Mataio 27; Mareko 15; Luka 23; Ioane 19

Ina ia fesoasoani i le vasega ia malamalama pe faapefea i tala i le maliu ole Faaola ona faapupula mai ai Lona alofa, taumafai se gaoioiga faapea: Avatu i tagata taitasi o le vasega se fatu pepa, ma valaaulia i latou e tusi i luga o a latou fatu se fasifuaitau mai le 1 Korinito 13:4–7 e faamatala ai le alofa mama Ona fai lea i ai e sailiili le Mataio 27; Mareko 15; Luka 23; po o le Ioane 19 ma tusi i le isi itu o latou loto ni nai fuaiupu lea e faaalia ai le faatinoga e le Faaola o lona alofa lea e faamatalaina e fusifaitau na latou filifilia. Fai i ai e faasoa mai mea ua latou maua. O a ni aafiaga ua fesoasoani i tagata o le vasega e malamalama ai i le alofa o le Faaola?

Ata

pale tuitui

O le a se mea e mafai ona e fai e faamalosiau ai tagata o le vasega e faasoa mai a latou molimau i mea sa latou aoaoina i lenei vaiaso? Mafaufau e valaaulia tagata o le vasega e sue se viiga o loo faamatala mai ai mea na tutupu ia sa latou fai ai, po o o latou lagona e uiga i mafatiaga o le Faaola ma le Faasatauroga. Mafaufau e usu se tasi pe sili atu foi o nei viiga e le vasega. E mafai faapefea e le suesue e uiga i toe itula o le Faaola ona musuia i tatou e faalagolago ma mulimuli ia te Ia?

O ata e mafai ona vaai faalemafaufau ai tagata i nisi o nei mea na tutupu o loo latou faitau ai i lenei vaiaso (tagai “Punaoa Faaopoopo” mo ata fautuaina). Atonu e mafai ona e vavaeina le vasega i ni vaega ma avatu i ai se ata i vaega taitasi. E mafai e vaega ona faitau faatasi ia fuaiupu o loo faamatala mai ai mea o loo faaalia i la latou ata. E mafai ona latou talanoaina le uiga o fuaiupu ma faasoa mai pe o faapefea ona fesoasoani le ata ia i laotu e malamalama atili ai i fuaiupu. E mafai e vaega taitasi ona faasoa mai o latou manatu i le vasega. E mafai foi ona e mafaufau e faaali ia vitio“Jesus Is Condemned before Pilate” and “Jesus Is Scourged and Crucified” (LDS.org).

O le a le mafai ona e talanoaina uma auiliiliga e uiga i toe itula o le Faaola ma le vasega, ae o se gaoioiga lea e mafai ona fesoasoani ia te oe e talanoaina ai auiliiliga e sili ona aoga i tagata o loo e faiaoga ai. Valaaulia tagata taitasi o le vasega e filifili se mataupu mai le faitauga o le vaiaso lenei ma faaalu ni nai minute e autilo faatopetope ai iai, ma vaavaai mo se upu, se fasifuaitau, po o se faamatalaga o aoao ai i latou i se mea anoa e uiga i le Faaola ma Lana misiona. Tuu atu ia i latou ni avanoa e faasoa mai ai mea sa latou maua ma faamatala mai pe aisea e anoa ai ia i latou.

E ono faamalolosia ai le faatuatua o i latou e te faiaoga ai ina ia iloa sa muai ta’u mai e perofeta anamua mea e tele o le a tutupu i toe itula o le Faaola. O se tasi auala e fesoasoani ai i tagata o le vasega e toeiloilo nei valoaga ma iloa ai pe na faapefea ona faataunuuina o le avatu lea i tagata taitasi o se mau se tasi pe sili atu foi o i le “Punaoa Faaopoopo” ma fai i ai e sue ni fuaiupu i le Mataio 27 o loo faaali mai ai pe na faapefea ona faataunuuina mau. E mafai ona e faia se siata e fetaui ma valoaga ma o latou faataunuuga. E mafai ona e fautuaina e tusi e tagata o le vasega ia fuaiupu o loo i ai valoaga i a latou tusitusiga paia i autafa o le Mataio 27. O le a se mea ua tatou aoao mai i nei valoaga? E faapefea e nei valoaga ona faamalolosia lo tatou faatuatua ia Iesu Keriso?

Atonu e i ai ni tagata o le vasega o loo feagai ma mea faafeagai---e pei o le faamasinoina pe amusia---ina ua latou faamatala atu o latou talitonuga pe tofotofoina foi lo latou ola ai i lo latou faatuatuaga. Mafaufau e amata lau talanoaga i le fai atu i ni nai tagata o le vasega e faasoa mai ni aafiaga ina ua tupu lenei mea. Na faapefea ona latou tali atu? Valaaulia le vasega e faitau nisi o nei fuaiupu mai le Mataio 27; Mareko 15; Luka 23; ma le Ioane 19 e faamatala ai sauaga na feagai ma le Faaola. O a ituaiga o mea faafeagai o loo feagai nei ma le galuega a le Atua? O le a se mea o mafai ona tatou aoao mai tali a le Faaola e mafai ona fesoasoani tatou te faafetaia’ia ai mea faafeagai i o tatou taimi? O isi mau e mafai ona fesoasoani pe a tatou feagai ma mea faafeagai e aofia ai le Mataio 5:10; Roma 12:14; 2 Timoteo 3:10–12; Alema 1:19–28; ma le 3 Nifae 12:10–12. O le a se mea ua tatou aoao mai i nei fuaiupu?

Mata e fesoasoani i tagata o lau vasega le faitau o le tala i le Faaola na ole atu i le Tama e faamagalo fitafita ma ofo atu le faamoemoe i le pagota i luga o le satauro? Mafaufau e vavae le vasega i ni vaega se lua ma tofi se tasi vaega e faitau le Luka 23:34–38 (e aofia ai le fuaiupu 34, vaefaamatalaga c, lea o loo i ai malamalamaaga mai le Faaliliuga a Iosefa Samita) ma le isi vaega e faitau le Luka 23:39–43. E mafai e tagata o vaega taitasi ona talanoaina mea latou te aoaoina e uiga i le Faaola mai nei fuaiupu ona faasoa mai lea o o latou manatu i le vasega atoa. E mafai faapefea ona tatou mulimuli i le faataitaiga a le Faaola?

Ina ia fesoasoani i soo se tasi o lau vasega atonu e faigata ona faamagalo atu i isi e pei ona faia e Iesu, mafaufau e faasoa atu le saunoaga a Elder Jeffrey R. Holland i le “Punaoa Faaopoopo.”