Ko ha Pōpoaki mei he Kau Palesitenisī ʻUluakí

Siʻi Tuofāfine:

Kuo mau tuʻutuʻuni ke teuteuʻi ʻa e tohi Ngaahi ʻOfefine ʻi Hoku Puleʻangá: Ko e Hisitōlia ʻo e Ngāue ʻa e Fineʻofá, ke fakahaaʻi ʻaki ʻemau houngaʻia koeʻuhí ko e tāpuaki ʻoku fai ʻe he Fineʻofá ki he moʻui ʻa e kāingalotu ʻo e Siasí. ʻOku mau lotua ʻe hoko ʻa e tohí ni ko ha tāpuaki kiate koe pea mo ha niʻihi kuo ongo hoʻo tokoni ki heʻenau moʻuí.

ʻOku mau fakahaaʻi atu homau ʻofa mo e tanganeʻia ʻiate kimoutolu pea ʻoku mau ʻiloʻi ko e ngaahi ʻofefine ʻofeina kimoutolu ʻo e Tamai Hēvaní pea mo ha kau ākonga mateaki ʻo e ʻEiki ko Sīsū Kalaisí. ʻOku mou kau atu ki he feohi fakatokoua maʻongoʻonga ko ʻeni ʻi he funga ʻo e māmaní. ʻOku tataki kimoutolu ʻe hoʻomou motó, “ʻOku ʻikai fakaʻau ʻo ngata ʻa e ʻofá,” ke mou tokoni ke fakamālohia ʻa e ngaahi fāmilí mo langa hake ʻa e puleʻanga ʻo e ʻOtuá ʻi he māmaní.

ʻOku mau poupouʻi kimoutolu ke mou ako ʻa e tohí ni pea tuku ke hanga ʻe hono ngaahi moʻoni taʻefakangatangatá mo e ngaahi sīpinga fakalaumālié ʻo tākiekina hoʻomou moʻuí.

ʻOku mau fakamoʻoni kuo toe fakafoki mai ʻe he ʻEikí ʻa e kakato ʻo e ongoongoleleí ʻo fakafou ʻi he Palōfita ko Siosefa Sāmitá pea ko e Fineʻofá ko ha konga mahuʻinga ia ʻo e toe fakafoki mai ko iá. ʻOku ʻi ai ha tukufakaholo nāunauʻia ʻo e houʻeiki fafine ʻi he Fineʻofá. ʻOku mau lotua ʻe hoko ʻa e tohí ni ko ha maʻuʻanga tokoni mahuʻinga ki hono paotoloaki e tukufakaholo ko iá.