“24–30 Sune. Mātiu 28; Maʻake 16; Luke 24; Sione 20–21: ‘Kuó Ne Toe Tuʻu’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Foʻoú 2019 (2019)
“24–30 Sune. Mātiu 28; Maʻake 16; Luke 24; Sione 20–21,” Haʻu, ʻo Muimui ʻIate Au—Maʻá e Lautohi Faka-Sāpaté: 2019
Fafanga ʻEku Fanga Sipí, tā fakatātaaʻi ʻe Kamille Corry
24–30 Sune
Mātiu 28; Maʻake 16; Luke 24; Sione 20–21
“Kuó Ne Toe Tuʻu”
Kimuʻa pea mou vakai ki he ngaahi fakakaukau fakafaiako ʻi he fokotuʻutuʻu ko ʻení, lau ʻa e Mātiu 28; Maʻake 16; Luke 24; mo e Sione 20–21, pea fakalaulauloto ki he founga ʻe lava ke fakaʻaongaʻi ai e ngaahi vahe ko ʻení ke fakamālohia e tui ʻa kinautolu ʻokú ke akoʻí.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Ke tokoni ki he kau mēmipa ʻo e kalasí ke vahevahe e meʻa ne nau akó ʻi heʻenau ako fakatāutahá mo e fakafāmilí, kole ange ke nau tohi ha moʻoni mei he laukonga ʻo e uike ní ʻoku nau ongoʻi ʻoku totonu ke vahevahe mo e “māmaní kotoa pē” (vakai, Maʻake 16:15). ʻI he fakaʻosinga ʻo e kalasí, ʻeke ange pe ne nau maʻu ha ngaahi moʻoni makehe te nau fie vahevahe.
Akoʻi e Tokāteliné
Mātiu 28; Maʻake 16; Luke 24; Sione 20
Koeʻuhí ko e toetuʻu ʻa Sīsuú, te tau toetuʻu mo kitautolu.
-
Ke maʻu ʻe he tokolahi taha ʻo e kakaí e faingamālie ke vahevahe e meʻa kuo nau ako fekauʻaki mo e Toetuʻú, ʻe lava ke ke tuku ange ha ngaahi miniti siʻi ki he kau mēmipa ʻo e kalasí ke toe vakaiʻi e laukonga ki he uike ní mo e “Toetuʻu” ʻi he Fakahinohino ki he Folofolá pea hiki hifo e ngaahi moʻoni naʻa nau ako fekauʻaki mo e Toetuʻú. Tuku ke nau fevahevaheʻaki e meʻa ne nau tohí, pea poupouʻi e kau mēmipa ʻo e kalasí ke hiki honau nimá ʻi he taimi te nau fanongo ai ʻoku vahevahe ʻe ha taha ha moʻoni ʻoku tatau mo e meʻa ne nau tohí. Ko e hā ʻoku mahuʻinga ai e ngaahi moʻoni ko ʻení kiate kitautolú? ʻOku liliu fēfē ʻe heʻetau ʻilo te tau toetuʻú ʻetau ongo fekauʻaki mo e Tamai Hēvaní mo Sīsū Kalaisí? ʻE lava ke tokoni hono hulu ʻo e foʻi vitiō hiva “Kuo Toe Tuʻú” (LDS.org) ke fakaafeʻi e Laumālié ki he fealēleaʻakí.
Te tau lava ʻo fakaafeʻi ʻa e Fakamoʻuí “ke tau [nofo maʻu].”
-
Ke tokoni ke ʻilo ʻe he kau akó e fehokotaki ʻi he vahaʻa ʻo ʻenau ngaahi aʻusiá mo e aʻusia ʻa e kau ākongá ʻi he hala ki ʻEmeasí, tā ha foʻi hala ʻi he palakipoé, pea fakaafeʻi e kau mēmipa ʻo e kalasí ke nau hiki e ngaahi fakaikiiki mei he talanoa ʻi he Luke 24:13–35, ʻi he tafaʻaki ʻe taha ʻo e halá. Te nau lava ʻo hiki ʻi he tafaʻaki ʻe taha ʻo e foʻi halá e meʻa ʻoku nau pehē ʻoku tatau ʻi heʻenau ngaahi aʻusiá ko e kau muimui ʻo Sīsū Kalaisi. Hangē ko ʻení, te nau lava ʻo tohi Naʻe taʻofi ʻa hona matá (Luke 24:16) ʻi ha tafaʻaki ʻe taha ʻo e halá pea hiki ʻi he tafaʻaki ʻe tahá ʻa e taimi ʻe niʻihi ʻoku ʻikai ke tau fakatokangaʻi e ivi tākiekina ʻo e ʻEikí ʻi heʻetau moʻuí.
