Mamona 1–6

Faitau le Mamona 1:1--3 i tamaiti, pe faaaoga le “Mataupu 49: O Mamona ma Ana Aoaoga” (Tala o le Tusi a Mamona, 138--42, po o le vitio talafeagai i luga o le ChurchofJesusChrist.org). Valaaulia i latou e faalogo pe o le a le matua o Mamona ina ua tuuina atu e Amarona ia te ia se misiona faapitoa. Ona fai atu lea ia i latou e uu i luga le tele o tamatamai lima. Ina ia fesoasoani i tamaiti e mafaufau i le talavou sa i ai Mamona, faaali atu ia i latou se ata o se tasi e 10 tausaga. Fesoasoani ia i latou ia malamalama i uiga lelei na vaaia e Amarona ia Mamona ao laitiiti, ma ia molimau atu e mafai e tamaiti ona pei o Mamona ao latou mulimuli ia Iesu Keriso.

Taaalo i se taaloga lea e toe fai ai e tamaiti taga masani e te faia. Ona faaali lea o ata o mea na faia e Iesu, ma talanoa pe mafai faapefea ona tatou mulimuli ia te Ia (tagai Tusi Ata o le Talalelei, nu. 33--35, 41-42). Ia talanoaina auala na mulimuli ai Mamona ia Iesu Keriso-mo se faataitaiga, e ala i le aoaoina atu o le talalelei, uunaiina tagata ia usiusitai i le Atua, ma alofa atu i isi.

Faitau le Mamona 3:3 ma le 9 i tamaiti, ma faamatala atu na le iloa e Sa Nifae na faamanuiaina i latou e le Tama Faalelagi. Fesoasoani i tamaiti e mafaufau i faamanuiaga ua tuuina atu e le Tama Faalelagi ia i latou. Faʻaali ata po o mea faitino e tuʻuina atu ia i latou manatu. O le a se mea e mafai ona tatou faia i le aso e faaali atu ai ua tatou faafetai i le Tama Faalelagi mo o tatou faamanuiaga?

Fesoasoani i tamaiti e mafaufau i faamanuiaga ua tuuina atu e le Tama Faalelagi ia i latou, ma fai atu ia i latou e tusi ata o nisi o nei faamanuiaga. Valaaulia i latou e tautau a latou ata i se mea i le fale e mafai ai ona latou vaai ia i latou ma manatua e faamanuiaina tele i latou e le Tama Faalelagi i le tele o auala. E mafai foi ona e valaaulia i latou e faailoa mai faamanuiaga e oo mai mai le Tama Faalelagi ao latou usuina le fuaiupu muamua o le “Ou Te Faafetai Ia Te Oe, Le Tama e” (Tusipese a Tamaiti,9).

Fai atu i tamaiti taitasi e tusi se tagata i luga o le laupapa, ma faasino atu le eseesega o foliga o tagata taitoatasi na latou tusia mai isi. Tusi se fatu lapoa e siomia ai ata uma. Fesoasoani i tamaiti ina ia malamalama e finagalo le Tama Faalelagi ina ia tatou alolofa i tagata uma. Faitau le Mamona 3:12, faamamafa upu “alofa” ma “alofagia.” O le a le mea na faia e Mamona e faaalia ai lona alofa mo isi?

Usu faatasi se pese e faatatau i le alofa i isi, e pei o le “Fetalai Mai Iesu e Alofa i Tagata Uma” (Tusipese a Tamaiti,39), aʻo faʻaalia ata o tamaiti mai le salafa o le lalolagi. Molimau atu i le alofa o le Atua mo Ana fanau uma. Faamaea faatasi ma tamaiti le itulau o gaoioiga mo lenei vaiaso

Valaaulia tamaiti taitoatasi e faitau se tasi o mau nei, ma fesoasoani ia i latou e faasoa mai mea na latou aoaoina e uiga ia Mamona: Mamona 1:1–3; 2:1, 23–24; ma le 3:1–3, 12, 20–22. Ona fetufaai atu lea o uiga lelei e te vaaia i tamaiti taitoatasi.

Faaali atu se ata o Mamona (tagai i le ata i totonu otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Fesoasoani i tamaiti ia latou iloa ona sa nafa Mamona ma faatuatuaina e tausia ma faasaoina faamaumauga a sa Nifae, ua ia te i tatou le Tusi a Mamona i aso nei. Talanoa ma tamaiti pe o le a le uiga o le talitonuina ma le faatuatuaina. Valaaulia i latou e mafaufau loloto i auala e mafai ai ona sili atu le talitonuina o i latou.

Ata

O Mamona a o tamaitiiti

Tusi ia ulutala nei i luga o le laupapa: O le faanoanoa lea e taitai atu ai i le salamo ma le Faanoanoa e le taitai atu ai i le salamo. Fai atu i tamaiti e auaua’i i le faitauina o fuaiupu mai le Mamona 2:8, 10–15. Fesoasoani ia i latou e tusi mea latou te aoaoina e uiga i le faanoanoa i lalo o ulutala talafeagai i luga o le laupapa. E faapefea ona tatou mautinoa o le faanoanoa tatou te lagona mo a tatou agasala e taitai atu ai i tatou e sui?

Valaaulia se tasi o le au epikopo po o se matua o se tasi o tamaiti e faasoa atu i le vasega pe faapefea e le faanoanoa faaleatua ona fesoasoani ia i tatou e suia ina ia avea atili e faapei o le Tama Faalelagi ma Iesu Keriso. Aisea e taua ai le iloa pe o tatou lagonaina le tiga faaleatua po o le faanoanoa faalelalolagi? Valaaulia tamaiti e saili le Mamona 2:12 e sue ai mafuaaga e tatau ai ona “olioli … tatou loto” (Mamona 2:12).

Fesoasoani i se tamaitiiti e faitau le Mamona 3:12, ma valaaulia tamaiti e tusi se fuaiupu se tasi e tauaofai ai mea na latou aoaoina mai ia Mamona e uiga i le alofa atu i isi. Valaaulia tamaiti e faasoa mai mea na latou tusia. E faapefea ona tatou lagona le alofa o le Atua mo isi? (tagai Moronae 7:48). O le a se mea e mafai ona tatou faia e faʻaalia ai lo tatou alofa mo tagata i la tatou vasega ma o tatou aiga?

Fesoasoani i tamaiti e faamaea le itulau o gaoioiga o lenei vaiaso. Fesoasoani ia i latou e mafaufau i ni auala anoa e aapa atu ai i le alofa ia i latou atonu e ese mai ia i tatou.