“11–17 Novema. Eperu 7–13: ‘O Se Faitaulaga Sili i Mea Lelei Atali’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“11–17 Novema. Eperu 7–13,” Sau, Mulimuli Mai ia te au—Mo Tagata Taitoatasi ma Aiga: 2019
Ua Faamanuia e Mekisateko ia Aperamo, saunia e Walter Rane
11–17 Novema
Eperu 7–13
“O Se Faitaulaga Sili i Mea Lelei Atali”
A o e faitau i le Eperu 7–13. atonu e te maua ni uunaiga e ala mai i le Agaga Paia. Mafaufau i auala e mafai ona e tusifaamaumauina ai i latou; mo se faataitaiga, e mafai ona e tusifaamaumauina i latou i le otootoga lenei, i le avanoa i autafa o au tusitusiga paia, po o le polokalama o le Gospel Library.
Tusifaamaumau Lagona e Uunaia Ai Oe
E oo lava foi i le Au Paia faamaoni e i ai taimi e puapuagatia ai i “upu faifai ma puapuaga” lea e mafai ona luluina ai o latou lagona mautinoa (tagai Eperu 10:32–38). Sa iloa e Paulo sa oo tagata Iutaia liliu mai i le faaKerisiano i ni sauaga matuia ona o lo latou faatuatuaga fou. Ina ia faamalosiau atu ia i latou ia tumau le faamaoni i a latou molimau, sa ia faamanatu atu ia i latou e uiga i le agaifanua umi o tagata talitonu faamaoni mai lo latou lava talafaasolopito: Apelu, Enoka, Noa, Aperaamo, Sarai, Iosefa, Mose—“o e matamata mai” e faapea e moni folafolaga a le Atua ma e aoga ai le faatalitali i ai (Eperu 12:1). O lenei talatuu o le faatuatua ua tofusia ai i latou uma o e vaavaai “atu ia Iesu o le na te taitaiina ma le na te faaatoatoaina le faatuatua” (Eperu 12:2). Ona o Ia, soo se taimi lava e manao ai le fili ia tatou “tuumuli,” nai lo o lena, e mafai ona tatou “faalatalata atu ia te ia ma le loto faamaoni i le faatuatua ua mautinoa lava” (Eperu 10:22, 38). Mo i tatou, e pei o le Au Paia anamua, o Iesu Keriso o le tatou “faitaulaga sili i mea lelei atali” (Eperu 9:11).
Manatu mo Suesuega Faaletagata Lava Ia o Tusitusiga Paia
O le Perisitua Mekisateko o le perisitua e maualuga atu.
Mo le tele o seneturi, sa faaaoga ai e tagata Iutaia le Perisitua faa-Levi, lea e taua o le Perisitua Arona. Ae faatasi ai ma le atoatoaga o le talalelei a Iesu Keriso na aumaia ai le Perisitua Mekisateko e maualuga atu, lea na ofoina mai ai faamanuiaga sili atu. O le a se mea ua e aoaoina e uiga i le Perisitua Mekisateko mai le Eperu 7? O nisi nei o faataitaiga o upumoni e te ono maua:
-
Faaliliuga a Iosefa Samita, Eperu 7:3, 21:O i latou o e ua faauuina i le Perisitua Mekisateko “ua faia e pei o le Alo o le Atua” ma o ni “[faitaulaga] e faavavau.”
-
Eperu 7:11:O le Perisitua faa-Levi e le ofoina mai le “atoatoa” ma o le mea lea ua suia ai e le Mekisateko (tagai MFF 84:18–22).
-
Eperu 7:20–21:O le Perisitua Mekisateko e maua e ala i se tautoga (tagai MFF 84:19–44).
O a ni faamanuiaga ua e mauaina mai le Perisitua Mekisateko ma ona sauniga e faatatau i ai?
Tagai foi i le Alema 13:1–13; Mataupu Faavae ma Feagaiga 121:36–46; Gospel Topics, “Melchizedek Priesthood,” topics.lds.org; Taiala i Tusitusiga Paia, “Mekisateko,” scriptures.lds.org; Henry B. Eyring, “Faatuatua ma le Tautoga ma le Feagaiga o le Perisitua,” Ensign po o le Liahona, Me 2008, 61–64; Dallin H. Oaks, “O Ki ma le Pule o le Perisitua,” Ensign po o le Liahona, Me 2014, 49–52.
O sauniga anamua ma onaponei e faasino atu ia Iesu Keriso.
Atonu sa masani lelei ia uluai au faitau Eperu o le tusi lenei i le falefetafai anamua ma sauniga sa faamatalaina e Paulo. Ae sa lei iloa lelei e nisi o le faamoemoega o nei sauniga o le, ia faasino atu i le taulaga togiola a Iesu Keriso.
