1 Korinito 14–16

Toe faifai soo le fasifuaitau lenei faatasi ma tamaiti: “E toe faaolaina uma ia Keriso” (1 Korinito 15:22). Faaali le ata o le Faaola toetu (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Faamalamalama atu o le a i ai se aso tatou te oti uma ai, ae ona sa toetu mai Iesu, o lea o le a tatou toe ola uma ai pe a uma ona tatou oti.

Faaaoga se lesona i mea faitino e pei o lea e aoao atu ai e uiga i le Toetu: Faaali i tamaiti se peleue, lea e faatusa i o tatou tino faitino. A o tatou ola, e i ai o tatou agaga i totonu o o tatou tino, ma e mafai ona gaoioi o tatou tino (faamaulu le peleue). A tatou oti, e tuua e o tatou agaga o tatou tino faitino, ma e le mafai ona gaoioi o tatou tino (aveese le peleue ma tuu i luga o se laulau po o se nofoa e faatusa i se tino ua le o i ai se agaga). A tatou toetutu, e toe foi mai o tatou agaga i o tatou tino (toe faamaulu le peleue), ma e le toe tuueseesea lava. Tuu i tamaiti e feauaua’i e faamaulu le peleue ma toe aveese a o faamalamalama e se isi tamaitiiti le mea e tupu pe a tatou toetutu mai.

Fesoasoani i tamaiti e mafaufau i mea e le mafai ona latou faia mo i latou lava (e pei o le amoina o se mea mamafa po o le aapa atu i se mea o i se fata maualuga). O ai e fesoasoani ia i latou e faia nei mea? Faaali se ata o se tasi o ou augatama ua oti e aunoa ma le papatisoina. Faamatala i tamaiti e uiga i lenei tagata, ma faamalamalama atu o lenei tagata e le mafai ona papatiso e aunoa ma le fesoasoani mai se tasi o i le lalolagi.

Fesili i tamaiti pe i ai ni tagata o o latou aiga ua o i le malumalu e faia papatisoga mo e ua maliliu. Faaali atu ata o se vai papatiso o se malumalu. Pe o iloa e tamaiti le mea e tupu iinei? Faamalamalama atu o totonu o le malumalu e mafai ona tatou papatiso mo tagata o e ua maliliu ae le’i papatisoina. Ona mafai lea e na tagata ona filifili pe latou te taliaina le papatisoga.

Tusi i le laupapa le selesitila, terasitila, ma le telesitila. Fesoasoani i tamaiti e a’o le ta’uga o nei upu.

Faaali ni ata o le la, masina, ma fetu. O le fea e sili ona malamalama lona pupula? Faitau i tamaiti le 1 Korinito 15:40–41 (tagai foi Faaliliuga a Iosefa Samita, 1 Korinito 15:40, vaefaamatalaga a). Faamalamalama atu o le la, masina, ma fetu e faatusa i malo e mafai ona tatou ola ai pe a mavae ona tatou toetutu mai. I le malo selesitila, e mafai ona tatou nonofo ai ma Tama Faalelagi.

Tusi le la i le laupapa ma tuu ai ni fasipepa ninii, po o ni sitepu, i le eleele e tau atu i le la. O pepa taitasi e faatusa i se mea e tatau ona tatou faia e ulufale atu ai i le malo selesitila (tagai MF&F 76:50–53). Tuu atu i tamaiti e faasoa mai ni manatu ma laalaa agai atu i le malo selesitila.

Valaaulia ia tamaiti e feauaua’i i le faitauina o fuaiupu i le 1 Korinito 15:12–22, ma vaavaai mo tali i le fesili “Mata o le a se mea e tupu pe ana leai se toetu?”

Valaaulia ia tamaiti e faatino mai taga pe faapefea ona faamalamalama atu le toetu i se tasi. Mo manatu, tagai i le savali a Thomas S. Monson o le “Mrs. Patton—ua Toe Faaauau le Tala” (Ensign po o le Liahona, Nov. 2007, 21–24). Tagai foi vitio “Until We Meet Again” (LDS.org). Tuu atu lau molimau i le Toetu o Keriso.

Faitau le 1 Korinito 15:29. O le a le mea na faia e le Au Paia i ona po o Paulo ua tatou faia foi i ona po nei?

Fesili i tamaiti pe aisea tatou te papatiso ai mo e ua maliliu. Afai e tatau ai, faamalamalama atu o le toatele o o tatou augatama, sa le’i maua le avanoa e papatiso ai ma faamau i lenei olaga. I totonu o le malumalu, e mafai ona tatou papatiso ai ma faamau mo i latou.

I nai aso a o loma le vasega, talosaga se matua o se tasi o tamaiti e sau sauniuni e faasoa mai le gafa o lona aiga, pe faamatala se tala e uiga i se tuaa. E mafai foi ona e faasoa atu e uiga i ou lava augatama.

Valaaulia se tasi o le au epikopo e faasoa mai ni nai mea e mafai e tamaiti ona fai ina ia agavaa ai e ulu atu i le malumalu. Fesili i tamaiti pe o a mea e mafai ona latou faia ia manatua ai e faia nei mea. Tusi o latou manatu i luga o le laupapa. Valaaulia i latou e faia se sini e o i le malumalu i se aso.

Faitau le 1 Korinito 15:40–41 ma valaaulia se tamaitiiti e tusi se ata o le la, masina, ma le fetu i le laupapa. Fai i tagata o le vasega e faailoa mai pe o le fea ituaiga tino toetu e faatusa i ai ata taitasi.

Usu faatasi se pese e uiga i malumalu, e pei o le “Ia Tuu Mai E Le Alii Se Malumalu” (Tusipese a Tamaiti, 73). O le a se mea o aoao mai e lenei pese ia i tatou e uiga i le sauniuni e ola i le mamalu selesitila?

Faamalamalama atu sa vaaia e Iosefa Samita se faaaliga lea na ia vaai ai i malo e tolu lea e fetaui ma ituaiga o tino o loo faamatala mai e Paulo. Fesoasoani i tamaiti e sue mai ia fasifuaitau mai le Mataupu Faavae ma Feagaiga 76:50–53, 70; 76:71–79; 76:81–82 o loo faamatala mai ai nei malo e tolu.