“4–10 Novema. Eperu 1–6: ‘Iesu Keriso, ‘o le Tupuga o le Ola e Faavavau’’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“4–10 Novema. Eperu 1–6,” Sau, Mulimuli Mai ia te Au---Mo Tagata Taitoatasi ma Aiga: 2019
Pulu Pāsama i Kiliata, saunia e Annie Henrie
4–10 Novema
Eperu 1–6
Iesu Keriso, “o le Tupuga o le Ola e Faavavau”
O le tusifaamaumauina o manatu faaleagaga e fesoasoani e te iloa ai mea e finagalo le Agaga Paia e aoao atu ia te oe. O le faatinoina o ou manatu e faaalia ai lou faatuatua o na uunaiga e moni.
Tusifaamaumau Lagona e Uunaia ai Oe
O i tatou uma lava e tatau ona lafoaia se mea ia talia ai le talalelei a Iesu Keriso—pe o lena mea o ni mausa le lelei, talitonuga sese, fegalegaleaiga e le talafeagai, po o se isi mea. Mo tagata o Nuuese, o le liua sa masani ona faauigaina o le lafoaia o atua sese. Ae peitai, mo tagata Eperu (Iutaia), o le liua sa faamaonia le fai o sina lavelave, pe afai e le faigata tele, Ma le isi, o o latou talitonuga ma tu ma aga faapelepele sa faavae lea i le tapuai i le Atua moni ma aoaoga a Ana perofeta, mai lava i le fia afe tausaga i tua atu. Ae sa aoao atu e Aposetolo, o le tulafono a Mose ua faataunuuina ia Iesu Keriso ma o lea ua avea se tulafono maualuga atu ma tulaga faatonuina mo e talitonu. O lona uiga la o le taliaina o le faaKerisiano e tatau ai i tagata Eperu ona lafoaia o latou talitonuga ma talafaasolopito sa i ai muamua? O le Tusi i Eperu sa faapea e fesoasoani e tali ai fesili faapena e ala i le aoao atu e taua uma lava le tulafono a Mose, o perofeta ma sauniga, ae e sili atu le taua o Iesu Keriso (tagai Eperu 1:1–4; 3:1–6; 7:23–28). O le mea moni, o nei mea uma e faasino atu i le, ma molimau e uiga ia Keriso o le Alo o le Atua ma le Mesia folafolaina lea sa faatalitali i ai tagata Iutaia. O le savali mo tagata Eperu, ma mo i tatou uma lava, o le, o nisi taimi e tatau ai ona tatou lafoai ese tu ma aga masani ina ia avea Iesu Keriso ma totonugalemu o la tatou tapuaiga ma o tatou olaga—ina “ia maua ai foi le alofa tunoa” e ala ia Keriso (Eperu 4:16).
Manatu mo Suesuega Faaletagata Lava Ia o Tusitusiga Paia
O ai na tusia le Tusi i Eperu?
Ua fesiligia e nisi o tagata atamamai pe o Paulo na tusia le Tusi i Eperu. O le sitali aloaia a Eperu e fai si ese mai isi tusi a Paulo, ma o lomiga muamua lava o le anotusi sa lei ta’ua mai ai se tusitala. Ae peitai, ona o manatu ua faaalia i le FaaEperu ua ogatasi lava ma isi aoaoga a Paulo, ua tele lava ina talia e le Au Paia o Aso e Gata Ai, e tusa ai ma tu ma aga faaKerisiano, o Paulo sa aafia i le tusiga o lenei tala.
(Tagai foi Bible Dictionary, Pauline Epistles.”
O Iesu Keriso “ua matua tusa lava” ma le Tama Faalelagi.
E toatele tagata Iutaia e faigata ona taliaina o Iesu Keriso o le Alo o le Atua. O le Tusi i Eperu ua aoao mai ai, o mea uma e uiga ia Iesu e molimau e uiga ma o le faataitaiga o Lona Tama. A o e faitau i mataupu muamua e lima o le Eperu, e mafai ona e faia se lisi o suafa, matafaioi, uiga auaumama, ma galuega a Iesu Keriso e te tau i ai o loo taua iina. O a ni mea o loo aoao mai e nei mea e uiga i le Faaola? O a ni mea o aoao mai ai e uiga i le Tama Faalelagi?
O a ni mea mai le saunoaga lenei mai ia Elder Jeffrey R. Holland e faaopoopo atu i lou malamalamaaga o aoaoga i nei mataupu? “Na afio mai Iesu … e faaleleia atili le vaaiga a le tagata i le Atua ma augani atu ia i latou ina ia alolofa i lo latou Tama Faalelagi e faapei ona Ia faia i aso uma ma o le a alofa pea lava ia i latou. ... O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama” (“O Le Silisiliese o le Atua,” Ensign po o le Liahona, Nov. 2003, 72).
