EyaBantwana Abancinane—Ukulungiselela Abantwana Bakho Ubomi Bonke kwiNdlela yoMnqophiso kaThixo

Nika abantwana imifanekiso emele ukholo kuYesu Krestu, inguquko, ubhaptizo, noqinisekiso. Funda okanye ucengceleze nabantwana isivumo sesine sokholo, kwaye ubacele ukuba baphakamise imifanekiso yabo xa lo mgaqo okanye ummiselo ukhankanywa. Nceda abantwana baqonde indlela nganye yale migaqo nemimiselo esinceda ngayo ukuba sifane ngakumbi noBawo oseZulwini noYesu Krestu.

Ungabanceda njani abantwana baqonde ukuba ukholo, inguquko, ubhaptizo, noqinisekiso ayizoziganeko zexesha elinye kodwa ziphembelela ukukhula kwethu kwasemoyeni kubomi bethu bonke? Ngokomzekelo, ungababonisa umfanekiso wembewu nomthi omkhulu (okanye uzobe ezi zinto ebhodini). Bancede bacinge ngezinto ezinceda imbewu ikhule ibe ngumthi omkhulu, njengamanzi, umhlaba nokukhanya kwelanga. Bancede babone ukuba ezi zifana nezinto esizenzayo ukuze sisondele ngakumbi kuThixo kubo bonke ubomi bethu—sakha ukholo lwethu kuYesu Krestu, siguquke yonke imihla, siphile iminqophiso yethu yobhaptizo, kwaye siphulaphule kuMoya oyiNgcwele.

   Kutheni sisiva uvuyo xa siguquka? Yabelana nabantwana ngovuyo nothando oye waluva xa ucele uBawo oseZulwini ukuba akuxolele

Bonisa umfanekiso wobhaptizo loMsindisi nobhaptizo lomnye umntu Cela abantwana babelane ngento eyahlukileyo kwaye nento efanayo phakathi kwemifanekiso emibini. Fundani kunye u Mateyu 3:13–17.

Bavumele abantwana balathe kwizinto ezikwimifanekiso ekhankanywe kwisifundo. Xelela abantwana ngothando lwakho kuMsindisi nomnqweno wakho wokulandela Yena.

Mamela okanye ucule ingoma ethetha ngobhaptizo. Sifunda ntoni ngobhaptizo kule ngoma? Funda u 2 Nifayi 31:9–10, kwaye umeme abantwana ukuba baphulaphule ukuba kwakutheni ukuze uYesu Krestu abhaptizwe. Bameme ukuba bazobe umfanekiso wabo ngosuku lokubhaptizwa kwabo.

Cacisa ukuba umnqophiso sisithembiso phakathi komntu noBawo oseZulwini. Njengoko sizabalazela ukugcina izithembiso zethu kuThixo, uThixo uthembisa ukusisikelela. Bhala ebhodini iZithembiso Zam kuThixo kunye neZithembiso zikaThixo Kum. Fundani kunye u Mozaya 18:10, 13 kunye IMfundiso neMinqophiso 20:37, kwaye uncede abantwana benze uluhlu lwezithembiso abazifumana phantsi kwezihloko ezifanelekileyo. Yabelana ngendlela uBawo oseZulwini akusikelele ngayo njengokuba uzama ukugcina umnqophiso wakho wobhaptizo.

Bonisa abantwana imifanekiso yezinto uYesu Krestu awazenzayo xa Wayesemhlabeni Vumela abantwana bathethe ngoko kwenziwa nguYesu kumfanekiso ngamnye. Funda u Mozaya 18:8–10, 13, kwaye umeme abantwana ukuba bamamele izinto abathembisa ukuzenza xa bebhaptizwa. Ezi zithembiso ziza kuba nefuthe njani kwizenzo zethu yonke imihla? Mema abantwana bazobe umfanekiso wabo benceda omnye umntu ngendlela uYesu ebeya kwenza ngayo. Okanye ungenza abantwana ibheji elula yokuyinxiba enegama loMsindisi kuyo.

Umfanekiso

inkwenkwe ibhaptizwa

Mema umntu osandula ukubhaptizwa kwaye waqinisekiswa ukuba eze eklasini kwaye abelane ngokuba bekunjani ukuqinisekiswa. Kuthetha ukuthini kulo mntu ukuba lilungu leBandla likaYesu Krestu labaNgcwele beMihla yokuGqibela? Nceda abantwana bacinge ngeendlela abanokuthi bawugcine ngazo umnqophiso wabo wobhaptizo njengamalungu eBandla (njengokukhonza abanye, ukumema abanye ukuba bafunde ngakumbi ngoYesu, ukuthandaza ezintlanganisweni, njalo njalo). Yabelana ngendlela ukwenza ezi zinto kukuncede ngayo uve uvuyo lokuba lilungu leBandla likaKrestu.

