“10–16 Aokuso. Alema 53–63: ‘Faasaoina … i Lona Mana Faavavega,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)

“10–16 Aokuso. Alema 53–63,” Sau, Mulimuli Mai ia te Au—Mo Tagata Taitoatasi ma Aiga: 2020

Ata

au tau o taulele’a e lua afe

Au Tau Talavou e Lua Afe, saunia e Arnold Friberg

10–16 Aokuso

Alema 53–63

“Faasaoina … i Lona Mana Faavavega”

O tala o loo i le Alema 53-63 e mafai ona fesoasoani e te iloa ai taunuuga o le ola ai po o le teenaina foi o upumoni o le talalelei. A e faitauina le Alema 53-63, tusifaamaumau ia uunaiga ma mafaufau loloto i auala e mafai ona e ola ai i upumoni ua e aoaoina.

Tusifaamaumau Ou Lagona Uunai

A faatusa i autau a sa Lamana, e le mafai ona maua e le “autau laitiiti” (Alema 56:33) a Helamana o sa Nifae talavou e 2,000 se avanoa e [manumalo] ai. E ese mai i le toalaiti o le fuainumera, o fitafita a Helamana “sa laiti lava i latou uma,” ma “latou te le’i tau lava” (Alema 56:46–47). I nisi o itu, atonu e tai pei e tutusa lo latou tulaga ma i tatou o e lagonaina i nisi o taimi le toaitiiti ma lofituina i la tatou taua i aso e gata ai e faasaga ia Satani ma au a le tiapolo i le lalolagi.

Peitai sa i ai nisi o tulaga na sili atu ai le autau a Helamana nai lo o sa Lamana lea sa leai ma se sootaga i le fuainumera po o tomai faamiliteli. Sa latou filifilia Helamana, o se perofeta, e taitaia i latou (Alema 53:19); “sa aoaoina i latou e o latou tinā, e faapea afai latou te le masalosalo, o le a laveaiina i latou e le Atua” (Alema 56:47); ma sa latou “faatuatua tele i ia mea sa aoaoina [ai] i latou.” O se taunuuga, sa puipuia i latou e ala “i le mana faavavega o le Atua” (Alema 57:26). E ui lava ina sa mananu’a i latou uma i le taua, “sa leai se tagata e toatasi o i latou na fano” (Alema 57:25). O lea la, pe a faamanualia e le olaga i tatou taitoatasi i manuaga faaleagaga, e mafai ona tatou faaaogaina ma le lototoa—le savali a le autau a Helamana e faapea, “o loo [i ai] se Atua faamasinotonu, ma o soo se tasi [e] le masalosalo, [o le a] faasaoina i latou i lona mana faavavega” (Alema 57:26).

Ata

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Alema 53:10–22; 56:43–48, 55–56; 57:20–27; 58:39–40

A ou faaalia le faatuatua i le Atua, o le a Ia faamanuiaina a’u e ala i Lona mana faavavega.

O tala faavavega e pei o le manumalo o fitafita talavou a Helamana, atonu e faigata ona fesootai i ai ona e foliga mai e matuai le gafatia lava. Ae o se tasi o mafuaaga ua i ai tala faapea i totonu o tusitusiga paia, o le, ina ia faaali mai ai ia i tatou, a tatou faatuatua e mafai e le Atua ona galueaiina vavega i o tatou olaga. A o e faitau i fuaiupu nei e uiga i le autau talavou, vaavaai mo faaiteite i auala na latou faaaogaina ai o latou faatuatua i le Atua, po o a mea na matuai malosi ai o latou faatuatua, ma po o le a le mea na mafai ai ona tutupu vavega: Alema 53:10–22; 56:43–48, 55–56; 57:20–27; ma le 58:39–40. Ua fautuaina atu i le siata lenei se auala e tasi e mafai ona tusifaamaumau ai mea e te maua.

Uiga faaalia o le autau a Helamana:
O mea na aoaoina ai i latou:
O mea na latou faia:
Faamanuiaga na latou maua:

A uma ona suesue nei fuaiupu, o le a se mea ua musuia oe e fai e faaaoga ai lou faatuatua?

Sa ta’ua e Helamana le matafaioi a tina i le faamalolosia o faatuatua o le autau talavou (tagai Alema 56:47–48; 57:20–27). O a ni matafaioi a tagata o le aiga ma isi na faia i le atinaeina o lou faatuatua? O le a se mea e mafai ona e faia e faamalosia ai le faatuatua o lou aiga ma uo?

Latou te Le’i Masalosalo, na saunia e Joseph Brickey

Alema 58:1–12, 31–37; 61

E mafai ona ou filifili e mafaufau i mea e sili ona lelei e uiga i isi ma ia le tiga ai.

