Mataio 28; Mareko 16; Luka 24; Ioane 20–21

Ina ia maua e tagata e toatele le avanoa e faasoa ai mea sa latou aoaoina e uiga i le Toetu, e mafai ona e tuu atu i le vasega ni nai minute e toe iloilo ai le faitauga o lenei vaiaso ma le ”Toetu” i le Bible Dictionary ma tusi i lalo upumoni sa latou aoaoina e uiga i le Toetu. Tuu atu latou te faasoa mai mea sa latou tusia, ma fautuaina tagata o le vasega e sii mai o laotu lima pe a faalogo o faasoa mai e se tasi se upumoni e tutusa ma mea sa latou tusia. Aisea e taua ai nei upumoni ia i tatou? E faapefea ona aafia o tatou lagona e uiga i le Tama Faalelagi ma Iesu Keriso i lo tatou iloa ai o le a tatou toetutu? O le faaalia o le vitio faamusika o le “He Is Risen” (LDS.org) e mafai ona valaaulia ai le Agaga i lenei talanoaga.

Ina ia fesoasoani i tagata o le vasega e vaai i sootaga i le va o o latou aafiaga ma le aafiaga o soo i le auala i Emau, tusi se auala i luga o le laupapa, ma valaaulia le vasega e tusi ia faamatalaga o le tala i le Luka 24:13--35 i le tasi itu o le auala. ona, tusi lea i le isi itu o le auala, o mea e ogatusa ma o latou lava aafiaga o nisi e o mulimuli ia Iesu Keriso. Mo se faataitaiga, e mafai ona latou tusia Ua punitia o la’ua mata (Luka 24:16) i le isi iu o le auala ma le O nisi taimi tatou te le iloa ai tosinaga a le Alii i o tatou olaga i le isi itu.

E i ai viiga e lua e faavae i le Luka 24:13–35: “Iesu, Sei e Faatasi Mai” ma le “Afio Mai!” Viiga, nu. 93, 92. E mafai faapefea ona e faaaogaina nei viiga e fesoasoani ai i tagata o le vasega ia iloa faauigaga loloto i le tala faatusipaia?

O le poloaiga na avatu e le Faaola toetu i Ana Aposetolo e folafola Lana talalelei e mafai foi ona faatatau ia i tatou i aso nei. E mafai faapefea ona e fesoasoani i tagata o le vasega ia iloa la latou matafaioi i le folafolaina atu o le talalelei? Atonu e mafai ona e valaaulia i latou e vaai faalemafaufau faapea o loo latou tuuina atu ni fautuaga i se tagata o le aiga po o se uo e ave se misiona faatala’i. O le a se mea tatou te faasoa atu mai upu a le Faaola i Ana Aposetolo? E mafai faapefea ona tatou faaaogaina na lava upu ia tatou taumafaiga e faasoa atu le talalelei i isi?

Atonu e i ai nisi o lau vasega e manatu faapei o Toma, o le sa manao e vaai i le Alii toetu a o lei mafai ona talitonu. E mafai ona avea lau vasega o le Aoga Sa o se nofoaga e faamalolosia ai e tagata o le vasega le faatuatua o le tasi ma le isi i mea e le o mafai ona latou vaai i ai. Atonu e mafai ona e amata i le fai atu i se tasi e aotele mai le aafiaga o Toma i le Ioane 20:19--28. E mafai foi ona e faaalia le vitio “Blessed Are They That Have Not Seen, and Yet Have Believed” (LDS.org). E mafai e tagata o le vasega ona lisi i le laupapa ni nai mea ua poloaiina i tatou e le Atua e talitonu i ai e aunoa ma le vaai i ai. E mafai ona e fesili atu i ai e faasoa mai aafiaga ua faamalolosia ai a latou molimau o nei mea. O a faamanuiaga ua maua e le vasega a o latou faaaogaina le faatuatua?

O le a se mea e ono fesoasoani i tagata o le vasega e talia le valaaulia a le Faaola e “fafaga [Ana] mamoe”? E mafai ona e amata i le valaaulia o i latou e faitau le leoa le Ioane 21:15–17 ae sui le igoa o Simona i o latou lava igoa ma le “a’u tamai mamoe” ma le “a’u mamoe” i igoa o tagata latou te manatu e finagalo le Alii latou te auauna atu i ai---mo se faataitaiga, o tagata latou te asia o ni faiaoga o aiga, po o ni faiaoga asiasi, o tuaoi, po o tagata latou te iloa i le galuega po o le aoga. A mavae ni nai minute, e mafai e tagata o le vasega ona faasoa o latou lagona uunai na maua. O le a le uiga o le fafaga o tamai mamoe ma mamoe a le Faaola? O saunoaga a Peresitene Russell M. Nelson ma Elder Marvin J Ashton i le “Punaoa Faaopoopo” e mafai ona fesoasoani e tali le fesili lea.