“22-28 Iulai. Galuega 16–21: ‘Ua Valaauina i Matou e Le Alii e Folafola Atu le Talalelei’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“22-28 Iulai. Galuega 16–21,” Sau, Mulimuli Mai ia te Au---Mo Tagata Taitoatasi ma Aiga: 2019
22-28 Iulai
Galuega 16–21
“Ua Valaauina i Matou e Le Alii e Folafola Atu le Talalelei”
A o e faitau i taumafaiga a Paulo e talai le talalelei, atonu e uunaia oe e le Agaga i ni manatu po o ni lagona. Tusi i lalo nei uunaiga ma fai ni fuafuaga e faatino ai.
Tusifaamaumau Lagona e Uunaia ai Oe
O se tasi o fetalaiga mulimuli a le Alii i Ana Aposetolo o le poloaiga , “Ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia: aoao atu ia te i latou ia tausi i mea uma ua ou fai atu ai ia te outou” (Mataio 28:19–20). A o le i oo lelei atu Aposetolo i atunuu uma, o le Galuega 16–21 o loo faaalia ai sa tulaga ese le alualu i luma sa faia e Paulo ma ana soa i le faavaeina o le Ekalesia. Sa latou aoaoina atu, papatisoina, ma tuuina atu le meaalofa o le Agaga Paia. Sa latou faia vavega, e oo lava i le faatuina o se alii mai le oti, ma valoia le Liliu Ese Tele (Galuega 20:7–12; 20:28–31). Ma o loo faaauau pea le galuega sa latou amataina e Aposetolo soifua i aso nei, faatasi ai ma soo tuuto e pei o oe, o e o loo fesoasoani e faataunuu le poloaiga a le Faaola i auala e lei mafai ona mafaufauina e Paulo. Atonu o loo e iloa ni tagata o e e le iloaina lo latou Tama Faalelagi ma Lana talalelei. Atonu na e lagonaina le “tiga tele ifo o [lou] loto” ia faasoa atu ia i latou mea ua e iloa e uiga ia te Ia (Galuega 17:16). Afai e te mulimuli i faataitaiga a Paulo o le lotomaualalo ma le lototoa i le faasoaina atu o le talalelei, atonu e te maua se tagata “ua tatalaina e le Alii lona loto” (Galuega 16:14).
Manatu mo Suesuega Faaletagata Lava Ia o Tusitusiga Paia
O le a taiala a’u e le Agaga i a’u taumafaiga e faasoa atu le talalelei.
E manaomia e tagata uma le talalelei a Iesu Keriso, ae o isi tagata ua sili atu le saunia e talia nai lo o isi. O le tasi lea o pogai tatou te manaomia ai le Agaga Paia pe a tatou faasoa atu le talalelei—e taitai atu i tatou ia i latou ua saunia. A o e faitau i le Galuega 16–21, ia matau taimi na taiala ai e le Agaga ia Paulo ma ana soa. O a faamanuiaga na oo mai ona sa latou mulimuli i le Agaga? O le a se taimi sa e lagona ai le uunaiga o oe e le Agaga i au taumafaiga e faasoa atu le talalelei.
Tagai foi i le Alema 7:17–20; Dallin H. Oaks, “Faasoaina Atu o le Talalelei Toefuataiina,” Ensign po o le Liahona, Nov. 2016, 57–60; Tala’i La’u Talalelei 92–93.
E mafai ona ou folafola atu le talalelei i tulaga uma.
O le lafo i le falepuipui mo le talaiina o le talalelei e foliga mai o se mafuaaga malamalama lea e taofi ai le talai atu. Ae ia Paulo ma Sila, sa avea o se avanoa e faaliliu ai se leoleo o le falepuipui (tagai i le Galuega 16:16–34). I le Galuega 16–21 atoa, vaavaai mo isi faataitaiga o le naunau o Paulo e faasoa atu lana molimau i tagata uma. Aisea e te manatu sa matuai lototoa ma le fefe ai o ia? O le a se mea ua e aoao mai i le faataitaiga a Paulo?
E tele atu isi savali e uiga i le faasoa atu o le talalelei i mataupu 16–21. Afai e te vaai ma le totoa, e mafai ona e maua ai nisi e faapitoa ona faatatau ia te oe? Taumafai e faitau mataupu nei faatasi ma le sini lenei i [lou] mafaufau. O le a se mea ua e maua?
“O le fanau a le Atua i tatou.”
