EyaBazali—Ukulungiselela Abantwana Bakho Ubomi Bonke kwiNdlela yoMnqophiso kaThixo

UNifayi wafundisa ukuba “isango [thina] esinokungena ngalo” indlela yomnqophiso “yinguquko nobhaptizo ngamanzi” (2 Nifayi 31:17). Iinzame zakho zokunceda abantwana bakho balungiselele ubhaptizo noqinisekiso inokumilisela iinyawo zabo kuloo ndlela. Ezi nzame ziqala ngokufundisa ngokholo kuYesu Krestu nenguquko. Ziquka kananjalo nokufundisa ngendlela esihlaziya ngayo iminqophiso yethu yobhaptizo ngokuthatha umthendeleko qho ngeveki.

Nasi esinye isixhobo esinokukunceda: 2 Nifayi 31.

• Nanini na xa unamava omeleza ukholo lwakho kuBawo oseZulwini kunye noYesu Krestu, yabelana ngawo nomntwana wakho. Mncede aqonde ukuba ukholo yinto enokomelela kwaye enokukhula yomelele ngokomelela ubomi bonke. Zeziphi ezinye izinto anokuzenza umntwana wakho ukuze abe nokholo olomeleleyo kuKrestu ngaphambi kokuba abhaptizwe?

• Xa umntwana wakho esenza ukhetho olungalunganga, thetha ngovuyo ngesipho senguquko. Kwaye xa wena wenze ukhetho olungalunganga, yabelana ngovuyo oluza xa uguquka. Ngqina ukuba ngenxa yokuba uYesu Krestu wabandezeleka kwaye wafela izono zethu, Yena wasinika amandla okutshintsha. Xa umntwana wakho efuna ukuxolelwa, mxolele ngokukhululekileyo nangovuyo.

• Xelela umntwana wakho ngobhaptizo lwakho. Bonisa imifanekiso kwaye wabelane ngeenkumbulo. Thetha ngendlela owaziva ngayo, ukuba iminqophiso yakho yobhaptizo ikuncede njani ukuba ufikelele ekwazini uYesu Krestu ngcono, kwaye iqhubekeka njani ukusikelela ubomi bakho. Khuthaza umntwana wakho ukuba abuze imibuzo.

• Xa kukho ubhaptizo kusapho lwakho okanye kwisebe lakho, thatha umntwana wakho ayokubona. Thethani kunye ngoko wena nomntwana wakho enikubonileyo kwaye nenikuvileyo. Ukuba kunokwenzeka, thetha nomntu obhaptizwayo uze umbuze imibuzo enjengale: “Usenze njani esi sigqibo? Uzilungiselele njani?”

• Nanini na ubona umntwana wakho esenza into athembise ukuyenza, mncome ngokunyanisekileyo. Chaza ukuba ukugcina izibophelelo kuyasinceda ukuba silungiselele ukugcina iminqophiso esiyenzayo xa sibhaptizwa. Simthembisa ntoni uThixo xa sibhaptizwa? Usithembisa ntoni Yena? (bona Mozaya 18:8–10, 13).

• Xa wena nomntwana wakho ninamava angcwele kunye (njengasecaweni, ngelixa nifunda izibhalo, okanye ngelixa nikhonza omnye umntu), mxelele ngeemvakalelo zomoya okanye iimpembelelo onazo. Mema umntwana wakho ukuba achaze indlela aziva ngayo. Qaphela iindlela ezahlukeneyo anokuthetha ngazo uMoya ebantwini, kuquka neendlela Yena athetha ngazo nawe buqu. Nceda umntwana wakho abone amaxesha apho anokuba namava empembelelo yoMoya oyiNgcwele.

•    Thethani kunye ngeendlela ezahlukeneyo izicaka zeNkosi eziliva ngayo ilizwi laKhe . Mema umntwana wakho azobe umfanekiso okanye enze umboniso bhanya-bhanya malunga nendlela aliva ngayo ilizwi loMsindisi.

