Eperu 7–13

• O se tasi o auala e suesue ai le mataupu lenei, o le valaaulia o tagata o le vasega e tusi i luga o le laupapa ni faamatalaga sao e uiga i le Perisitua Mekisateko (mo ni manatu, e mafai ona latou faitau “Perisitua Mekisateko” i le Faamaoni i le Faatuatua, 101–2). Ona latou suesue lea i le Eperu 7:1–22 mo fasifuaitau e lagolago ai faamatalaga o loo i luga o le laupapa. E mafai foi ona latou faaaogaina le Topical Guide po o le Guide to the Scriptures e sue ai isi mau e lagolago ai.

• I le Eperu 7:11 na fesili ai Paulo, “Pe sea le toe aoga ona faatuina o le tasi faitaulaga, e uiga faatasi ma Mekisateko, a e le taua i le uiga faatasi ma Arona?” I nisi faaupuga, aisea tatou te manaomia ai le Perisitua Mekisateko e faaopoopo atu i le Perisitua Arona? Atonu e mafai e tagata o le vasega ona vaavaai mo ni tali i le Faamaoni i le Faatuatua, “Perisitua Arona” ma le “Perisitua Mekisateko.” Atonu foi e te valaaulia i latou e mafaufau i faamanuiaga ua tatou maua ona o nei perisitua e lua, (tagai foi i le upusii mai ia Sister Sheri L. Dew i le “Punaoa Faaopoopo”). Pe na faapefea ona maua e tagata o le vasega nei faamanuiaga?

• E ui ina tatou le faia ni taulaga i manuvaefa, ae tatou te auai i sauniga i aso nei ia e faapea ona, i se auala e talitutusa lava, faasino atu ai o tatou agaga ia Keriso ma tuuina atu “ni auala faatagaina ia e mafai ai e faamanuiaga ma mana o le lagi ona tafe mai i o tatou olaga taitoatasi” (David A. Bednar, “[Faatumauina] Pea le Faamagaloina o a Outou Agasala,” Ensign po o le Liahona, Me 2016, 60). Atonu e mafai ona outou suea faatasi nisi o faamatalaga e uiga i sauniga anamua o loo faamatalaina i le Eperu 8–10 ma o latou uiga faafaailoga. Mo se faataitaiga, o le a le mea ua faatusa i ai le toto o povipoa ma oti? (tagai Eperu 9:13–14). O ai e faatusa i ai le faitaulaga sili? (tagai Eperu 9:24–26). E mafai ona fesoasoani le vitio “Sacrifice and Sacrament” (LDS.org). O faapefea ona faamanuiaina i tatou e sauniga i onaponei ma fesoasoani e faasino atu i tatou ia Iesu Keriso? O a ni mea e mafai ona ou faia ia atili anoa ai nei sauniga ma taulai atu i le Faaola?

• Ina ia fesoasoani i tagata o le vasega ia malamalama i aoaoga a Paulo e uiga i le faatuatua, e mafai ona e amata i le fai atu ia i latou e mafaufau pe faapefea ona latou faamatalaina le faatuatua i se fuaiupu se tasi. Ona, faitau lea ma talanoaina o se vasega le faauigaga na tuuina mai e Paulo i le Eperu 11:1. Ona e vaevaea lea o le vasega i ni vaega toalaiti ma totofi atu ia vaega taitasi e suesue se tasi o tagata o loo taua i le Eperu 11. E mafai e tagata o le vasega ona faaaoga ia vaefaamatalaga po o le Guide to the Scriptures e toe faamanatu ai aafiaga o le tagata i le Feagaiga Tuai, ona faasoa mai lea e se sui mai vaega taitasi i le vasega mea na maua e le vaega. Na faapefea ona faaalia e nei tagata sa latou lagonaina se “faamautinoaga o mea e faamoemoe i ai”? (Faaliliuga Iosefa Samita, Eperu 11:1 [i le Eperu 11:1, vaefaamatalaga e]). O a nisi faataitaiga o tagata faamaoni e mafai ona faasoa mai e tagata o le vasega? O le a se taimi sa tatou faaalia ai le faatuatua i folafolaga ia e lei faataunuuina?

• Atonu e manaia le fatuina o se taaloga e fesoasoani ai i tagata o le vasega e aoao e uiga i le faatuatua mai le Eperu 11. Mo se faataitaiga, e mafai ona e vaevaea le vasega i ni au se lua ma fai atu fesili e uiga i le faatuatua o loo taliina i le Eperu 11 (tagai i le “Punaoa Faaopoopo” mo ni faataitaiga). E maua le ai a le au e muamua maua se tali e lagolagoina e mau. Fai atu i tagata o le vasega e talanoa i mea ua latou aoaoina mai nei fuaiupu ua fesoasoani e latou te malamalama lelei ai i le faatuatua.

