Eperu 1–6

• E mafai faapefea ona e faamalosiauina tagata o le vasega e faasoa mai ni mau anoa e uiga ia Iesu Keriso sa latou maua i a latou suesuega patino ma faaleaiga i lenei vaiaso? Mafaufau e tusi ni koluma se lima i luga o le laupapa e faatusa i mataupu muamua e lima o le Eperu. Valaaulia tagata o le vasega e tusi i le koluma talafeagai ni fasifuaitau mai nei mataupu sa faapea ona latou aoao ai e uiga ia Iesu Keriso ma le numera o le fuaiupu sa latou mauaina ai. E faapefea e le iloaina o nei mea e uiga i le Faaola ona aafia ai o tatou faatuatua ma le naunau e mulimuli ia te Ia?

• O loo faaaoga i leEperu 1–5 ni ata eseese e faamatala ai le Faaola. Atonu e mafai ona e faaaogaina nei ata e fesoasoani ai i tagata o le vasega ia faaloloto o latou malamalamaaga i Lana misiona? Mo se faataitaiga, e mafai ona e faafesootaia nisi o tagata o le vasega i ni nai aso a o lei oo i le aso o le vasega, ma fai atu ia i latou e aumai i le vasega se mea faitino e faatusa i se tasi o nei faamatalaga e uiga ia Iesu Keriso po o Lana misiona mai le Eperu 1–5 (tagai faapitoa i le Eperu 1:3; 2:10; 3:1, 6; 5:9). E mafai ona latou faamatala atu i le vasega mea e aoao mai e a latou mea faitino e uiga ia Iesu Keriso ma faitau ia fuaiupu e faatatau i ai mai le Eperu. E faapefea e le iloaina o nei upumoni e uiga i le Faaola ona aafia ai o tatou olaga?

• Atonu o i ai ni tagata o lau vasega o e o loo pagatia i tofotofoga ma lagona ai i nisi o taimi le tuulafoaiina ma le leai o se faamoemoe. Atonu o le talanoaina o le Eperu 2:9–18; 4:12–16; 5:7–8 e mafai ona atinae ai o latou faatuatua, e mafai ona latou liliu atu i le Tama Faalelagi ma le Faaola mo se fesoasoani. O se tasi o auala e amata ai se talanoaga faapena, o le valaaulia lea o tagata o le vasega e mafaufau e uiga i se tagata latou te iloa o loo puapuagatia ma atonu ua leai se faamoemoe. O a ni upumoni latou te maua i nei fuaiupu e mafai ona latou faasoa atu i lena tagata? E mafai foi e tagata o le vasega ona faasoa mai auala ua faamafanafanaina ma lagolagoina ai i latou e le Faaola. Mafaufau e faasoa atu le upusii mai ia Peresitene Ioane Teila i le “Punaoa Faaopoopo” o se vaega o le talanoaga.

• O le Eperu 2:9–18; 4:12–16 e mafai foi ona fesoasoani i tagata o e matauina puapuaga o le lalolagi ma mafaufau ai pe o silafia pe popole foi i ai le Atua. Atonu e mafai e tagata o le vasega ona sailiili i nei fuaiupu e sue ai ni upumoni o le a fesoasoani i fesili faapena. O le a se mea o latou aoao mai e uiga i le ala e tali mai ai le Faaola i puapuaga o tagata? Atonu foi e fesoasoani le valaaulia o tagata o le vasega e faasoa mai ni faataitaiga mai tusitusiga paia o ni tulaga sa lagolagoina ai tagata e Iesu Keriso i o latou puapuaga (tagai “Punaoa Faaopoopo”) pe faaali le vitio “Mountains to Climb” (LDS.org). Ia talanoa faatasi i mea ua tatou aoaoina e uiga i le ala e mafai ai e le Faaola ona fesoasoani ia i tatou pe a tatou feagai ma luitau faigata.

• O leEperu 3 ma le 4 o loo i ai se augani i le Au Paia ina ia le faamaaaina o latou loto ma faapea ai ona teena faamanuiaga sa finagalo le Atua e avatu ia i latou. A o outou faitau ma lau vasega i le Eperu 3:7–4:2, ia talanoa i auala e mafai ona faatatau ai aafiaga a Isaraelu anamua ia i tatou i aso nei, e pei foi ona faatatau ia Eperu i le Ekalesia anamua (mafaufau e tagai atu i anomea e suesue ai e uiga i nei fuaiupu i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga). O a ni mea e mafua ai ona faamaaa loto o tagata i o tatou taimi? O a ni mea e mafai ona tatou faia e faatumau ai le malu o o tatou loto ma talivave atu ma le mautinoa i le finagalo o le Alii? (tagai Eteru 4:15; Alema 5:14–15).