Bonisa umfanekiso wabantu kuManzi eMormoni , kwaye ucele abantwana bachaze into abayibonayo emfanekisweni. Cinga kwakhona ibali lika-Alma nabantu bakhe kuManzi eMormoni usebenzisa u Mozaya 18:1–16

Cinga kwakhona u Mozaya 18:8–9 kwaye umeme abantwana ukuba benze izenzo zokubanceda bakhumbule izinto abantu ababezimisele ukuzenza njengamalungu eBandla likaKrestu. Yabelana ngamava xa ubone amalungu eBandla ekhonza ngezi ndlela.

Funda IMfundiso neMinqophiso 33:15, kwaye ucele abantwana bamamele isipho esikhethekileyo uBawo oseZulwini asinika sona xa sibhaptizwa kwaye siqinisekiswa. Ukubanceda bafunde ngakumbi malunga nendlela isipho soMoya oyiNgcwele esiza kubanceda ngayo, cingani kunye kwakhona Yohane 14:26; AmaGalati 5:22–23; 2 Nifayi 32:5; 3 Nifayi 27:20.   

Ngaphambi kweklasi, cela abazali bomntwana omnye okanye ngaphezulu ukuba babelane ngendlela abasikelelwe ngayo ngenxa yokuba benesiphiwo soMoya oyiNgcwele. Yena ubanceda njani? Baliva njani ilizwi laKhe?

Culani kunye ingoma ngoMoya oyiNgcwele. Nceda abantwana baqonde ukuba iculo lisifundisa ukuba uMoya oyiNgcwele angasinceda njani.

Nceda abantwana bacinge ngeendlela ezahlukeneyo esinokuthetha ngazo nomhlobo wethu ohlala kude, ezinjengokubhala ileta, ukuthumela i-imeyile, okanye ukuthetha efowunini. Bafundise ukuba uBawo oseZulwini angathetha nathi ngoMoya oyiNgcwele.   

Yabelana ngamava xa uMoya oyiNgcwele wanxibelelana nawe, mhlawumbi ngeengcinga ezisengqondweni yakho okanye ngemvakalelo esentliziyweni yakho (bona IMfundiso neMinqophiso 6:22–23; 8:2–3). Ngqina ebantwaneni ukuba uMoya oyiNgcwele unako ukubanceda ngeendlela ezifanayo.

Nceda abantwana bacinge ngamaxesha abangaba babewuvile uMoya—ngokomzekelo, xa becula ingoma yoMsindisi okanye xa besenzela abanye into yobubele. Bancede baqonde iimvakalelo zomoya eziziswa nguMoya oyiNgcwele. Kutheni ucinga ukuba uMoya oyiNgcwele usinika ezo mvakalelo? Nceda abantwana bacinge ngezinto ekufuneka sizenze ukuze sive uMoya oyiNgcwele ethetha nathi. Thethani ngezinto enizenzayo ukuze nive uMoya ngokucace ngakumbi.

   Bacele ukuba balathe kwinto abantu abacinga ngayo emfanekisweni. Fundela abantwana iinxalenye zika 3 Nifayi 18:1–12 Yintoni esinokuyenza ukukhumbula uYesu Krestu ngexesha lomthendeleko?

Cela abantwana ukuba bakuxelele izinto ezithile ekufuneka besoloko bekhumbula ukuzenza, njengokubopha izihlangu zabo okanye ukuhlamba izandla zabo phambi kokuba batye. Kutheni kubalulekile ukukhumbula ezi zinto? Funda u Moronayi 4:3 ebantwaneni, kwaye ubameme ukuba baphulaphule oko sithembisa ukusoloko sikukhumbula xa sithatha umthendeleko. Kutheni kubalulekile ukukhumbula uYesu Krestu? Nceda abantwana baqonde indlela isonka namanzi somthendeleko asinceda ngayo ukuba sikhumbule into asenzele yona uYesu (bona Moronayi 4:3; 5:2).

Bhala ebhodini “Ndithembisa uku…” Funda imithandazo yomthendeleko ebantwaneni (bona IMfundiso neMinqophiso 20:77, 79). Xa besiva isithembiso esisenza kuThixo, nqumama uze ubancede bagqibezele isivakalisi esisebhodini kunye nesithembiso abasivileyo. Bancede baqonde ukuba xa sithatha umthendeleko, senza izithembiso ezifanayo sazenzayo kubhaptizo.

