Mateu 26; Marku 14; Lluka 22; Gjoni 18

Përse e krijoi Shpëtimtari sakramentin? Përse e marrim sakramentin çdo javë? Çfarë përgjigjesh të mundshme mund të gjejnë anëtarët e klasës te Mateu 26:26–29; Lluka 22:7–20; Doktrina e Besëlidhje 20:75–79 dhe Të Vërtetë ndaj Besimit, f. 150–152? Për shembull, Të Vërtetë Ndaj Besimit na mëson se sakramenti përkujton flijimin e Krishtit, gjë që e plotësoi ligjin e Moisiut. Ju gjithashtu mund të doni t’i lexoni lutjet e sakramentit si klasë dhe t’u kërkoni anëtarëve të klasës të përcaktojnë besëlidhjet që i bëjmë si pjesë të ordinancës. Si mund ta ndihmojmë dikë tjetër të kuptojë se çfarë domethënie kanë këto zotime? Si duhet t’i ndikojë zgjedhjet që i bëjmë gjatë tërë javës, pjesëmarrja jonë në sakrament?

Pamja

e re duke marrë sakramentin

Anëtarët e klasës ka të ngjarë që do të përfitojnë nga dëgjimi i ideve të njëri-tjetrit rreth mënyrës se si ta kujtojmë Shpëtimtarin gjatë sakramentit dhe gjatë gjithë javës (shih DeB 6:36–37). Ndoshta mund t’i ftoni të tregojnë se çfarë i ndihmon ata dhe familjet e tyre që ta kujtojmë Shpëtimtarin dhe t’i mbajnë besëlidhjet e tyre. Cilat vargje nga leximi i kësaj jave e thellojnë nderimin tonë për sakramentin? Për mendime të tjera rreth mënyrës se si ta kujtojmë Shpëtimtarin, shihni Gerit W. Gong, “Gjithmonë Kujtojeni Atë”, Ensign ose Liahona, maj 2016, f. 108–111.

Ky diskutim mund të jetë një mundësi e mirë për të shqyrtuar me anëtarët e klasës simbolikën e sakramentit. Si na ndihmojnë këto simbole që të përqendrohemi te Shpëtimtari gjatë ordinancës? Çfarë na mësojnë këto simbole rreth Tij dhe marrëdhënies sonë me Të?

Në fund të diskutimit tuaj rreth sakramentit, mund t’u jepni anëtarëve të klasës disa çaste që të përsiatin dhe shkruajnë se çfarë ndihen të frymëzuar të bëjnë për t’u përgatitur për sakramentin javën e ardhshme. Që t’i shtoni shpirtit të kësaj përvoje, merreni parasysh të luani një himn sakramenti ndërkohë që anëtarët e klasës po përsiatin.

Shembulli i Shpëtimtarit për nënshtrimin ndaj vullnetit të Atit mund t’i ndihmojë anëtarët e klasës suaj kur t’iu nevojitet të bëjnë të njëjtën gjë. Për të filluar një diskutim, ju mund ta ftoni secilin anëtar të klasës që të tregojë për një kohë kur ia nënshtroi veten diçkaje që e dinte se Perëndia donte që ai ta bënte. Çfarë e shtyu që t’i bënte ato gjëra? Ftojeni klasën të lexojë Mateun 26:36–42 dhe të përsiatë përse Shpëtimtari ishte i gatshëm t’ia nënshtronte vullnetin e Tij vullnetit të Atit të Tij. Si do të na bekojë më së fundi nënshtrimi i vullnetit tonë ndaj Perëndisë?

Për ta shqyrtuar parimin e nënshtrimit ndaj Perëndisë, ju mund t’i kërkoni gjysmës së klasës të lexojë Mosian 3:19 dhe gjysmës tjetër të lexojë 3 Nefin 9:20. Çfarë na mësojnë këto vargje rreth asaj se çfarë do të thotë të jesh i nënshtruar ndaj Perëndisë? Si nënshtrohemi ne? Anëtarët e klasës mund të përsiatin se si mund ta nënshtrojnë vullnetin e tyre ndaj Perëndisë në javën në vazhdim. Thënia nga Plaku Nil A. Maksuell në pjesën “Burime Shtesë” gjithashtu mund t’i shtojë diskutimit tuaj.

Ne dëgjojmë shumë mësime të ungjillit në jetën tonë, por nganjëherë është tunduese të hamendësojmë se ato mësime kanë të bëjnë kryesisht me njerëz të tjerë. Një diskutim rreth Mateut 26 mund të na ndihmojë ta mposhtim këtë prirje. Për ta filluar këtë bashkëbisedim, ju mund ta ndani klasën në dyshe dhe kërkojini njërit në secilën dyshe të lexojë Mateun 26:20–22 ndërkohë që tjetri lexon vargjet 31–35. Ftojini të krahasojnë përgjigjet e dishepujve në këto dy tregime. Çfarë mësimesh mund të nxjerrim nga mënyra se si dishepujt i vunë në jetë fjalët e Shpëtimtarit për veten e tyre? Për të mësuar më shumë, shihni referimin e Presidentit Diter F. Uhtdorf te Mateu 26:21–22 në mesazhin e tij “Mos Jam Unë, Zot?” (Ensign ose Liahona, nëntor 2014, f. 56–59).

Merreni parasysh që t’i ftoni anëtarët e klasës të japin ide që i gjetën rreth Shlyerjes së Jezu Krishtit gjatë studimit të tyre vetjak ose familjar.

Mateu 26 përshkruan se çfarë ndodhi në Gjetseman, por a e kuptojnë anëtarët e klasës suaj domethënien e kësaj në jetën e tyre? Për t’i ndihmuar ata, ndoshta ju mund të shkruani në tabelë pyetje të tilla si Çfarë ndodhi në Gjetseman? dhe Përse është ai i rëndësishëm për mua? Anëtarët e klasës mund të punojnë individualisht ose në grupe të vogla që t’i gjejnë përgjigjet te Mateu 26:36–46; Alma 7:11–13 dhe Doktrina e Besëlidhje 19:16–19. Ata gjithashtu mund të gjejnë përgjigje te mesazhi i Plakut C. Skot Grou “Mrekullia e Shlyerjes” (Ensign ose Liahona, maj 2011, f. 108–110).

Në Librin e Mormonit, Jakobi e quan Shlyerjen e Jezu Krishtit “një shlyerje të pafund” (2 Nefi 9:7). Për t’i ndihmuar anëtarët e klasës të kuptojnë se çfarë do të thotë kjo, ju mund të jepni mësimet e Presidentit Rasëll M. Nelson te pjesa “Burime Shtesë” dhe t’u kërkoni anëtarëve të klasës që të renditin mënyrat se si ndikimi i flijimit të Shpëtimtarit mund të konsiderohej i pafundmë. Ata gjithashtu mund të lexojnë shkrimet e shenjta vijuese dhe të shtojnë në listën e tyre: Hebrenjve 10:10; Alma 34:10–14; Doktrina e Besëlidhje 76:24 dhe Moisiu 1:33. Si mund ta tregojmë vlerësimin tonë për atë që Shpëtimtari ka bërë për ne?