“15--21 Aperila. Eseta: ‘Le Tuugamau e, O Fea o i ai Lou Manumalo?’“ Sau, Mulimuli Mai ia te Au---Mo le Aoga Sa: Feagaiga Fou 2019 (2019)
“15--21 Aperila. Eseta,” Sau, Mulimuli Mai ia te Au---Mo le Aoga Sa: 2019
15--21 Aperila
Eseta
“Le Tuugamau e, O Fea o i ai Lou Manumalo?”
A o e tapenapena e aoao atu i lenei vaiaso, mafaufau pe mafai faapefea e le talanoaga a lau vasega i le Aso Sa o le Eseta ona fausia le faatuatua ia Iesu Keriso ma Lana Togiola.
Tusifaamaumau Ou Lagona Uunai
Valaaulia le Fefaasoaai
Fesili i tagata o le vasega pe faapefea ona latou tali atu i fesili e pei o le “O le a le Togiola a Iesu Keriso?” ma le “E mafai faapefea ona ou maua faamanuiaga o le Togiola a Keriso?” Pe na latou faitauina mau i lenei vaiaso ia e fesoasoani e tali ai nei fesili?
Aoao atu Aoaoga Faavae
Ua laveaiina i tatou e Iesu Keriso mai le agasala ma le oti, faamalolosia i tatou i o tatou vaivaiga, ma faamafanafanaina i tatou i o tatou tofotofoga.
-
Pe o malamalama lau vasega e le gata i le faatoilaloina o le agasala ma le oti, ae mafai foi e Iesu Keriso ona faamafanafanaina i tatou i o tatou tofotofoga ma faamalolosia i tatou i o tatou vaivaiga? O se tasi auala e fesoasoani ai ia latou maua nei mataupu faavae o le tusia lea o nei upu i le laupapa: Agasala, Oti, Tofotofoga, Vaivaiga Fai i tagata taitasi o le vasega e faitau se tasi o mau o lisi atu i le “Punaoa Faaopoopo” ma manatunatu loloto pe faapefea ona fesoasoani le Faaola ia i tatou e faatoilalo pe onosaia nei mea. E mafai e le vasega ona tusi mea latou te aoao mai nei mau i lalo o faaulutala taitasi ma faasoa mai a latou molimau i le Faaola ma Lana Togiola.
-
O a mea o aoao mai e mau e uiga ile tau na totogi e Iesu mo lo tatou faaolataga? Mo se faataitaiga, tagai Luka 22:39–44; Mosaea 3:7; ma le Mataupu Faavae ma Feagaiga 19:16–19 O le a le tau na totogi e lo tatou Tama Faalelagi? (tagai Ioane 3:16
-
A o lei amataina le vasega, mafaufau e valaaulia ni nai tagata o le vasega e aumai se upusii mai se savali ole konafesi o loo faamatala ai le auala ua faamanuia ai e le Faaola i tatou e ala i Lana Togiola (mo ni nai faataitaiga, tagai “Punaoa Faaopoopo”) O faapefea e aoaoga a perofeta o aso nei ona faalauteleina lou malamalama i faamanuiaga o le Togiola a le Faaola? E faapefea ona latou faamalolosia a tatou molimau i le mana o Lana Togiola?
-
Atonu e mafai ona fesoasoani se lesona faitino faigofie e faapupula ai le eseesega o le faamama mai agasala ma le faaatoatoaina: E mafai ona e tusia i le laupapa ia nai laina muamua mai le Moronae 10:32, ae faaaofia ai sipelaga po o kalama sese. Ona valaaulia lea o se tasi o le vasega e solo ese mea sese. Pe ua foia ai i lea mea le faafitauli? O le a le mea ua tatou aoao mai lenei mau ma lenei lesona faitino e uiga i le aafiaga o le Togiola e mafai ona i o tatou luga? E mafai foi ona fesoasoani le saunoaga lea mai ia Peresitene Dieter F. Uchtdorf : “Afai o le uiga o le faaolataga e na o le solo ese ai o a tatou measese ma agasala, o lona uiga o le faaolataga---po o le a le matagofie---e le faataunuuina ai le finagalo o le Tama mo i tatou. E maualuga tele naua Ona faamoemoega: E finagalo o Ia i Ona atalii ma afafine e avea e faapei o Ia” (“O Le Meaalofa o le Alofatunoa,” Ensign po o le Liahona, Me 2015, 108).
