“7-13 Setema. 3 Nifae 1-7: ‘Ina Ea Ia Lou Ulu ma Ia Olioli,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“7–13 Setema. 3 Nifae 1–7,” Sau, Mulimuli Mai ia te Au—Mo Tagata Taitoatasi ma Aiga: 2020
Tasi le Ao, Tasi le Po, ma Tasi le Ao saunia e Jorge Cocco
7–13 Setema
3 Nifae 1–7
“Ina Ea Ia Lou Ulu ma Ia Olioli”
Sa molimauina e sa Nifae ni faailoga faavavega, ae i le aluga o taimi na galo ai ia i latou le mea na latou oo i ai (tagai 3 Nifae 2:1). O le faamaumauina o ou lagona uunai o le a fesoasoani e te manatua ai ou aafiaga faaleagaga ao suesueina le 3 Nifae 1–7.
Tusifaamaumau Ou Lagona Uunai
I nisi o itu, o se taimi fiafia lea i le avea ma se tagata e talitonu ia Iesu Keriso. Sa faataunuuina valoaga—o faaaliga ma vavega maoae i tagata na faaalia ai o le a le toe mamao ae fanau mai le Faaola. I le isi itu, sa o se taimi atuatuvale foi mo tagata talitonu ona, e ui lava i vavega uma, sa faafinau lava tagata le talitonu e faapea, “ua mavae le taimi” mo le fanau mai o le Faaola (3 Nifae 1:5). O nei tagata na faatupuina “se faanunununu tele i le laueleele atoa” (3 Nifae 1:7) ma faatu foi se aso e fasioti ai tagata uma e talitonu pe afai e faaalia mai le faailoga na valoia e Samuelu le sa Lamana—o se po e leai se pogisa.
I nei taimi faigata, na “tagi faatauanau atu [le perofeta o Nifae] i lona Atua mo ona tagata” (3 Nifae 1:11). O le tali a le Alii e musuia i soo se tasi o feagai ma sauaga po o masalosaloga ma manaomia ona iloa, o le malamalama o le a faatoilaloina le pogisa: “Ina ea ia lou ulu ma ia olioli; … o le a ou faataunuuina mea uma ia sa ou poloaiina ia fetalai atu e fofoga o au perofeta paia” (3 Nifae 1:13).
Manatu mo Suesuega Faaletagata Lava Ia o Tusitusiga Paia
O le a faataunuu e le Alii Ana afioga uma lava.
O le a sau vaaiga faalemafaufau i sou lagona pe ana o oe o se tasi o tagata talitonu i le taimi o loo faamatalaina i le 3 Nifae 1–7? Mo se faataitaiga, mata o le a se lagona o le faatalitali i le po e leai se pogisa lea o le a logoina mai ai le fanau mai o le Faaola, i le iloaina o le a fasiotia oe pe afai e le’i tupu? A o e faitau i le 3 Nifae 1:4–21 ma le 5:1–3, vaavaai mo mea na faia e Nifae ma isi tagata talitonu ina ia tausisia ai lo latou faatuatua i nei taimi faigata. Na faapefea ona faamanuia i latou e le Alii? O le a se mea ua e aoaoina e mafai ona fesoasoani pe a oo ina e faatalitali mo faamanuiaga na folafola mai e le Alii?
O le faagaloina o aafiaga faaleagaga e lamatia ai a’u i faaosoosoga a Satani.
Atonu e te manatu o le molimauina o se mea e matuai ofoofogia e pei o le po e leai se pogisa, o le a tumau ia te oe mo se taimi umi, ma avea o se taula i lau molimau. Ae o mea e manatua e uiga i faailoga ma mea e ofo ai na molimauina e sa Nifae sa foliga mai na galogalo malie atu lava i le aluga o le taimi. O le a le mea na mafua ai ona galo ia i latou, ma o a taunuuga o le galo? (tagai 3 Nifae 1:22; 2:1–3).
O le a lau mea o fai e manatua ma faafou ai lau molimau i upumoni faaleagaga? Mo se faataitaiga, mafaufau pe mafai faapefea ona fesoasoani le tusifaamaumauina o ou aafiaga faaleagaga ia te oe. E faapefea ona faasoa atu lau molimau ia i latou o e aupito latalata atu ia te oe e fesoasoani ai ia latou talitonu?
Tagai foi Alema 5:6; Henry B. Eyring, “E! Ia Manatua, Ia Manatua Lava,” Ensign po o le Liahona, Nov. 2007, 66–69; Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Nov. 2015, 65–68.
