Mataio 4; Luka 4–5

O le tala i le Faaola o tetee atu ia Satani e mafai ona fesoasoani i tagata o le vasega e iloa ai auala e taumafai ai Satani e faaosooso i latou. E mafai e le vasega ona filifili se tasi o tofotofoga o i le Mataio 4:1–11 po o le Luka 4:1–13 ma mafaufau i se tofotofoga i ona po nei, se tofotofoga e fesootai i ai (e mafai ona fesoasoani faamatalaga o i le “Punaoa Faaopoopo). Aisea e aoga ai le iloa na fetaiai le Faaola ma tofotofoga e talitutusa pei foi ona tatou fetaiai i aso nei? Aisea na mafai ai e Keriso ona tetee atu i tofotofoga? Mo isi faataitaiga faatusi paia o tagata na teena Satani, tagai Kenese 39:7–20; 2 Nifae 4:16–35; ma le Mose 1:10–22.

O se tasi auala e fautuaina ai le talanoaga e uiga i le Mataio 4:1–11 ma le Luka 4:1–13 o le tusia lea o ni fesili se lua i le laupapa: O le a se mea ua tatou aoao e uiga ia Keriso mai lenei tala? ma le O le a se mea ua tatou aoao e uiga ia Satani? Ona valaaulia lea o le vasega e saili ia fuaitau e sue ai tali i nei fesili ma tusi a latou tali i le laupapa.

O le a se mea e ono fesoasoani i lau vasega e tetee ai i faaosoosoga? E mafai ona e fai i le vasega e toe iloilo mea o loo tutupu i le Mataio 4:1–11 po o le Luka 4:1–13 lea na fesoasoani ai le malamalama o le Faaola i tusitusiga paia e tali atu ai ia Satani (i lona fai atu, “ua tusia”). Tuu i le vasega se taimi e sue ai ma faasoa mai mau e mafai ona puipui ma faamalolosia ai i latou pe a tofotofoina. (Mo ni manatu, e mafai ona latou sue le faamatalaga i le “Tofotofoga”i le Taiala mo Autu.)

Ina ia fesoasoani i tagata o le vasega ia malamalama atili i lenei tala, e mafai ona e faamalamalama i ai o faalaniga Mesia ma Keriso e faauiga uma “o le ua faauuina.” A o latou faitauina le Luka 4:18--21, fai i ai e mafaufau pe o le a le uiga o le faapea o Iesu o le Keriso, o le Mesia, po o le o Le ua Faauuina. Atonu foi latou te iloaina e fesoasoani le faitau o le “Anointed One i le Bible Dictionary. O faapefea ona tautino atu e Iesu i aso nei o Ia o le Mesia? Valaaulia tagata o le vasega e faasoa mai pe na faapefea ona latou iloa o Keriso o lo latou Faaola.

Atonu e i ai ni lesona e fesoasoani e aoao ai e ala i le sailiili pe aisea na le taliaina ai e tagata o Nasareta Iesu o le Mesia folafolaina. O se tasi auala e fai ai o le faatusatusa o o latou uiga faaalia ma le fafine Sarefata ua oti lana tane ma Naamanu i le Feagaiga Tuai. E mafai ona e vave faafesootaia ni tagata o le vasega ma fai i ai e o mai sauniuni e aotele tala taitasi nei (tagai 1 Tupu 17:8–24; 2 Tupu 5:1–17; Luka 4:16–30). O a mea o aoao mai e nei tala e uiga i vavega ma le tali atu i auauna a le Atua? Pe o vaai tagata o le vasega i se feau mo tagata o le Ekalesia i aso nei, i upu a le Faaola i tagata i Nasareta?

O nisi taimi o le taitaiga e tuu mai e le Alii e le talafeauga i le taimi muamua. E mafai e le vasega ona saili le Luka 5:1--1, ma vaavaai mo mea na fesili ai le Faaola ia Peteru ma pe aisea na masalosalo ai Peteru i Ana faatonuga. Mata na faapefea ona aafia le vaaiga a Peteru e uiga i le Faaola ma ia lava ona o lenei mea? E mafai ona e valaaulia tagata ole vasega e faasoa mai ni aafiaga na latou faaaoga ai lo latou faatuatua i le taitaiga faalelagi, e ui ina le malamalama atoatoa i ai. O le a le taunuuga ina ua latou faaaogaina lo latou faatuatua?

Ata

O Iesu o loo valaauina Peteru ma Aneterea i le sami

E pei lava ina “lafoai mea uma” e faifaiva ina ia mulimuli ia Iesu Keriso (Luka 5:11), e i ai mea e tatau ona tatou lafoaia ina ia avea ma Ona soo. O le a se mea o faaataata mai i le Mataio 4:18--22 e uiga i uiga faaalia ma le faatuatua o Peteru, Aneterea, Iakopo, ma Ioane? E ono fesoasoani le aumaia o se upega fagota i le vasega ma valaaulia tagata o le vasega e tusi i lalo mea latou te mananao e lafoai pe ua uma ona lafoai ina ia mulimuli ai ia Keriso ma tuu i latou i le upega. Mafaufau e valaaulia ni nai tagata o le vasega e faasoa mai pe na faapefea ona suia o latou olaga ina ua latou filifili e lafoai mea uma ae mulimuli i le Faaola.