Glad mo Traehad blong Laef long Saed blong Spirit
Taem we, long laef blong yumi, yumi stap lukluk nomo long Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi.
Ol dia brata mo sista blong mi. Tedei, mi wantem toktok raon long wan prinsipol ia we i ki blong traem blong traehad blong laef long saed blong spirit. Hem i wan prinsipol we bae i kam moa impoten taem ol trabol mo ol giaman oli kam bigwan raon long yumi.
Hemia oli ol las dei, so i no gat wan long yumi i sapos blong sapraes taem hem i stap luk se profesi i stap kamtru. Plante profet, olsem Aesea, Pol, Nifae mo Momon oli bin luk finis se ol denja taem ia bae oli kam,1 se bae long taem blong yumi, ful wol bae i muvmuv plante,2 se “bae man i tingbaot olgeta nomo, … oli no man blong gat sore long man, … oli man we oli wantem tumas ol samting we oli stap harem gud long hem i winim we oli stap lavem God,”3 mo plante bae oli kam ol wokman blong Setan we i stap sapotem wok blong enemi.4 I tru, yu mo mi i “stap faet agens ol devel we oli stap olbaot long wol ia. Hemia ol lida blong olgeta, mo olgeta we oli gat paoa mo ol jif blong olgeta we oli stamba blong ol fasin blong tudak long wol ia.”5
Taem ol faet bitwin ol nesen oli stap kam plante moa, taem ol teroris oli haed mo kilimded man we i no mekem rong, mo taem korapsen long evri samting, bisnis i go kasem gavman i olsem nating nomo evri dei, ?wanem nao i save helpem yumi? ?Wanem i save helpem wanwan long yumi wetem ol trabol blong yumiwan mo wetem ol raf jalenj blong stap laef long ol las dei ia?
Profet Lihae i bin tijim wan prinsipol blong traehad blong laef long saed blong spirit. Faswan, tingting long situesen blong hem: Oli mekem nogud hem from hem i prijim trutok long Jerusalem mo Lod i givim oda long hem blong livim evri ting blong hem mo ronwe wetem famli blong hem i go long waelples. Hem i bin laef long tenet mo i kakae wanem kaekae we hem i save faenem long rod i go long wan ples we hem i no save; mo hem i lukluk tufala boe blong hem, Leman mo Lemyul, tufala i agensem ol tijing blong Lod mo go agensem tufala brata blong tufala, Nifae mo Sam.
I klia we Lihae i save wanem ia, agens, wari, hat i soa, sobodi, filim nogud, mo harem nogud. Be yet, hem i no holemtaet hem mo i talem klia wan prinsipol we Lod i talemaot long hem: “Ol man oli stap, blong oli save gat glad.”6 !Traem tingting! !Aot long evri toktok we hem i bin save yusum blong tokbaot stamba tingting mo wanem i laef blong yumi long wol ia, hem i jusum toktok ia, glad!
Laef i fulap long rod we i go raon mo rod we i fas, mo evri kaen tes mo jalenj. Wanwan long yumi bae i gat taem we tingting i fasfas, i wari, mo i lusum hop we i stap kakae yumi. Be yet, ?yumi stap ia blong gat glad?
!Yes! Bigfala ansa i, !yes! ?Be olsem wanem nao i posibol? Mo wanem bae yumi mekem blong klemem glad ia we Papa long Heven i putum i stap blong yumi?
Eliza R. Snow, seken Jeneral Presiden blong Rilif Sosaeti, i givim wan intresting ansa. From oda blong gavman blong Misuri blong ronemaot ol memba blong Jos, we oli putumaot long stat blong winta 1838,7 Eliza mo ol narafala Sent, oli fosem olgeta blong ronwe long stet ia long winta ia. Wan naet, famli blong Ilaesa i stap long wan wud haos we ol rifuji Sent oli bin stap yusum. Plante samting we i blokem ol hol, oli karemaot mo oli yusum blong bonem faeawud, mekem se i gat hol bitim ol wud, we oli bigwan blong puskat i pas long hem. Ples i kolkol tumas, mo kaekae i aes nomo i stap.
