Mosaea 29–Alema 4

• Afai e aoga i tagata o le vasega le talanoaina pe faapefea ona tosina le sosaiete mo le lelei, e mafai ona e valaaulia i latou e mafaufau i ni nai faafitauli o feagai ma lou nuu ma lisi mai ni nai mea i luga o le laupapa (aloese mai le talanoaina auiliili o nei faafitauli). E mafai e tagata o le vasega ona iloilo le Alema 2:1--7 e sue ai po o a faafitauli na feagai ma sa Nifae ma pe o le a le mea sa latou faia i ai. O le a se mea semanu e tupu pe ana fai e lei faia e “tagata o le ekalesia” ia lagona o latou leo? O le a se isi mea ua tatou aoaoina e uiga i tagatanuu lelei mai lenei tala, i le Mosaea 29:26-27, ma mai le tala o loo i “Punaoa Faaopoopo”? Atonu e mananao ia tagata o le vasega e mafaufau i se mea o le a latou faia e tosina ai lo latou nuu mo le lelei a o manatunatu ai i se tasi o faafitauli o i le laupapa.

• O le faataitaiga a Kitiona o teena ia Neoa e mafai ona musuia ai lau vasega. Atonu e mafai ona e vave fai i se tagata e iloilo le talafaasolopito o Kitiona ma faasoa mai i le vasega (tagai Mosaea 19:1–8; 20:15–22; 22:1–9; ma le Alema 1:2–9). E faavae i lea iloiloga, e mafai e tagata o le vasega ona lisi mai nisi o uiga musuia o Kitiona. Mo se faataitaiga, ina ua faalogo Kitiona i aoaoga sese a Neoa, sa faafetaia’ia Neoa e Kitiona “i afioga a le Atua” (fuaiupu 9). Ia latou suesuega faaletagata lava ia, atonu na maua e tagata o le vasega ia mau e faamaonia ai le sese o aoaoga a Neoa o loo maua i le Alema 1:3--6. Valaaulia i latou e faasoa mai mau na latou maua. E tele foi mau o loo fautuaina mai i le “Punaoa Faaopoopo.” E mafai faapefea ona pei o Kitiona i la tatou puipuiga o le upumoni?

• O aoaoga sese a Neoa o loo faamatala mai i le Alema 1:3--6, e mafai ona fesoasoani tatou te iloa ai auala e faaaoga e Satani e faaseseina ai i tatou. Mo se faataitaiga, e tele ona ia nanaina ana talapepelo i totonu o le upumoni. Mafaufau e valaaulia tagata o le vasega e sailiili i le Alema 1:3--4 ma faailoa mai pepelo na ta’ua e Satani ma upumoni na ia faaaogaina e faatosinaina ai. O a nisi o pepelo o loo suifefiloi ma le upumoni o loo faaseseina ai tagata i ona po nei? E mafai faapefea ona tatou fesoasoani i o tatou aiga ma e pele ia i tatou ona iloa le eseesega i le va o le mea moni ma le mea sese?

• E mafai e le vasega ona usuina pe faitau se viiga e uigai le lotomaualalo, e pei o le “Ia E Lotomaualalo” (Viiga, nu. 69), ma talanoaina pe ese faapefea lona savali mai le savali a Neoa i le Alema 1:2–9. E mafai foi ona latou vaai le eseesega o mea na aoao atu e Neoa e uiga i faiaoga o le talalelei ma mea na aoao atu e Alema ma isi taitai o le Ekalesia ma faata’ita’ia (tagai Alema 1:26; 4:15--20). O le a le mea na faaosofia ai Neoa? E faapefea ona ese mai ia Alema? Fautuaina tagata o le vasega e mafaufau i mea o faaosofia ai i latou lava e galulue auauna i le Ekalesia. O le a le mea o fautuaina mai i le Alema 1:26 e uiga i lo tatou tiutetauave o ni tagata aoao?

• O le talanoaina o le Alema 1 ma le Alema 4 e mafai ona fesoasoani i tagata o le vasega ia malamalama i le ala e aafia ai tagata taitoatasi ma le Ekalesia i le faamaualuga. E mafai ona e vaevaeina le vasega i ni vaega ma fai i le tasi vaega e aoao e uiga i le tulaga o le Ekalesia e pei ona faamatala mai i le Alema 1:19–30, ae aoao e isi vaega le tulaga o le Ekalesia i ni nai tausaga mulimuli ane, o loo faamatala mai i le Alema 4:6–15. Fai atu i vaega taitasi e faasoa mai pe na faapefea le Ekalesia ma ona tagata e tusa ai ma fuaiupu sa latou faitauina. E mafai ona latou fuafuaina faatasi se ala fatufatu e faia ai lenei mea---mo se faataitaiga e mafai ona latou tusia se ata pe saunia se tala faatino puupuu. A uma ona fefaasoaai ia vaega, fai i ai e talanoaina mea sa latou aoaoina e uiga i aafiaga o le faamaualuga i le Ekalesia ma ona tagata ma faamanuiaga o le lotomaualalo. O a lesona o i ai i nei tala mo i tatou i ona po nei?