• Thetha ngokuba ukuba lilungu leBandla likaYesu Krestu labaNgcwele beMihla yokuGqibela kukusikelele njani. Usondele njani kuBawo oseZulwini noYesu Krestu njengokuba ukhonza abanye nanjengoko abanye bekukhonza? Nceda umntwana wakho acinge ngeendlela zokukhonza nokomeleza abanye njengelungu leBandla.

• Yenza umthendeleko ube sisiganeko esingcwele nesilulonwabo kusapho lwakho. Nceda umntwana wakho acwangcise iindlela zokugqalisela kuYesu Krestu ngexesha lomthendeleko. Siyakubonisa njani ukuba umthendeleko ungcwele kuthi?

• Ukhutsho oluninzi lwencwadi Umhlobo iquka amanqaku, amabali, nemisebenzi yokunceda abantwana balungiselele ubhaptizo noqinisekiso. Vumela umntwana wakho azikhethele ezithile azozifunda kwaye azonwabele kunye nawe.   

  Umfanekiso

  inkwenkwe ibhaptizwa

Ububingeleli ligunya namandla kaThixo athi ngawo asikelele abantwana baKhe. Ububingeleli bukaThixo busemhlabeni namhlanje kwiBandla likaYesu Krestu labaNgcwele beMihla yokuGqibela. Onke amalungu eBandla agcina iminqophiso yawo asikelelwa ngamandla kaThixo obubingeleli emakhayeni awo ukuze azomeleze wona kunye neentsapho zawo. La mandla ayakunceda amalungu ekwenzeni umsebenzi kaThixo wosindiso nowokuphakamisa kubomi bawo bobuqu kunye neentsapho zabo (bona General Handbook2.2

Sifumana imimiselo ngegunya lobubingeleli. Xa amadoda nabafazi bekhonza kubizo lweBandla, bakwenza oko ngegunya lobubingeleli, phantsi kwesikhokelo sabo baphethe izitshixo zobubingeleli. Bonke abantwana bakaBawo oseZulwini—oonyana baKhe neentombi zaKhe—baya kusikelelwa njengokuba besiya ekuqondeni ngcono ububingeleli.

• Yenza imimiselo yobubingeleli ibe yinxalenye yobomi bosapho lwakho. Umzekelo, nceda umntwana wakho ukuba alungiselele ngokomoya umthendeleko ngeveki nganye. Khuthaza umntwana wakho ukuba afune iintsikelelo zobubingeleli xa egula okanye efuna intuthuzelo okanye ulwalathiso. Kwenze umkhwa ukukhomba iindlela iNkosi esikelela ngayo usapho lwakho ngamandla obubingeleli.

• Njengoko nifunda izibhalo kunye, khangelani amathuba okuxoxa ngendlela uThixo abasikelela ngayo abantu ngamandla aKhe. Yabelana ngamava akho xa uThixo ekusikelele ngobubingeleli baKhe.  Ngokwemizekelo yentsikelelo esizifumanayo kuThixo ngobubingeleli, bona General Handbook, 3.2, 3.5.

• Funda ngomnombo wegunya lobubingeleli lomntu othile kusapho lwakho. (Ababingeleli bakaMelkizedeke bangafumana ikopi yomnombo wegunya ngokuthumela i-imeyile ku LineofAuthority@ChurchofJesusChrist.org Thetha ngokuba kutheni kubalulekile ukwazi ukuba igunya lobubingeleli liphuma kuYesu Krestu ngokwaKhe. Kutheni Yena esabelana nathi ngalo?

• Fundisa umntwana wakho ukuba emva kobhaptizo, angafumana amandla obubingeleli ngokugcina umnqophiso wobhaptizo.    Xelela umntwana wakho ukuba imimiselo yobubingeleli iwazise njani amandla kaThixo ebomini bakho.  Uludwe lwezinye iindlela esisikelelwa ngazo ngamandla obubingeleli, bona General Handbook, 3.5.

• Xoxa ngombuzo othi “Sinjani isicaka seNkosi?” Fundani kunye IMfundiso neMinqophiso 121:36–42, kwaye nikhangele iimpendulo. Nanini na ubona umntwana wakho (okanye omnye umntu) esebenzisa omnye wemigaqo okanye iimpawu ezikule miqolo, yilathe.

