Tusi a Mamona

O se tasi lea o tusi e fa o tusitusiga paia ua talia e Le Ekalesia a Iesu Keriso o le Au Paia o Aso e Gata Ai. O lea tusi o se otootoga lea na faia e se perofeta e igoa ia Mamona o talafaamaumau o e sa nonofo i Amerika anamua. Sa tusia lea tusi e molimau atu ai o Iesu o le Keriso. E uiga i lenei tusi, o le Perofeta o Iosefa Samita, o lē na faaliliuina le tusi i le meaalofa ma le mana o le Atua, na fai mai: “Sa ou fai atu i le auuso o le Tusi a Mamona o le tusi aupito sili ona saʼo i soo se isi lava tusi i luga o le lalolagi, o le maaʼauʼau foi lea o la tatou tapuaiga, e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi” (tagai i le faatomuaga i le amataga o le Tusi a Mamona).

O le Tusi a Mamona o se talafaamaumau faalelotu o vaega e tolu o tagata o e na malaga mai mai le Lalolagi Tuai i Konetineta o Amerika. O nei vaega na taitaia e perofeta o e na faamaumauina ō latou talafaasolopito faalelotu ma faalelalolagi i papatusi metala. Ua tusia i le Tusi a Mamona le asiasiga a Iesu Keriso i tagata i Amerika ina ua mavae lona toetu. Na i ai se vaitaimi o le filemu e luaselau tausaga ina ua mavae lenā asiasiga a Iesu.

O Moronae, o le perofeta-tusitala mulimuli lea o sa Nifaē, na faamaufaailogaina talafaamaumau na otootoina e uiga i nei tagata ma sa natia ia talafaamaumau e tusa o le 421 T.A. O le 1823, na asiasi mai ai Moronae ua toetu mai ia Iosefa Samita ma sa tuuina atu ai ia te ia i se taimi mulimuli ane nei talafaamaumau anamua ma le paia ina ia faaliliuina ma ia aumaia ai i le lalolagi e avea o se isi molimau ia Iesu Keriso.