I taimi o le tusi paia, i se aso malolo e tasi i le tausaga e taua o le Aso o le Togiola, e ulu atu ai se faitaulaga sili i le nofoaga aupito sili ona paia (po o le Paia o Paia) i le malumalu i Ierusalema ma ositaulagaina ai se oti poo se tamai mamoe e togiola ai mo agasala a Isaraelu. Sa faamalamalama mai e Paulo e faapea, o Iesu Keriso o se faitaulaga sili o le ua ofoina mai se taulaga e tasi—o Lona lava soifua—e togiola ai mo agasala a le lalolagi (tagai Eperu 9:24–10:14).
Mafaufau i sauniga o loo e auai ai i aso nei. E faapefea ona faasino atu nei sauniga ia Iesu Keriso.
Ina ia aoao atili e uiga i sauniga a Iutaia anamua ma o latou faafaailoga, matamata i vitio, “The Tabernacle” ma le “Sacrifice and Sacrament” (LDS.org).
O le faatuatua e manaomia ai le talitonu i folafolaga a le Atua.
Afai e fesili atu se tasi ia te oe e faamanino atu le uiga o le faatuatua, o le a sau tala e fai atu i ai? Sa utuvai mai Sister Anne C. Pingree, o le sa avea ma sui o le Au Peresitene Aoao o le Aualofa, i le gagana mai le Eperu 11 e aumai ai le faauigaga lenei: “O le faatuatua o le taumafaiga faaleagaga ina ia i ai le faatuatua i folafolaga [o le talalelei] o le a faapea ona faataunuuina i se ‘taimi i le lumanai’ ae atonu o le a le mafai ona maua i lenei olaga, o le fua faatatau mautinoa lea o i latou o e talitonu moni” (“O Le Faataunuuina o Folafolaga na Iloa Mamao Atu,” Ensign po o le Liahona, Nov. 2003, 14).
Mafaufau e atinae lau oe lava faauigaga o le faatuatua a o e mafaufau loloto i manatu o loo i le Eperu 11. O a ni mea ua aoaoina ai oe e uiga i le faatuatua [e ala] i faataitaiga a tagata o loo taua i lenei mataupu? (Tagai foi i le Eteru 12:6–22.)
Tagai foi Alema 32:21, 26–43; Jeffrey R. Holland, “An High Priest of Good Things to Come,” Ensign, Nov. 1999, 36–38; Gospel Topics, “Faith in Jesus Christ,” topics.lds.org.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
E mafai ona e valaaulia tagata o le aiga e faasoa mai ni aafiaga faaleagaga o ni taimi sa latou lagonaina ai le “faamalamalamaina” i le upumoni. E mafai faapefea ona fesoasoani ia i tatou nei aafiaga ia “aua le lafoai ai o [tatou] faamalosi” i taimi o tofotofoga po o le le mautonu?
E mafai faapefea ona e fesoasoani i tagata o lou aiga ia aoao mai faataitaiga faamaoni o loo taua i le Eperu 11? Atonu e malie le faatino o tala o nisi o nei faataitaiga. Pe atonu foi, e mafai ona talanoa lou aiga i faataitaiga a isi tagata faamaoni tou te iloa—e aofia ai tuaa, taitai o le Ekalesia, ma tagata o le tou pitonuu.
E tusa ai ma lenei fuaiupu, aisea sa finagalo malie ai Iesu e onosaia tiga ma puapuaga o le satauro? O le a se mea ua aoao mai e lenei mea ia i tatou e uiga i le ala e mafai ona tatou onosaia ai o tatou tofotofoga? Sa tuuina mai e Peresitene Russell M. Nelson nisi o manatu aoga i lenei fuaiupu i lana savali “Olioli ma le Ola ai Faaleagaga” (Ensign po o le Liahona, Nov. 2016, 81–84).
Aisea e aoai ma faasa’o ai i tatou e le Alii? O a ni mea e maitau e tagata o le aiga e uiga i le ala e silasila ai le Alii i aoaiga ao outou suesue faatasi i nei fuaiupu? E mafai faapefea e nei fuaiupu ona aafia ai le ala e te tuuina atu pe maua ai aoaiga?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faaaoga musika e valaaulia ai le Agaga ma aoao aoaoga faavae Na saunoa mai le Au Peresitene Sili, “Ua i ai i musika ni mana le faatapulaaina mo le uunaiga o aiga ia faateleina le faaleagaga ma le maelega i le talalelei” (“Tuleiga Tomua a le Au Peresitene Sili,” Viiga, x). Atonu o se pese e uiga i le faatuatua, e pei o le “Vaivai Ea Fanau a Siona” (Viiga, nu. 159), o le a faaopoopo i se talanoaga faaleaiga mai le Eperu 11.
O faailoga o le malumalu anamua ma ona sauniga na aoao mai e uiga i matafaioi a Iesu Keriso.