• Xa wena okanye umntwana wakho esebenzisa izitshixo ukuvula ucango okanye ukudumise imoto, thatha umzuzwana uthelekise ezo zitshixo kwizitshixo eziphethwe ziinkokeli zababingeleli. (Ukucacisa ngezitshixo zobubingeleli, bona General Handbook, 3.4.1). Izitshixo zobubingeleli “zisivulela” okanye “zisiqalela” ntoni thina?   

• Xa ubekelwa ubizo bucala, mema umntwana wakho ukuba abekho, ukuba kunokwenzeka. Vumela umntwana wakho akubone uzalisekisa ubizo lwakho. Ungakhangela iindlela ezifanelekileyo anokukunceda ngazo. Chaza ukuba uwava njani amandla eNkosi kubizo lwakho.

Iitempile ziyinxalenye yecebo likaBawo oseZulwini ngabantwana baKhe. Ezitempileni, senza iminqophiso engcwalisekileyo kunye noBawo oseZulwini njengokuba sithatha inxaxheba kwimimiselo engcwalisekileyo, yonke eyalatha kuYesu Krestu. UBawo oseZulwini ulungiselele indlela kubo bonke abantwana baKhe ukuba benze iminqophiso kwaye bathabathe inxaxheba kwimimiselo, kuquka nabo bangazange bayifumane kobu bomi. Ekuqaleni konyaka xa egqiba iminyaka eyi 12, umntwana wakho umdala ngokwaneleyo ukuba angabhaptizelwa aze aqinisekiswe etempileni esenzela izinyanya ezingasekhoyo.

• Yiya etempileni kangangoko iimeko zakho zikuvumela. Thetha nomntwana wakho malunga nokuba kutheni uhamba kwaye itempile ikunceda njani ukuba uzive ukufutshane noBawo oseZulwini noYesu Krestu.

• Hlola kwaye nixoxe ngemibuzo yemvume yokungena etempileni kunye. Thetha nomntwana wakho malunga nokwenzeka kudliwano-ndlebe lwemvume yokungena etempileni. Yabelana ngokuba kutheni ukuba nemvume yokungena etempileni kubalulekile kuwe.

• Fundani kunye Malaki 4:6. Thethani ngokuba iintliziyo zenu zingaguqukela kooyihlo njani. Funda ngakumbi malunga nezinyanya zakho ngokujonga imbali yosapho lwakho kunye ku FamilySearch.org. Khangela izinyanya ezifuna ukubhaptizwa noqinisekiso. Umcebisi wembali yosapho wetempile nowesebe angakunceda.

•    

Intsikelelo kasolusapho inokuba ngumthombo wesikhokelo, intuthuzelo, nempembelelo. Iqulethe ingcebiso yobuqu evela kuBawo oseZulwini kuthi kwaye isinceda ukuba siqonde ubuni bethu banaphakade kunye nenjongo yethu. Nceda umntwana wakho alungiselele ukufumana intsikelelo kasolusapho ngokumfundisa ukubaluleka nobungcwele beentsikelelo zikasolusapho.

• Yabelana nomntwana wakho ngamava akho okufumana intsikelelo kasolusapho. Ungabelana ngezinto ezifana nendlela olungiselele ngayo ukuyifumana, indlela ekuncede ngayo ukuba usondele kufuphi kuThixo, kunye nendlela oyisebenzisa ngayo intsikelelo ebomini bakho. Ungamema kananjalo umntwana wakho ukuba athethe namanye amalungu osapho afumene iintsikelelo zawo zikasolusapho.

•      

• Ukuba unezinyanya ezafumana iintsikelelo zikasolusapho, kungayinkuthazo ukufunda ezinye zazo kunye nomntwana wakho. Ukucela iintsikelelo zookhokho abangasekhoyo, ngena ChurchofJesusChrist.org, cofa uphawu lweakhawunti olukwikona ephezulu ngasekunene kwesikrini, kwaye ukhethe “Intsikelelo kaSolusapho.”

• Emva kokuba umntwana wakho efumene intsikelelo kasolusapho, mema nawaphina amalungu osapho awayekhona ukuba abhale iimvakalelo zabo kwaye abelane ngazo nomntwana wakho.