-
ʻOku ʻi ai ha foʻi himi ʻe ua ʻoku fakatefito ʻi he Luke 24:13–35: “Afe Mai Kuo Poʻuli” mo e “Afe Mai Hē!” Ngaahi Himí fika 86, 87. Te ke fakaʻaongaʻi fēfē e ongo himi ko ʻení ke tokoni ki he kau mēmipa ʻo e kalasí ke ʻuhingamālie ange kiate kinautolu e talanoa fakafolofolá?
Mātiu 28:16–20; Maʻake 16:14–20; Luke 24:44–53
ʻOku fekauʻi kitautolu ke tau malanga ʻaki e ongoongoleleí ki māmani kotoa.
-
ʻE lava foki ke ʻaonga kiate kitautolu ʻi he kuongá ni ʻa e fekau naʻe fai ʻe he Fakamoʻui kuo toetuʻú ki Heʻene Kau ʻAposetoló ke malanga ʻaki ʻEne ongoongoleleí. Te ke lava fēfē ʻo tokoniʻi e kau mēmipa hoʻo kalasí ke nau ʻilo honau fatongia ʻi hono malanga ʻaki e ongoongoleleí. ʻE lava ke ke fakaafeʻi kinautolu ke nau fakakaukauloto ʻoku nau faleʻi ha mēmipa ʻo e fāmilí pe ko hanau kaungāmeʻa ʻoku teuteu ke ʻalu ʻo ngāue fakafaifekau taimi kakato. Ko e hā te tau vahevahe mei he folofola ʻa e Fakamoʻuí ki Heʻene Kau ʻAposetoló? Te tau fakaʻaongaʻi fēfē e ngaahi lea tatau ʻi heʻetau feinga ke vahevahe e ongoongoleleí mo e niʻihi kehé?
“ʻOku monūʻia ʻa kinautolu ʻoku ʻikai mamata, kae tuí.”
-
Mahalo ʻe ʻi ai ha kau mēmipa ʻi hoʻo kalasí ʻoku nau ongoʻi fakaʻofaʻia ʻia Tōmasi, ʻa ia naʻe holi ke mamata ki he ʻEiki kuo toe tuʻú kae toki tui. ʻE lava ke hoko hoʻo kalasi Lautohi Faka-Sāpaté ko ha feituʻu maʻá e kau mēmipa ʻo e kalasí ke fakamālohia ai ʻenau tuí, ʻi he ngaahi meʻa ʻoku ʻikai ke nau lava ʻo mamata ki aí. ʻE lava ke ke kamata ʻaki hano kole ki ha tokotaha ke ne fakamatalaʻi fakanounou e aʻusia ʻa Tōmasi ʻi he Sione 20:19–28. Te ke lava foki ʻo hulu e foʻi vitiō “ʻOku monūʻia ʻa kinautolu ʻoku ʻikai mamata, kae tuí” (LDS.org). ʻE lava ke lisi ʻe he kau mēmipa ʻo e kalasí ʻi he palakipoé ha ngaahi meʻa ʻoku kole mai ʻe he ʻOtuá ke tau tui taʻe-mamata ki aí. Te ke lava leva ʻo kole ange ke nau vahevahe ha ngaahi ʻausia naʻá ne fakamālohia ʻenau fakamoʻoni ki he ngaahi meʻa ko ʻení. Ko e hā e ngaahi tāpuaki kuo maʻu ʻe he kau mēmipa ʻo e kalasí ʻi heʻenau ngāue ʻaki ʻa e tuí?
Naʻe akoʻi ʻe Sīsū ʻa Tōmasi ke, “ʻOua [te ne] taʻetui, kae tui” (Sione 20:27).