• A uma ona suesue i aoaoga a Paulo e uiga i le faatuatua i le Eperu 10:34–38; 11, faamata o le a aoga i tagata o le vasega le aoao e uiga i le faatuatua mai isi punaoa? E mafai ona e tofia mamao atu nisi tagata o le vasega e suesue i se fesili e uiga i le faatuatua e pei o lenei: O le a le faatuatua? E faapefea ona tatou atiina ae le faatuatua? O a ni auala e faamanuiaina ai i tatou pe a faaaoga o tatou faatuatua? O le a le mea e tupu pe a tatou filifili e le faaaogaina o tatou faatuatua? Ona latou faasoa atu lea o mea ua latou aoaoina i le vasega. Pe e mafai ona e valaaulia tagata o le vasega e galulue faatasi i vaega e sue ai tali. O nisi o punaoa e mafai ona latou faia e ono aofia ai le Alema 32:21–43; Eteru 12; “Faatuatua ia Iesu Keriso,” Gospel Topics, topics.lds.org; ma le Bible Dictionary, “Faith.” A uma ona faasoa mai e tagata o le vasega mea ua latou aoaoina, fai atu i ai e mafaufau po o a ni mea e mafai ona latou faia e faamalosia ai o latou faatuatua. Valaaulia nisi o i latou e faasoa mai o latou manatu.

• O le fautuaga i le Au Paia i Eperu o e sa faaosoosoina e “tuumuli” mai lo latou faatuatua e mafai ona taua i tagata o le vasega o e atonu o loo tauivi ma a latou molimau. Ina ia maua lenei fautuaga, e mafai ona faitau e tagata o le vasega le Eperu 10:34–38 ma le saunoaga a Elder Jeffrey R. Holland i le “Punaoa Faaopoopo.” Aisea e lafoai ese ai e tagata i le lalolagi i aso nei lo latou mautinoa (tagai Eperu 10:35) i le Alii ma Lana talalelei? O le a se mea e mafai ona tatou faia e atiina ae ma faatumau ai le faatuatua ma le mautinoa ia “maua le mea na folafolaina [e le Atua]”? (Eperu 10:36). E mafai ona faaopoopo atu vitio “Good Things to Come” ma le “An High Priest of Good Things to Come” (LDS.org) i le talanoaga lenei.

• O faapefea ona faauiga e le Eperu 11 le faatuatua? (tagai i le fuaiupu 1).

• O le a le mea na mafai ona fai e Apelu ona o le faatuatua? (tagai i le fuaiupu 4).

• E tusa ai ma le Eperu 11, o le a le mea e faigata ona fai e aunoa ma le faatuatua? (tagai fuaiupu 6).

• O le a le mea sa musuia ai e le faatuatua ia Aperaamo e vaai i ai ? (tagai fuaiupu 10).

• O le a le mea na faia e Isaako i lona faatuatua? (tagai fuaiupu 20).

• O le a le mea sa musuia e le faatuatua ia Mose e lafoai? (tagai fuaiupu 24--27).

Sa saunoa mai Sister Sheri L. Dew, o le sa avea ma fesoasoani i le Au Peresitene Aoao o le Aualofa: “Ua avanoa faamanuiaga o le perisitua i alii ma tamaitai amiotonu uma. E mafai ona tatou mauaina uma le Agaga Paia, maua faaaliga e patino i le tagata lava ia, ma maua faaeega paia i le malumalu, lea tatou te tulai mai ai ua ‘faaauupegaina’ i le mana. O le mana o le perisitua e faamaloloina, puipuia, ma tuipuipuia tagata amiotonu uma e faasaga i mana o le pogisa” (“It Is Not Good for Man or Woman to Be Alone,” Ensign, Nov. 2001, 13).

Na aoao mai Jeffrey R. Holland:

“Ioe e faigata—ae e te le’i auai i le Ekalesia, a’o e taumafai e auai, ma ina ua e auai. O le mea lava lena sa i ai, o le faamatalaga lea a Paulo, ae aua le solomuli ai. Aua le popole ma foi i tua . Aua ne’i aluese le talitonuga . Aua ne’i galo le faalogona sa e lagonaina muamua. Aua e te le talitonuina le aafiaga na e maua. …

“Soo se faaiuga tele lava e i ai lapataiga ma faaeteetega e tatau ona faia, ae o le taimi lava na faamalamalamaina ai, faaeteete i faaosoosoga e aloese mai i se mea lelei. Afai na sa’o ina ua e tatalo ai, ma talitonuina ma ola ai, e sa’o foi i le taimi nei. Aua le fiu pe a faateleina le mamafa. … Faafetaia’i ou masalosaloga. Faafoe ou atuatuvalega. ‘Aua le lafoai ai lo outou mautinoa.’ Ia tumau ai ma vaai i le matagofie o le olaga o matala mai mo oe” (“Cast Not Away Therefore Your Confidence,” Ensign, Mat. 2000, 6–11).