“27 Mē–2 Suné. Siosefa Sāmita—Mātiu 1; Mātiu 25; Maʻake 12–13; Luke 21: ‘ʻO Ka Haʻu ʻa e Foha ʻo e Tangatá’” Haʻu ʻo Muimui ʻIate Au—Maʻá e Lautohi Faka-Sāpaté: Fuakava Foʻoú 2019 (2019)
“27 Mē–2 Sune. Siosefa Sāmita—Mātiu 1; Mātiu 25; Maʻake 12–13; Luke 21: Haʻu ʻo Muimui ʻIate Au—Maʻá e Lautohi Faka-Sāpaté 2019 (2019)
Ko e Hāʻele ʻAnga Ua Maí, tā fakatātaaʻi ʻe Harry Anderson
27 Mē– 2 Sune
Siosefa Sāmita—Mātiu 1; Mātiu 25; Maʻake 12–13; Luke 21
“ʻO Ka Haʻu ʻa e Foha ʻo e Tangatá”
Manatuʻi ke kamata ʻaki hoʻo teuteu ke faiakó hono lau ʻa e Siosefa Sāmita—Mātiu 1; Mātiu 25; Maʻake 12–13; mo e Luke 21 ʻi he faʻa lotu. Fekumi ki ha tataki fakalaumālie, peá ke toe vakaiʻi leva e fokotuʻutuʻu ko ʻení ki ha ngaahi fakakaukau kehe.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Hiki ʻi he palakipoé ha lisi ʻo e ngaahi talanoa fakatātā ʻo e Fakamoʻuí ʻoku maʻu ʻi he laukonga ʻo e uike ní, hangē ko e fuʻu ʻakau fikí, ko e tangata leleí mo e tangata kaihaʻá, ko e tamaioʻeiki faivelengá mo e tamaioʻeiki koví, ko e kau tāupoʻou ʻe Toko Hongofulú, ko e ngaahi talēnití, mo e fanga sipí mo e fanga kosí. Kole ki he kau mēmipa ʻo e kalasí ke nau vahevahe ha ngaahi moʻoni kuo nau ako mei he ngaahi talanoa fakatātā ko ʻení ʻe lava ʻo tokoni ke nau teuteu ki he Hāʻele ʻAnga Ua Mai ʻa e ʻEikí. Ko e hā ʻoku nau fai ke fakaʻaongaʻi ai e ngaahi moʻoni ko ʻení ʻi heʻenau moʻuí?
Akoʻi e Tokāteliné
ʻE lava ke tokoniʻi kitautolu ʻe he ngaahi kikite fekauʻaki mo e Hāʻele ʻAnga Ua Mai ʻa e Fakamoʻuí, ke tau fehangahangai mo e kahaʻú ʻi he tui.
-
Mahalo ʻe faingataʻa ke mahino e ngaahi fakaʻilonga ʻo e Hāʻele ʻAnga Ua Mai ʻa e Fakamoʻuí ki ha niʻihi ʻo e kau mēmipa ʻo e kalasí. ʻE ala tokoni kiate kinautolu ke nau ngāue fakakulupu pea kumi e ngaahi fakaʻilonga ʻoku nau maʻu ʻi he Siosefa Sāmita—Mātiu 1:21–37. ʻE ala tokoni foki ke mahino ange kiate kinautolu e mahuʻinga ʻo e ngaahi fakaʻilonga ko ʻení, kapau te nau fakafehoanaki kinautolu ki he ngaahi fakaʻilonga ʻo e halá. Ko e hā ʻoku mahuʻinga ai e ngaahi fakaʻilonga ʻo e halá? Ko e hā ʻoku fokotuʻu mai heni fekauʻaki mo e ngaahi fakaʻilonga ʻo e Hāʻele Anga Ua Maí? ʻE lava ke ke tufa ki he kulupu takitaha ha laʻi pepa ʻi he fuo ʻo e ngaahi fakaʻilonga ʻo e halá pea fakaafeʻi kinautolu ke nau tohi ʻi he laʻi pepa takitaha ha fakaʻilonga kimuʻa ʻi he Hāʻele ʻAnga Uá. Tuku ke nau vahevahe e meʻa ne nau maʻú, pea fakaafeʻi e kalasí ke nau aleaʻi e fakamoʻoni ʻo e nagahi fakaʻilonga ko ʻení ʻi he māmaní ʻi he kuongá ni.
