1 mo e 2 Tesalonika

Naʻe kamata e Tohi ʻa Paula ki he kakai Tesaloniká ʻaki ʻene fakamanatu ki he Kāingalotú e founga kuó ne vahevahe ai mo e niʻihi kehé e ongoongoleleí mo kinautolú. ʻE lava ke hoko ʻeni ko ha faingamālie lelei ki he kau mēmipa ʻo e kalasí ke nau sivisiviʻi ai e founga ʻo ʻenau feakoʻiʻakí mo e feakoʻakí. ʻE lava ke ke fakaafeʻi e kau mēmipa ʻo e kalasí ke nau lau ʻa e 1 Tesalonika 1:5–8; 2:1–13 pea kumi ʻa e ngaahi tefitoʻi moʻoni ʻoku fekauʻaki mo hono vahevahe lelei ʻo e ongoongoleleí. ʻE lava ke nau hiki ha ngaahi fehuʻi ʻo makatuʻunga ʻi he ngaahi veesi ko ʻení ʻa ia ʻe tokoni ke nau sivisiviʻi ʻaki ʻenau feinga ke akoʻi e ongoongoleleí ki he niʻihi kehé. Hangē ko ʻení, ʻe lava ke pehē ʻe ha fehuʻi ʻe taha “Ko ha sīpinga nai au ʻo e ngaahi meʻa ʻoku ou ʻiló?” (vakai, 1 Tesalonika 1:7). ʻE tokoniʻi fēfē nai kitautolu ʻe heʻetau muimui ʻi he ngaahi tefitoʻi moʻoni ʻo e potufolofola ko ʻení ke toe lelei ange ʻetau tokoni kiate kinautolu ʻoku tau akoʻí?

ʻI hono lau ʻo e 1 Tesalonika 1:5–8; 2:1–13, te ne ala fakamanatu ki he kau mēmipa ʻo e kalasí ha faiako anga faka-Kalaisi naʻá ne tākiekina lelei kinautolu “ʻo hangē ko [ha] tamai ki heʻene fānaú” (1 Tesalonika 2:11). Fakaafeʻi e kau mēmipa ʻo e kalasí kenau fekumi ʻi he ngaahi potufolofola ko ʻení ke maʻu ha ʻulungaanga ʻo e faifekau faivelengá pea fakakaukau ki ha faiako ʻoku nau ʻilo ʻokú ne maʻu ʻa e ʻulungaanga ko iá. ʻE lava ke ke kole ange ki he kau mēmipa ʻo e kalasí ke nau fai ha tohi pe faʻu ha tohi fakamoʻoni ko ha pale ki he faiako ʻoku nau fakakaukau ki aí. Poupouʻi kinautolu ke fakakau ʻi he tohí pe palé ha veesi mei he 1 Tesaloniká pea mo ha fakamatala ʻo e founga ʻoku tatau ai ʻa e faiakó mo e veesi ko iá. ʻE lava foki ke nau ongoʻi ʻoku ueʻi kinautolu ke foaki e tohí pe palé ki he tokotaha ne nau tohi fekauʻaki mo iá.

Naʻe akoʻi ʻe Paula e Kāingalotu Tesaloniká “naʻe ʻikai ui ʻa kitautolu ʻe he ʻOtuá ki he fakalielia, ka ki he māʻoniʻoni” (1 Tesalonika 4:7). Ke kamataʻi ha fealēleaʻaki fekauʻaki mo e māʻoniʻoní, ʻe lava ke hivaʻi ʻe he kalasí pe ko ha taha ʻa e “Fakatapuʻi Au” (Ngaahi Himí, fika 64). Kole ki he kau mēmipa ʻo e kalasí ke nau aleaʻi e ngaahi ʻulungaanga ʻo e māʻoniʻoni ʻoku ʻasi ʻi he himí ʻa ia ʻoku makehe kiate kinautolú. Hiki ʻi he palakipoé ʻa e Fakatapuʻi au, … , pea fakaafeʻi e kau mēmipa ʻo e kalasí ke nau kumi ha ngaahi lea pe kupuʻi lea mei he 1 Tesalonika 3:9–13; 4:1–12 ke fakakakato e sētesí. Te tau fakatupulaki fēfē e ngaahi ʻulungaanga ko ʻení?

ʻE ngali mafatukutuki ki ha niʻihi ʻa e fakaafe ke anga māʻoniʻoní. ʻE lelei kapau ʻe mahino ki he kau mēmipa ʻo e kalasí ko hono fakatupulaki ko ia ʻo e anga māʻoniʻoní, ko ha founga ia ʻoku hoko māmālie mo fie maʻu ke tau “tupulekina lahi ʻaupito” ʻi he fakalau mai ʻa e taimí (1 Tesalonika 4:10). Ke fakatātaaʻi e founga ko ʻení, ʻe lava ke ke fakaafeʻi ha mēmipa ʻo e kalasí ke fakamatala fekauʻaki mo ha talēniti pe lavameʻa naʻe fie maʻu ke ngāueʻi taʻetūkua mo taimi lōloa, hangē ko hano ngaahi ha monomono pe fakaʻaongaʻi ha meʻalea. ʻOku tatau fēfē nai ʻeni mo e feinga ke māʻoniʻoní? Fakaafeʻi e kau mēmipa ʻo e kalasí ke nau toe vakaiʻi ʻa e 1 Tesalonika 3:9–13; 4:1–12 pea vahevahe ha ngaahi fakakaukau fekauʻaki mo e lahi ʻo e ngāue ʻoku fie maʻu ke te māʻoniʻoni ai ʻi he ngaahi founga naʻe fakamatalaʻi ʻe Paulá. Ko e hā kuó ne tokoniʻi kitautolu ke tau fakalakalaka atu ki he māʻoniʻoní?