Sa i ai ia Helamana ma Paorana ni mafuaaga lelei e tiga ai. Sa le’i maua e Helamana le lagolago talafeagai mo lana autau, ae sa tuuai seseina Paorana e Moronae i le taofiofia o lena lagolago (tagai Alema 58:4–9, 31–32; 60). O le a se mea e faagaeetia ai oe e uiga i a laua tali atu i le Alema 58:1–12, 31–37 ma le Alema 61? E mafai faapefea ona e mulimuli i a latou faataitaiga i ni tulaga faapena?

Na aoao mai Elder David A. Bednar: “E i ai nisi taimi, o le a faia ai e se tagata se mea poo se tala foi, e ono faapea ua faatausuai. O na mea e tutupu lava ia i tatou taitoatasi—ma o le a sili atu i le faatasi ona tupu. … E le mafai ona ta taofia faamoemoega ma amioga a isi tagata. Peitai, tatou te fuafuaina pe faapefea ona tatou tali atu. Faamolemole ia manatua, o oe ma a’u o sui ua faamanuiaina i le faitalia e tatau ai, ma e mafai ona ta filifili e aua nei faatausuai” (“E Leai Foi se Mea e Tausuai ai i Latou,” Ensign po o le Liahona, Nov. 2006, 91).

Tagai foi Faataoto 16:32; Moronae 7:45; David A. Bednar, “Agamalu ma Maualalo i le Loto,” Ensign po o le Liahona, Me 2018, 30–33.

Ata

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 53:10–17

Sa osifeagaiga Aneti-Nifae-Liae ia le faamasaa toto. O a feagaiga ua tatou osia ma le Atua? O le a se mea ua tatou faitau i ai i le Alema 53:10–17 ua musuia ai i tatou ia faateleina le faamaoni i a tatou feagaiga?

Alema 53:20–21

E mafai faapefea ona avea atili i tatou e pei o alii talavou a Helamana? Atonu e fesoasoani le talanoa i le uiga o nisi o fuaitau o nei fuaiupu; mo se faataitaiga, o le a le uiga o le ia “lototetele, ma malolosi foi ma toaaga”? O le a le uiga o le “savavali ma le tonu i luma [o le Atua]”?

Alema 58:9-11, 33, 37

I taimi o puapuaga, pe tatou te liliu atu ea i le Tama Faalelagi, e pei ona sa faia e fitafita sa Nifae? Na faapefea ona Ia tali mai i a latou tatalo? Na faapefea ona Ia taliina a tatou tatalo?

Alema 61:2, 9, 19

O a ni mea ua tatou aoao mai ia Paorana e uiga i le ala e tali atu ai pe a tuuai seseina i tatou?

Alema 62:39–41

O se lesona faatino lenei e mafai ona fesoasoani ia malamalama ai lou aiga e mafai ona tatou filifili ai a le ia “faamaaaina” po o le “faamaluluina” i o tatou tofotofoga: Tuu se pateta mata ma se fuamoa mata i totonu o se ulo vaivevela o loo puna. O le pateta ma le fuamoa ua fai ma sui o i tatou, ae o le vai ua faatusa i tofotofoga tatou te feagai. A o pupuna le pateta ma le fuamoa, e mafai ona outou talanoa e uiga i nisi o tofotofoga o feagai ma lou aiga. O a ni auala eseese e tali atu ai i tofotofoga pei o nei? E tusa ai ma le Alema 62:41, o a ni aafiaga tatou te oo i ai ona o la tatou tali atu i tofotofoga? A ua vela lelei loa le pateta ma le fuamoa, tipi le pateta ma tata’e le fuamoa e faaali atu ai, o le “tofotofoga” lava e tasi na vaivai ai le pateta ae malo ai le fuamoa. O a ni mea e mafai ona fai e le tatou aiga ia mautinoa ai e faalotomaualaloina i tatou e o tatou tofotofoga ma tatou latalata atili atu ai i le Atua?

Mo nisi manatu mo le aoaoina o tamaiti, tagata i le otootoga i le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Tuu le avanoa i tamaiti e faailoa ai lo latou fatufatuai. “A e valaaulia [lau] fanau e fatufatu se mea e fesootai ma se mataupu faavae o le talalelei, e te fesoasoani ia i latou e malamalama atili i le mataupu faavae, ma e te tuuina atu ia i latou se faamanatu fai tino o mea o loo latou aoaoina. … Tuu atu ia i latou e fauina, tusi ni ata, valivali, tusitusi, ma fatufatu” (Aoao Atu i le Ala o le Faaola, 25).