“21-27 Setema. 3 Nifae 12-16: “O A’u o le Tulafono, ma le Malamalama’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“21-27 Setema. 3 Nifae 12-16,” Sau, Mulimuli Mai ia te Au—Mo Tagata Taitoatasi ma Aiga: 2020
Tolu Nifae: Lenei Toasefululua O E Ua Ou Filifilia, saunia e Gary L. Kapp
21–27 Setema
3 Nifae 12–16
“O A’u o le Tulafono, ma le Malamalama”
E tele ni mataupu faavae e su’e i le 3 Nifae 12–16. O nisi ua faamamafaina atu i le otootoga lenei, ae e te ono maua ia isi. Ia faataga le Tama Faalelagi, e ala mai i Lona Agaga, e aoao oe i mea e te manaomia i le taimi nei.
Tusifaamaumau Ou Lagona Uunai
E faapei o soo o Iesu o e sa faapotopoto atu i le mauga i Kalilaia, o tagata o e na faapotopoto atu i le malumalu i Nuumau sa ola i lalo o le tulafono a Mose. Sa latou mulimuli ai ona na faasino atu ai o latou agaga ia Keriso (tagai Iakopo 4:5), ae o lea ua tu atu Keriso i o latou luma, ma folafola atu se tulafono maualuga atu. Ae e oo foi ia i tatou o e le’i ola lava i le tulafono a Mose e mafai ona iloa o le tulaga faatonuina na faatuina e Iesu mo Ona soo o se tulafono e maualuga atu. Sa Ia folafola atu, “ou te manao ia outou atoatoa” (3 Nifae 12:48). Afai e te lagona le le atoatoa ona o lenei mea, ia manatua na fetalai mai foi le Iesu, “Amuia e matitiva i le agaga o e e ō mai ia te au, aua e o latou le malo o le lagi” (3 Nifae 12:3). O le tulafono maualuga atu o se valaaulia—o le isi auala e faaupu ai o le “Ia outou o mai ia te au ma faaolaina” (3 Nifae 12:20). E pei o le tulafono a Mose, o le tulafono lenei e faasino atu ai i tatou ia Keriso—o le tagata e Toatasi e mafai ona laveaia ma faaatoatoa i tatou. “Faauta,” na Ia fetalai mai ai, “O A’u o le tulafono, ma le malamalama. Ia outou vaavaai mai ia te au, ma tumau e oo i le iuga, ma o le a outou ola ai” (3 Nifae 15:9).
Manatu mo Suesuega Faaletagata Lava Ia o Tusitusiga Paia
O aoaoga a le Faaola ua faaali mai ai ia te a’u le ala e avea ai ma se soo moni.
E tele upumoni, upu o fautuaga, ma lapataiga i le 3 Nifae 12–14. O se tasi nei o auala e suesue ma faaaoga ai mea na aoao mai e le Faaola i nei mataupu: Piki se vaega o fuaiupu, ma vaai pe mafai ona e otootoina mea o loo aoao mai e fuaiupu i se fuaiupu se tasi e amata i le “O soo moni o Iesu Keriso …” Mo se faataitaiga, o se aotelega o le 3 Nifae 14:1–5 atonu o le “O soo moni o Iesu Keriso e le faamasino atu.” Atonu e te manao e filifili se fuaiupu mai mataupu nei e faapitoa ona anoa ia te oe ma tauloto pe kopi ma tuu i le mea o le a e vaai soo i ai. Mafaufau loloto i auala e mafai ona e faaaoga ai mea ua e aoaoina i au taumafaiga patino ia avea ma se soo lelei atu o Iesu Keriso.
Tagai foi Mataio 5–7; Luka 6:20–49.
3 Nifae 12:1–2; 15:23–24; 16:1–6
Amuia i latou o e talitonu e aunoa ma le vaai mai.
E faatusa atu i le aofaiga atoa o fanau a le Atua, e toaitiiti ua vaai i le Faaola ma faalogo i Lona siufofoga, e pei ona sa faia e tagata i Nuumau. O le toatele o i tatou e matele ina pei o tagata ua faamatalaina i le 3 Nifae 12:2; 15:23; ma le 16:4–6. O a folafolaga ua faia i tagata faapena i nei fuaiupu? Ua faapefea ona faataunuuina nei folafolaga i lou olaga?
Tagai foi Ioane 20:26–29; 2 Nifae 26:12–13; Alema 32:16–18.
3 Nifae 12:21–30; 13:1–8, 16–18; 14:21–23
E le lava faatinoga amiotonu; e tatau foi ona mama lo’u loto.
