“16–22 Tesema. Kerisimasi: ‘Tala Lelei o le Olioli Tele’” Sau, Mulimuli Mai ia te Au—Mo Tagata Taitoatasi ma Aiga: Feagaiga Fou 2019 (2019)

“16–22 Tesema. Kerisimasi,” Sau, Mulimuli Mai ia te Au---Mo Tagata Taitoatasi ma Aiga: 2019

Ata

o le pepe o Iesu i se faatanoa vao

Saogalemu i totonu o se Falemanu saunia e Dan Burr

16-22 Tesema

Kerisimasi

“Tala Lelei o le Olioli Tele”

Mo nisi, o le Kerisimasi e mafai ona avea o se taimi vevesi tele. Mafaufau pe mafai faapefea ona fesoasoani lou suesueina o le Feagaiga Fou e aumai ai se agaga o le toafilemu ma le paia i lou olaga. Mafaufau loloto i le faatosinaga o le soifua mai ma le misiona a le Faaola i lou olaga, ma tusifaamaumau soo se uunaiga faaleagaga e oo mai.

Tusifaamaumau Lagona e Uunaia Ai Oe

Aisea e aumaia ai e le fanau mai o se pepe le olioli tele? Atonu ona o se pepe fou e mafai ona avea ma faailoga o le faamoemoe. E i ai se mea e uiga i se olaga fou lava e tumu i avanoa e faapea ona valaaulia ai i tatou e mafaufau loloto i mea atonu e faapolopolo e le olaga mo lena tamaitiiti, ma o a foi ni mea matagofie o le a ia ausia. E lei i ai lava se taimi ua sili atu ona moni ai lenei mea nai lo i le soifua mai o le Alo o le Atua, o Iesu Keriso. E lei i ai lava se taimi ua sili atu ona tele ai le faamoemoe ua tuuina i se tamaitiiti, ma e lei i ai lava se taimi ua fanau mai ai se tasi ma ni folafolaga se tele.

Ina ua valaaulia e se agelu ia leoleo mamoe e saili i se tama meamea faatoa fanau i se faatanoa vao, sa ia tuuina atu foi ia i latou se savali e uiga i lena tama meamea. Sa o se savali o le faamoemoe—e faapea na oo mai lenei pepe i le lalolagi e faataunuu se misiona paia. O leoleo mamoe sa latou “faailoa [le latou savali] … o i latou uma e na faalogo ai, ua ofo i latou i mea ua taua mai ia te i latou e leoleo mamoe. A o Maria ua taofi ia upu uma, ua mafaufau ai i lona loto” (Luka 2:17–19). Atonu e lelei le mulimuli i le faataitaiga a Maria i lenei Kerisimasi: ia mafaufau loloto i lou loto i mea ua e aoaoina i lenei tausaga e uiga i le Faaola. Na faapefea ona Ia faataunuuina Lana misiona o le togiola i tala ua e faitau i ai? Ma le mea e sili atu le taua, na faapefea ona suia e Lana misiona lou olaga?

Ata

aikona o le suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 1:18–25; 2:1–12; Luka 1:26–38; 2:1–20

Sa afio mai maualalo Iesu Keriso ina ia fanau mai ma i tatou i luga o le fogaeleele

E tusa lava pe faafia ona e faitau pe faalogo i le tala i le soifua mai o Iesu Keriso, ia suesue i ai i le taimi lenei ma le manatu lenei i lou mafaufau: “O le Kerisimasi e le na o se faamanatuga o le auala na afio mai ai Iesu i le lalolagi, ae o le iloaina foi po o ai o Ia—o lo tatou Alii ma le Faaola, o Iesu Keriso—ma pe aisea na Ia afio mai ai” (Craig C. Christensen, “The Fulness of the Story of Christmas” [faigalotu a le Au Peresitene Sili, 4 Tes., 2016], broadcasts.lds.org).

O le a se mea ua e iloa e uiga i le po o ai Iesu Keriso ao lei soifua mai o Ia? (tagai, mo se faataitaiga, Ioane 17:5; Mosaea 3:5; MFF 76:13–14, 20–24; Mose 4:2). O a ni aafiaga o lenei malamalama i ou faalogona pe a e faitau e uiga i Lona soifua mai?

O le a se mea ua e iloa e uiga i le pogai na afio mai ai Iesu Keriso i le lalolagi? (tagai, mo se faataitaiga, Luka 4:16–21; Ioane 3:16–17; 3 Nifae 27:13–16; MFF 20:20–28). O a ni aafiaga o lenei malamalama i ou faalogona e uiga i le Faaola? O faapefea ona aafia ai le ala o loo e ola ai?

Tagai foi 2 Korinito 8:9; Eperu 2:7–18; 1 Nifae 11:13–33; Alema 7:10–13; “The Nativity” (vitio, LDS.org).

