“14–20 Setema. 3 Nifae 8–11: ‘Tutulaia ma O Mai ia te Au,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“14–20 Setema. 3 Nifae 8–11,” Sau, Mulimuli Mai ia te Au—Mo Tagata Taitoatasi ma Aiga: 2020
O Au o le Malamalama o le Lalolagi, saunia e James Fullmer
14–20 Setema
3 Nifae 8–11
“Tutulaia ma O Mai ia te Au”
I le 3 Nifae 8–11, na faalogo ai tagata i le siufofoga o le Atua o fetalai atu ia i latou. A o e faitau i nei mataupu, ia ua’i atu i mea o ta’u mai e Lona siufofoga ia te oe.
Tusifaamaumau Ou Lagona Uunai
“Faauta, o Au o Iesu Keriso, o le na molimau i ai perofeta o le a sau i le lalolagi” (3 Nifae 11:10). Faatasi ai ma nei upu, na faailoa mai ai e le Faaola toetu o Ia lava, ua faataunuu ai le silia o le 600 tausaga o valoaga o le Tusi a Mamona. Na tusia e Elder Jeffrey R. Holland, “O lena faaaliga ma le tautinoga na fatuina ai le manatu autu, le taimi silisili, i le talafaasolopito atoa o le Tusi a Mamona. Sa o le faaalia mai ma le folafolaga lea na faapea ona faailoaina ma musuiaina ai perofeta uma o sa Nifae. … Sa talanoa tagata uma e uiga ia te ia, pepese e uiga ia te ia, fai miti e uiga ia te ia, ma tatalo mo lona afio mai—ae, o lea ua i ai moni lava o ia. O le aso o aso! O le Atua, o le na te faaliliu po pogisa uma i taeao malamalama, ua taunuu mai” (Christ and the New Covenant: The Messianic Message of the Book of Mormon [1997], 250–51).
Manatu mo Suesuega Faaletagata Lava Ia o Tusitusiga Paia
O Iesu Keriso o le Malamalama o le Lalolagi.
Atonu e te matauina o autu e faatatau i le pogisa ma le malamalama—i le faaletino ma le faaleagaga—ua ta’ua soo i le 3 Nifae 8–11. O le a se mea ua e aoaoina mai nei mataupu e uiga i le pogisa ma le malamalama faaleagaga? O le a se mea e aumaia le pogisa i lou olaga? O le a le mea e aumaia le malamalama? Aisea e te manatu na filifili ai le Faaola e faailoa mai o Ia lava “o le malamalama ma le ola o le lalolagi”? (3 Nifae 9:18; 11:11). Ua avea faapefea Iesu Keriso ma se malamalama i lou olaga?
Afai ou te salamo, o le a faapotopoto mai, puipui, ma faamalolo a’u e le Faaola.
O le a sou manatu o a ni lagona o tagata ina ua uma ona oo i le faatamaiaga ma le pogisa ua faamatalaina i le 3 Nifae 8? O le a sou manatu, o a ni o latou lagona na i ai ina ua latou faalogo i le siufofoga o le Faaola o fetalai mai e uiga i le malamalama, alofa mutimutivale, ma le togiolaina i le mataupu 9 ma le10?
E ui ina na folafola mai e le Faaola e faapea, o le faatamaiaga sa o se taunuuga o agasala a tagata, sa Ia folafola mai o le a ia faamaloloina i latou o e o le a toe foi atu ia te Ia ma salamo (tagai 3 Nifae 9:2, 13). Na saunoa Elder Neil L. Andersen, “Ou te maofa i opo mai o aao alofa mutimutivale o le Faaola mo le tagata ua salamo, e tusa lava pe o le a le manatu faapito o le agasala ua lafoai. Ou te molimau atu, e mafai ma e naunau le Faaola e faamagalo a tatou agasala” (“Repent … That I May Heal You,” Ensign po o le Liahona, Nov. 2009, 40).
Saili i le 3 Nifae 9–10 mo faamaoniga o le alofa mutimutivale o Keriso ma Lona naunau e faamagalo. Mo se faataitaiga, o le a se mea e te maua i le 3 Nifae 9:13–22 ma le 10:1–6 e fesoasoani e te lagona ai le alofa ma le alofa mutimutivale o le Faaola? Mafaufau loloto i aafiaga i se taimi na e lagonaina ai Lona “faapotopoto mai” ma “tausia” oe (tagai 3 Nifae 10:4). Mafaufau e tusifaamaumau nei aafiaga i se apitalaaga pe faasoa atu i e pele ia te oe.
E mafai ona ou aoao e faalogo ma malamalama i le siufofoga o le Atua.