ʻE lava ke kamataʻi ʻe he ngaahi fehuʻi pehení ha fealēleaʻaki fekauʻaki mo e faleʻi ʻa Paula kau ki he ngāué: Ko e hā e ngaahi ikuʻanga ʻo e fakapikopikó? ʻOkú ke pehē ko e hā e ʻuhinga ʻa Paula ki he foʻi lea “fakalongo pē”? (1 Tesalonika 4:11; 2 Tesalonika 3:12). ʻE lava ke ke hiki ʻi he palakipoé ha ngaahi fehuʻi peheni ke fakalaulauloto ki ai e kau mēmipa ʻo e kalasí ʻi heʻenau lau ʻa e 1 Tesalonika 4:11–12 mo e 2 Tesalonika 3:7–13. Fakaafeʻi kinautolu ke nau aleaʻi tautau toko ua e ngaahi fehuʻi ko ʻení, ʻi ha fanga kiʻi kulupu iiki, pe fakakalasi. Ko e hā mo ha ngaahi veesi folofola kehe ʻoku tokoni mai ke mahino kiate kitautolu ʻa e mahuʻinga ʻo e ngāué mo e fakatuʻutāmaki ʻo e fakapikopikó? (vakai ki he ngaahi fokotuʻu ʻi he “Ngaahi Maʻuʻanga Tokoni Kehé”).

ʻE lava ke fakamālohia ʻe he mahino fekauʻaki mo e Hē Fakaʻaufuli mei he Moʻoní ʻa e fakamoʻoni ʻa e kau mēmipa hoʻo kalasí ki hono toe Fakafoki Mai e ongoongolelei ʻo Sīsū Kalaisí. ʻOku kau ʻi he fokotuʻutuʻu ki he uiké ni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ha ngaahi maʻuʻanga tokoni fekauʻaki mo e Hē mei he Moʻoní. ʻE lava ke ke fakaafeʻi ha kau mēmipa ʻe niʻihi ʻo e kalasí ke nau omi mateuteu ke vahevahe ha ngaahi fakakaukau mei heʻenau ako e ngaahi maʻuʻanga tokoni ko ʻení, pe te mou ako mo aleaʻi fakataha kinautolu ʻi he kalasí. ʻOku lahi foki mo ha ngaahi vitiō fekauʻaki mo e Hē mei he Moʻoní ʻi he “Ngaahi Maʻuʻanga Tokoni Kehé” ʻe lava ʻo tokoni atu ki hoʻomou fealēleaʻakí.

ʻE lelei ke mou aleaʻi e tala fakatātā kuo fakaʻaongaʻi ʻe he kau palōfitá ke fakamatalaʻi ʻaki ʻa e Hē mei he Moʻoní, hangē ko ha liliu kovi (vakai, 2 Tesalonika 2:3), ko ha honge (vakai, ʻAmosi 8:11–12), hū ʻa e fanga ulofi fakamālohí ki ha tākanga sipi (vakai, Ngāue 20:28–30), mo e telinga velí (vakai, 2 Tīmote 4:3–4). ʻE lava ke ke vahevahe e kalasí ke nau tauhoa pea kole ange ke nau lau ha potufolofola ʻe taha pe lahi ange (pe ha ngaahi potufolofola kehe te ke fili) pea fakamatalaʻi ʻa e meʻa ʻoku akoʻi mai ʻe he ngaahi vēsí fekauʻaki mo e Hē Fakaʻaufuli mei he Moʻoní. Ko e hā naʻe akoʻi ʻe he kau palōfitá fekauʻaki mo e Hē mei he Moʻoní pea mo e kovi ʻe hoko aí?

Ke tokoni ke ʻilo lahi ange e kau mēmipa ʻo e kalasí fekauʻaki mo e Hē Fakaʻaufuli mei he Moʻoní, fakaafeʻi kinautolu ke nau fakakaukauloto ʻoku ʻi ai hanau kaungāmeʻa ʻoku ʻikai mahino kiate ia ʻa e mahuʻinga hono toe fakafoki mai ʻo e ongoongoleleí. Tā ha saati ʻoku kōlomu ua ʻi he palakipoé pea fakahingoa ko e Ngaahi Tupuʻanga ʻo e Hē mei he Moʻoní mo e Ngaahi kovi ʻo e Hē mei he Moʻoní. Fakaafeʻi ʻa e kau mēmipa ʻo e kalasí ke nau kumi tautau toko ua pe ʻi ha fanga kiʻi kulupu iiki ʻa e konga “Ko e Hē Fakaʻaufuli mei he Moʻoní” ʻi he Malanga ʻAki ʻEku Ongoongoleleí (peesi 39–40), pea kumi e ngaahi tupuʻanga mo e kovi ʻo e Hē mei he Moʻoní ke hiki ʻi he palakipoé. Ko e hā ha ngaahi fakakaukau mei he saati ko ʻení ʻe lava ke nau fakaʻaongaʻi ke tokoni ki honau kaungāmeʻá ke mahino kiate ia ʻa e mahuʻinga hono Toe Fakafoki mai ʻo e ongoongoleleí?

ʻE ʻaonga nai ki hoʻo kalasí ha fealēleaʻaki ʻi he founga ke tau fakaʻehiʻehi ai mei he “liliu koví”? ʻE lava ke ke fakaafeʻi kinautolu ke nau kumi ʻi he 2 Tesalonika 2 pea kumi ha faleʻi te nau lava ʻo fai ki ha kaungāmeʻa ʻe tokoni kiate ia ke fakaʻehiʻehi mei he hē fakataautaha mei he moʻoní.