Sa mafatia Iesu Keriso i faaosoosoga ma vaivaiga ina ia mafai ona Ia malamalama ma fesoasoani mai ia te au.
Pe e te manatu e mafai ona e “faalatalata atu ai ma le faamalosi i le nofoalii o le alofa tunoa” ma saili le alofa mutimutivale? (Eperu 4:16). O le savali e tasi o le Tusi i Eperu o le, e ui lava i a tatou agasala ma vaivaiga, e mafai lava ona tatou o atu i le Atua ma maua Lona alofa tunoa. O le a se mea e te maua i le Eperu 2:9–18; 4:12–16; 5:7–8 e faamalosia ai lou talitonu o le a fesoasoani Iesu Keriso ia te oe ma ou luitau i le olaga nei? Mafaufau e tusifaamaumau i se apitalaaga ou manatu ma lagona e uiga i mea ua faia e le Faaola mo oe.
Tagai foi Mosaea 3:7–11; Alema 7:11–13; 34.
Ina ia maua faamanuiaga a le Atua, “e le [tatau ona] faamaaa” lo’u loto.
E ui ina latou liliu i le faaKerisiano, ae sa faigata i nisi o le Au Paia Iutaia ona talia atoa le talalelei a Iesu Keriso ma ona faamanuiaga. O le toe faamatalaina o le tala ia Isaraelu anamua, sa faamoemoe ai Paulo e tauanau ai tagata Iutaia ia aloese ma le measese sa faia e o latou tuaa—o le teenaina o faamanuiaga a le Atua ona o le le talitonu. (E mafai ona e faitau i le tala sa taua e Paulo i le Numera 14:1–12, 26–35.)
Mafaufau pe faapefea ona faatatau le Eperu 3:7–4:11 ia te oe. Ina ia faia lenei mea, e mafai ona e mafaufau loloto i fesili e pei o nei:
-
Na faapefea ona faaonoono le fanauga Isaraelu i le Alii? (tagai Eperu 3:8–11). O a taunuuga o le i ai o se loto maaa?
-
O le a se taimi sa ou faatagaina ai lou loto ia maaa? Pe o i ai ni faamanuiaga ua finagalo le Atua e aumai ia te au ou te le o mauaina ona o le leai o sou faatuatua?
-
O a ni mea e mafai ona ou faia e atiina ae ai se loto malu ma e loto salamo? (tagai Eteru 4:15; Faataoto 3:5–6; Alema 5:14–15).
Tagai foi 1 Nifae 2:16; 15:6–11; Iakopo 1:7–8; Alema 12:33–36.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
O a ni auala ua faaalia ai e Iesu e alofa o Ia i le amiotonu ae ita i le agasala? Afai e i ai ni o tatou manaoga le amiotonu, o le a se mea e mafai ona tatou faia e suia ai?
E mafai ona e mafaufau i se lesona e fai i mea faitino e fesoasoani ia malamalama ai lou aiga i le uiga o le taofi mau i upumoni o le talalelei “ua tatou faalogologo i ai”? Atonu e te faaalia lenei mea i se mea faitino e faigata ona pipii i ai. E pei faapefea a tatou taumafaiga e taofimau a tatou molimau i le pueina ma le uuina o lenei mea faitino? E faapefea ona tatou faamautinoa “o mea ua tatou faalogologo i ai” ia le “te’a” ese mai ia i tatou? (fuaiupu 1).
Ina ia vailiili le fasifuaitau “alii o lo latou olataga,” e mafai ona e amata i le talanoa po o le a le alii. O le a le mea e faia e le alii? E faapefea ona pei Iesu Keriso o se alii mo i tatou ma lo tatou olataga?
E mafai ona fesoasoani nei fuaiupu ia tou faia ai se talanoaga i le uiga o le valaauina e le Atua ia umia le perisitua pe ia faataunuu isi valaauga o le Ekalesia e se tagata ua i ai le pule. O a ni mea e mafai ona tatou aoaoina mai i faataitaiga a Iesu Keriso e uiga i le mauaina ma le faataunuuina o valaauga?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Faataitai ni faiga eseese. Nai lo o le suesueina o tusitusiga paia i le auala lava e tasi i taimi uma, mafaufau i ni manatu eseese e suesue ai. Mo ni manatu, tagai i “Manatu e Faaleleia ai Au Suesuega Faaletagata Lava Ia o Tusitusiga Paia” i le amataga o le punaoa lenei.
Ua Asiasi Keriso i le Lalolagi Fou, saunia e Walter Rane