Long naet ia, samples 80 man oli hip insaed long smol wudhaos ia, we i 6.1 skwea mita. Plante oli sidaon o stanap ful naet blong traem blong stap wom. Aotsaed, i gat wan grup blong ol man we oli spendem naet raon long wan bigfala faea, mo sam oli singsing ol hym, mo ol narawan oli rusum poteto we i aes. Eliza i raetem: “I no gat man i komplen—evriwan i hapi, mo sapos man i luk olgeta, bae oli tekem se mifala i man blong lukaotem lafet be i no wan grup we oli ronemaot olgeta.”
Ripot blong Eliza we i tokbaot naet ia we man i taed, mo i kolkol kasem bun, i talem tu se i gat hop. Hem i se: “I bin wan naet blong lafet. I no gat nara man moa, be ol Sent nomo oli save hapi long eni kaen situesen.”8
!Hemia nao! Ol Sent oli save hapi long eni kaen situesen. !Yumi save filim glad iven taem dei i nogud, wik i nogud, o iven taem ful yia i nogud!
Ol dia brata mo sista blong mi. Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.
Taem we, long laef blong yumi, yumi stap lukluk nomo long plan blong God long saed blong fasin blong sevem man we Presiden Thomas S. Monson i jes tijim yumi long hem, mo Jisas Kraes, mo Gospel blong Hem, yumi save filim glad, nomata wanem i stap hapen—o i no stap hapen—long laef blong yumi. Glad i kam long Hem mo from hem. Hem i stamba blong evri glad. Yumi filim long taem blong Krismes taem yumi singsing: “Glad i go long wol, Lod i stap kam.”9 Mo yumi save filim ful yia. Long ol Lata-dei Sent, !Jisas Kraes nao i glad ia!
Hemia nao from wanem ol misinari oli aot long hom blong olgeta blong prijim gospel blong Hem. Gol blong olgeta i no blong leftemap namba blong ol memba blong Jos. !Be ol misinari oli tij mo baptaesem man10 blong tekem glad i go long ol pipol long wol!11
Semmak olsem we Sevya i givim pis we i “bitim save blong yumi,”12 Hem i givim tu wan glad we i strong, i dip, mo i longwan we i bitim stret tingting blong man o wanem man i save andastanem. Eksampol. I luk se i no posibol blong filim glad taem pikinini blong yu i kasem wan sik we i no gat meresin, o taem yu lusum wok, o taem hasban o waef i no fetful. Be yet, hemia nao glad we Sevya i givim. Glad blong Hem i stap oltaem, i talem stret long yumi se ol hadtaem blong yumi bae oli “blong smol taem nomo,”13 mo bae i blong gud blong yumi.14
Nao, ?olsem wanem nao yumi save klemem glad? Yumi save stat taem yumi “luk long Jisas se Hem i stap long stat i go kasem en blong stamba blong bilif blong yumi,”15 “long saed blong evri tingting blong yumi.”16 Yumi save talem tangkyu long Hem oltaem long ol prea blong yumi mo taem yumi kipim ol kavenan we yumi bin mekem wetem Hem mo Papa blong yumi long Heven. Taem se Sevya i kam moa ril long yumi mo taem yumi stap askem glad blong Hem, bae glad blong yumi i kam antap.
Glad i gat paoa, mo taem yumi lukluk nomo long glad i tekem paoa blong God i kam long laef blong yumi. Semmak long evri samting, Jisas Kraes i stamba eksampol blong yumi, “taem hem i go blong i ded long kros, hem i luksave finis we bambae i save harem gud.”17 !Tingting long hemia! Blong Hem i stap gotru long ol bigfala nogud eksperiens ia we man i eva fesem long wol ia, !Sevya i bin lukluk nomo long glad!
Mo ?wanem glad nao i bin stap long fored blong Hem? Yes, i bin gat glad blong kam klin, blong hilim man, mo blong mekem yumi kam strong moa; glad blong pem sin blong evriwan we bae i sakem sin; glad blong mekem i posibol blong yu mo mi blong gobak hom—we yumi klin mo inaf—blong stap laef wetem Papa mo Mama blong yumi long Heven mo ol famli.
Sapos yumi lukluk nomo long glad we bae i kam long yumi, o long olgeta we yumi lavem, ?wanem nao bae yumi save stap strong long hem we yumi luk se i bigwan tumas, i soa, i mekem yumi fraet, o i no posibol nomo?