UThixo ufuna ukunika, okanye ukusikelela, bonke abantwana baKhe “ngamandla avela phezulu” (IMfundiso neMinqophiso 95:8). Siya etempileni ukuze sifumane isipho esisesethu kube kanye kuphela, kodwa iminqophiso esiyenzayo noThixo kunye namandla omoya Yena asinika wona njengenxalenye yesipho esisesethu angasisikelela yonke imihla yobomi bethu.

• Bonisa umfanekiso wetempile kwikhaya lakho. Xelela umntwana wakho malunga neemvakalelo ozifumanayo etempileni. Thetha rhoqo ngothando lwakho lweNkosi nendlu yaKhe neminqophiso oyenzileyo apho.

• Hlolani kunye temples.ChurchofJesusChrist.org.     Vumela umntwana wakho abuze nayiphi na imibuzo anayo ngetempile.   

• Njengokuba wena kunye nomntwana wakho nithatha inxaxheba okanye nibona eminye imimiselo (efana nomthendeleko okanye intsikelelo yempiliso), thathani umzuzwana nixoxe ngomfuziselo obandakanyekayo kulo mmiselo. Imela ntoni imifuziselo? Ingqina njani ngoYesu Krestu? Oku kungamnceda umntwana wakho ukuba alungiselele ukuphonononga ngentsingiselo yomfuziselo wemimiselo yasetempileni, engqina kananjalo ngoYesu Krestu.

• Nceda umntwana wakho aqaphele indlela awugcina ngayo umnqophiso wobhaptizo ochazwe ku Mozaya 18:8–10, 13 Kananjalo nceda umntwana wakho abone indlela iNkosi emsikelela ngayo. Yakha ukuzithemba komntwana wakho kumandla akhe okugcina iminqophiso.

• Thetha ngokuphandle kwaye rhoqo malunga nendlela iminqophiso yakho yetempile ekhokela ngayo ukhetho lwakho kwaye ikuncede ukhule kufutshane noYesu Krestu.  Ungasebenzisa General Handbook, 27.2, ukucinga kwakhona ngeminqophiso esiyenza etempileni.

Umdala uDavid A. Bednar wafundisa: “Eyona nto ibalulekileyo ongayenza ukulungiselela ubizo lokukhonza kukuba ube ngumfundisi wevangeli kwakudala phambi kokuba uye ebufundisini. … Umba ayikokuya ebufundisini; endaweni yoko, umba kukuba ngumfundisi wevangeli kwaye sisebenze ubomi bethu bonke ngentliziyo yethu yonke, ngamandlakazi, ngengqondo nangokomelela. … Ulungiselela umsebenzi wokufundisa ivangeli ubomi bakho bonke” (“Becoming a Missionary,” Liahona, EyeNkanga. 2005, 45–46). Amava umntwana wakho anawo okuba ngumfundisi wevangeli ayakumsikelela ngonaphakade, hayi nje ixesha anokuthi akhonze njengomfundisi wevangeli.

• Bonisa indlela yokwabelana ngevangeli ngeendlela zendalo. Soloko uphaphamele amathuba okwabelana nabanye ngeemvakalelo zakho ngoBawo oseZulwini noMsindisi neentsikelelo ozifumanayo njengelungu leBandla laKhe. Mema abanye ukuba bangene nosapho lwakho kwimisebenzi enxulumene neBandla kunye nosapho.

• Khangela amathuba okuba usapho lwakho lusebenzisane nabafundisi bevangeli. Bameme ukuba bafundise abahlobo bakho, okanye ubavumele bafundise abantu ekhayeni lakho. Buza abafundisi bevangeli ngamava abawafumanayo nangendlela inkonzo yomsebenzi wobuvangeli ebanceda ngayo basondele kufuphi kuYesu Krestu. Kananjalo buza ukuba yintoni abayenzileyo (okanye abanqwenela ukuba ngebabeyenzile) ukulungiselela ukuba ngabafundisi bevangeli.

