“15-21 Iulai. Galuega 10–15: ‘Ua Tupu le Afioga a le Atua ma Ua Faateleina’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“15-21 Iulai. Galuega 10–15,” Sau, Mulimuli Mai ia te Au—Mo Tagata Taitoatasi ma Aiga: 2019
15-21 Iulai
Galuega 10–15
“Ua Tupu le Afioga a le Atua ma Ua Faateleina”
Faitau ma le totoa le Galuega 10–15, tuu se taimi mo le Agaga e musuia oe i ni manatu ma lagona. O le a se mea o iina e te aoaoina i nei mataupu?
Tusifaamaumau Lagona e Uunaia ai Oe
I Lana auaunaga i le olaga nei, sa masani ona luiina ai e aoaoga a Iesu Keriso ia aganuu ma talitonuga a tagata ua leva ona taofimau i ai; sa lei taofia lenei mea ina ua mavae Lona afio ae i le lagi—e tusa la, sa faaauau ona Ia taitaia Lana Ekalesia e ala i faaaliga. Mo se faataitaiga, i le soifuaga o Iesu sa talai atu ai e Ona soo le talalelei i o latou uso a tagata Iutaia. Ae e lei leva lava ona mavae le maliu o le Faaola, ma avea Peteru ma perofeta o le Ekalesia, sa faaali atu e Iesu Keriso ia Peteru e faapea, ua oo i le taimi e talai atu ai le talalelei i tagata e le o ni Iutaia. E le o se mea e faateia ai i aso nei le manatu lea o le faasoa atu o le talalelei i tagata o Nuuese, o le a la le lesona o loo i lenei tala mo i tatou? E masalo o se tasi o lesona o le, o suiga i aiaiga ma faiga masani—i le Ekalesia anamua ma aso nei—e oo mai e ala i faaaliga mai le Alii i Ana taitai filifilia (Amosa 3:7; MFF 1:38). O faaaliga faifaipea o se tulaga matuai talafeagai lea o le Ekalesia moni ma le ola a Iesu Keriso. E pei o Peteru, e ao ona tatou naunau e talia faaaliga faifaipea ma ola i “afioga uma a le Atua” (Luka 4:4), e aofia ai “mea uma na faaali mai e [Ia], mea uma ua Ia faaali mai nei” ma le “tele o mea silisili ma le tāua” o le a Ia faaalia mai “tau i le Malo o le Atua” (Mataupu Faavae o le Faatuatua 1:9).
Manatu mo Suesuega Faaletagata Lava Ia o Tusitusiga Paia
“E le faailogaina tagata e le Atua.”
Mo le tele o augatupulaga, sa talitonu ai tagata Iutaia e faapea, o le avea ma “fanau a Aperaamo,” po o se e tupuga moni mai ia Aperaamo, o lona uiga o lea tagata ua taliaina (filifilia) e le Atua (tagai Luka 3:8). O soo se isi lava tagata sa manatu i ai o se tagata Nuuese “leaga” o le sa le taliaina e le Atua. I le Galuega 10, o le a le mea na aoao atu e le Alii ia Peteru i le po o ai “ua talia latou e ia”? (Galuega 10:35). O le a se faamaoniga na e maua i lenei mataupu e faapea o Konelio sa ola i se olaga amiotonu lea sa taliaina i le Alii? Aisea e taua ai le iloa “e le faailogaina tagata e le Atua” (fuaiupu 34), o lona uiga, e mafai e tagata uma lava ona maua faamanuiaga o le talalelei pe afai latou te ola i le talalelei? (tagai 1 Nifae 17:35).
E pei o tagata Iutaia o e sa vaai maualalo ia i latou o e sa le o ni fanau a Aperaamo, pe na e maua ea oe lava o e faia ni faamatalaga faalealofa pe le fetaui e uiga i se tasi e ese mai ia te oe? E mafai faapefea ona e faatoilaloina lenei faiga? Atonu e manaia le fai o se gaoioiga faigofie mo nai aso e sosoo ai: Soo se taimi lava lua te fesootai ai ma se tasi, taumafai e mafaufau ia te oe lava, “O le tagata lenei o se atalii/afafine o le Atua.” Ao e faia lenei mea, o a ni suiga e te matauina i le ala e te mafaufau ai ma fesootai ai ma isi?
Tagai foi D. Todd Christofferson, “Tumau i Lo’u Alofa,” Ensign po o le Liahona, Nov. 2016, 48–51; 1 Samuelu 16:7; “Peter’s Revelation to Take the Gospel to the Gentiles” (vitio, LDS.org).
E aoao mai a’u e le Tama Faalelagi i lea mataupu ma lea mataupu e ala mai i faaaliga.