3 Nifae 2:11–12; 3:1–26; 5:24–26
E faamalosia e le Alii Lana Au Paia e faasaga i mea matautia faaleagaga.
I o tatou aso, e masani ona tatou le fetaiai ma ni aufaomea ia e faamalosia i tatou e tuua o tatou fale ae faapotopoto atu i se nofoaga se tasi. Ae tatou te feagai ma mea matautia faaleagaga, ma o aafiaga a sa Nifae e mafai ona i ai lesona e mafai ona fesoasoani ia i tatou. Vaai mo nei lesona a o e faitau i le 3 Nifae 2:11–12 ma le 3:1–26.
I le 3 Nifae 5:24–26 tatou te faitau ai i le faapotopotoina o le nuu o le Alii i aso e gata ai. O a mea ua aoao mai e nei fuaiupu e uiga i le ala e faapotopoto ai e le Alii Lona nuu i aso nei?
Tagai foi “Faigalotu mo le Autalavou i le Lalolagi Atoa: Savali mai ia Peresitene Russell M. Nelson ma Sister Wendy W. Nelson,” 3 Iuni, 2018, ChurchofJesusChrist.org; “Israel—The gathering of Israel,” Guide to the Scriptures, scriptures.ChurchofJesusChrist.org.
O a’u o se soo o Iesu Keriso.
E te manatu o le a le uiga o le avea ma se soo o Iesu Keriso? (tagai MFF 41:5). I le 3 Nifae 5:12–26, na taofi ai e Mamona lona otootoina o faamaumauga a sa Nifae ae tautino mai o ia o se soo o Iesu Keriso. Ona oo lea, i le 3 Nifae 7:15–26, sa ia faamatalaina ai le auaunaga a se isi soo—le perofeta o Nifae. O le a se mea e te maua i nei fuaitau e lua e fesoasoani e te malamalama ai i le uiga o le avea ma se soo o Iesu Keriso?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
3 Nifae 3:13–14, 25–26
O a mea na fai e sa Nifae e puipui ai i latou lava mai le fili na latou fetaiai? O a ni mea o tatou faia e fai ai o tatou fale o se nofoaga o le saogalemu ma le puipuiga mai le amioleaga i lenei lalolagi?
3 Nifae 2:1–3; 6:15–17
Ina ia fesoasoani i lou aiga ia aoao i auala e mafai ai e Satani ona faaseseina i tatou, tusi se ata o se tino, ma a’o faitau e lou aiga le 3 Nifae 2:1–3 ma le 6:15–17, faailoga vaega eseese o le tino o loo ta’ua. E tusa ai ma nei fuaiupu, o a nisi o auala e faaosooso ai i tatou e Satani e faagalo le Atua ae liliu atu i le agasala?
3 Nifae 4:7–12, 30–33
O a mea sa fai e sa Nifae ina ua latou vaai ua o mai le au faomea a Katianetona? O le a se mea e mafai ona aoao mai e lo tatou aiga mai ia sa Nifae pe a tatou feagai ma tulaga o faafitauli? O le a se mea e mafai ona tatou aoao mai upu a sa Nifae ina ua uma ona fesoasoani le Alii ia i latou i o latou taimi o faafitauli?
3 Nifae 5:13; Mataupu Faavae ma Feagaiga 41:5
Faitau le 3 Nifae 5:13 ma le Mataupu Faavae ma Feagaiga 41:5, ma talanoa i le uiga o le avea ma se soo o Keriso. Masalo e mafai e tagata o le aiga ona talanoa e uiga i taimi na latou maitauina ai le tasi ma le isi o avea ma soo. Afai e i ai ni au fanau laiti, atonu e te faia se pine faapea mai, “O a’u o se soo o Iesu Keriso,” ona tuu atu lea latou te faia le pine i soo se taimi lava e te matauina ai o latou mulimuli i le Faaola.
Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Fesoasoani i lou aiga e faatatau tusitusiga paia ia i latou lava. Na faapea mai Nifae “sa ou faatatauina tusitusiga paia uma ia te i matou, ina ia avea ma o matou manuia ma aoaoga” (1 Nifae 19:23 Ina ia fesoasoani i lou aiga e faatatau tusitusiga paia ia i latou lava, e mafai ona e valaaulia i latou e mafaufau loloto i mea latou te ono faia pe ana faapea latou te i ai faatasi ma tagata talitonu na faamatalaina i le 3 Nifae 1:4–9. (Tagai Aoao Atu i le Ala a le Faaola,21.)
O se Ao, o se Po, ma se Ao, na saunia e Walter Rane