Wan papa, we i bin stap long denja long saed blong spirit i lukluk long glad blong kam klin mo kam stret wetem Lod—glad blong kam fri long rong mo sem—mo glad blong gat pis long maen. Hemia i bin givim hem strong paoa long tingting blong konfes fulwan long waef mo bisop blong hem long problem blong hem wetem ponografi, mo we hem i no bin fetful. Naoia, hem i stap mekem evri samting we bisop i givim advaesem blong mekem, mo i traehad wetem ful hat blong hem blong winimbak tras blong waef blong hem we hem i lavem tumas.
Wan yang woman i lukluk nomo long glad blong stap klin long saed blong seks blong helpem hem blong fesem ol jik blong ol fren blong hem taem hem i wokaot long wan strong mo popula ples, be i wan denja long spirit.
Wan man we i stap daonem waef blong hem oltaem, mo i stap kros bigwan long ol pikinini blong hem, i lukluk nomo blong gat glad blong stap klin inaf blong kasem Tabu Spirit olsem fren blong hem oltaem. Hemia i pusum hem blong sakemaot man we i laekem samting blong wol,18 we fulap taem hem i stap folem, mo i bin mekem ol jenis we i nid blong mekem.
Wan gudfala fren blong wok i tokbaot long mi ol twante yia we oli pas, blong hevi trabol. Hem i talem se: “Mi bin lan blong safa wetem glad. Safaring blong mi i draon insaed long glad blong Kraes.”19
?Wanem nao bae yu mo mi bae i save stap strong o gotru long hem taem yumitu stap lukluk nomo long glad we i stap finis long fored blong yumitu?20 ?Wanem nao bae yumitu sakem sin from? ?Wanem wiknes bae i kam paoa blong yumitu?21 ?Wanem samting we bae oli stretem yumitu long hem we bae i kam wan blesing?22 ?Wanem nogud filing, o trabol, bae yumitu tanem i blong gud blong yumitu?23 ?Mo wanem seves we i gat jalenj we bae yumitu mekem long Lod?24
Taem yumi stap wok strong blong lukluk nomo long Sevya, mo afta, folem rod blong Hem blong lukluk nomo long glad, bae yumi nidim blong stap longwe long ol samting ia we i save stopem glad blong yumi. Tingbaot Koriho, ?man we i agensem Kraes? I taltalemaot ol giaman tok abaot Sevya; Koriho i aot long wan ples i go long nara ples kasem taem we oli tekem hem i go long fored blong wan pris we i bin askem hem: “?From wanem yu stap go olbaot blong prapa spolem gud ol wok blong Lod? ?From wanem yu tijim pipol ia se bae i no gat wan Kraes, blong stopem gud glad blong olgeta?”25
Eni samting we i agensem Kraes o doktrin blong Hem, bae i stopem glad blong yumi. Hemia i tekem tu ol tingting blong ol man, we oli fulap long intanet mo ol blog, we oli stap mekem stret wanem Koriho i bin mekem.26
Sapos yumi lukluk i go long wol mo folem ol fasin blong hem blong stap glad,27 bae yumi neva save wanem i glad. Olgeta we oli no stret mo nogud oli save gat plante kaen filing, be bae oli neva save glad!28 Glad i wan presen we i blong olgeta we oli fetful.29 Hem i presen we i kam taem wan i wantem mo minim blong traem blong laef long wan stret mo gud laef, olsem we Jisas Kraes i tijim.30
Hem i tijim yumi olsem wanem blong gat glad. Taem yumi jusum Papa long Heven blong i God blong yumi,31 mo taem yumi stap filim Atonmen blong Sevya we i stap wok long laef blong yumi, bae yumi fulap long glad.32 Evri taem we yumi fidim waef o hasban blong yumi mo lidim ol pikinini blong yumi, evri taem yumi fogivim wan man o askem fogivnes, yumi save filim glad.
Evri dei we yu mo mi i jusum blong laef folem ol selestial loa, evri dei we yumi kipim kavenan blong yumi mo helpem ol narawan blong mekem semmak, bae yumi gat glad.
Mekem folem ol toktok blong man we i raetem Ol Sam: “Oltaem mi save we Hae God i stap wetem mi, i stap kolosap long mi nao i no gat wan samting i save muvum mi. Taem mi stap wetem yu, bae mi harem we mi glad tumas.”33 Taem prinsipol ia i fasgud insaed long hat blong yumi, evri dei bae i save kam wan dei blong glad mo hapi.34 Mi testifae olsem long tabu nem blong Jisas Kraes, amen.