“2–8 Tesema. 1–3 Ioane; Iuta: ‘O Le Atua O Le Alofa Lava Ia’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)
“2–8 Tesema. 1–3 Ioane; Iuta,” Sau, Mulimuli Mai ia te Au—Mo Tagata Taitoatasi ma Aiga: 2019
Alofa Atoatoa, saunia e Del Parson
2-8 Tesema
1–3 Ioane; Iuta
“O Le Atua o le Alofa”
A o e faitau i Tusi a Ioane ma Iuta, saili musumusuga e uiga i auala e mafai ona faaali atu ai lou alofa i le Atua. Tusifaamaumau nei uunaiga ma faatino.
Tusifaamaumau Lagona e Uunaia Ai Oe
Ina ua tusia e Ioane ma Iuta a laua tusi, sa laua valoia le faataunuuga o le Liliuese, o se taunuuga o sauaga ogaoga ma aoaoga faavae piopio. Sa faapea lava ona fesiligia ai e faiaoga pepelo pe na faaali moni mai Iesu Keriso “i le tino” (tagai, mo se faataitaiga 1 Ioane 4:1–3; 2 Ioane 1:7). O lea na amata ai e Ioane lana tusi muamua i le tuuina atu o lana molimau patino e uiga i le Faaola: “O le molimau lenei matou te tuuina atu e uiga i le mea sa i ai lava mai le amataga, na faapea ona matou faalogoina, na faapea ona matou vaai i ai i o matou lava mata, na faapea ona matou vaai atu i ai, ma uuina i o matou lima, e uiga i le Upu o le ola” (Faaliliuga a Iosefa Samita, 1 Ioane 1:1 [i le 1 Ioane 1:1, vaefaamatalaga a]). Ae atonu o le savali aupito malosi o tusi a Ioane o le alofa: O le alofa o le Atua ia i tatou ma le alofa e tatau ona ia i tatou mo Ia ma Ana fanau uma lava. O le mea lava ia, sa maua e Ioane lava ia le alofa o le Faaola (tagai Ioane 13:23; 20:2), ma sa manao o ia ia lagona e le Au Paia lena lava alofa e tasi a o feagai ai ma faafitauli ma mea faafeagai, aua “e leai se fefe i le alofa; a o le alofa atoatoa e faateaeseina ai le fefe” (1 Ioane 4:18).
Manatu mo Suesuega Faaletagata Lava Ia o Tusitusiga Paia
O le Atua o le malamalama, ma o le Atua o le alofa lava ia.
Afai e te filifilia se upu se tasi pe lua e faamatala ai le Atua, o a na upu? I ana tusi, sa faaaoga ai e Ioane ia upu “malamalama” ma le “alofa” (1 Ioane 1:5; 4:8, 16). A o e faitau i le 1 Ioane, mafaufau loloto i aafiaga a Ioane e pei ona tusifaamaumauina i le Tusi a Ioane, ma mafaufau pe na aoaoina faapefea Ioane e nei aafiaga e uiga i le malamalama ma le alofa o le Atua. O a ni aafiaga patino ua aoaoina ai oe e faapea, o le Atua o le malamalama ma le alofa lea?
Tagai foi i le Ioane 3:16–21; 15:9–17; 2 Nifae 26:24; Mataupu Faavae ma Feagaiga 50:24; 88:6, 12–13; 93:36–37.
E mafai ona ona ou faapei o Iesu Keriso.
Pe e foliga maualuga tele ea ia te oe le sini o le avea e faapei o Keriso? Mafaufau i le fautuaga faamalosiau a Ioane: “Le fanau e, ia outou tumau ia te ia, ina ia maua ai e i tatou le faamalosi pe a faaali mai o ia … [ma] foliga ai lea o i tatou ia te ia” (1 Ioane 2:28; 3:2). O le a se mea e te maua i le 1 Ioane 2:24–3:3 e tuuina atu ia te oe le lototele ma le mafanafana i le avea ai o se soo o Iesu Keriso? A o e suesue i tusi a Ioane, vaavaai mo isi mataupu faavae po o fautuaga e mafai ona fesoasoani ia te oe i au taumafaiga ia avea atili e faapei o Keriso.
Tagai foi Moronae 7:48; Mataupu Faavae ma Feagaiga 88:67–68; “Becoming Like God,” Gospel Topics, topics.lds.org.
