Mataio 3; Mareko 1; Luka 3

E faapefea ona tatou saunia mo se asiasiga a se malo taua? E mafai ona fesoasoani se fesili faapea ia te oe e folasia atu ai se talanoaga e uiga i le pe na faapefea ona saunia e Ioane le Papatiso tagata ia talia Iesu Keriso. Ona vavae lea o le vasega i ni vaega se tolu e faitau le Mataio 3:1–6; Mataio 3:7–12; ma le Luka 3:10–15, ma vaavaai pe na faapefea ona saunia e Ioane le Papatiso ia tagata e talia Iesu Keriso i o latou olaga. Ia feauaua’i vaega e faasoa mai mea na latou maua.

E pei lava ona sa faia e Ioane le Papatiso, e fesoasoani foi perofeta soifua e saunia i tatou e talia le Faaola i o tatou olaga. Ina ia fesoasoani i tagata o le vasega e faia le sootaga o perofeta i ona po nei ma Ioane le Papatiso, e mafai ona outou toeiloiloina aoaoga a Ioane le Papatiso i le Mataio 3:1--12 ma le Luka 32--18 ma ni fautuaga mai le konafesi aoao pito lata mai. E faapefea ona fesoasoani lenei fautuaga faaperofeta ia i tatou e saunia ai e talia le Faaola?

Faaliliuga a Iosefa Samita, Luka 3:4--11 (i le faaopoopoga o le Tusi Paia) o loo aumai ai le malamalamaaga i le misiona a Iesu Keriso i talaatu o mea o loo maua i le Luka 34--6. O a mea o aoao e le vasega mai nei fuaiupu e uiga i le Faaola ma le manaomia ona tatou salamo?

Ata

Ioane le Papatiso o loo talai atu

I le Luka 3:8, na aoao e Ioane le Papatiso ia tagata ae lei mafai ona latou papatiso, e tatau ona latou faaali atu “fua,” po o se faamaoniga, o lo latou salamo. E mafai faapefea ona e fesoasoani i tagata o le vasega e faailoa le faamaoniga o lo latou lava salamo? E mafai ona e fai atu ia i latou e saili i le Luka 3:8--14 ma vaavaai mo mea na manatu Ioane o “fua” o le salamo. E mafai foi ona latou iloiloina le Moronae 61--3 ma le Mataupu Faavae ma Feagaiga 20:37. E mafai ona e tusia se laau ‘aina i luga o le laupapa ma tuu atu i le vasega e faaigoa fua o i luga o le laau i “fua” o le salamo latou te mauaina. E mafai foi ona lelei lenei taimi e talanoa ai pe o le a le uiga o le salamo faamaoni. Ta’u i ai o se tasi ala e mafai ona “faasa’o lona ala” (Luka 3:4) e ala lea i le salamo mai soo se mea faalavefau e ono taofia le Agaga mai le oo mai ia i tatou.

O le usuina o le viiga “Faapaia Mai Au,” Viiga, nu. 70, e mafai ona faamalosiauina ai le talanoaga e uiga i le auala e mafai ai e le salamo ona fesoasoani ia tatou avea atili e faapei o le Faaola. Mo se vitio musika o lenei viiga, tagai mormontabernaclechoir.org.

Ina ia iloilo le tala o le papatisoga o Iesu Keriso, taumafai le manatu lea: Fai i le vasega pe mafai faapefea ona latou faaaogaina le Mataio 3:13--17 e aoao ai se tasi, e pei o se tamaitiiti po ose tasi o se isi faatuatuaga, e uiga i le papatisoga. (E mafai foi ona latou faaaogaina le ata i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga.) O a elemene taua o le papatisoga latou te faamamafaina? E mafai ona latou faataitaia o latou manatu e ala i le aoao atu e le tasi le isi.

Ina ia fesoasoani i le vasega e manatua o latou lava papatisoga ma tomanatu i le taua o le ola ai i a latou feagaiga o le papatisoga, e mafai ona e valaaulia i latou e faitau le Mataio 3:13–17 ma le saunoaga a Elder Robert D. Hales i le “Punaoa Faaopoopo.” E ono fiafia tagata o le vasega e faasoa o latou lagona i o latou lava papatisoga ma a latou feagaiga o le papatisoga. E mafai foi ona latou usuina le “Mulimuli Mai ia te Au,” Viiga, nu. 62.

Na aoao atu e Ioane le Papatiso e faapea o le Faaola o le a papatiso atu ‘i le Agaga Paia, ma le afi”(Mataio 3:11) O le papatisoga i le afi e tupu pe a faamauina i tatou ma maua le meaalofa o le Agaga Paia. E tatau i se a ona tatou maua le meaalofa o le Agaga Paia e agai atu ai i le malo o le Atua? O le a le aafiaga o le papatisoga i le afi ma le Agaga Paia ia i tatou? (tagai Alema 5:14). O le vitio “Baptism of the Holy Ghost” (LDS.org) e mafai ona fesoasoani i lenei talanoaga.

O se gaoioiga lenei o le a fesoasoani i le vasega e faalautele ai le talanoaga i le aoaoga faavae o le papatisoga. Tusi fesili nei i le laupapa ma mau i ni fasipepa. Valaaulia le vasega e filifili fasipepa ona faitau lea o mau taitasi o se vasega. Talanoaina pe o fea fesili e sili ona tali e mau taitasi. Pe i ai nisi mau po o ni malamalamaaga e mafai ona fesoasoani e tali nei fesili?

• O a mea o aoao mai e mau e uiga i le tatau ona faia papatisoga? (3 Nifae 11:38)

• O le a le faatusa o le papatisoga e ala i le faatofu? (Roma 6:3–5)

• E faapefea ona suia lo’u olaga e a’u feagaiga o le papatisoga? (Mosaea 18:8–10)

• Aisea tatou te le papatisoina ai tamameamea? (Moronae 8:8–12)

• Aisea e taua ai le faatino o le papatisoga e se tasi ua i ai le pule, ae le na o se faamoemoega tonu? (Eperu 5:4)

• Afai ua uma ona ou papatiso i se isi ekalesia, aisea e tatau ai ona ou toe papatiso? (MF 22:1–4)

• Aisea e tatau ai ona sosoo le papatisoga ma le mauaina o le meaalofa o le Agaga Paia? (Ioane 3:5)