ʻOku fakaafeʻi kitautolu ʻe he Fakamoʻuí ke fafanga ʻEne fanga sipí.
-
Ko e hā ʻe ala tokoni ke tali ʻe he kau mēmipa ʻo hoʻo kalasí e fakaafe ʻa e Fakamoʻuí ke “fafanga [ʻEne] fanga sipí”? Te ke lava ʻo kamata ʻaki hano kole ange ke nau lau fakalongolongo ʻa e Sione 21:15–17, ʻo fetongi e hingoa ʻo Saimoné ʻaki honau hingoá mo e “ʻeku fanga lamí” mo e “fanga sipí” ʻaki e hingoa ʻo e kakai ʻoku nau ongoʻi ʻoku finangalo ʻa e ʻEikí ke nau tokoniʻí—hangē ko e kakai ʻoku nau faiako fakaʻapi pe faiako ʻaʻahi ki aí, ngaahi kaungāʻapí, pe ko ha kakai ʻoku nau maheni mei he ngāué pe akó. Hili ha ngaahi miniti siʻi, ʻe lava ke vahevahe ʻe he kau akó e meʻa naʻa nau ongoʻí. Ko e ʻuhinga ki he hā ke fafanga e fanga lami mo e fanga sipi ʻa e Fakamoʻuí? ʻE lava ke tokoni e fakamatala ʻa Palesiteni Russell M. Nelson mo ʻEletā Marvin J. Ashton ʻi he “Ngaahi Maʻuʻanga Tokoni Kehé” ke tali e fehuʻi ko ʻení.
Poupouʻi ʻa e Ako ʻi ʻApí
Ke poupouʻi e kalasí ke lau e Ngāue 1–5 ʻi he uiké ni, kole ange ke nau tokanga ki he founga naʻe hoko ai ha tangata toutai taʻe-ako ko ha taki māʻongoʻonga ʻo e Siasi ʻo Kalaisí ʻi heʻene mafola ʻi he funga ʻo e māmaní. ʻI heʻenau ako e ngaahi vahe ko ʻení, te nau vakai ki he founga naʻe hoko ai ʻa e liliú.
Ngaahi Maʻuʻanga Tokoni Kehé
Ko e ʻuhinga ki he hā ke fafanga e fanga sipi ʻa e Fakamoʻuí?
Naʻe vahevahe ʻe Palesiteni Russell M. Nelson e ngaahi fakakaukau ko ʻení mei ha tohi faka-Kalisi ʻo e Sione 21 ʻi he kuonga muʻá:
“ʻI he [Sione 21:15], naʻe maʻu e foʻi lea fafangá mei he foʻi lea faka-Kalisi ko e bosko, ko hono ʻuhingá ‘ke tauhi pe tokangaʻi. Naʻe maʻu e foʻi lea lamí mei he foʻi lea arnion, ko e ʻuhinga ki ha ‘kiʻi lami.’ …
“ʻI he [Sione 21:16], naʻe maʻu e foʻi lea fafangá mei ha foʻi lea kehe ko e, poimaino, ʻa ia ko hono ʻuhingá ‘Ke tauhi, pe tokangaʻi.’ Naʻe maʻu ʻa e foʻi lea sipí mei he foʻi lea probaton, ʻuhinga ki he ‘fanga sipi lalahí.’ …
“ʻI he [Sione 21:17], naʻe toe maʻu ʻa e foʻi lea fafangá mei he foʻi lea faka-Kalisi ko e bosko, ʻuhinga ki hono tauhi. Naʻe liliu foki ʻe foʻi lea sipí mei he foʻi lea faka-Kalisi ko e probaton, ʻuhinga ki he fanga sipi motuʻá.
“ʻOku maʻu ʻi he ngaahi veesi ʻe tolu ko ʻení, ʻa ia ʻoku nau faitatau ʻi he lea faka-Pilitāniá, ʻa e ngaahi pōpoaki kehekehe ʻe tolu ʻi he lea faka-Kalisí:
-
ʻOku fie maʻu ke tauhi ʻa e fanga lami īkí kae lava ke nau tupu;
-
ʻOku fie maʻu ke tokangaʻi ʻa e fanga sipí.