1 Korinito 15:21–26; Kolose 1:12–22; 1 Peteru 2:21–25

Sa faataunuu e Iesu Keriso Lana misiona ma ua mafai ai ona ou mautofi i le ola e faavavau.

E ui lava sa siomia le tala i le soifua mai o Keriso i mea faavavega na tutupu, semanu o Lona soifua mai e pei lava o le fanau mai o se isi [tagata] pe ana leai le galuega maoae sa Ia faataunuuina mulimuli ane i Lona soifuaga. E pei ona faaupu ai e Peresitene Gordon B. Hinckley, “Semanu e avea le pepe o Iesu o Peteleema o se isi lava pepe pe ana leai le Keriso togiola o Ketesemane ma Kalevaria, ma le upu moni manumalo o le Toetu” (“The Wondrous and True Story of Christmas,” Ensign, Tes. 2000,).

O loo maua i le Feagaiga Fou atoa ia faamaoniga o le misiona paia a le Faaola ma Lona alofa tele mo isi. O le fea o fuaitau po o tala ua e manatuaina? Atonu o le a e toe tagai i tua i le punaoa lenei po o lau apitalaaga mo suesuega ma toe faamanatu nisi o lagona sa e tusifaamaumauina. E mafai foi ona e faitau i le 1 Korinito 15:21–26; Kolose 1:12–22; 1 Peteru 2:21–25 ma manatunatu loloto i le ala ua faamanuiaina ai e le Faaola ma Lana galuega lou olaga. O le a se mea ua musuia oe e sui i lou olaga? O le a faapefea ona e utuvai mai i le mana o le Faaola?

Ata

aikona o le suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

Mataio 1:18–25; 2:1–12; Luka 1:26–38; 2:1–20

E mafai faapefea ona outou faamanatuina ma lou aiga le soifua mai o Iesu Keriso? O ni manatu nei, pe e mafai foi ona e aumaia ni ou oe lava manatu:

Faitau pe faatino faatasi ia vaega o le tala o le Fanau mai o Iesu.
Matamata le vitio “The Nativity” (LDS.org).
Vaavaai i nisi o punaoa i le christmas.mormon.org; jesuschrist.lds.org; po o le “Christmas,” Gospel Topics, topics.lds.org.
Matamata i se faigalotu o le Kerisimasi a le Au Peresitene Sili (broadcasts.lds.org;).
Usu faatasi ni viiga o le Kerisimasi, po o le filifili o ni tuaoi po o ni uo e asiasi i ai ma pesepese atu ia i latou (tagai Viiga, nu 201–14).
Faatino se galuega o le auauna atu.
Fai atu i tagata o le aiga e vaavaai mo faamatalaga i le tala o le Fanau mai o Iesu, latou te maua ai ni manatu mo mea teuteu po o teuga e mafai ona latou faia e faamanatu atu ai ia Iesu Keriso.

1 Korinito 15:21–26; Kolose 1:12–22; 1 Peteru 2:21–25

Aisea tatou te faafetai ai ona sa soifua mai Iesu Keriso? O a ni meaalofa ua Ia tuuina mai ia i tatou? E faapefea ona tatou faaalia lo tatou agaga faafetai ia te Ia?

“O Le Keriso Soifua: O Le Molimau a Aposetolo,”

Afai e te fia fesoasoani i lou aiga ia taulai atu i le Faaola i le vaitaimi o le Kerisimasi, atonu e mafai ona outou faaaluina se taimi e faitau ma suesue faatasi ai i le “O Le Keriso Soifua: O Le Molimau a Aposetolo,” (Ensign po o le Liahona, Me 2017, pito i totonu o le faavaa o luma). Atonu e mafai ona e taulotoina fuaitau mai le “O Le Keriso Soifua” pe vaavaai mo faamatalaga o le soifuaga o le Faaola i le Feagaiga Fou e lagolago ai faamatalaga o loo i ai. E mafai foi ona e valaaulia tagata taitoatasi o le aiga e tusi lana molimau e uiga ia Iesu Keriso ma, afai e uunaia ai, faitau atu i le aiga.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava ia

Vaavaai mo Iesu Keriso. Ua aoao mai tusitusiga paia e molimau mea uma ia Iesu Keriso (tagai Mose 6:62–63), o lea la, e tatau ona tatou vaavaai mo Ia i mea uma. A o e faitau i tusitusiga paia, mafaufau e tusi i lalo pe faailoga ia fuaiupu o aoao mai ia te oe e uiga ia te Ia. Ia faaavanoa ni taimi i aso ao agai atu i le Kerisimasi e vaavaai ai mo mea o loo siomia ai oe o molimau mai ia Iesu Keriso.