-
ʻI he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí naʻe fakaafeʻi ai e kau akó ke nau kumi ha faleʻi ʻi he ngaahi veesi ko ʻení fekauʻaki mo e founga ke “ʻoua naʻa [nau] manavahē” ai ʻi he ngaahi meʻa ʻe hoko kimuʻa he Hāʻele ʻAnga Ua Maí (vakai foki ki he lea ʻa Palesiteni Tōmasi S. Monisoni ʻi he “Ngaahi Maʻuʻanga Tokoni Kehé”). Fakaʻaliʻali ha fakatātā ʻokú ne fakahaaʻi e Hāʻele ʻAnga Uá (vakai, Ko e Hāʻele ʻAnga Uá, Tohi Fakatātā ʻo e Ongoongoleleí, fika 66), pea fakaafeʻi e kau mēmipa ʻo e kalasí ke nau vahevahe e ngaahi veesi ne nau fakaʻilongaʻi ʻi heʻenau ako fakatāutahá. Ko e hā ʻoku hoko ai ʻetau ʻilo fekauʻaki mo e ngaahi meʻa ʻe hoko kimuʻa ʻi he Hāʻele ʻAnga Uá ko ha tāpuakí?
Siosefa Sāmita—Mātiu 1:26–27, 38–55; Mātiu 25:1–13
Kuo pau ke tau mateuteu maʻu pē ki he Hāʻele ʻAnga Ua Maí.
-
Neongo kuo ʻosi kole mai ʻe he Fakamoʻuí ke tau mateuteu maʻu pē ki Heʻene Hāʻele ʻAnga Ua Maí, ʻoku faingofua ke tau moʻumoʻua ʻi he moʻui fakaʻahó pea ʻikai faʻa fakakaukau ki ai. ʻE lava ke tokoni e ngaahi talanoa fakatātā ʻi he Siosefa Sāmita—Mātiu 1:26–27, 38–55 mo e Mātiu 25:1–13 ki he kau mēmipa ʻo e kalasí ke nau fakatokangaʻi e mahuʻinga ʻo e teuteu ki he Hāʻele ʻAnga Uá. Fakaafeʻi e kau mēmipa ʻo e kalasí ke nau kumi e ngaahi talanoa fakatātā ko ʻení mo hono fakafehoanakí, pea vahevahe e meʻa ʻoku nau akoʻi fekauʻaki mo e mateuteu ki he Hāʻele ʻAnga Uá. ʻE lava ke haʻu ha ongo mēmipa ʻo e kalasí kuó na mateuteu mo ha ngaahi fakatātā mohu founga ki ha taha ʻo e ngaahi talanoa fakatātā ko ʻení.
-
ʻE lava ke tokoni e talanoa fakatātā ʻo e Kau Taupoʻou ʻe Toko Hongofulú ki he kau mēmipa ʻo e kalasí ke nau fakakaukau ki heʻenau teuteu fakalaumālie ke fetaulaki mo e Fakamoʻuí. Naʻe ʻomi ʻe ʻEletā David A. Bednar ha fakaʻuhinga ʻo e talanoa fakatātā ʻe lava ʻo tokoní (vakai, “Ngaahi Maʻuʻanga Tokoni Kehé”). ʻE lava ke aleaʻi ʻe he kau mēmipa ʻo e kalasí e meʻa te tau lava ʻo fai ʻi heʻetau moʻui fakaʻahó, ke tau ului kakato ange ai ki he ongoongoleleí. Ko e hā kuo pau ke tau aʻusia ai e uluí maʻatautolú? Ko e hā ʻoku tānaki mai ʻe he Tokāteline mo e Ngaahi Fuakava 45:56–57 ki he mahino ʻoku tau maʻu fekauʻaki mo e talanoa fakatātā ko ʻení?
-
ʻE lava ke mou hivaʻi fakataha ha ngaahi himi fekauʻaki mo e Hāʻele ʻAnga Uá mo aleaʻi e ngaahi pōpoaki ʻoku nau akoʻí (vakai, “Ngaahi Maʻuʻanga Tokoni Kehé”).
Te tau fakahoko ha fakamatala ki he ʻEikí fekauʻaki mo ʻetau moʻuí, ʻi he Fakamaau Fakaʻosí.
