Mataio 5; Luka 6

O le Lauga a le Faaola i luga o le Mauga, lea na tuuina atu faapitoa i Ona soo sa pito latalata atu ia te Ia, e amata i faaupuga ua lauiloa o Faaamuia, lea na valaaulia ai e Keriso i tatou e toe manatunatu i le uiga o le ola i se olaga faaamuia---o se olaga o le fiafia tumau. Ina ia amata le talanoaga e uiga i le fiafia tumau, e mafai ona e fai i le vasega e faasoa mai po o a mea e afua ai ona latou fiafia. E tusa ai ma Faaamuia, o le a le mea na fetalai Iesu e “faaamuia” ai i se tagata pe fiafia ai e faavavau? E faapefea ona ese aoaoga a Iesu mai isi ala o loo taumafai tagata e sue ai le fiafia?

Ina ia fesoasoani i tagata ole vasega ia malamalama i faaupuga e pei o le loto mama po o le faatupuina le filemu, e mafai ona e lisiina nisi o faaupuga mai le fuaiupu 3–12 i le laupapa. Ona valaaulia lea o le vasega e fautua mai faafeagai o faaupuga taitasi ma mea ua latou aoao mai faaupuga taitasi e ala i le faia o nei mea. Fai i le vasega e manatunatu loloto po o a mea e mafai ona latou suia ina ia mafai ona avea ma ituaiga o tagata o loo faamatala mai i faiupu nei. O le a le mea o faaopoopo mai e le 3 Nifae 12:3, 6 i lo tatou malamalama i le Mataio 5:3, 6?

O se tasi ala e suesue ai i fuaiupu nei o le valaaulia lea o vasega taitasi e suesue i mau faaopoopo e uiga i Faaamuia ma faasoa mai i le vasega mea latou te aoaoina. E faapefea e se tagata latou te iloa ona faataitai i lena mataupu faavae?

O a lagona o lau vasega ina ua latou faitau i le fetalaiga a Iesu faapea o i latou o le malamalama o le lalolagi”? O le a le uiga o le nana o a tatou lamepa “i lalo o le mea e fua ai saito,” ma aisea e ono faaosoosoina ai i tatou e faia lenei mea? O le saunoaga a Elder Robert D. Hales i le “Punaoa Faaopoopo” e ono faamalosiau. O ai sa avea o se “malamalama” i tagata o lau vasega?

Mafaufau i se auala e faataitai ai le aoaoga a Keriso faapea o i tatou o malamalama o le lalolagi. E mafai ona e faaali atu se ata o se aai o malamalama i le po? Pe mafai ona aumai se moliuila ma nana i lalo o se ato? Aisea ua faatusa ai e le Faaola ona soo i le malamalama? E mafai faapefea ona tatou faaaogaina lenei malamalama e avea ai o se lamepa i isi? (tagai MFF 103:9--10). E mafai e tagata o le vasega ona talanoaina pe faatino i taga ni auala e mafai ai ona susulu atu le malamalama o le talalelei i o latou olaga e faamanuia ai isi.

O nisi o mau e mafai ona faaopoopo i la outou talanoaga e uiga i le malamalama e aofia ai le 3 Nifae 18:24; Mataupu Faavae ma Feagaiga 50:24; 84:44–47; 88:50, 67; ma le 93:36–40. E ono fiafia foi tagata o le vasega e usu viiga e uiga i le malamalama, e pei o le “O Iesu Lou Sulu” ma le “Le Atua, le Tama e,” Viiga, nu. 49, 97. O a ni mea e faaopoopo e nei viiga ma mau i lo tatou malamalama i le Mataio 5:14–16?

O tulaga o loo faamatala mai i le Mataio 5 sa patino i ona po o le Faaola, peitai o mataupu faavae na Ia aoao atu e laugatasia ai. Ina ia fesoasoani i le vasega e vaai i le faatatauga i o latou olaga, valaaulia i latou e filifili se tasi o nei fuaitau ma mafaufau i se faataitaiga faaonaponei e faapupula mai ai le mea sa aoao mai ele Faaola: fuaiupu 21–24; 27–30; 33–37; 38–39; 40–42; ma le 43–44. E mafai ona latou faia lenei mea taitoatasi pe fai i ni vaega ma faasoa mai i le vasega a latou faataitaiga.

E ono fiafia le autalavou i se taaloga faafetaui lea e fesoasoani latou te iloa ai aoaoga a le Faaola o loo maua i le Mataio 5:21--48 e suia ai le tulafono a Mose. E mafai ona e faia se seti o kata o ni fasifuaitau e amata i le “ua outou faalogo” (e faamatala ai le tulafono a Mose) mai le Mataio 5:21–44. Fai se isi seti o fasifuaitau mai fuaiupu e amata i le “ae ou te fai atu” (e faamatala ai le tulafono maualuga a Keriso). Faafao uma seti o kata, ae tuu atu i se tagata o le vasega e filifili se tasi o kata “ua outou faalogo”, ma vaavaai mo mea e fetaui. Faifai pea seia faafetaui uma e le vasega tulafono a Mose ma aoaoga fou a Keriso. Mo mea taitasi e fetaui, talanoaina pe aisea ua manaomia ai aoaoga a le Faaola i o tatou aso.

E mafai faapefea ona e fesoasoani i tagata ole vasega ia iloa o le uiga o le poloaiga a le Faaola ia “atoatoa” pei ona faamalamalama mai e Peresitene Russell M. Nelson, ia “atoa lelei” po o le “ua mae’a”? (Mataio 5:48; “Perfection Pending,” Ensign, Nov. 1995, 86–88). O se manatu lenei: ‘oti’oti se ata o Iesu i se paso, ma valaaulia le vasega e tusi i tua o fasi paso taitasi se aoaoga mai le Mataio 5 e musuia i latou e faaaoga i o latou olaga. Tuu i latou e galulue faatasi e faamae’a le paso. E fesoasoani faapefea le Togiola a Iesu Keriso ia i tatou ia “atoa lelei” pe “mae’a”? (tagai Bible Dictionary, “Grace”).

E mafai foi ona e valaaulia tagata ole vasega e faatu se sini e faatino se uunaiga latou te maua a o suesue i le Mataio 5. Mafaufau pe mafai faapefea ona e tulitataoina lenei valaaulia i lesona o lumanai.