samting. Ating ol pikinini blong yu oli save droem wan pikja blong man o woman, o pikinini ia, we i mekem hem i rimemba blong gat hop long Jisas Kraes.
Mi save gat hop long Jisas Kraes, iven long taem blong ol tes we oli had.
Blong tijim ol pikinini blong yu abaot hop long Jisas Kraes, yu save fulumap wan klia kontena wetem wota, mo sakem tu samting insaed long hem—wan we i flot mo narawan we i draon. Taem yu ridim tugeta Moronae 7:40–41 mo 9:25–26, ol pikinini blong yu oli save lukluk long wanem nao hop i save mekem blong yumi. Olgeta oli save komperem samting we i flot long wan man we i gat hop long Kraes. ?Olsem wanem nao Hem i stap “leftemap [yumi] antap” taem yumi fesem ol tes we oli had? Helpem ol pikinini blong yu oli tingting long samfala wei we oli save kipim Sevya mo ol tijing blong Hem blong leftemap tingting “ long maen blong [olgeta] oltaem.”
Wan singsing abaot lav, olsem “Love One Another” (Children’s Songbook, 136), i save statem wan storian abaot wanem ia bigfala lav. Yu save ridim o talem i sot Moronae 7:47 mo invaetem ol pikinini blong yu blong droem ol pikja blong olgetawan we i stap soem lav long narafala man. Givim tingting long olgeta se bae oli putum pikja blong olgeta long wan ples we bae i rimaenem olgeta blong lavem ol narawan olsem we Jisas i mekem.
?Olsem wanem nao yu save mekem ol pikinini blong yu oli laekem blong lukaotem mo gro long klin lav blong Kraes long laef blong olgeta? Yu save helpem olgeta blong tingting long sam wei we Jisas i bin soem bigfala lav, (luk, eksampol long, Luk 23:34; Jon 8:1–11; Ita 12:33–34). ?Olsem wanem nao yumi save folem eksampol blong Hem?
Blong moa aedia, luk long spesel namba blong manis ia long Fren magasin.
Pikja
Jisas Kraes
Pikja blong Kraes we i Sevya, i kam long Heinrich Hofmann