• E toatele tagata e mafai ona fesootai atu i mea na lagonaina e Alema ina ua “faanoanoa tele” o ia (Alema 4:15) e uiga i le amioleaga ma mafatiaga o lona nuu. Atonu e mafai e tagata o le vasega ona mafaufau e uiga i se e pele o loo latou popole i ai ma teuloto i mafaufau lena tagata a o latou faitauina le Alema 4:12--20. A uma ona faitau le vasega, e mafai ona e fai atu i ai fesili faapenei e uunaia ai se talanoaga o fuaiupu: O le a se mea na aumaia ai le olioli i tagata i o latou tulaga faigata? O le a le uiga o le fasifuaitau “sa lei tuulafoaiina o ia e le Agaga o le Alii” ia te oe? (Alema 4:15). O a osigataulaga na faia e Alema e fesoasoani ai i lona nuu, ma o a osigataulaga o talosagaina i tatou e fai i nisi taimi? O a faataitaiga ua tatou vaaia i le mana o le “molimau manino”? (Alema 4:19). E mafai faapefea ona tatou faasoaina atu a tatou molimau e aunoa ma le tau lauga atu po o le faamasinosino? E mafai ona e tuu atu i tagata o le vasega se taimi e tusi ai se savali o le molimau i e pele ia i latou.

• Atonu o le a manuia tagata o le vasega mai le talanoaina po o le a le uiga o le “molimau manino”. O le vitio “Apostle Testimony Montage” (ChurchofJesusChrist.org) o loo i ai ni faataitaiga lelei tele. E faapefea e nei molimau, po o isi ua tatou faalogo i ai, ona “uunai ai [i tatou] ia manatua o [tatou tiute”? (Alema 4:19.) E fesoasoani faapefea nei molimau ia i tatou e faatoilalo ai le faamaualuga ma finauga?

E lei leva ona tofia Sister Belle S. Spafford e avea ma Peresitene Aoao o le Aulaofa i le 1945, sa valaaulia taitai o le Aualofa e auai i se fonotaga a se fono tele iloga faaleatunuu a tamaitai. Ua tele tausaga talu ona avea taitai aoao o le Aualofa ma sui auai o lea fono, ae sa latou lagonaina sa lei lelei ona taulimaina i latou e le aufono. Ina ua maea se talanoaga ma ona fesoasoani, sa fautuaina e Sister Spafford ia Peresitene Siaosi Alapati Samita, le Peresitene o le Ekalesia, faapea ua tatau ona faamuta ona toe avea le Aualofa ma sui auai i le fono.

A o latou talanoaina le fautuaga, sa saunoa Sister Spafford, “E te silafia, Peresitene Samita, e leai se matou mea o maua mai i le Aufono.”

Sa ia faamatalaina mulimuli ane:

“Sa tilotilo mai le Peresitene ia te au ma le ofo. Sa ia saunoa mai, ‘Sister Spafford, pe e te mafaufau pea lava i taimi uma i mea e te maua mai? Pe e te le mafaufau ea i ni taimi e mafaufau ai i mea e tatau ona e tuuina atu? Ou te talitonu,’ sa ia faaauau ai, ‘o tamaitai Mamona e i ai se mea e tuuina atu i tamaitai o le lalolagi, ma e mafai foi ona latou aoao mai ai ia i latou. O lea nai lo lou faamutaina o le avea ai o outou ma sui auai, ou te fautua atu e te alu ma ave nisi o sui auai aupito tomai o lau pulega ma toe o i lena fono.’

“Na ia fai mai lea ma se faamamafa, ‘Ia faasusulu atu lo outou malamalama’” (Belle S. Spafford, A Woman’s Reach [1974], 96--97).

Sa usitai Sister Spafford i lea fautuaga. Sa tele tausaga o tautua ai o ia i le aufono ma sa iu ina filifilia o se tasi o ona taitai.

• Mataio 7: 21–23

• Galuega 20:33–35

• 1  Peteru 5:2

• 2 Nifae 26:29–31

• 2 Nifae 33:9

• Enosa 1:23

• Mosaea 18:24–26

• Alema 1:26

• Alema 11:37

• Helamana 12:25–26