Galuega 1-5

• O le faitau e uiga i aafiaga o Aposetolo e mafai ona fesoasoani i tagata o lau vasega ia iloa ai auala e mafai ona latou maua ai le mana ma le taitaiga mai le Agaga Paia i o latou valaauga o le Ekalesia. O se tasi o auala e toe faamanatu ai aafiaga o loo i le Galuega 1–5 o le tusi i luga o le laupapa E mafai ona fesoasoani mai le Agaga Paia ia te au i lo’u valaauga e ala i le: ona valaaulia lea o tagata o le vasega e sue i le Galuega 1:1–8; 2:36–39; ma le 4:1–16, 31–33, e vaavaai mo auala e faauma ai le fuaiupu. Aisea sa manaomia ai e le Au Aposetolo le Agaga Paia?

• I le avea ai o se vasega, e mafai foi ona e suesuea auala o loo taitai ai e Iesu Keriso Lana Ekalesia i onaponei e ala mai i le Agaga Paia. Ina ia faia lenei mea, e mafai ona e faafesootaia muamua nisi o tagata o lau vasega ma fai ia i latou e toe faamanatu ia tala o loo i le Galuega 1:1–8; 2:37–39; 4:1–16, 31–33 ma o mai saunia e faasoa mai aafiaga patino e talitutusa i aafiaga o le Au Aposetolo. Mo se faataitaiga, e mafai ona latou faasoa mai i se taimi sa fesoasoani ai le Agaga Paia ia i latou e molimau atu e uiga i se mataupu faavae o le talalelei pe tali i le fesili a se tasi. O le a le mea sa latou faia e saili ai le taitaiga a le Agaga Paia?

• Atonu o le a fesoasoani i lau vasega le maitau o sui fou o le Korama a Aposetolo e Toasefululua i le Ekalesia anamua sa valaauina e ala i faaaliga, e pei lava ona valaauina ai i latou i aso nei. Mafaufau e valaaulia tagata o le vasega e faamatala pe faapefea ona filifilia e se pisinisi se tasi e suitulaga i se tofiga faatonu, e pei o le tilotilo i tulaga faaleaoaoga, potomasani, ma isi mea faapena. Fai atu ia i latou e faatusatusa lenei mea i le auala sa valaauina ai le Aposetolo o Matatia i le Galuega 1:15–26 (tagai foi 1 Samuelu 16:1–13). E faapefea ona faaopoopo atu le upusii mai ia Peresitene Gordon B. Hinckley i le “Punaoa Faaopoopo” i le malamalama o tagata o le vasega? (tagai foi Russell M. Nelson, “Lagolagoina o Perofeta,” Ensign po o le Liahona, Nov. 2014, 74-77). E faapefea e lenei malamalama ona aafia ai o tatou faatuatua i taitai ua valaauina e le Alii? Na faapefea ona e maua lau molimau e uiga i aposetolo ma perofeta o aso nei?

• E mafai faapefea ona maua e i latou o loo e aoaoina ia le mana ma le faamoemoe i upumoni faigofie sa aoaoina e Peteru ma Ioane (faatuatua ia Iesu Keriso, salamo, papatisoga, le meaalofa o le Agaga Paia, ma tumau e oo i le iuga)? O se tasi o auala o le suesueina o le taua o nei mataupu faavae ma sauniga, o nisi taimi e faatatau atu i ai o le aoaoga faavae a Keriso (tagai 2 Nifae 31). E mafai ona e aumaia i le vasega ni pepa se lima o loo i ai se savali ma tusi i le pito i luga o pepa taitasi o loo i ai se savali se tasi o vaega nei o le aoaoga faavae a Keriso: Faatuatua ia Iesu Keriso, Salamo, Papatisoga, Meaalofa o le Agaga Paia, Tumau e oo i le Iuga. Vaevae le vasega i ni vaega se lima, ma tuu atu ia tofu vaega taitasi ma se pepa o loo i ai se savali. Valaaulia ia vaega e toe faamanatu le uiga o le autu o loo i luga o a latou pepa o loo i ai se savali i le Taiala i Tusitusiga Paia po o le Talai La’u Talalelei. Ona latou toe faamanatuina lea o aoaoga a Peteru o loo i le Galuega 2:22–47; 3:13–26; ma le 4:5–12 ma tusi i luga o a latou pepa o loo i ai se savali ni faataitaiga o a latou autu na totofi atu i ai, mai tusitusiga paia. E faapefea ona fesoasoani nei mataupu faavae ma sauniga o le talalelei ia tatou maua ai faamanuiaga o le Togiola a le Faaola? O a matafaioi e faia e nei mataupu faavae ma sauniga i le ata o le faaolataga a le Tama Faalelagi?