Kuthetha ukuthini ukuthabathela kuthi igama likaYesu Krestu? Ukunceda abantwana baphendule lo mbuzo, yabelana ngomzekelo wento esibeka kuyo amagama ethu. Kutheni sibeka amagama ethu kwezi zinto? Kutheni le nto uYesu Krestu efuna ukubeka igama laKhe phezu kwethu? Cinga ngokwabelana ngale ngcaciso evela kuMongameli uRussell M. Nelson: “Ukuthabatha igama loMsindisi phezu kwethu kubandakanya ukubhengeza nokungqina kwabanye—ngezenzo zethu nangamazwi ethu—ukuba uYesu unguKrestu” (“The Correct Name of the Church,” Liahona, EyeNkanga. 2018, 88).

Nceda abantwana baqaphele iintsikelelo abazifumanayo ngenxa yobubingeleli.   

Cinga ngokudwelisa ezi ntsikelelo ebhodini. Kutheni zibalulekile nje ezi ntsikelelo kuthi? Ngqina ukuba ezi ntsikelelo ziza kuthi ngenxa kaYesu Krestu namandla obubingeleli baKhe.

Bhala ezi zihloko zilandelayo ebhodini: Amandla kaThixo kunye Amandla negunya likaThixo elinikwe abantu emhlabeni. Cela abantwana babeke imifanekiso phantsi komxholo wokuqala osinceda siqonde indlela uThixo aye wawasebenzisa ngayo amandla aKhe ukuze asisikelele, njengokudala ihlabathi, ukusikhokela esalathathisa, ukusibonisa ukuba Yena uyasithanda kwaye uyasazi, nokuva aze aphendule imithandazo yethu. Bacele ukuba babeke imifanekiso phantsi komxholo wesibini osinceda siqonde indlela amadoda afanelekileyo emhlabeni asebenzisa ngayo amandla negunya likaThixo ukuze basisikelele, njengokusikelela abagulayo, ukubhaptiza, ukuqinisekisa, ukulungiselela umthendeleko, nokutywina iintsapho. Yabelana ngokuba kutheni unombulelo ngobubingeleli neentsikelelo obuzizisayo.

Enye yeendlela eziphambili esizifumana ngazo iintsikelelo zamandla kaThixo ebomini bethu kungokwenza imimiselo yobubingeleli (bona IMfundiso neMinqophiso 84:20). Ukunceda abantwana bafunde le nyaniso, ungadwelisa ezi zibhalo zilandelayo ebhodini: 3 Nifayi 11:21–26, 33 (ubhaptizo); Moronayi 2 (uqinisekiso); Moronayi 4–5 (umthendeleko). Abantwana banokukhetha ngamnye kwezi zicatshulwa kwaye bachonge ummiselo owuchazayo. Mema abantwana ukuba babelane ngendlela abasikelelwe ngayo ngokufumana imimiselo yobubingeleli.

Nceda abantwana baqonde ukuba bayakufumana amandla kuThixo xa bebhaptizwa kwaye begcina umnqophiso wabo wobhaptizo. Buza abantwana ukuba la mandla anokubanceda njani.

Funda kunye nabantwana u Marko 3:14–15, uze ubabonise umfanekiso wesiganeko esichazwe apho. Buza abantwana ukuba bakhe bambona umntu othile emiselwa kwi-ofisi yobubingeleli okanye abekelwe bucala ubizo (okanye ubaxelele ngamava okhe wabanawo). Oku kufana njani noko uMsindisi wakwenzayo nabaPostile baKhe? Nceda abantwana badwelise kwibhodi iiofisi zobubingeleli okanye ubizo olunokuthi lunikwe amalungu eBandla, njengotishala okanye inkokeli embuthweni. Ecaleni kweofisi nganye okanye ubuzo, ungabhala ukuba umntu onaloo ofisi okanye ubizo unegunya lokwenza ntoni na. Xelela abantwana ukuba ukubekwa bucala ngumntu phantsi kwesikhokelo sezitshixo zobubingeleli kukuncede njani ukuba ukhonze.

Mema abantwana ukuba bacinge ngento edinga isitshixo sayo, njengemoto okanye ucango. Kwenzeka ntoni ukuba awunaso isitshixo? Fundani kunye IMfundiso neMinqophiso 65:2, kwaye wabelane ngobungqina bakho malunga nokubaluleka kokuba nezitshixo zobubingeleli emhlabeni.      

Cela omnye umntu osewadini ophethe izitshixo ukuba eze eklasini kwaye abelane nabantwana ukuba kuthetha ukuthini ukubamba izitshixo zobubingeleli. Mmeme ukuba achaze uxanduva lwakhe. Zeziphi iinxalenye zomsebenzi weNkosi azikhokelayo? UMsindisi umnceda njani yena?

