Galuega 10–15

• Atonu e i ai ni manatu sese o nisi o tagata o le vasega e uiga i le faagasologa o le mauaina o faaaliga. Atonu e mafai ona fesoasoani ia i latou le talanoa i auala na oo mai ai faaaliga ia Peteru, ma pe faapefea ona latou agai i luma, “aua lava le masalosalo vale” (Galuega 10:20), pe a foliga e le atoatoa pe le manino ia faaaliga. Mafaufau e tusi se laina i luga o le laupapa ma tusi i le tasi o faatausiusiuga o le laina E tatau ona talai atu le talalelei i Nuuese. Ia toe faamanatu faatasi o se vasega le Galuega 10 ma le 11:1–18, ona faaopoopo lea o vaega i luga o le laina e faaalia ai le ala na faaali atu ai e le Alii ia Peteru i lea laasaga ma lea laasaga e faapea, ua oo mai le taimi e talai atu ai le talalelei i Nuuese. Mo se faataitaiga, atonu e te amata i le vaega e faailogaina “Sa vaai Konelio i se faaaliga vaaia” (Galuega 10:1–6) pe amata foi i le poloaiga a le Faaola i Ona soo e “fai nuu uma lava ma soo” i le Mataio 28:19. O le a se mea e mafai ona tatou aoaoina e uiga i faaaliga mai le aafiaga a Peteru? O a aoaoga a Nifae e uiga i le faaaliga i le 2 Nifae 28:30 ma aoaoga mai ia Elder David A. Bednar ma Elder Dallin H. Oaks i le “Punaoa Faaopoopo” e faaopoopo atu i le talanoaga?

• E mafai faapefea ona e fesoasoani i tagata o le vasega ia mafaufau loloto atili e uiga i auala latou te maua ai faaaliga? Atonu e te suesuea tulaga i mau ia sa faapea ona aoaoina ai e le Alii ia tagata i lea fuaitau i luga o lea fuaitau. E faaopoopo atu i le aafiaga a Peteru i le Galuega 10, e mafai e tagata o le vasega ona toe faamanatu ia aafiaga a Nifae (1 Nifae 18:1–3); Alema (Alema 7:8; 16:20); ma Mamona (3 Nifae 28:17, 36–40). O a isi faataitaiga e mafai ona mafaufau i ai tagata o le vasega lea na maua ai e tagata le taitaiga faaleagaga “o sina mea itiiti i i ma sina mea itiiti i o”? (2 Nifae 28:30). Aisea e filifili ai le Alii i nisi o taimi e faaali mai mea i lenei auala nai lo o le tuuina mai o tali ia i tatou i le taimi e tasi? (tagai MFF 50:40; 98:12). Atonu o le a fesoasoani se talafaatusa e pei o lenei: A faapea na fautuaina atu e se tasi e ave se vasega calculus ae e te lei aoga i le algebra po o le tomiteri (geometry). E faapefea ona e tali atu i ai? E faapefea ona fesootai lenei mea i le mamanu a le Alii mo le faaalia o le mea moni?

• O nisi taimi e i ai fesili po o atugaluga a tagata o le ekalesia e uiga i suiga i tulafono faavae ma polokalama i le Ekalesia. Atonu o le a fesoasoani ia i latou le talanoa i le auala na suia ai e le faaaliga e amata le talaiga o le talalelei i Nuuese (tagai Galuega 10) ia faatonuga na muamua atu a le Alii i Ona soo (tagai Mataio 10:1, 5–6). Mata e faapefea ona tali atu tagata o le vasega i se tagata i aso o Peteru o le sa le malie i le taitaiga a Peteru ona sa feteenai ma faiga anamua? E mafai faapefea e le faaaliga i le Galuega 10 ona fesoasoani ia tatou faalogo ma usitai i faaaliga faifaipea a le Alii e ala mai i Lana perofeta?

• Atonu e manaia le toe faamanatu faatasi o le fautuaga lea na faia i Aposetolo e pei ona faamatalaina i le Galuega 15:1–22, ma le tusi na latou tusi atu ai i le Au Paia (tagai fuaiupu 23–29). E mafai ona e faaalia atu le vitio “The Jerusalem Conference” (LDS.org). O le a le fesili sa i ai a le au soo? Na faapefea ona latou sailia se tali? O le faamatalaga a Peresitene Gordon B. Hinckley o loo i le “Punaoa Faaopoopo” e mafai ona faasusuluina atu se malamalama faaopoopo i le auala e taitai ai e le Alii Lana Ekalesia e ala i faaaliga i aposetolo ma perofeta.

