“24 Fepuari–1 Mati. 2 Nifae 26–30: ‘O Se Galuega Taua ma le Ofoofogia,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)

24 Fepuari–1 Mati. 2 Nifae 26–30” Sau, Mulimuli Mai ia te Au—Mo Tagata Taitoatasi ma Aiga: 2020

Ata

O Iesu o loo fesoasoani atu i se fafine

O Le A Ia Taitai Oe i lou Lima, saunia e Sandra Rast

24 Fepuari–1 Mati

2 Nifae 26–30

“O se Galuega Taua ma le Ofoofogia”

Na fetalai le Alii, “Ou te poloaia tagata uma … ia latou tusia upu Ou te tautala atu ai ia te i latou” (2 Nifae 29:11). E ala mai i le Agaga, o le a fetalai mai ai le Alii ia te oe a o e suesueina Lana afioga. Tusifaamaumau mea e te maua.

Tusifaamaumau Ou Lagona Uunai

“Ou te vavalo atu ia te outou e uiga i aso e gata ai,” na tusia ai e Nifae (2 Nifae 26:14). I se isi faaupuga, sa tusi o ia e uiga i o tatou aso. Ma e i ai le pogai e tatau ai ona popole e uiga i mea sa ia vaai i ai: ua faafitia e tagata le mana ma vavega a le Atua, faasalalauina le lotomatau’a ma le fefinauai, ua noanoatia e le tiapolo ia tagata i maea malolosi. Ae faaopoopo i “galuega o le pogisa” i nei aso e gata ai (2 Nifae 26:10, 22) e taitaia e le fili, sa tautala foi Nifae e uiga i “se galuega taua ma le ofoofogia” e taitaia e le Alii lava Ia (2 Nifae 27:26). I le totonugalemu o lena galuega o le a i ai se tusi—o se tusi e tautala mai le efuefu, e folasia i malae pepelo a Satani, ma e faapotopotoina e amiotonu e pei o se tagavai. O lena tusi o le Tusi a Mamona, o le galuega taua o le galuega a le Ekalesia a le Alii i aso e gata ai, ma le ofoofogia o Lona valaaulia lea o i tatou uma, e ui i o tatou vaivaiga, ina ia auai.

Ata

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

2 Nifae 26:20–33

E valaaulia e Iesu Keriso tagata uma e o mai ia te Ia.

Na aoao mai e le Perofeta o Iosefa Samita e faapea o le Tama Faalelagi e sili atu ona “leai ni tuaoi i lona alofa mutimutivale ma faamanuiaga, nai lo le mea ua tatou sauni e talitonu i ai pe mauaina” (The Joseph Smith Papers, “History, 1838–1856, volume D-1,” i. 4 [addenda], josephsmithpapers.org). Faitau le mea na muai vaai i ai Nifae i le 2 Nifae 26:20–22 ma le mea na ia aoao mai e uiga i le Faaola i fuaiupu 23–33, ma faatusatusa i le faamatalaga a Iosefa Samita. O a ni mea ua e aoaoina e uiga i le alofa mutimutivale e leai se tuaoi o le Alii? O le a se mea e mafai ona e faia o se tagata o le Ekalesia a Iesu Keriso ina ia atili avea ai e faapei o Keriso i le ala e te taulimaina ai fanau a le Atua?

Tagai foi 3 Nifae 18:30–32.

2 Nifae 26–27

O le a le tusi lea e ta’ua i mataupu nei?

O le valoaga a Nifae i le 2 Nifae 26–27, lea e mamafa lona faapogai mai se valoaga muamua a Isaia (tagai Isaia 29), o loo muai ta’ua mai ai le oo mai o le Tusi a Mamona. O le valoaga o loo faamatala mai ai mea nei:

O upu a fanau a Liae (o e tupuga mai ia te ia) o loo tautala mai “lalo o le efuefu” e “peiseai o se aitu vavalo” ma ua “faamauina i se tusi” (2 Nifae 26:14–17; tagai foi Isaia 29:4).
O se vaega o le tusi na tuuina atu i se tagata aoaoina o le na fai mai “Ou te le mafai ona faitauina” (2 Nifae 27:15–20; Iosefa Samita—Talafaasolopito 1:64–65; tagai foi Isaia 29:11).

E le gata i le Isaia, o loo i ai isi perofeta i le tusi paia o loo faasino i le Tusi a Mamona, e ui ina latou te le o ta’ua i lona igoa. Mo se faataitaiga, Esekielu 37:15–20 o loo tautala i se “laau a Iosefa,” lea e mafai ona faasino i talafaamaumau a sa Nifae, o e tupuga mai ia Iosefa. O lea talafaamaumau o le a tasi ma le “laau a Iuta,” o lona uiga o le Tusi Paia.