-
ʻE lava ke ueʻi kitautolu ʻe he talanoa fakatātā ʻo e ngaahi talēnití mo e talanoa fakatātā ʻo e fanga sipí mo e fanga kosí ke tau fakakaukau ki he talanoa ʻo ʻetau moʻuí, ʻa ia te tau fai ki he ʻEikí ʻi he Fakamaau Fakaʻosí. ʻE lava ke mou lau fakataha e ngaahi talanoa fakatātaá pea fakaafeʻi e mēmipa takitaha ʻo e kalasí ke nau vahevahe ha fehuʻi ʻe taha ʻe ala ʻeke ʻe he Fakamoʻuí ʻi he taimi te tau fai ai ha fakamatala ʻo ʻetau moʻuí. Tuku ha taimi ke palani ʻe he kau mēmipa ʻo e kalasí ha ngaahi founga te nau ngāueʻi ai e ngaahi ongo ne nau maʻu lolotonga e fealēleaʻakí.
ʻĪmisisheep and goatsNaʻe fakaʻaongaʻi ʻe Kalaisi e fanga sipí mo e kosí ke akoʻi fekauʻaki mo e Fakamaau Fakaʻosí (vakai, Mātiu 25:31–33).
-
ʻE lava ke mou toe vakaiʻi mo e kau mēmipa ʻo e kalasí e ʻuhinga ʻo e Fakamaau Fakaʻosí ʻi he Fakahinohino ki he Ngaahi Folofolá, “Fakamaau Fakaʻosí, Ko e,” scriptures.lds.org. Te ke lava leva ʻo kole ki he kau mēmipa ʻo e kalasí ke nau toe vakaiʻi ha ngaahi veesi folofola ʻe niʻihi fekauʻaki mo e tūkunga ʻe ʻi ai ʻa e Fakamaau Fakaʻosí, hangē ko e ʻAlamā 5:17–25. Ko e hā ʻoku ueʻi kitautolu ʻe he ngaahi veesi folofola ko ʻení ke tau fai ke teuteu ki he ʻaho ko iá?
-
Ke tokoni ki he kau mēmipa ʻo e kalasí ke nau ʻilo e ʻuhinga fakataautaha ʻo e ngaahi talēnití ʻi he talanoa fakatātaá (vakai, Mātiu 25:14–30), vahevahe e ngaahi fakakaukau pe fakaʻaongaʻi ha ʻekitivitī mei he “The Parable of the Talents,” by Elder Ronald A. Rasband (Ensign, Aug. 2003, 32–35).
-
Ke kamataʻi ha fealēleaʻaki fekauʻaki mo e Mātiu 25:34–40, te ke lava ʻo fakaafeʻi e kau mēmipa ʻo e kalasí ke nau vahevahe ha ngaahi sīpinga ʻo e kakai ʻoku nau fakatātaaʻi e manavaʻofa ʻoku fakamatalaʻi ʻi he ngaahi veesi ko ʻení. Tuku ange ha taimi ke nau fakalaulauloto ai pe ko hai te ne ala fie maʻu ʻenau tokoní. Ko e hā ha ngaahi founga angamaheni ʻe lava ai ke tau fafanga ʻa e fiekaiá, fakakofuʻi ʻa e telefuá, pea ʻaʻahi ki he kau mahakí?
Poupouʻi ʻa e Ako ʻi ʻApí
Ke poupouʻi e kau mēmipa ʻo e kalasí ke nau lau ʻa e Sione 13–17 ʻi he uike ka hokó, kole ange ke nau fakakaukau ki he meʻa te nau lea ʻaki ki hanau foha pe ʻofefine kimuʻa pea ʻalu ʻo ngāue fakafaifekaú. Te tau lau ʻi he Sione 13–17 e ngaahi fakahinohino fakaʻosi naʻe fai ʻe he Fakamoʻuí ki Heʻene kau ākongá kimuʻa pea Tutuki Iá.
Ngaahi Maʻuʻanga Tokoni Kehé
Ngaahi Himi fekauʻaki mo e Hāʻele ʻAnga Uá.