Bonisa umfanekiso omnye okanye ngaphezulu weetempile. Buza abantwana ukuba yintoni eyenza itempile ibe yindawo ekhethekileyo. Bonisa ukuba kwitempile nganye kukho lo mbhalo: “UbuNgcwele eNkosini: Indlu yeNkosi.” Buza abantwana ukuba bacinga ukuba “ubuNgcwele eNkosini” bunokuthetha ntoni. Kutheni itempile ibizwa ukuba yindlu yeNkosi Oku kusifundisa ntoni ngetempile? Ukuba kukho nabaphi na abantwana abakhe baya etempileni, nabo bangabelana ngendlela ababeziva ngayo xa babelapho. Ukuba ubukhe waya etempileni, yabelana ngendlela obuve ngayo ubukho beNkosi apho, kwaye uthethe ngokuba kutheni itempile iyindawo engcwele kuwe.

Fundani kunye IMfundiso neMinqophiso 97:15–17. Cela abantwana ukuba bakhangele oko iNkosi ikulindeleyo kwabo bangena endlwini yaYo engcwele. Kutheni le nto sidinga sikufanelekele ukungena endlwini yaKhe? Njengenxalenye yale ncoko, thetha nabantwana malunga neemvume zetempile, kuquka nendlela yokuzifumana. Ungamema ilungu lobubhishophu ukuba labelane nabo ukuba lunjani udliwano-ndlebe lwemvume yasetempileni nemibuzo ebuzwa kuyo.

Cela abantwana bakuncede ucinga kwakhona umnqophiso esiwenzayo noThixo xa sibhaptizwa kwaye siwuhlaziye xa sithatha umthendeleko. (bona Mozaya 18:10; IMfundiso neMinqophiso 20:77, 79). Bonisa umfanekiso wetempile kwaye ucacise ukuba uBawo oseZulwini uneentsikelelo ezininzi Yena afuna ukusinika zona etempileni.

Zoba isango elikhokelela endleleni. Buza abantwana ukuba kutheni becinga ukuba kuluncedo ukuba nendlela yokuhamba. Fundani kunye u 2 Nifayi 31:17–20, apho uNifayi ethelekisa umnqophiso wobhaptizo nesango kwaye esimema ukuba siqhubeke endleleni emva kobhaptizo. Kukho iminqophiso emininzi ekufuneka yenziwe emva kobhaptizo, kuquka iminqophiso eyenziwa etempileni. Cacisa ukuba uMongameli uNelson uyibize le ndlela “indlela yomnqophiso.”

Thetha ngexesha apho umntu othile wakwenzela into ongenakuzenzela yona. Mema abantwana ukuba babelane ngamava afanayo. Cacisa ukuba xa sisiya etempileni, singafumana imimiselo engcwalisekileyo efana nobhaptizo lwabanye abangasekhoyo. Sifana njani noYesu xa sisenzela umsebenzi abafileyo? Yintoni Yena asenzele yona ebesingenako ukuzenzela yona ngokwethu?

Mema ulutsha omnye okanye ngaphezulu oye wabhaptizelwa izinyanya zakhe ukuba abelane ngamava akhe. Babuze ukuba kwakunjani etempileni. Bakhuthaze ukuba babelane ngendlela abavakalelwa ngayo xa bewenza lo msebenzi besenzela izinyanya zabo.

Zoba umthi ebhodini, kuquka iingcambu namasebe. Cela abantwana ukuba bacinge ngendlela usapho olufana ngayo nomthi. Faka amagama kwiingcambu Izinyanya, bhala amasebe iNzala, uze ubhale isiqu somthi othi Wena. Fundani kunye esi sivakalisi kwiMfundiso neMinqophiso 128:18: “Kuba ngaphandle kwabo [izinyanya zethu] asinako ukwenziwa sigqibelele; bengenako nabo ukwenziwa bagqibelele ngaphandle kwethu.” Buza imibuzo efana nale ilandelayo: “Kutheni sidinga izinyanya zethu? Kutheni inzala yethu isidinga? Baye basinceda njani abazali, oomakhulu nootatomkhulu nazinye izinyanya zethu?” Mema abantwana ukuba bakhangele kuyo yonke IMfundiso neMinqophiso 128:18 ibinzana elichaza indlela esinokunceda ngayo izinyanya zethu.

Cinga ngokusebenza nabazali bomntwana ngamnye ukufumana igama lesinyanya ukuze umntwana alise etempileni (bona FamilySearch.org).