Pe na e lagonaina ea e pei na e tauivi ia malamalama i se savali na fesootai atu e le Atua ia te oe? Atonu e mafai ona fesoasoani ia te oe le aafiaga o tagata o loo i le 3 Nifae 11:1–8 e te malamalama ai i nisi o mataupu faavae o le faalogo ma le malamalama i le siufofoga o le Atua. Atonu e te maitaua tulaga iloga o le siufofoga o le Atua na faalogoina e tagata ma mea na latou faia ia malamalama lelei i ai. E mafai faapefea ona faatatau lenei tala i au taumafaiga e faalogo ma iloa le siufofoga o le Atua i lou olaga e ala i faaaliga faaletagata lava ia.
Ua valaaulia au e Iesu Keriso ina ia maua se molimau patino e uiga ia te Ia.
Pe a ma le 2,500 tagata na faapotopoto i Nuumau i le taimi na faaali ane ai Iesu Keriso (tagai 3 Nifae 17:25). E ui lava i lenei numera toatele, sa valaaulia e le Faaola i latou “taitoatasi” e fetagofi i tulaga fao i Ona lima ma vae (3 Nifae 11:14–15). O le a se mea o fautua mai e lenei mea ia te oe e uiga i le taua o le i ai o aafiaga patino e atinae ai le faatuatua ia Iesu Keriso? O a ni auala o valaaulia ai oe e le Faaola ia “tutulaia ma o mai ia te” Ia? (3 Nifae 11:14). O a ni aafiaga na fesoasoani ia te oe e maua ai se molimau o Ia o lou Faaola? Atonu foi e te mafaufau pe mafai faapefea e le faataitaiga a le Faaola i nei fuaiupu ona musuia ai au taumafaiga e auauna atu i isi.
Taitoatasi, saunia e Walter Rane
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
3 Nifae 8–9
Ina ia fesoasoani i lou aiga e faamatala mai aafiaga o loo faamatalaina i le 3 Nifae 8–9, e mafai ona e toe faamatalaina pe faalogologo i se puega o vaega o nei mataupu i totonu o se potu ua faapogisaina. Talanoa pe mata e faapeī le i ai i le pogisa mo aso e tolu? Ona e talanoa lea e uiga i auala ua avea ai Iesu Keriso “o le malamalama … o le lalolagi” (3 Nifae 9:18).
3 Nifae 10:1–6
O le ata faatusa o se matuamoa e ofoofotaiina lana toloai e mafai ona avea o se meafaigaluega mamana faafaiaoga e fesoasoani ia malamalama ai tamaiti i le uiga ma le misiona a le Faaola. E mafai ona e faitauina nei fuaiupu a o matamata lou aiga i se ata o se matuamoa ma lana toloai. Aisea o le a manaomia ai ona faapotopoto mai e se matuamoa lana toloai? Aisea e finagalo ai le Faaola e faapotopoto faalatalata atu i tatou ia te Ia? O le a se mea e ono tupu pe afai e filifili se tamaimoa e le faapotopoto mai pe a valaau atu i ai?
3 Nifae 11:1–17
Atonu e te manao e faitau nisi o fuaiupu nei i se “leo itiiti” (3 Nifae 11:3). O le a le mea sa tatau ona faia e tagata ina ia malamalama ai i le leo mai le lagi? O le a se mea e mafai ona tatou aoao mai i la latou aafiaga?
3 Nifae 11:21-38
Pe o sauniuni se tasi o lou aiga e papatiso? E mafai ona fesoasoani le faitau o le 3 Nifae 11:21–38 latou te saunia ai. E mafai faapefea ona fesoasoani le mafaufau loloto i aoaoga a le Faaola i nei fuaiupu i tagata o le aiga o e ua uma ona papatisoina?
3 Nifae 11:29-30
O le a se mea o aoao mai e nei fuaiupu e uiga i finauga? E mafai faapefea ona tatou “aveesea” finauga i o tatou aiga? (3 Nifae 11:30).
Mo nisi manatu mo le aoaoina o tamaiti, tagai i le otootoga i le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Suesuega Faaletagata Lava ia
Tusifaamaumau lagona. Sa saunoa Elder Richard G. Scott: “O le malamalama ua faamaumauina lelei, o le malamalama lea e mafai ona maua i taimi e manaomia ai. … [O le faamaumauina o uunaiga faaleagaga] e faaleleia ai lou ono mauaina o le malamalama sili atu” (“Acquiring Spiritual Knowledge,” Ensign, Nov. 1993, 88).
Tasi le Leoleo Mamoe, saunia e Howard Lyon