Galuega 16–21

• Talu ai o le Galuega 16–21 o loo faamatala mai ai ni malaga faamisiona se lua a Paulo, e mafai e tagata o le vasega ona aoao mai nei mataupu i auala e molimau atu ai e uiga ia Iesu Keriso ma faasoa atu ma le mataalia Lana talalelei. Ina ia musuia le talanoaga i lenei autu, atonu e mafai ona e valaaulia ni nai tagata e o mai saunia i le vasega e faasoa mai ni malamalamaaga ua latou maua mai le Galuega 16–21 e uiga i le faasoaina atu o le talalelei. Ina ia loloto atili le talanoaga, atonu latou te faasoa mai foi ni faamatalaga mai se lauga i le konafesi aoao lata mai nei e uiga i le galuega faafaifeautalai. E mafai ona latou sueina se lauga se tasi e i latou lava, pe e mafai foi ona e fautuaina atu se tasi o savali o loo i le “Punaoa Faaopoopo.”

• O se tasi o savali iloga i nei mataupu o le matafaioi taua o le Agaga Paia i le faasoaina atu o le talalelei. Mo se faataitaiga, e mafai e tagata o le vasega ona suesue i auala na fesoasoani ai le Agaga Paia ia Paulo ma Sila i le Galuega 16:6–15. E mafai foi ona latou faitauina le 2 Nifae 33:1 ma le Mataupu Faavae ma Feagaiga 42:14 ma faasoa mai upumoni latou te tau i ai e uiga i le taua o le i ai o le Agaga pe a faasoa atu le talalelei (tagai foi i le saunoaga mai ia Elder Dallin H. Oaks i le “Punaoa Faaopoopo”). Atonu e mafai e tagata o le vasega ona fefaasoaai i aafiaga i se taimi sa taialaina ai e le Agaga Paia a latou taumafaiga e faasoa atu le talalelei. O a nisi o aafiaga sa tatou maua i le faasoaina atu o le talalelei i se tasi na tuuina e le Alii i lo tatou ala? (tagai foi Talai La’u Talalelei, 3–4).

• E mafai ona e faaaogaina aafiaga a Paulo e fesoasoani i tagata o lau vasega ia maua le lototele pe a uunaia i latou e faasoa atu a latou molimau. Mafaufau e toe faamanatu faatasi ia tala i tusitusiga paia o loo faamalata ai le molimau atu o Paulo, e pei o lona aafiaga i Maketonia (tagai Galuega 16:19–34), i Atenai (tagai Galuega 17:16–34), ma i Korinito (tagai Galuega 18:1–11). O le a se faamaoniga ua tatou maua o le lototele ma le lototoa o Paulo? O a aoaoga faavae sa aoao atu e Paulo (ma malamalama i ai) na tuuina atu ia te ia le to’a i lana savali? Aisea tatou te fefefe ai i nisi o taimi e faasoa atu le talalelei, ma e mafai faapefea ona tatou faatoilaloina lenei fefe? Atonu e mafai ona asiasi atu faifeautalai faamisiona i lau vasega ma faasoa atu ni auala ua latou maua ai le lototele e molimau atu. Ia uunaia tagata o le vasega e mafaufau i se auala e tasi e mafai ona latou mulimuli ai i le faataitaiga a Paulo ma ia atili lototele ai i le faasoaina atu o a latou molimau e uiga ia Keriso.

• I Areopako, sa aoao atu ai Paulo e uiga i le Tama Faalelagi i se vaega o tagata o e sa itiiti so latou iloa e uiga i le natura moni o le Atua. Ina ia suesue i nei aoaoga, e mafai e tagata o le vasega ona faitau le Galuega 17:24–31 ma tusi i le laupapa ia upumoni latou te maua e uiga i le Tama Faalelagi, lo tatou sootaga ma Ia, ma o tatou sootaga ma le tasi ma le isi. O a ni aafiaga e mafai ona faasoa mai e tagata o le vasega sa faapea ona latou lagona ai le moni o le faamatalaga a Paulo e faapea, e “le mamao [le Atua] ma i tatou taitoatasi”? (fuaiupu 27).

