“3–9 Aokuso. Alema 43–52: ‘Tutumau Mausali i le Faatuatua ia Keriso,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“3–9 Aokuso. Alema 43–52,” Sau, Mulimuli Mai ia te Au—Mo Tagata Taitoatasi ma Aiga: 2020
Mo Faamanuiaga o le Saolotoga, saunia e Scott M. Snow
3–9 Aokuso
Alema 43–52
“Tutumau Mausali i le Faatuatua ia Keriso”
Atonu e foliga mai o mea na tutupu o loo faamatalaina i le Alema 43–52 e le talafeagai tonu ia te oe. Ae peitai, e pei ona i ai i tusitusiga paia uma, o loo i ai se feau a le Alii mo oe. Ia sailiili i ai ma le agaga tatalo.
Tusifaamaumau Ou Lagona Uunai
Pe a tatou faitau i nei upu i le amataga o le Alema mataupu e 43—“Ma o lenei ou te toe foi i se tala o taua i le va o sa Nifaē ma sa Lamanā”—o le mea masani le mafaufau pe aisea na faaaofia ai e Mamona nei tala o taua ae sa utiuti se avanoa i luga o papatusi (tagai Upu a Mamona 1:5). E moni o loo i ai foi a tatou taua i aso e gata ai, ae e i ai se taua i ana upu e sili atu i lo o faamatalaga o mamanu ma le faigata o taua. O ana upu foi e saunia ai i tatou mo le taua lea ua “tauto ai i tatou” (Viiga, nu. 250), o le taua o loo tatou tau ai i aso taitasi e faasaga i au a le tiapolo. O lenei taua e matuai mo’i lava, ma o le taunuuga e aafia ai o tatou ola e faavavau. E pei o sa Nifae, o i tatou ua “musuia i se pogai e sili atu ona lelei,” o lo “tatou Atua, o le tatou tapuaiga, ma le saolotoga, ma lo tatou filemu, ma o tatou [aiga].” Na ta’ua e Moronae lenei mea “o le faamoemoe o le au Kerisiano,” o le faamoemoe lava lea e o loo tatou tau ai i le aso (Alema 43:45; 46:12, 16).
Manatu mo Suesuega Faaletagata Lava Ia o Tusitusiga Paia
O taua i le Tusi a Mamona ua aoao ai a’u e uiga i a’u taua e faasaga i le amioleaga.
O le faitau e uiga i taua i le va o sa Nifae ma sa Lamana, e ono anoa atu ia te oe pe a e vaavaai mo auala e tutusa ai ma a oe lava taua faaleagaga. A o e faitau i le Alema 43–52, ia maitau mea na faia e sa Nifae na latou manumalo ai (pe le manumalo ai foi). Ona mafaufau loloto lea pe mafai faapefea ona e faaaogaina mea ua e aoaoina e fesoasoani ai ina ia e manumalo i au taua faaleagaga. A o e suesue i nei fuaiupu e pei o fuaiupu o loo ta’ua i lalo, tusi ou manatu i le pe mafai faapefea ona e mulimuli i le faataitaiga a sa Nifae:
-
Alema 43:19. Na saunia sa Nifae i ofutau. (E mafai ona ou taumafai ina ia ou saunia ma se ofutau faaleagaga.)
-
Alema 43:23–24. Sa latou sailia le taitaiga a le perofeta.
Ia maitau foi le ala na taumafai ai sa Lamana ma e na tetee ia sa Nifae e faatoilalo sa Nifae. O nei mea e mafai ona lapataia ai oe e uiga i auala e ono taumafai ai le fili e osofai oe. A o e suesue, tusi i lalo auala e ono osofai ai oe e Satani i ni auala talitutusa faapea:
-
Alema 43:8. Sa saili Sera’emina e faaoso le ita i lona nuu ina ia mafai ona ia maua le pule ia i latou. (A ou ita i isi tagata, ou te tuu atu ia Satani e pule ia te a’u.)
-
Alema 43:29. Sa mananao sa Lamana e faanofopologa sa Nifae.
Puipuiga o se Aai o sa Nifae, saunia e Minerva K. Teichert
A ou taumafai e faamaoni e pei o Moronae, o le a ou avea atili ai faapei o le Faaola.
Pe e te manao ia mafai ona avea atili oe e pei o le Faaola ma tuuitiitia ai le mana o le fili i lou olaga? O se tasi o auala o le mulimuli lea i le apoapoaiga o loo i le Alema 48:17 ina ia avea “e pei o Moronae.” Ia ua’i atu i uiga auaumama ma amioga a Moronae o loo faamatala mai i le Alema 43–52 ae ia faapitoa lava i le 46:11–28 ma le 48:7–17. O le a se mea ua faagaeetia ai oe e uiga i lenei “tagata malosi”? E mafai faapefea e uiga auaumama ma amioga faapea ona faavaivaia le mana o le tiapolo i lou olaga? Mafaufau loloto i mea e musuia ai oe e fai e mulimuli ai i le faataitaiga a Moronae ma avea atili ai e pei o le Faaola.