• E le o tagata uma o lau vasega o ni tagata ua umia le perisitua, ae o le savali mai le Eperu 5 e faatatau i e umia le perisitua ua valaauina e le Atua, e faatatau foi i tagata uma o e maua valaauga o le Ekalesia. Ina ia fesoasoani i lau vasega ia iloa le uiga o le “ia valaauina e le Atua e pei o Arona foi,” mafaufau e valaaulia i latou e toe faamanatu le tala i le mauaina e Arona o lona valaauga i le Esoto 4:10–16, 27–31; 28:1. O a ni malamalamaaga manino mai lenei tala e fesoasoani tatou te malamalama ai i le Eperu 5:1–5? O le a se taimi na maua ai e tagata o le vasega, e aofia ai taitai o le uarota, le faamaoniga faapea, sa valaauina se tagata e le Atua e faataunuu se valaauga faapitoa? Na faapefea ona fesoasoani lena faamaoniga ia i latou e lagolago lelei ai se tagata i o latou valaauga? (Atonu e te manao e fai atu i tagata o le vasega e aua le faailoaina mai ni faamatalaga maaleale.) Atonu foi e i ai tagata o le vasega o e e mafai ona molimau mai sa musuia i latou e le Atua a o faataunuuina o latou lava valaauga.

Na aoao mai Peresitene Ioane Teila: “O le mea lava e tatau ai a o i ai le Faaola i le fogaeleele, ‘ona faaosoosoina o ia i mea uma pei o i tatou,’ ma ‘tiga alofa faatasi ma i tatou i o tatou vaivaiga,’ [tagai Eperu 4:15] ia malamalama i vaivaiga ma malosiaga; o atoatoaga ma le le atoatoa o le pauu o tagata; ma faataunuuina le mea na ia afio mai i le lalolagi e fai, ma tauivi ai ma le faafiaamiotonu, o le fai mea pi’opi’o, o le vaivai, ma le valea o le tagata— o lona fetaiai ma faaosoosoga ma tofotofoga i soo se ituaiga, ma faatoilaloina, ua avea ai o ia ma ‘Se faitaulaga sili faamaoni’ [tagai Eperu 2:17] e fautua mo i tatou i le malo e faavavau o lona Tama. Na te silafia ona fuafaatatau, ma tuu le tau sa’o i le tagata, aua sa iai o ia i lea lava tulaga e pei o i tatou, ua ia silafia le ala e tauaveina ai o tatou vaivaiga ma faaletonu, ma e mafai ona malamalama atoatoa i le loloto, mamana, ma le malosi o puapuaga ma tofotofoga e fetaiai ma tagata i lenei lalolagi, ma o lea, ona o lona malamalama ma le poto masani ua i ai, e mafai ai ona ia onosa’ia e le gata o se tama, ae o se uso matua foi” (Aoaoga a Peresitene o le Ekalesia: Ioane Teila [2001], 204–5).

• Ioane 8:1–11: Sa faamafanafanaina e le Alii le fafine sa moliai le mulilua.

• Ioane 11:1–46: Sa faamafanafanaina e le Alii ia Maria ma Mareta ina ua maliu lo laua tuagane o Lasalo.

• Enosa 1:4–6: Sa faamagalo e le Alii agasala a Enosa ma aveese lona tausalaina.

• Mosaea 21:5–15: Sa faamaluluina e le Alii loto o sa Lamana ina ia latou faamamaina avega o le nuu o Limae.

• Mosaea 24:14–15: Sa faamama e le Alii avega o le nuu o Alema.

• Eteru 12:23–29: Sa faamafanafanaina Moronae i fetalaiga a le Alii.

• 3 Nifae 17:6–7: Sa faamaloloina e le Faaola ia sa Nifae i mea sa latou vaivai ai.

• Mataupu Faavae ma Feagaiga 121:7–10: Sa faamafanafanaina e le Alii ia Iosefa Samita (tagai foi MFF 123:17).