Mga Ideya upang Mapagbuti ang Iyong Personal na Pag-aaral ng Banal na Kasulatan

Itinuturo sa atin ng mga banal na kasulatan na lahat ng bagay ay nagpapatotoo kay Cristo (tingnan sa 2 Nephi 11:4; Moises 6:63), kaya hanapin Siya sa mga pangyayari, kuwento, at turo sa Bagong Tipan. Isiping isulat o markahan ang mga talatang nagtuturo tungkol sa Tagapagligtas at kung paano sumunod sa Kanya.

Maaari kang mapahanga sa partikular na mga salita at parirala sa mga banal na kasulatan, na para bang isinulat ang mga ito para sa iyo. Maaari mong madama na angkop ito sa iyo mismo at maaaring magbigay-inspirasyon at makahikayat sa iyo. Isiping markahan ang mga ito sa iyong mga banal na kasulatan o isulat ang mga ito sa isang study journal.

Kung minsan ang mga katotohanan ng ebanghelyo (madalas tawaging doktrina o mga alituntunin) ay diretsahan ang pagkasabi, at kung minsan ay ipinahihiwatig sa pamamagitan ng halimbawa o kuwento. Itanong sa iyong sarili, “Anong mga walang-hanggang katotohanan ang itinuturo sa mga talatang ito?”

Pag-ukulan ng pansin ang iyong mga iniisip at nadarama, kahit walang kaugnayan ang mga ito sa binabasa mo. Maaaring ang mga impresyong iyon mismo ang mga bagay na nais ng iyong Ama sa Langit na matutuhan mo.

Isipin kung paano naaangkop sa buhay mo ang mga kuwento at turong binabasa mo. Halimbawa, maaari mong itanong sa iyong sarili, “Ano ang mga naranasan ko na kahalintulad ng binabasa ko?” o “Paano ko masusunod ang halimbawa ng taong ito sa mga banal na kasulatan?”

Habang nag-aaral ka ng mga banal na kasulatan, may mga tanong na maaaring pumasok sa isipan mo. Ang mga tanong na ito ay maaaring nauugnay sa binabasa mo o sa buhay mo sa pangkalahatan. Pagnilayan ang mga tanong na ito at hanapin ang mga sagot habang patuloy kang nag-aaral ng mga banal na kasulatan.

Para magkaroon ng karagdagang mga ideya sa mga talatang binabasa mo, gamitin ang Gabay sa mga Banal na Kasulatan at iba pang mga tulong sa pag-aaral.

Maraming paraan para maitala ang mga impresyong dumarating habang nag-aaral ka. Halimbawa, maaari mong markahan ang isang makabuluhang salita o parirala at itala ang mga iniisip mo sa iyong banal na kasulatan. Maaari mo ring isulat sa isang journal ang mga ideya, damdamin, at impresyong natatanggap mo.

Basahin ang itinuro ng mga propeta at apostol sa mga huling araw tungkol sa mga alituntuning nakikita mo sa mga banal na kasulatan (halimbawa, tingnan sa conference.lds.org at mga magasin ng Simbahan).

Ang pagtalakay sa mga ideya mula sa iyong personal na pag-aaral ay hindi lang mabuting paraan para turuan ang iba, kundi tumutulong din itong patatagin ang pagkaunawa mo sa nabasa mo.

Ang pag-aaral ng banal na kasulatan ay hindi lamang dapat magbigay ng inspirasyon sa atin—dapat tayong akayin nito na baguhin ang paraan ng ating pamumuhay. Pakinggan ang ipinahihiwatig ng Espiritu na gawin mo habang nagbabasa ka, at pagkatapos ay mangakong kumilos ayon sa mga pahiwatig na iyon.

Larawan

pamilyang nagbabasa ng mga banal na kasulatan