1 Korinito 8–13

Faitau le 1 Korinito 10:13 i tamaiti, ma valaaulia i latou e faliu ese mai ia te oe pe a latou faalogo i upu “tofotofo” po o le “tofotofoga.”

Fai ni faailoga taofi laiti mo tamaiti. Faamatala ni nai tala pupuu o tagata o e o le a tauau e faia se filifiliga sese. A o faalogologo tamaiti, valaaulia i latou e tuu i luga a latou faailoga pe a fai e le tagata o i le tala se filifiliga sese. O le a le filifiliga tonu? Molimau atu o le a fesoasoani le Tama Faalelagi ia i latou e filifili le mea tonu.

Faaali atu se ata o Iesu, ma usu faatasi ma tamaiti se pese e uiga ia Iesu Keriso, e pei o le “O Loo Ou Taumafai e Avea e Pei o Iesu” (Tusipese a Tamaiti, 40-41). E fesoasoani faapefea le manatuaina o Iesu tatou te faia ai filifiliga lelei? Faaali atu ata o isi mea e fesoasoani ia i tatou e faia filifiliga lelei, e pei o matua po o tusitusiga paia. Fesili i tamaiti pe o le a le mea e fesoasoani ia i latou e faia filifiliga lelei.

Faitau faatasi le 1 Korinito 12:7–11, ma faailoa mai ia meaalofa faaleagaga na ta’u mai e Paulo. Fesoasoani i tamaiti e mafaufau i taga e mafai ona o faatasi ma nei meaalofa a le Agaga, ma faaaoga ia taga e fesoasoani ai i tamaiti e manatua ia meaalofa.

Fai i tamaiti e tusi se ata o se meaalofa e fiafia i ai ua latou mauaina. Faamalamalama atu ua aumaia e le Tama Faalelagi ia i tatou ia meaalofa faaleagaga e faamalolosia ai lo tatou faatuatua ma fesoasoani ai ia i tatou e faamanuia isi.

Tusi se faaupuga mo tamaiti taitasi, e faamatala ai se meaalofa faaleagaga ua e vaaia ia te ia (pe e mafai foi ona e valaaulia ia matua e tusia na faaupuga). Afifi ia faaupuga e pei o ni meaalofa. Faataga ia tamaiti e tatala a latou meaalofa, ma fesoasoani ia i latou e faitau e uiga ia latou meaalofa faaleagaga.

Faitau le 1 Korinito 13:8 ma le Moronae 7:47, ma fesoasoani i tamaiti e toe fai mai le “O le alofa mama o le alofa le pona o Keriso.” Faaali atu ata o Iesu o loo alofa ma agalelei atu, ma fesili i tamaiti pe na faapefea ona Ia faalia le alofa i isi (tagai Tusi Ata o le Talalelei mo manatu).

Valaaulia se tamaitiiti e tu i luma o le vasega. Fesili i le tamaitiiti pe o le a faapefea ona ia auauna atu i se isi tagata o le vasega. Faamalamalama atu o se tasi lea auala e mafai ona tatou faaalia ai le alofa mama i isi. Valaaulia isi tamaiti e feauauai e faaalia le alofa mama.

Usu se pese e uiga i le alofa i isi, e pei o le “Fetalai Mai Iesu e Alofa i Tagata Uma” po o le “Ia Fealofani” (Tusipese a Tamaiti 39, 74), faatasi ma tamaiti. Faaali atu ni ata o tagata esese (e pei o se matua, faiaoga, po o se uo), ma fesili i tamaiti e faasoa mai pe mafai faapefea ona latou auauna atu i lena tagata. Valaaulia ia tamaiti e mafaufau i se tasi e mafai ona latou auauna atu i ai ma tusi se faaupuga pe tusi se ata e avatu i lena tagata. Afai latou te manaomia nisi manatu, faaali le vitio “Pass It On” (LDS.org).

Valaaulia tamaiti e faitau i ni paga le 1 Korinito 10:13 ma aotele le fuaiupu ia latou lava upu. Fai i tamaiti e faasoa mai se aafiaga na fesoasoani ai le Tama Faalelagi ia i latou e aloese pe tetee atu i tofotofoga. O le a se mea e mafai ona fai e faalagolago ai i le Tama Faalelagi pe a tofotofoina i tatou?

Tusi i ni fasipepa ia tofotofoga e ono feagai ma tamaiti i le aso. Valaaulia ia tamaiti e tofu filifili se pepa ma faasoa mai ia mea na tuuina mai e le Tama Faalelagi e fesoasoani ai ia te i tatou e aloese pe tetee atu i nei tofotofoga. Mo nisi manatu, faitau faatasi le Alema 13:28–29.

Fai i se tamaitiiti e faitau le 1 Korinito 11:28. O le a le uiga o le “suesue” ifo ia i tatou lava a o lei aai ma feinu i le faamanatuga? Fai i tamaiti e mafaufau i isi tagata o e suesueina mea, e pei o fomai, leoleo nana, po o saienitisi (mo se faataitaiga, o fomai e suesueina o tatou tino mo manu’a po o faama’i e manaomia ona faamalolo.) O le a se mea o aoao mai e a latou galuega e uiga i le ala tatou te suesue ifo ai i tatou lava pe a tatou aai ma feinu i le faamanatuga?

Fai i tamaiti e fai se lisi o mea e mafai ona latou mafaufau i ai pe a latou aai ma feinu i le faamanatuga. Valaaulia i latou e faaaoga a latou lisi e fai ma faamanatu e suesue ifo ai i latou lava ile taimi o le faamanatuga.

Fai i tamaiti e tusi i le laupapa ia meaalofa faaleagaga latou te mauaina i le 1 Korinito12:7–11; 13:2. Valaaulia i latou e sue soo se meaalofa faaopoopo o loo ta’ua i le Moronae 10:8–18 ma le Mataupu Faavae ma Feagaiga 46:13–26. Faasoa atu ia i latou nisi o meaalofa faaleagaga faaopoopo o loo ta’ua e Elder Marvin J. Ashton: “O le meaalofa o le fesili; o le meaalofa o le faalogo; … o le meaalofa o le aloese mai le femisaa’i; … o le meaalofa o le sailia o le amiotonu; o le meaalofa o le le faamasino atu; o le meaalofa o le vaavaai atu i le Atua mo le taitaiga; … o le meaalofa o le manatu alofa mo isi; … o le meaalofa o le ofoina atu o le tatalo; o le meaalofa o le tuuina atu o se molimau maoae” (“There Are Many Gifts,” Ensign, Nov. 1987, 20). Valaaulia ia tamaiti e talanoa e uiga i meaalofa faaleagaga latou te vaaia i le tasi ma le isi.

A o lei amataina le vasega, fesili i matua e uiga i meaalofa latou te vaaia ia latou fanau, pe mafaufau foi oe lava e uiga ia latou meaalofa. Ta’u i tamaiti e uiga i nei meaalofa, ma fai i ai e mate mai po o ai le tamaitiiti o i ai lena meaalofa. Valaaulia ia tamaiti e tusi i lalo se auala se tasi o le a latou faaaoga ai a latou meaalofa e faamanuia ai se tasi i lenei vaiaso.

Faamatala ni tulaga eseese e mafai ai e tagata ona faaaoga se meaalofa faaleagaga mai le 1 Korinito 12:7–10. Valaaulia ia tamaiti e faailoa mai ia meaalofa faaleagaga e mafai ona faaaoga i tulaga taitasi.