• Mata o le a aoga i tagata o lau vasega se talanoaga e uiga i le uiga o le “e le faailogaina tagata e le Atua”? E mafai ona e amata i le valaaulia o le vasega e faitau ia mau o loo aoao mai, e le faailogaina tagata e le Atua, e pei o le Roma 2:1–11; 1 Nifae 17:34–40; 2 Nifae 26:32–33; Alema 5:33; Moronae 8:12; ma le Mataupu Faavae ma Feagaiga 1:34–35. Fai atu i tagata o le vasega e tusi ni faauigaga e mafai ona i ai o le “e le faailoga tagata,” e faavae i mea latou te faitauina, ona faasoa mai lea o mea na latou tusia. Atonu e manaomia ona e fesoasoani i tagata o le vasega ia malamalama o le “e le faailoga tagata” e le faauigaina faapea, e faamanuia tutusa e le Atua tagata uma e tusa lava po o a a tatou amioga. E finagalo o Ia ia talia e Ana fanau uma Lana talalelei, ae o le atoatoa o faamanuiaga o le talalelei ua faapolopoloina mo i latou o e osia ma tausia feagaiga ma Ia. E faapefea ona faaalia i mea na tutupu ma mataupu faavae o loo i le Galuega 10:34–48 e le faailogaina tagata e le Atua? E mafai faapefea ona “talia” ma “faapitoa” e amiotonu e le Atua e ui lava e le faailogaina e Ia ni tagata? (tagai Galuega 10:34–35; 1 Nifae 17:35).

• O le tala i le laveaiga o Peteru mai le falepuipui i le Galuega 12:1–17 e mafai ona fesoasoani i tagata o le vasega e atinae o latou faatuatua i le mana o le tatalo. Atonu e mafai ona sau saunia se tagata o le vasega e faasoa mai faamatalaga o lenei tala ma lana molimau i le tatalo. Pe e mafai foi ona e valaaulia se tagata se toatasi pe sili atu o le uarota po o le paranesi e faasoa mai ni aafiaga na faapea ona latou lagonaina ai pe molimauina ai le mana o tatalo tuufaatasi o le au paia. E mafai foi ona outou usuina viiga e uiga i le tatalo (e pei o le “Pe Na Faia Sau Tatalo?” Viiga nu. 75)

Sa saunoa Elder David A. Bednar i manatu nei e uiga i le mamanu o faaaliga a le Alii: “E toatele i tatou e masani ona faapea o le a tatou maua se tali po o se uunaiga i a tatou tatalo ma auganiga faatauanau. Ma e masani foi ona tatou faamoemoe o se tali po o se uunaiga faapea o le a vave oo mai ma [oo] uma mai i le taimi e tasi. O lea, tatou te matele ai i le talitonu o le a tuuina mai e le Alii ia i tatou se tali tele ma vave ma oo uma mai i le taimi e tasi. Ae peitai, o le mamanu o loo faamatala faafia mai i tusitusiga paia, o loo tau mai ai, tatou te maua i ‘lea fuaitau i luga o lea fuaitau, i lea mataupu i luga o lea mataupu,’ po o se isi faaupuga, o ni tali laiti e tele i le aluga o se periota o taimi. O le iloaina ma le malamalama i lenei mamanu o se ki taua i le mauaina o musumusuga ma le fesoasoani mai le Agaga Paia” (“Line upon Line, Precept upon Precept,” New Era, Sete. 2010, 3–4).

Ata

teineitiiti o loo faitauina tusitusiga paia

Sa tuuina mai e Elder Dallin H. Oaks le fautuaga lenei: “E tatau ona tatou suesue i mea i o tatou mafaufau, e faaaoga ai mana o le magafagafa ua tuuina e le Foafoa i totonu ia i tatou. Ona tatau lea ona tatou tatalo mo le taitaiga ma galulue i ai pe a tatou mauaina. Afai tatou te le maua le taitaiga, e tatau ona tatou galulue i luga o lo tatou faautaga sili ona lelei” (“Our Strengths Can Become Our Downfall,” Ensign, Oke. 1994, 13–14).

Sa faasoa mai e Peresitene Gordon B. Hinckley lona finagalo i le auauna ai i le aufono pulefaamalumalu o le Ekalesia:

“I le amataga o le talanoaina o se mataupu, atonu e i ai se eseesega o taofi. O se mea mautinoa lena mea. O nei tamalii e o mai mai siosiomaga eseese. O i latou o ni tamalii e mafaufau mo i latou lava. …

“… Mai i lenei ala o le faaalia e nei uso o o latou lava mafaufauga na ala mai ai le iloiloga ma le filiga o manatu ma mataupu. Peitai ou te lei vaai lava i se feeseeseaiga tele po o se feitagai o le tasi i le isi o ou Uso nei. Ae ua ou molimauina se mea matagofie ma ofoofogia—o le aumai faatasi lea, i lalo o le taitaiga a le Agaga Paia ma lalo o le mana o faaaliga, o taofi eseese seia oo lava ina i ai le autasi ma le maliliega atoatoa. Ona faatoa faia lea o se mea. Ou te molimau atu, o lena mea, o se faamaoniga a le agaga o faaaliga o faaalia mai pea lava pea i le taitaiga o le galuega lenei a le Alii” (O Le Atua o Loo i le Ao o Lenei Ekalesia,” Liahona, Iulai 1994, 54 59).