I Atenai, sa tau atu ai Paulo i se nuu sa eseese lagona faaalia ma manatu faalelotu. Sa latou saili e le aunoa e “faalogo mai sina tala faatoa iloa,” ma o le mea sa ofo atu e Paulo sa mautinoa lava le fou ia i latou (tagai Galuega 17:19–21). Sa latou tapuai i le tele o atua, e aofia ai se tasi na latou taua “o le Atua e le mailoa” (Galuega 17:23), ae sa latou talitonu o atua o ni paoa po o ni malosiaga, ae e le o ni tagata ola, ma patino, ma e mautinoa lava e le o so tatou Tama. Faitau le mea na tau atu e Paulo e fesoasoani ia i latou ia o mai ia iloa le Atua, ma maitau uiga o le Atua e te mauaina. O le a le uiga ia te oe o le avea ma “fanau a le Atua”? (Galuega 17:29). I lou manatu, e faapefea ona ese le avea ma se atalii o le Atua mai le nao le avea ma se tasi o Ana foafoaga? Afai na e tu i talane o Paulo ao tuuina atu lana molimau, o le a se mea e te ono tau atu i tagata Eleni anamua e uiga i lo tatou Tama Faalelagi? E te iloa se tasi e mafai ona manuia mai le faalogo i lau molimau?
Taua o se Agaga, saunia e Liz Lemon Swindle
Tagai foi Roma 8:16; 1 Ioane 5:2; “We Are the Offspring of God” (vitio, LDS.org).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Ina ia fesoasoani i lou aiga e vaai faalemafaufau i le mea o loo tupu i nei mataupu, atonu e manaia pe a tou faitau faatasi, ia faailoa aai sa asiasi i ai Paulo i luga o se faafanua (tagai i le faafanua i le faaiuga o le otootoga lenei).
E mafai faapefea ona avea atili i tatou e pei o le Au Paia i nei tusitusiga paia? E mafai faapefea e le faitauina o tusitusiga paia i aso uma ona tatou atili “amio lelei” ai? (Galuega 17:11). O le a se mea e mafai ona tatou faia ina ia “maoae le poto i tusi”? (Galuega 18:24).
O aoaoga nei mai le Perofeta o Iosefa Samita e mafai ona aoga i lou aiga e talanoa ai i le Galuega 19:1–7: “O le papatisoga i le vai ua na o le afa lea o le papatisoga, ma e leai se aoga e aunoa ma le isi afa—o le, papatisoga i le Agaga Paia. … ‘O le fanau i le vai ma le Agaga’ o le faatofuina lea i le vai mo le faamagaloina o agasala ma le mauaina mulimuli ane o le mea foaifua o le Agaga Paia. E tuuina atu lea i le faaee atu o lima o se tasi ua i ai le pule na tuuina atu i ai e le Atua” (Aoaoga a Peresitene o le Ekalesia: Iosefa Samita, 102-3). O a ni faamanuiaga ua oo mai ia i tatou mai le mauaina o le meaalofa o le Agaga Paia?
O le a le mea na musuia ai tagata i nei fuaiupu e susunu a latou tusi ia sa tusa ma le “lima sefulu o afe o tupe ario”? (Galuega 19:19). O i ai ni meatotino po o ni gaoioiga faalelalolagi e manaomia ona tatou lafoaia ina ia maua ai faamanuiaga faalelagi?
O le a se taimi sa maua ai e le tou aiga se aafiaga o le aoaoga a Keriso o le: “e sili le manuia o le na te foai atu i le manuia o le na te talia mai”? (Galuega 20:35). O i ai se tasi e mafai ona manuia mai le auaunaga, taimi po o meaalofa e mafai ona tuuina atu e la outou aiga? Ia talanoa o se aiga ni manatu ma fai se fuafuaga e auauna atu ai i se tagata. O a ni o tatou lagona pe a tatou auauna atu i isi? Aisea e sili ai le manuia o le foai atu nai lo le talia mai?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Tusifaamaumau ni musumusuga. A oo mai ni musumusuga po o ni malamalamaaga loloto, ia tusifaamaumau i latou. Mo se faataitaiga, e mafai ona tusifaamaumau ou manatu i avanoa o i autafa o au tusitusiga paia, i le polokalama o le Gospel Library, po o se apitalaaga o suesuega. “A e tusifaamaumauina ni musumusuga faaleagaga, ua e faaali atu i le Alii e te faatauaina Lana taitaiga, ma o le a Ia faamanuia oe i ni isi faaaliga faifai soo” (Aoao Atu i le Ala a le Faaola, 12; tagai foi 30).
O malaga faafaifeautalai a le Aposetolo o Paulo.