Ina ua vaai Peteru i le faaaliga vaaia ua faamatalaina i le Galuega 10, sa faafaigata ia te ia i le taimi muamua ona malamalama i ai ma “masalosalo i lona lava loto pe se a lea [mea]” (fuaiupu 17). Ae sa tuu atu e le Alii ia Peteru le malamalama sili atu ina o saili i ai Peteru. A o e faitau i le Galuega 10, 11, ma le 15, ia maitau pe na faapefea ona faalolotoina le malamalama o Peteru e uiga i lana faaaliga i le aluga o taimi. Na faapefea ona e sailia ma maua le malamalama faateleina mai le Atua i taimi sa i ai ni au fesili?
Galuega 10, 11, ma le 15 o loo faamatala mai ai ni taimi sa taitaia ai e le Alii Ana auaunaga e ala mai i faaaliga. Atonu e aoga le tusifaamaumau o mea e te maua e faatatau i faaaliga ao e faitau i nei mataupu. E faapefea ona tautala atu le Agaga ia te oe?
Tagai foi “Faaaliga,” Gospel Topics, topics.lds.org; Ronald A. Rasband, “Tuu Atu i le Agaga Paia e Taitai,” Ensign po o le Liahona, Me 2017, 93–96; “The Jerusalem Conference” (vitio, LDS.org).
O a’u o se Kerisiano aua ou te talitonu ma mulimuli ia Iesu Keriso.
O le a le mea taua e uiga i se tagata e ta’ua o se Kerisiano? (tagai Galuega 11:26). O le a le uiga ia te oe o le ta’ua o se Kerisiano po o le tauaveina i ou lava luga o le suafa o Iesu Keriso? (tagai MFF 20:77). Mafaufau i le taua o igoa. Mo se faataitaiga, o le a le uiga o lou faaiu ia te oe? Aisea ua taua ai le igoa o aso nei o le Ekalesia? (tagai MFF 115:4).
Tagai foi Mosaea 5:7–15; Alema 46:13–15; 3 Nifae 27:3–8; M. Russell Ballard, “O Le Taua o se Igoa,” Ensign po o le Liahona, Nov. 2011, 79–82.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Na i ai se taimi sa e maua ai ni aafiaga faaleagaga ae mulimuli ane e masalosalo i mea na tatou lagonaina pe aoaoina? O le a se fautuaga e mafai ona tatou tuu atu i le tasi ma le isi e mafai ona fesoasoani e faatoilalo ai o tatou masalosaloga? (Tagai Ronald A. Rasband, “Ne’i Galo ia te Oe,” Ensign po o le Liahona, Nov. 2016, 113–15.)
Ina ua lafo Peteru i le falepuipui, sa faapotopoto faatasi tagata o le Ekalesia ma tatalo mo ia. O i ai se tagata ua musuia le tou aiga e tatalo mo ia, e pei o se taitai o le Ekalesia po o se e pele? O le a le uiga o le tatalo “faatauanau”? (Galuega 12:5).
Ua Laveaiina Peteru mai le Falepuipui, na saunia e A. L. Noakes
A o outou faitau faatasi i le mataupu lenei, e mafai e nisi o le aiga ona faailoga faamanuiaga na oo mai i soo ma le Ekalesia, ae o isi tagata o le aiga e faailoga mea faafeagai po o tofotofoga sa oo i le au soo. Aisea e faatagaina ai e le Atua mea faigata e tutupu i tagata amiotonu?
O fuaiupu nei o loo faamatala ai se feeseeseaiga i le Ekalesia e uiga i le pe tatau ona peritomeina tagata nuuese (e le o ni Iutaia) e liliu mai, o se faailoga o la latou feagaiga. Sa foia le feeseeseaiga ina ua fono faatasi le au Aposetolo e soalaupule i le mataupu ma oo ai ina maua se tali musuia. Atonu o se taimi lelei lenei e aoao atu ai i lou aiga, o loo faaaoga lava lea mamanu i aso nei. Ia filifili faatasi o se aiga se fesili e uiga i le talalelei e te manao e sue faatasi le tali. Ia vaavaai faatasi mo ni malamalamaaga loloto ma manino o loo i tusitusiga paia ma i aoaoga a perofeta ma aposetolo o aso nei. (E aoga foi le Topical Guide ma le faasino autu i le lomiga o le konafesi o mekasini a le Ekalesia.)
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Tusi se ata. O ata e mafai ona fesoasoani i tagata o le aiga e vaai faalemafaufau ai i aoaoga ma tala faaletusi paia. Atonu e te faitaua ni nai fuaiupu ona tuu lea o se taimi i tagata o le aiga e tusi ai se ata o se mea e fesootai ma mea sa outou faitauina. Mo se faataitaiga, atonu e fiafia tagata o le aiga e tusi ata o le faaaliga vaaia a Peteru o loo i le Galuega 10.
O le faaaliga vaaia faavavega ma le malaga a Konelio le taitai o le toaselau e feiloai ia Peteru ua faaalia ai “e le faailogaina tagata e le Atua” (Galuega 10:34).