O se tasi o autu e te ono matauina i nei mataupu o le valaaulia a le Faaola ia ola i se tulafono maualuga atu—ia amiotonu e le gata i a tatou faatinoga i fafo ae faapea foi i totonu o o tatou loto. Vaavaai mo le autu lenei i le taimi na fetalai ai le Faaola e uiga i finauga (3 Nifae 12:21–26), ola le mama (3 Nifae 12:27–30), tatalo (3 Nifae 13:5–8), ma le anapogi (3 Nifae 13:16–18). O a isi faataitaiga e mafai ona maua? O le a se mea e mafai ona e faia e faamama ai manaoga o lou loto nai lo o le taulai atu i na’o faatinoga i fafo?
Afai ou te sailia “mea lelei” mai le Tama Faalelagi, o le a ou mauaina.
Na saunoa mai Peresitene Russell M. Nelson: “E finagalo moni ea le Atua e talanoa mai ia te oe? Ioe! … Oi, e matuai anoanoai mea e finagalo lou Tama Faalelagi ia e iloa” (“Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95). A o e faitau i le valaaulia a le Alii i le 3 Nifae 14:7–11 e ole atu, saili, ma tu’itu’i atu, mafaufau loloto po o a “mea lelei” atonu e finagalo o Ia e te ole atu ai. O mau faaopoopo nei e mafai ona fesoasoani e te malamalama ai i le auala e ole atu ai, saili ma tu’itu’i atu ai. E mafai foi ona fesoasoani e faamalamalama le pogai e le taliina ai nisi o tatalo i le auala e te manatu ai: Isaia 55:8–9; Helamana 10:5; Moronae 7:26–27, 33, 37; ma le Mataupu Faavae ma Feagaiga 9:7–9.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
3 Nifae 12:48
E faapefea ona fesoasoani le savali a Elder Jeffrey R. Holland “Ia Atoatoa Ona Leleli o La Outou Amio—I Le Iuga” (Ensign po o le Liahona, Nov. 2017, 40–42) tatou te malamalama ai i fetalaiga a le Faaola i le fuaiupu lenei? E mafai foi ona e maua le fesoasoani i le Moronae 10:32–33.
3 Nifae 12:9, 38–42; 14:3–5, 12
E faapefea ona faaaoga nei fuaiupu i fegalegaleaiga i tagata o le aiga? Atonu e mafai ona faatutu faatasi e lou aiga ni sini ia faateleina le ola faamaoni i nei mataupu faavae
3 Nifae 13:19–21
E mafai ona faaosofia e nei fuaiupu se talanoaga e uiga i mea e teufatuina e lou aiga. E i ai nisi o oa o le lalolagi o loo taofia oe mai le teuina o oa o le lagi? E mafai ona e faamamafaina le manatu lenei i le taitaia o le aiga i se sailiga oa e su’e ni mea i totonu o le tou fale e faamanatu atu ai i tagata o lou aiga e uiga i oa e taua e faavavau.
3 Nifae 14:7-11
Atonu o le a fiafia tamaiti laiti i se taaloga, e musuiaina e le 3 Nifae 14:8–9, lea latou te ole atu ai mo se mea ae maua mai ai se mea e matuai ese lava. O le a le mea na finagalo le Faaola ia tatou iloa e uiga i lo tatou Tama oi le Lagi ina ua Ia faasoa mai le faataitaiga lenei?
3 Nifae 14:15–20
O le a le “fua lelei” e fesoasoani ia tatou iloa o Iosefa Samita, po o le Peresitene o loo i ai nei o le Ekalesia, o se perofeta moni?
3 Nifae 14:24–27
Mafaufau i ni auala e mafai ona e fesoasoani ai i lou aiga e vaai faalemafaufau i le faataoto o i nei fuaiupu? Atonu e mafai ona tusi e tagata o le aiga ni ata, fai ni taga, pe fau ni mea i luga o ni faavae malo ma oneone.
Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faaaoga lesona faatino. Sa aoao atu e le Faaola ni upumoni o’oo’o e ala i le faatatau ai i mea faitino ua masani ai. E mafai ona e faia se mea talitutusa faapena a o faitau e lou aiga le 3 Nifae 12–16. Mo le faataitaiga, a e faitau i le mataupu 12, e mafai ona e faaali atu se masima, se moliga’o, ma se ofutele. E mafai foi ona tau atu lenei mea i se gaoioiga faamanatu lelei. A uma ona e faitauina nei mataupu, toe faaali atu mea faitino, ma fesili atu i tagata o le aiga po o le a se aoaoga a le Faaola e uiga i ia mea taitasi.
O Le Asiasiga a le Faaola i Tagata i Amerika, saunia e Glen S. Hopkinson