2 Korinito 1–7

Aumai ni meafaitino i le vasega e maua ai le mafanafana, e pei o se palanikeke po o se fusi. Fesili i tamaiti pe o le a le mea e faamafanafanaina ai i latou pe a faanoanoa pe fefefe pe i ai foi isi faafitauli. Faitau faatasi ma tamaiti le 2 Korinito 1:3–4 faamalamalama i ai o “puapuaga” o se isi upu lea mo faafitauli faigata. Faasoa atu ni nai auala sa faamafanafanaina ai oe e le Tama Faalelagi, ma molimau atu o le a Ia faamafanafanaina foi tamaiti.

Faaali atu ata o tagata o loo papatisoina (tagai Tusi Ata o le Talalelei, nu. 103 ma le 104) a o e faitauina le 2 Korinito 1:4 ma le Mosaea 18:8–9 i tamaiti. Faamalamalama atu o le papatisoga tatou te folafola atu ai e faamafanafana atu i isi. E mafai faapefea ona tatou mulimuli i le fautuaga a Paulo e “faamafanafana atu i latou ua maua i se puapuaga”?

Valaaulia ia tamaiti e tusi se ata o i latou lava o fesoasoani i se tasi o manaomia le fesoasoani. Tuu atu latou te faamalamalama maia pe faapefea ona aumaia le mafanafana i isi i le faia o nei mea.

Faamalamalama atu i tamaiti sa manao Paulo i le Au Paia i Korinito e faamagalo se tagata sa agasala. Faitau le 2 Korinito 2:7–8, 10, ma valaaulia tamaiti e tuu o latou lima i luga o o latou fatu i taimi uma latou te faalogoina ai upu ia faamagalo atu ma le faamagalo atu i ai.

Valaaulia ia tamaiti e faatino mai taga pe faapefea ona latou tali atu i tulaga e faia ai e se tagata se mea le alofa. Tuu atu ia latou feauaua’i e fai mai “Malie lou loto” ma le “Ou te faamagalo ia te oe.” E faapefea ona tatou fesoasoani i tagata ia iloa ua tatou faamagalo i latou? Faamalamalama atu o se tasi auala o le “faamauina lou alofa,” pe faaali atu lou alofa ia i latou (2 Korinito 2:8).

Fesoasoani i tamaiti e tauloto le fasifuaitau “Matou te talitonu i le faamaoni” (Mataupu Faavae o le Faatuatua 1:13). Tusi le fasifuaitau lea i taulima pepa e mafai e tamaiti ona teuteu ma fai i le fale. Faamalamalama atu o le faamaoni o lona uiga o le tautala i le mea moni.

Fai i tamaiti e sii o latou lima pe a e ta’ua se mea e moni ae tuutuu i lalo pe a e ta’ua se mea e le moni. Fai ni faaupuga faigofie ae e iloagofie, e pei o le “O le aso o le Aso Sa” po o le “E tolu a’u isu.” Toe fai mo ni nai taimi le gaoioiga, ma feauaua’i tamaiti e faia ia faaupuga moni ma sese. Aisea e lelei ai le faamaoni?

A o e faitauina le 2 Korinito 1:3–4, fai i tamaiti e faalogologo mo se tali i le fesili “O le a le mea e fai e le Atua mo i tatou?” Fesoasoani i tamaiti e lisi mai ni auala e faamafanafanaina ai i tatou e le Atua. Valaaulia ia tamaiti e faasoa mai ni aafiaga ina ua latou faanoanoa pe popole pe fefefe foi ma sa faamafanafanaina i latou e le Atua.

Valaaulia ia tamaiti e faasoa mai ni auala e mafai ai ona tatou faamafanafanaina isi. Tuu atu ia i latou se taimi e mafaufau ai i se tasi latou te iloaina e manaomia le faamafanafanaga ma fai se fuafuaga e aapa atu ai i lena tagata.

Ta’u i tamaiti sa i ai se tasi i Korinito sa agasala ma “sa faatupuina ai le tiga” mo le Au Paia (tagai 2 Korinito 2:5). Fai i tamaiti e sue le 2 Korinito 2:7–8 e sue ai le mea na manao ai Paulo i le Au Paia e fai.

Faasoa mai se aafiaga na e faamagalo ai i se tasi—pe sa faamagalo ai oe e se isi—ma pe o a ni ou lagona mulimuli ane.

Faitau faatasi ma tamaiti le 2 Korinito 5:6–7 ma le Alema 32:21 ma fai i ai e vaavaai mo upu ma fasifuaitau ia e fesoasoani e faamanino ai le uiga o le faatuatua. Fai i ai e tusi i lalo a latou faauigaga, faitau leotele mai, ma tuu i luga o le laupapa.

Fusi mata o se tasi o tamaiti, ma fai i isi tamaiti e tuu atu ia te ia faatonuga e fesoasoani ai na te faamaeaina le galuega e pei o le fausiaina o se ‘olo i poloka, tuufaatasia se paso, pe savali i le isi itu o le potu. E fesoasoani faapefea lenei gaoioiga tatou te malamalama ai i le uiga o le “savali i le faatuatua” i le Atua?

Faaali le vitio “Pure and Simple Faith” (LDS.org), ma fesili i tamaiti pe na faapefea ona savali le tamaitai talavou i le faatuatua. Faasoa mai se aafiaga ina ua tatau ona e faatuatua i le Atua. Valaaulia tamaiti e faasoa mai soo so latou aafiaga sa i ai i le savali i le faatuatua.

Faamalamalama atu o le 2 Korinito 7:8–11, sa faasino atu ai e Paulo i se tusi sa ia tusia muamua i le Au Paia, ma lapataia ai i latou ma le lototoa e uiga ia latou agasala. Faitau faatasi fuaiupu nei. Aisea na fiafia ai Paulo ina ua latou tiga? Ta’u i ai o lenei ituaiga o tiga e ta’u o le tiga e tusa i le Atua.

Fai i tamaiti e moeiini ma mafaufau i se taimi sa latou faia ai se mea sese ma sa latou lagona ai le faanoanoa. Valaaulia i latou e fesili ifo ia i latou lava, “Aisea na ou faanoanoa ai?” Tusi i le laupapa ni nai mafuaaga e faanoanoa ai tagata pe a uma ona latou faia se mea sese, e pei o le “Sa ou fefe ina ne’i faasalaina au” po o le “Sa ou maasiasi i mafaufauga o tagata ia te au” po o le “Sa ou iloaina o le a le fiafia le Tama Faalelagi ia te au.” O le fea o tali o i le laupapa e foliga e pei o le “tiga i la le Atua”? Aisea e sili atu ai le tiga i la le Atua nai lo isi ituaiga o faanoanoaga e mafai ona tatou lagona pe a uma ona tatou faia o se mea sese?