• E mafai ona e fai atu i nisi o faifeautalai faamisiona, faifeautalai faatoa taliu mai, po o faamisiona a le uarota e faaaoga ni nai minute e faamatala ai auala na latou aoaoina ai isi e uiga i le aoaoga faavae a Keriso e faaaoga ai le lesona 3 i le Talai La’u Talalelei. Aisea ua avea ai le aoaoga faavae a Keriso ma savali autu a a tatou faifeautalai? E faapefea e se tasi ua uma ona papatisoina ma maua le meaalofa o le Agaga Paia ona faaauau ona faaaoga le aoaoga faavae a Keriso?

• A o suesue e tagata o le vasega ia tusitusiga paia i le fale ma faatasi i le vasega i vaiaso taitasi, atonu e masani ona latou lagonaina le “tuia lea o latou loto” (Galuega 2:37). Atonu e te lagona le musuia e fesoasoani ia i latou e o atu i se isi laasaga e ala i le fesili, “O le a se mea tatou te faia?” (Galuega 2:37). Faitau faatasi le Galuega 2:37–47 , valaaulia tagata o le vasega e sue ia mea sa faia e lenei vaega o tagata e 3,000 o se taunuuga o le valaaulia a Peteru. Atonu foi e mafai ona latou faasoa mai ni auala na latou galulue ai i musumusuga mai a latou suesuega o le afioga a le Atua. Ma atonu o le a e sefeina se taimi i le faaiuga o le vasega mo tagata taitoatasi e fesili ai ia i latou lava i le fesili lea, “O le a se mea ou te faia?” ona tusifaamaumau lea o o latou lagona.

Ata

O Peteru o loo tali atu ina ua uma ona sasaina [o ia]

• O le tala i le molimau atu ma le lototoa o Peteru ma Ioane e uiga ia Iesu e mafai ona musuia ai lau vasega ia le fefe i manatu o isi a o faasoa atu a latou molimau o le talalelei. O le a se mea na faagaeetia ai tagata o le vasega e uiga i le lototoa o Peteru ma Ioane i le Galuega 3; 4:1–21; ma le 5:12–42? O le a le faia i le va o le mauaina o le meaalofa o le Agaga Paia ma lo tatou mafai ona molimau atu ma le lototele? O tala o nei mataupu o loo faatinoina i vitio “Peter Preaches and Is Arrested,” “Peter and John Are Judged,” ma le “Peter and John Continue Preaching the Gospel” (LDS.org). Atonu foi o loo i ai ni aafiaga o tagata o le vasega e faasoa mai lea sa latou, po o se tasi foi latou te iloa, puipuia ai pe molimau atu ma le lototoa e uiga i le talalelei.

Sa faasoa mai e Gordon B. Hinckley le malamalamaaga manino lenei e uiga i le faagasologa o le valaauina o se Aposetolo fou: “O le taualumaga e tulaga ese lava i le ekalesia a le Alii. E leai se sailia o le tofi, leai se tauvaga mo tofiga, leai ni faatosinaga e faalauiloa ai uiga auaumama o se tasi. A faatusatusa auala a le Alii i auala a le lalolagi. O le auala a le Alii e filemu, o se auala o le toafimalie, e aunoa ma se vevesi vale po o ni totogi tupe. E aunoa ma le manatu faapito po o le faamaualuga po o le naunau. I lalo o le fuafuaga a le Alii, o i latou e i ai le tiutetauave e filifili ai tofi e faatautaia i se fesili aupito taua lea: ‘O ai o le a tofia e le Alii?’ O se iloiloga totoa ma le filemu. Ma e i ai le tele o tatalo ina ia maua le faamaoniga a le Agaga Paia ua sao le filifiliga” (“God Is at the Helm,” Ensign, Me 1994, 53).