Iosefa Samita—Mataio 1; Mataio 25; Mareko 12–13; Luka 21

O faailoga o le Afio Mai Faalua o le Faaola e ono faigata mo nisi o tagata o le vasega ona malamalama i ai. E ono fesoasoani ia i latou le galulue i vaega ma faailoa mai faailoga latou te maua i le Iosefa Samita---Mataio 1:21--37. E ono fesoasoani foi latou te malamalama atili ai i le taua o nei faailoga pe a latou faatusatusaina i faailoga o le aualatele. Aisea e taua ai faailoga o le aualatele? O le a se mea o fautuaina mai i nei mea e uiga i faailoga o le Afio Mai Faalua? E mafai foi ona e avatu i vaega taitasi ni fasipepa ua faafoliga i faailoga o le aualatele ma valaaulia i latou e tusi i luga o pepa taitasi se faailoga o le a muamua mai le Afio Mai Faalua. Tuu atu latou e faasoa mai mea sa latou maua, ma valaaulia le vasega e talanoaina faamaoniga o nei faailoga i le lalolagi i aso nei.

I le otootoga o lenei vaiaso i le Sau, Mulimuli Mai ia te Au---Mo Tagata Taitoatasi ma Aiga, sa valaaulia tagata o le vasega e sue ni fautuaga i nei fuaiupu e uiga i le ala e mafai ai ona tatou “le atuatuvale” i le taimi o mea e tutupu e tau atu i le Afio Mai Faalua (tagai foi i le saunoaga a Peresitene Thomas S. Monson i le “Punaoa Faaopoopo”). Faaali se ata o le Afio Mai Faalua (tagai The Second Coming, Tusi Ata o le Talalelei, nu. 66), ma valaaulia tagata o le vasega e faasoa mai fuaiupu sa latou matauina i a latou suesuega faaletagata lava ia. Aisea ua avea ai o se faamanuiaga le iloa o mea e tutupu e tau atu i le Afio Mai Faalua o le Faaola?

E ui ina sa poloaiina i tatou e le Faaola ia saunia e le aunoa mo Lona Afio Mai Faalua, ae e faigofie lava ona tatou aafia i le olaga i aso taitasi ae le mafaufau tele i ai. O faataoto i le Iosefa Samita—Mataio 1:26–27, 38–55 ma le Mataio 25:1–13 e mafai ona fesoasoani i tagata o le vasega ona iloa le taua o le saunia mo le Afio Mai Faalua. Valaaulia tagata o le vasega e sue faataoto nei ma faatusatusaga ma faasoa mai mea o loo aoao mai ai e uiga ile saunia mo le Afio Mai Faalua. Atonu pe tasi pe lua tagata o le vasega e mafai ona o mai saunia ma se ata fatufatu e faaalia ai se tasi o nei faataoto.

O le faataoto i taupou e toasefulu e mafai ona fesoasoani i tagata o le vasega e tomanatunatu ai i a latou tapenaga faaleagaga e faafeiloai le Faaola. Na tuu mai e Elder David A. Bednar se tasi o faaliliuga o le faataoto e ono fesoasoani (tagai “Punaoa Faaopoopo”). E mafai e tagata o le vasega ona talanoaina mea e mafai ona tatou fai i o tatou olaga i asotaitasi e liua atoatoa ai i le talalelei. Aisea e tatau ai ona tofu lagona ai i tatou le liuaina mo i tatou lava? O le a le mea ua faaopoopo e le Mataupu Faavae ma Feagaiga 45:56--67 i lo tatou malamalama i nei faataoto?

E mafai ona outou usuina faatasi ia viiga e uiga ile Afio Mai Faalua ma talanoaina ia savali o loo aoao mai ai (tagai “Punaoa Faaopoopo”).

O le faataoto i taleni ma le faataoto i le mamoe ma ‘oti e mafai ona musuia ai i tatou e mafaufau e uiga i le tala o o tatou olaga o le a tatou avatu i le Alii i le Faamasinoga Mulimuli. E mafai ona outou faitauina faatasi ia faaaoto ma valaaulia tagata taitoatasi o le vasega e faasoa mai se fesili se tasi e ono fesili atu ai le Faaola pe a tatou tuu atua se tala o o tatou olaga. Tuu atu se taimi mo tagata o le vasega e fuafua ai mea o le a latou faatinoina o uunaiga latou te maua i le taimi o le talanoaga.

Ata

mamoe ma ‘oti

Atonu e te manao e toe iloilo ma le vasega le faauigaga o le Faamasinoga Mulimuli o loo maua i le Taiala mo Tusitusiga Paia, “Judgment, The Last,” scriptures.lds.org. Ona mafai lea ona e fai i le vasega e toe iloilo nisi o mau pe o a foliga o le Faamasinoga Mulimuli, pei o le Alema 5:17--25. O a mea e musuia i tatou e nei mau e sauniuni i ai mo lena aso?

Ina ia fesoasoani i tagata o le vasega e sue le uiga patino i le faataoto i taleni (tagai Mataio 25:14–30), faasoa mai ni nai manatu pe faaaoga se gaoioiga mai le “O Le Faataoto i Taleni,” saunia e Elder Ronald A. Rasband (Ensign, Aug. 2003, 32–35).

Ina ia musuia se talanoaga e uiga ile Mataio 25:34--40, e mafai ona e valaaulia tagata o le vasega e faasoa mai ni faataitaiga o tagata o faata’ita’i maia le lotoalofa o loo faamatala mai i nei fuaiupu. Tuu atu ia i latou se taimi e manatunatu loloto ai pe o ai o ono manaomia la latou auaunaga. O a ni nai auala faatino e mafai ona tatou fafagaina ai e fiaaai, faaoofu i e ua le lavalava, ma asiasi atu i e mama’i?