-
E mafai ona fesoasoani tala ma talafaatusa tatou te malamalama ai ile Togiola a Keriso. Mo se faataitaiga, na faasoa mai e Elder Jeffrey R. Holland se tala e uiga i se au uso e toalua sa fe’a’ei i le pa o se fanafanua i lana savali “Pe a Faatasia le Faamasino Tonu, Alofa, ma le Alofa Mutimutivale” (Ensign po le Liahona, Me 2015, 104–6). E i ai foi se vitio o le autu lava lea i luga o le LDS.org. Pe e mafai foi ona outou matamata faatasi i le “Handel’s Messiah: Debtor’s Prison” (LDS.org; tagai faamatalaga i le “Punaoa Faaopopo”) ma talanoaina pe faapefea e le Togiola a Iesu Keriso ona faasaoloto mai tatou mai ia tatou falepuipui.
Na tuuina mai e molimau i le Feagaiga Fou faapea na manumalo Iesu Keriso i le oti.
-
Mafaufau e toe iloilo le tala faatusi paia o le uluai Eseta---le Toetu o Iesu Keriso. E mafai ona e valaaulia se tagata o le vasega e toe faamatala le tala i ana lava upu (tagai Ioane 20:1--17). E mafai foi ona e faaalia se vitio o le Tusi Paia, e pei o le “Ua Toetu o Ia” (LDS.org).
-
Atonu o le a maua e lau vasega se malamalama loloto atu i le taua o molimau i le Toetu o Iesu Keriso pe afai latou te vaai faalemafaufau o i latou o ni loia po o ni fai lipoti o talafou o loo suesueina se mau faapea na toetu mai Keriso. Valaaulia i latou e sue tagata i mau o e mafai ona avea ma molimau (tagai Mataio 28:1–10; Luka 24:13–35; Ioane 20:19–29; 1 Korinito 15:3–8, 55–58). E mafai foi ona latou tusia se aotelega puupuu o mea atonu e fai mai ai nei tagata pe a latou molimau atu i le faamasinoga pe faatalanoaina ai foi e se fai lipoti o talafou.
-
O se tasi auala e faaloloto ai lo tatou talisapaia o le Toetu o le Faaola o le mafaufau pe faapefea ona tatou faamatalaina o tatou talitonuga i isi. E faapefea ona faasoa mai e tagata o le vasega a latou molimau ia Iesu Keriso i tulaga nei: o se tagata o le aiga ua maua i se ma’i tuga; o se uo ua maliu se e pele; o se tuaoi ua fesili pe aisea e faamanatu ai le Eseta. Fautuaina i tatou e toe tilotilo i mau (pei o na e i le “Punaoa Faaopoopo”) a o fuafua a latou tali. Valaaulia nisi o i latou e faasoa mai o latou manatu.
E aumai e Iesu Keriso le faamoemoe ma le olioli.
-
E mafai ona tatou maua le faamoemoe ma le olioli ona o le Faaola. E mafai ona faitau le Ioane 16:33 ma talanoaina pe faapefea e le Togiola a Iesu Keriso ona fesoasoani ia tatou fiafia e ui i tofotofoga. O faapefea ona tatou maua le olioli ma lagolagoina i taimi o o tatou tofotofoga?
-
O le faitauina o le molimau a Peteru i le 1 Peteru 1:3--11 e mafai ona maua ai e tagata o le vasega se faamoemoega faateleina i le Togiola a Iesu Keriso. Tuu atu i ai se taimi e manatunatu loloto ai i nei fuaiupu ma galulue i paga e sue isi mau o loo faamatala ai foi pe faapefea ona maua le faamoemoe ia Iesu Keriso (tagai Topical Guide, ”Faamoemoe”) E mafai ona latou faaaogaina mau latou te maua e fai ai se pepa e faaali ai i o latou fale po o le upega tafailagi (tagai i faataitaiga o upusii ma ata i luga o le LDS.org). E mafai e tagata o le vasega ona mafaufau i tulaga o tagata o le aiga po o uo atonu o loo moomia tele le faamoemoe.