-
ʻOku fie maʻu ke tauhi ʻa e fanga sipí” (“Shepherds, Lambs, and Home Teachers,” Ensign, Aug. 1994, 16).
Te tau lava fēfē ʻo “fafanga [ʻEne] fanga sipí”?
Naʻe fakamatalaʻi ʻe ʻEletā Marvin J. Ashton e founga te tau lava ai ʻo fakahoko e fekau ʻa e ʻEikí ke fafanga ʻEne fanga sipí.
“Naʻe folofola ʻa Sīsū, ‘Fafanga ʻeku fanga sipí.’ (Sione 21:16.) He ʻikai te ke lava ʻo fafanga kinautolu kapau ʻoku ʻikai ke ke ʻilo e feituʻu ʻoku nau ʻi aí. He ʻikai te ke lava ʻo fafanga kinautolu kapau ʻokú ke ʻai ha meʻa ke nau hola ai meiate koe. He ʻikai te ke lava ʻo fafanga kinautolu kapau ʻoku ʻikai te ke maʻu ha meʻakai. He ʻikai te ke lava ʻo fafanga kinautolu kapau ʻoku ʻikai ke ke maʻu ʻa e manavaʻofá. He ʻikai te ke lava ʻo fafanga kinautolu kapau ʻoku ʻikai ke ke fie ngāue mo vahevahe. …
“ʻOku lalahi kehekehe ʻa kinautolu ʻoku fie maʻu tokoní. ʻOku ʻi ai Haʻane fanga sipi ʻe niʻihi ʻoku iiki, tuenoa, mo hē. ʻOku ʻi ai ha niʻihi ʻoku helaʻia, tukuhausia, mo motuʻa. ʻOku ʻi ai ha niʻihi ai ʻi hotau fāmilí, ʻi hotau kaungāʻapí, pe ʻi he ngaahi tuliki mamaʻo ʻo e māmaní te tau lava ʻo tokoniʻi ʻaki e ngaahi foaki ʻaukaí. ʻOku ʻi ai ha niʻihi ʻoku nau fiekaia. ʻOku ʻi ai ha niʻihi ʻoku nau fie maʻu ha ʻofa mo ha tokanga.
“Kapau te tau ʻoange ki Heʻene fanga sipí ha ʻuhinga ke nau hola ai meiate kitautolu, ʻe faingataʻa ʻetau feinga ke fafangá. He ʻikai lava ha taha ʻo faiako pe tokoni ʻi he talanoa tukuhifó pe fakaangá. ʻE uesia ʻe he pule fakatikitató pe ko e pehē ‘ʻoku ou tonu au ʻokú ke hala koé’ e ngaahi feinga kotoa pē ke fafanga e fanga sipi heé. ʻOku fokotuʻu ai ha ʻā vahevahe, pea he ʻikai lelei ia ki ha taha. …
“Fakahaaʻi ʻetau ʻofá ʻi heʻetau ngaahi ngāué. ʻOku ʻikai ʻaonga hono fakahaaʻi ʻo e ʻofá kapau ʻoku ʻikai fenāpasi ia mo e ngaahi ngāué. ʻOku fie maʻu ʻe Heʻene fanga sipí kotoa ha tauhi sipi ʻoku tokanga” (“Give with Wisdom That They May Receive with Dignity,” Ensign, Nov. 1981, 91).
Fakatupulaki ʻEtau Founga Akoʻí
Tuku ha taimi ke vahevahe ai e kau akó. ʻI he taimi ʻoku vahevahe ai ʻe he kau akó e meʻa ʻoku nau akó, ʻoku ʻikai ngata pē heʻenau ongoʻi hono fakamālohia ʻe he Laumālié ʻenau fakamoʻoní, ka te nau fakalotolahiʻi foki e toenga ʻo e kalasí ke nau ʻiloʻi e moʻoní ʻiate kinautolu pē. … Tuku ha taimi ke feʻinasiʻaki ai e kau akó he lēsoni kotoa pē—mahalo ko e taimi ʻe niʻihi te ke ʻiloʻi ko e ngaahi fealēleaʻaki ko ʻení ko e lēsoní ia” (Ko e Faiako ʻi he Founga ʻa e Fakamoʻuí, 31).