• Ukuba usebenze ebufundisini, thetha ngokuphandle kwaye rhoqo malunga namava akho. Okanye umeme abahlobo okanye amalungu osapho abasebenze ebufundisini ukuba bathethe ngawabo. Ungathetha kananjalo ngeendlela owabelane ngazo nabanye ngevangeli ebomini bakho bonke. Nceda umntwana wakho acinge ngeendlela anokwabelana ngazo ngevangeli.

• Nika umntwana wakho amathuba okufundisa usapho lwakho imigaqo yevangeli. Umntwana wakho kananjalo usenokuziqhelanisa ngokwabelana nabanye ngeenkolelo zakhe. Umzekelo, ungaxoxa ngemibuzo efana nale, “Singayazisa njani iNcwadi kaMormoni kumntu ongazange eve ngayo?” okanye “Singayichaza njani imfuneko yoMsindisi kumntu ongengomKrestu?”

• Nceda umntwana wakho akhululeke ukuthetha nabantu. Zeziphi iindlela ezilungileyo zokuqalisa incoko? Khuthaza umntwana wakho ukuba afunde indlela yokuphulaphula oko abanye bakutshoyo, ukuqonda okusezintliziyweni zabo, kwaye babelane ngeenyaniso zevangeli ezinokusikelela ubomi babo.

• Khangela amathuba okuba umntwana wakho afunde ngezinye iinkcubeko neenkolo. Mncede aqaphele kwaye ahlonele imigaqo elungileyo neyinyaniso kwiinkolelo zabanye.

Etempileni, indoda nomfazi banokutshata ngonaphakade. Oku kwenzeka kummiselo ekuthiwa lutywino. Nangona lo mmiselo usenokuba usekude ngeminyaka emininzi kunyana okanye intombi yakho, izinto ezincinane, ezilula, nezingaguquguqukiyo enizenzayo kunye ebudeni baloo minyaka zinokumnceda alungiselele le ntsikelelo imangalisayo.

• Fundani kunye “USapho: Isibhengezo kwiHlabathi kwiThala leVangeli. Esi sibhengezo sisifundisa ntoni ngolonwabo kubomi bentsapho nangomtshato ophumeleleyo? Ukunye nomntwana wakho, khetha omnye wemigaqo edweliswe kwisibhengezo ukuyikufunda. Usenokukhangela izibhalo ezinxulumene naloo mgaqo IsiKhokelo kwiZibhalo Unokuzibekela kananjalo iinjongo zokusebenzisa lo mgaqo ngokuzele ngakumbi kusapho lwakho. Njengoko nisebenzela kwiinjongo zenu, xoxani kunye ngemiphumela ebangwa kukuphila lo mgaqo kubomi bosapho.

•               

• Ukuba utshatile, thetha ngokuphandle nomntwana wakho ngezinto enivakalelwa kukuba nizenza kakuhle njengesibini, izinto enizifundayo, neendlela enizama ukuziphucula ngazo. Ukuba wena neqabane lakho nitywinwe etempileni, bonisa umntwana wakho ngomzekelo ukuba nizama kanjani ukugcina iminqophiso yenu omnye nomnye kunye neNkosi. Xelela umntwana wakho ukuba uzama njani ukwenza uBawo oseZulwini noMsindisi umbindi wobudlelwane bakho kwaye Bona baninceda njani.

• Xa kufuneka kwenziwe izigqibo zosapho, yiba namabhunga entsapho neengxoxo. Qinisekisa ukuba zonke izimvo zamalungu osapho ziyaviwa kwaye zixatyisiwe. Sebenzisa ezi ngxoxo njengethuba lokumisela unxibelelwano olunempilo kunye nobubele kubudlelwane bosapho, nkqu naxa ingenguye wonke ubani obona ngokufanayo.

• Xa kukho ukungavisisani okanye ingxabano kusapho, bonakalisa umonde novelwano. Nceda umntwana wakho abone indlela ukusingatha ingxabano ngeendlela zobuKrestu ]ezinokumnceda ngayo alungiselele umtshato owonwabileyo. Fundani kunye IMfundiso neMinqophiso 121:41–42, kwaye nithethe ngendlela imigaqo ekule miqolo engasetyenziswa ngayo emtshatweni.