Fautuaina le Aoaoina i le Aiga
O le a se mea e ono musuia ai tagata o le vasega e faitau le Mataio 18 ma le Luka 10? E mafai ona e fai atu ia i latou o nei mataupu o loo i ai faataoto e le mafaagaloina a le Faaola, ia o loo avatu ai lesona taua i le auala e tatau ona taulima e le tasi le isi.
Punaoa Faaopoopo
Eseta
O Mau e uiga i le Togiola a le Faaola.
O Savali e uiga i le Togiola a le Faaola
-
Peresitene Thomas S. Monson, “Ua Toe Tu o Ia!” Ensign po le Liahona, Me 2010, 87–90
-
Elder D. Todd Christofferson, “O Le Toetu o Iesu Keriso,” Ensign po le Liahona, Me 2014, 111–14
-
Elder Dallin H. Oaks, “Faamalosia e Ala i le Togiola a Iesu Keriso,” Ensign po le Liahona, Nov. 2015, 61–64
-
Sister Carole M. Stephens, “O Le Fomai Sili,” Ensign po le Liahona, Nov. 2016, 9–12
Viiga e uiga i le Togiola a le Faaola
E ono fiafia tagata o le vasega e usu nisi o nei viiga ma faitau ia mau e o faatasi ai ia o loo ta’ua i le pito i lalo o le itulau. Atonu na aoaoina e nisi o le vasega nisi o viiga e fai ma vaega o a latou suesuega o tusitusiga paia faaleaiga i lenei vaiaso; fautuaina i latou e faasoa mai o latou aafiaga.
-
“Le Faavae Malosi,” Viiga, nu. 45
-
“O Fea Lo’u Filemu?” Viiga, no. 68
-
“Ou Te Tu Ma Ofo,” Viiga, no. 107
-
“Ua Toe Tu Mai o Ia” viiga, no. 111
O vitio e uiga i le Eseta.
O tausaga taitasi e aumaia ai e le Ekalesia ni savali o le Eseta, ia e maua i luga o le mormon.org/easter.
Ua faasaolotoina e Iesu Keriso i tatou.
I le 1741, sa faia ai e George Frideric Handel se fatuga e uiga ia Iesu Keriso sa faaulutalaina o le Mesia. Sa naunau Handel o le faia o se faatinoga o le Mesia o le a ofoina atu e totogi ai le tatalaina mai o le au nofo aitalafu mai le falepuipui o le au aitalafu. E silia ma le 140 tagata sa faafalepuipuiina ona sa le mafai ona latou totogia a latou aitalafu sa faasaoloto mai ai ona o lena mea. I le faaalia o lona finagalo e uiga i lenei mea, sa saunoa ai Peresitene Russell M. Nelson, “A aunoa ma le Togiola a Iesu Keriso, o le a tatou nofo aitalafu ma le leai o se faamoemoe, e pei o na tagata i se falepuipi o e nofo aitalafu. Na afio mai lo tatou Togiola, le Alii o Iesu Keriso e totogi se aitalafu Na te lei faia aua sa tatou nofo aitalafu i se aitalafu sa le mafai ona tatou totogia.” Mo se ata vitio o lenei mea, tagai “Handel’s Messiah: Debtor’s Prison” i luga o le LDS.org.
Faaleleia o Lo Tatou Aoao Atu
Avea o se Meafaigaluega a le Agaga O lou faamoemoega o se faiaoga e le o le tuuina atu o se lesona manaia ae ia fesoasoani i isi ia maua faatosinaga a le Agaga Paia---o le faiaoga moni. (Tagai Aoao Atu i le Ala a le Faaola, 10.)