• A o outou iloiloa faatasi nei fuaiupu, ma fuafua e talanoa i le upumoni o loo aoaoina i le fuaiupu 29, “O le fanau a le Atua i tatou,” o lona uiga o le Tama Faalelagi o le tama moni lea o o tatou agaga. Ina ia fai lenei mea, e mafai ona e tusia i luga o le laupapa Ona o i tatou o fanau a le Atua ma le Ana faapea tatou te lei iloa o i tatou o fanau a le Atua. Valaaulia tagata o le vasega e fautua mai ni auala e faauma ai fuaiupu nei. Mo se faataitaiga, o le a se mea ua aoao mai ia i tatou e uiga i le Atua, e le mea moni e faapea o i tatou o fanau a le Atua? faapea le ala tatou te taulimaina ai isi? Mata e ese faapefea o tatou olaga pe ana faapea tatou te le iloa e uiga i lo tatou faia moni ma le Atua? O lenei mea e ono taitai atu ai i se talanoaga e uiga i auala e mafai ona tatou fesoasoani ai i isi ia malamalama o i latou o fanau a le Atua. E mafai ona faaopoopo atu le saunoaga mai ia Elder Dallin H. Oaks i le “Punaoa Faaopoopo” i lenei talanoaga.

• O le Galuega 19 o se vaega lelei lea e faamamafa atu ai le taua o le faamauina pe a uma ona tatou papatiso. Mafaufau e faasoa atu le saunoaga lenei mai le Perofeta o Iosefa Samita: “O le papatisoga i le vai o se afa papatisoga, ma e leai se uiga e aunoa ma le isi afa—o lona uiga, o le papatisoga a le Agaga Paia” (Aoaoga a Peresitene o le Ekalesia: Iosefa Samita, 95). O a auala ua faamaonia ai e aoaoga a Paulo o loo i le Galuega 19:1–7 le saunoaga mai ia Iosefa Samita? E mafai foi ona faamanuiaina tagata o le vasega mai le suesue i le “Holy Ghost, Baptism of” i le Taiala o Autu e aoao atili ai e uiga i faamanuiaga o le mauaina o le meaalofa o le Agaga Paia.

• Dallin H. Oaks, “Faasoaina Atu o le Talalelei Toefuataiina,” Ensign po o le Liahona, Nov. 2016, 57–60.

• David A. Bednar, “O Mai Ia Ina Matamata,” Ensign po o le Liahona, Nov. 2014, 107-10

• Neil L. Andersen, “O Se Molimau a le Atua,” Ensign po o le Liahona, Nov. 2016, 35–38.

• Mervyn B. Arnold, “I Le Laveai: E Mafai ona Tatou Faia,” Ensign po o le Liahona, Me 2016, 53–55.

• S. Gifford Nielsen, “Faanatinatiina o le Fuafuaga o le Taaloga a le Alii!” Ensign po o le Liahona, Nov. 2013, 33–35

O loo faasoa mai i le“O Le Aiga: O Se Folafolaga i le Lalolagi” upumoni e faavavau e uiga i lo tatou faia ma le Atua: “O tagata soifua uma—alii ma tamaitai—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga“ (Ensign po o le Liahona, Nov. 2010, 129).

Sa saunoa Elder Dallin H. Oaks o le Korama a Aposetolo e Toasefululua i le taua o le vaai muamua ia i tatou lava o ni fanau faaleagaga o le Atua:

“Ia faaeteete i le ala e te faafoliga i ai oe lava. Aua e te faafoligaina pe faamatalaina oe lava i ni uiga auaumama e le tumau. Na pau lava le uiga auaumama e tasi e tatau ona faamatalaina ai i tatou o le, o i tatou o se atalii po o se afafine o le Atua. O lena upumoni e faasopolia ai isi uiga faaalia uma, e aofia ai ituaiga, galuega, uiga faaletino, mamalu po o le tapuaiga e auai ai. …

“Ua i ai o tatou faitalia, ma e mafai ona tatou filifili i soo se uiga e faamatala ai i tatou. Ae e tatau ona tatou iloa, a tatou filifili loa e faamatala i tatou lava pe faailoa atu i tatou lava e ala i nisi o uiga e le tumau pe faatauvaa i tuutuuga e faavavau, ua tatou le faamamafaina le mea ua aupito taua e uiga ia i tatou, ae ua tatou ova faamamafaina le mea e matuai le taua lava. O lenei mea e mafai ona taitai ifo ai i tatou i le auala sese ma faatuai ai lo tatou alualu i luma e faavavau” (“Be Wise” [Brigham Young University–Idaho devotional, Nov. 7, 2006], byui.edu).