E faaosooso ma faasese i tatou e Satani e ala i mea laiti.
Ua iloa e Satani o le toatele o i tatou e le naunau e faia ni agasala tetele pe talitonu i ni pepelo tetele. O lea, na te faaaogaina ai pepelo ma faaosoosoga laiti e taitai atu ai i tatou i agasala e foliga mai e laiti—i le tele ua manatu o ia o le a tatou taliaina. E faaauau ona ia faia o lenei mea seia oo ina tatou se mamao ese mai le saogalemu o le ola amiotonu.
E mafai ona e maua le mamanu lenei i le tala i le faaseseina o Le’oneti e Amalekia, o loo maua i le Alema 47. A o e suesue, mafaufau loloto i auala e ono taumafai ai Satani e faasese oe, e pei ona faamatalaina mai e Elder Robert D. Hales:
“Sa tauanau e Amalekia taufaalata ia Le’oneti e ‘alu ifo i lalo’ la te fetaiai ma ia i le vanu. Ae ina ua tuua e Le’oneti le eleele maualuga, sa fa’aonā o ia ‘i le mea e gata mai ai’ seia oo ina oti ai o ia, ma pauu atu ai ona tagata i lima o Amalekia (tagai Alema 47). O feupuaiga ma tuuaiga, e maunu ai e nisi tagata i tatou ina ia tuua a tatou tulaga maualuluga po o le saogalemu. O le eleele maualuga o le mea e i ai le malamalama. … O le eleele saogalemu” (“Lototele Faakerisiano: O Le Tulaga Manaomia o se Soo,” Ensign po o le Liahona, Nov. 2008, 73).
Tagai foi 2 Nifae 26:22; 28:21–22.
E aumai e le lotogatasi le saogalemu.
I tulaga e pei ona faamaumauina i le amataga o le Alema 50, e foliga mai sa leai se avanoa o sa Lamana e manumalo ai ia sa Nifae. O ofutau, ‘olo, ma taumafaiga aufaatasi a sa Nifae sa foliga mai ai e le mafai ona faatoilaloina i latou (tagai Alema 49:28–30 ma le 50:17–20). Ae na le’i leva ae maua e sa Lamana le tele o o latou aai—e aofia ai ma na aai sa tu’ioloina e Moronae (tagai Alema 51:26–27). Na faapefea ona tupu lena mea? Vaavaai mo tali a o e faitau i mataupu nei (tagai faapitoa i le Alema 51:1–12). Ia mafaufau loloto i lapataiga o mafai ona i ai i lenei tala mo oe ma lou aiga.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Alema 45:2--8
O le faitau faatasi o nei fuaiupu e ono musuia ai lou aiga e fai ni talanoaga taitoatasi o le talalelei ma tagata o le aiga e pei ona sa faia e Alema ma Helamana.
Alema 46:12–22
O le tagavai o le saolotoga na musuia ai sa Nifae e tausi poloaiga a le Atua ma puipuia lo latou tapuaiga. O le a se mea ua musuia i tatou ia faia foi faapea? Atonu e mafai ona fatufatu e lou aiga la outou lava tagavai o le saolotoga—o se fu’a po o se ie e i ai upu po o ata e faamanatu ai ia te oe i aso taitasi e tausi poloaiga a le Atua.
Alema 48:7-9; 49:1-9; 50:1-6
A o faitau lou aiga e uiga i tu’iologa a sa Nifae, e mafai ona outou talanoaina pe o faapefea ona e faamalosia lou aiga e faasaga i le fili. Atonu o le a fiafia tamaiti i le fauina o se olo i mea faitino e pei o nofoa ma palanikeke, pe e mafai ona latou tusia ni ata o mea latou te manatu na foliga a’i tu’iologa a sa Nifae.
Alema 51:1–12
O a ni mea o aoao mai e nei fuaiupu e uiga i mea e mafai ona tatou faia i totonu o o tatou aiga pe a i ai ni o tatou fefinauaiga? E faapefea ona faateleina lo tatou lotogatasi?
Mo nisi manatu mo le aoaoina o tamaiti, tagai i le otootoga i le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Suesuega Faaletagata Lava ia
Fai fesili a o e suesue. Ao e suesue i tusitusiga paia, ia fesili ifo ia te oe lava i fesili e mafai ona fesoasoani e te mafaufau loloto ai pe o le a se lelei o e ola ai i mea ua e faitauina.
Tagavai o le Saolotoga, saunia e Larry Conrad Winborg