Faaliliuga a Iosefa Samita, 1 Ioane 4:12
Pe “leai se tagata ua vaai i le Atua i se taimi”?
Ua faamanino mai i le Faaliliuga a Iosefa Samita, 1 Ioane 4:12 e faapea, “e leai se tagata ua vaai i le Atua i se taimi, vagana ai i latou o e faatuatua” (i le 1 Ioane 4:12, vaefaamatalaga a; tagai foi i le Ioane 6:46; 3 Ioane 1:11). Ua tusifaamaumauina i tusitusiga paia ni taimi sa faaali mai ai e le Atua le Tama o Ia lava i tagata faamaoni, e aofia ai Ioane lava ia (tagai Faaaliga 4; tagai foi i le Galuega 7:55-56; 1 Nifae 1:8; Mataupu Faavae ma Feagaiga 76:23; Iosefa Samita—Talafaasolopito 1:16–17).
E mafai ona ou faatoilaloina le lalolagi a o faaali atu lo’u faatuatua ia Iesu Keriso ma ou toe fanaufouina.
O le manatu o le faatoilaloina o le lalolagi e tele ni taimi o loo faaali mai ai i tusitusiga a Ioane. Sa tusifaamaumauina e Ioane ia Iesu o fetalai, “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33). Ma i le Faaaliga 2–3, sa tusifaamaumauina ai e Ioane folafolaga a le Alii ia i latou o e faatoilaloina le lalolagi. O le a le tala a Ioane i le 1 Ioane 5:3–5 e uiga i le faatoilaloina o le lalolagi? A o e faitau i le 1 Ioane 5, vaavaai mo mea e ao ona tatou faia e faatoilalo ai le lalolagi ma maua ai le ola e faavavau. Mata e faapei le faatoilaloina o le lalolagi i lou olaga? E mafai foi ona e maua ni tali ma ni vaaiga loloto ma manino i le savali a Elder Neil L. Andersen “Manumalo i le Lalolagi” (Ensign po o le Liahona, Me 2017, 58–62).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
Ina ia fesoasoani i lou aiga e mafaufau loloto i aoaoga a Ioane, faapotopoto faatasi i totonu o se potu pogisa ma tuu atu i tagata o le aiga ia oo i le eseesega o le va o le savali “i le pouliuli” ma le savali “i le malamalama.” O a auala e faaoso ai e le ita i tatou e savavali i le pouliuli ma tautevateva? O a aulala e aumaia ai e le alofa o le tasi i le isi le malamalama i totonu o o tatou olaga?
O a mea o i ai i nei fuaiupu e faateleina ai lo tatou “mautinoa” o loo i ai i le Atua, ma i lo tatou mafai ona maua tali i a tatou tatalo?. E mafai foi ona e sueina le “Tatalo” i le Bible Dictionary, Taiala i Tusitusiga Paia (scriptures.lds.org), po o le Gospel Topics (topics.lds.org).
Pe o i ai ni poloaiga ua tatou manatu e “mamafa” pe faigata ona mulimuli i ai? E faapefea e lo tatou alofa i le Atua ona suia le auala tatou te manatu ai i Ana poloaiga?
O le tausia o poloaiga a le Atua e fesoasoani tatou te faatoilaloina ai le lalolagi.
O i ai ea ni lamatiaga faaleagaga ua faapea ona “sosolo ifo” i o tatou olaga ma aiga? (Iuta 1:4). E mafai faapefea ona tatou mulimuli i le apoapoaiga a Iuta ia “faamalolosi ona finau mo le faatuatua” ma tetee atu i nei mea e lamatia ai? (Iuta 1:3). O le a se mea e mafai ona tatou faia, e faamautinoa ai e “faateleina ... le alofa, ma le manuia” i o tatou aiga? (Iuta 1:2).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava ia
Mauaina o le alofa o le Atua. Ua aoao mai Elder M. Russell Ballard, “[O le] talalelei o se talalelei o le alofa—alofa i le Atua ma le alofa i le tasi ma le isi” (“God’s Love for His Children,” Ensign, Me 1988, 59). A o e faitau i tusitusiga paia, mafaufau e tusi i lalo pe faailoga ia upu ma fasifuaitau o loo faaalia ai le faamaoniga o le alofa o le Atua.
Savali faatasi ma Au, na saunia e Greg K. Olsen