-
“ʻE Kāinga Tau Loto Fiemālie,” Ngaahi Himí, fika 3
-
“Haʻu e Fānau ʻa e ʻEikí,” Ngaahi Himi fika 24
-
“Haʻu ʻa e Tuʻi ʻo e Naahi Tuʻi,” Ngaahi Himi, fika 23
-
“ʻOku ou Tui kia Kalaisi,” Ngaahi Himi, fika 66
-
“Fiefia ki Māmani,” Ngaahi Himí, fika 110
Ko e lolo ʻo e uluí.
Naʻe fokotuʻu mai ʻe ʻEletā David A. Bednar e ʻuhinga ko ʻeni ʻo e talanoa fakatātā ʻo e Kau Taupoʻou ʻe Toko Hongofulú:
“Fakakaukau ki he loló ko e lolo ʻo e uluí [vakai, Mātiu 25:4–9]. …
“Naʻe siokita nai mo taʻe fie vahevahe e kau tāupoʻou poto ʻe toko nimá, pe naʻa nau fakahā totonu ange pē he ʻikai lava ʻo kole ke fakaʻaongaʻi ʻa e lolo ʻo e uluí? ʻE lava nai ke foaki ki ha taha kehe ʻa e mālohi fakalaumālie ʻoku maʻu tupu mei he talangofua maʻu pē ki he ngaahi fekaú? ʻE lava nai ke foaki ʻa e ʻilo naʻe maʻu ʻi hono ako mo e fakalaulauloto fakamātoato ki he folofolá, ki ha taha ʻokú ne fie maʻu? ʻE lava nai ke ʻave ʻa e melino ʻoku ʻomi ʻe he ongoongoleleí mei ha tokotaha Siasi faivelenga ki ha taha ʻokú ne aʻusia ha ʻahiʻahi pe faingataʻa lahi? Ko e tali mahino ki he ngaahi fehuʻi takitaha ko ʻení ko e ʻikai.
“Hangē ko hono fakamamafaʻi totonu ʻe he kau tāupoʻou potó, kuo pau ke tau ‘takitaha fakatau maʻatautolu.’ Naʻe ʻikai fakamatala ʻe he kau fafine ko ʻeni ne ueʻi fakalaumālié ki ha fefakatauʻaki fakapisinisi; ka ko ʻenau fakamamafaʻi hotau fatongia fakafoʻituitui ke tauhi ke kei ulo ʻetau maama ʻo e fakamoʻoní mo tauhi ha lolo feʻunga ʻo e uluí. ʻOku maʻu e lolo mahuʻingá ni ko e tulutā ki he tulutā—ʻʻi he ʻotu lea ki he ʻotu lea [mo e] akonaki ki he akonaki’ (2 Nīfai 28:30), ʻi he faʻa kātaki mo e vilitaki” (“Ului ki he ʻEikí,” Ensign pe Liahona, Nōvema 2012, 109).
ʻOua ʻe manavahē.
Naʻe pehē ʻe Palesiteni Thomas S. Monson:
“Neongo ʻe fakatahataha mai e ngaahi matangí, pea ʻuha lōvai hifo kiate kitautolu, ka ʻe fakafiemālieʻi mo poupouʻi kitautolu ʻe heʻetau ʻilo ki he ongoongoleleí pea mo ʻetau ʻofa ki heʻetau Tamai Hēvaní mo hotau Fakamoʻuí, mo ha fiefia ki hotau lotó ʻi heʻetau ʻaʻeva angatonu mo tauhi ʻa e ngaahi fekaú. …
“Siʻoku ngaahi tokoua mo e tuofāfine ʻofeina, ʻoua te mou manavahē. Mou fiefia. ʻOku hā ngingila mai e kahaʻú ʻo hangē tofu pē ko hoʻomou tuí” (“”Ke Mou Fiefia,”Ensign pe Liahona, Mē 2009 92).
Fakatupulaki ʻEtau Founga Akoʻí
Fakapapauʻi ʻokú ke akoʻi ʻa e tokāteline moʻoní. “Toutou fehuʻi loto pē, ʻKo e hā ha founga ʻe tokoni ai ki he kalasí e meʻa ʻoku ou akoʻí ke langaki ʻenau tui kia Kalaisí, ke nau fakatomala pea fakahoko mo tauhi ʻenau ngaahi fuakava mo e ʻOtuá pea maʻu mo e Laumālie Māʻoniʻoní?’” (Ko e Faiako ‘i he Founga ‘a e Fakamoʻuí, 20).