O nisi o faataitaiga e mafai ona maua i le Taiala i Tusitusiga Paia, “Tusi a Mamona” (scriptures.ChurchofJesusChrist.org)

2 Nifae 28

E saili Satani e faasese.

O le tele o pepelo ma metotia a Satani o loo folasia i malae i faamatalaga a Nifae o aso e gata ai i le 2 Nifae 28. Vaai pe mafai ona e mauaina (mo se faataitaiga, tagai fuaiupu 6, 8, 21–23, 29). E manaomia i se a ona e iloa e uiga i pepelo a Satani? O le a se mea e te fai pe a taumafai le fili e faasese oe?

2 Nifae 28:27–31; 29

O loo faaauau pea ona tuuina mai e le Atua faaaliga e taiala ai Ana fanau.

I le avea ai ma Au Paia o Aso e Gata Ai ua faamanuiaina i tatou i le anoanoai o afioga a le Atua, o lea la e mafai ona faatatau lapataiga a Nifae ia i tatou: e le tatau lava ona tatou lagona faapea “ua lava!” A o e faitauina lapataiga i le 2 Nifae 28 ma le 29, mafaufau loloto i fesili e pei o nei:

O le a le finagalo o le Alii i o’u lagona ma le tali atu i Ana afioga?
Aisea e “feitai” ai tagata i nisi taimi i le mauaina o nisi mau upumoni mai le Atua? (2 Nifae 28:28). Pe ua i ai ea se taimi e faapea ai ni o’u lagona? Afai o lea, e mafai faapefea ona ou talia atili ia upumoni?
O le a le uiga o le maua o le afioga a le Atua? E mafai faapefea ona ou faaali atu faapea ou te manao ia maua nisi Ana mau upu?

Tagai foi Alema 12:10–11; 3 Nifae 26:6–10.

2 Nifae 29–30

Sa saunia e le Atua le Tusi a Mamona mo o tatou taimi.

Sa iloa e Nifae e ala i faaaliga, a o lei mae’a ona tusia le Tusi a Mamona, e faapea o le a i ai se aso o le a “taua tele ai i le fanauga a tagata” (2 Nifae 28:2). Aisea e taua tele ai ia te oe le Tusi a Mamona? Mafaufau i le fesili lea a o e faitauina le 2 Nifae 29–30. O a nisi o galuega “ofoofogia” ua faataunuuina e le Atua i le lalolagi ma i lou olaga e ala i le Tusi a Mamona?

Ata

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

2 Nifae 26:12–13

Na aoao mai e Nifae e faapea e faaalia mai e Iesu Keriso o Ia lava e ala i le Agaga Paia. O a ni aafiaga e mafai e tagata o le aiga ona fefaasoaai ai i le tasi ma le isi ina ua faamalolosia a latou molimau i le Faaola e le Agaga Paia?

2 Nifae 26:22; 28:19–22

Atonu o le a fiafia lou aiga i se lesona faatino e faapupula atu ai mea o loo aoao mai i le 2 Nifae 26:22 e uiga i le tiapolo. A o e faitau e uiga i togafiti a Satani i le 2 Nifae 28:19–22, e mafai ona e sai faataamilo se filo i tapulima o se tasi e faatusa “i se filifili matautia.” E faapefea ona pei se filifili matautia o faaosoosoga a Satani? E mafai faapefea ona avea ma maea malosi? E mafai faapefea ona tatou iloaina pepelo a Satani?

Sa faatusatusa e Nifae faaosoosoga a le tiapolo i “se filifili matautia.”

2 Nifae 27:20–21

Mata o le a le uiga o le fetalaiga a le Alii na Ia fetalai ai, “Ou te mafaia ona fai la’u lava galuega”? O tosinaina faapefea e lenei upumoni le ala o tatou auauna ai i Lana Ekalesia?

2 Nifae 28:30–31

Pe mafai e lou aiga ona mafaufau i se mea faapea, e pei o faaaliga mai le Atua, e sili ona maua auaua’i nai mea iti i le taimi? Aisea e faaalia ai e le Atua upumoni ia i tatou o “lea fuaiupu ma lea fuaiupu, o lea mataupu ma lea mataupu, o si mea itiiti i i ma si mea itiiti i o” nai lo le aumai uma i le taimi e tasi?

2 Nifae 29:7–9

O le a le mea ua faamoemoe le Alii e faamaonia pe faaali mai faatasi ma le Tusi a Mamona?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Suesuega Faaletagata Lava Ia

Fefaasoaai malamalamaaga. O le talanoaina faatasi ma isi o mea e te aoaoina e mafai ona faamalosia ai lou lava malamalama. A uma ona faitau le 2 Nifae 29:6–14, e mafai ona e lagonaina le musuia e faamalamalama atu i se uo le mafuaaga tatou te manaomia ai le Tusi a Mamona.